តទៅនេះ គឺជាបទវិចារណកថាដែលឆ្លុះបញ្ចាំងអំពីទស្សនៈរបស់រដ្ឋាភិបាលសហរដ្ឋអាមេរិក
នៅក្នុងប្រទេសអ៊ូហ្គាន់ដា លោកប្រធានាធិបតី Yoweri Museveni អាយុ ៧៦ ឆ្នាំ ដែលបានកាន់តំណែងតាំងពីឆ្នាំ ១៩៨៦ មក បានឈ្នះម្ដងទៀតនៅក្នុងការបោះឆ្នោតកាលពីថ្ងៃទី ១៤ ខែមករា កន្លងទៅនេះ។
ទោះជាយ៉ាងនេះក្ដី សហរដ្ឋអាមេរិកបានបញ្ជាក់ថា ដំណើរការបោះឆ្នោតនេះ មានលក្ខណៈមិនសេរីនិងមិនយុត្តិធម៌ និងបានសន្យាចាត់វិធានការប្រឆាំងនឹងអ្នកទទួលខុសត្រូវចំពោះអំពើហិង្សាទាក់ទិននឹងការបោះឆ្នោត ឬអ្នកដែលទទួលខុសត្រូវចំពោះការបំផ្លាញលទ្ធិប្រជាធិបតេយ្យ។
រដ្ឋមន្ត្រីការបរទេសសហរដ្ឋអាមេរិកលោក Antony Blinken បានបញ្ជាក់នៅក្នុងសេចក្ដីថ្លែងការណ៍មួយកាលពីថ្ងៃទី ១៦ ខែមេសាកន្លងទៅនេះថា ទង្វើរបស់រដ្ឋាភិបាលអ៊ូហ្គាន់ដា «តំណាងឲ្យគន្លងធ្លាក់ចុះជាបន្តសម្រាប់លទ្ធិប្រជាធិបតេយ្យនិងការគោរពសិទ្ធិមនុស្សដែលត្រូវបានទទួលស្គាល់និងការពារដោយរដ្ឋធម្មនុញ្ញរបស់ប្រទេសអ៊ូហ្គាន់ដា»។
លោក Blinken បាននិយាយដូច្នេះថា៖ «បេក្ខជនគណបក្សប្រឆាំងតែងតែត្រូវបានយាយី ចាប់ខ្លួន និងដាក់ឃុំខុសច្បាប់ដោយគ្មានការចោទប្រកាន់។ កងកម្លាំងសន្តិសុខអ៊ូហ្គាន់ដាជាអ្នកទទួលខុសត្រូវចំពោះការស្លាប់និងការរងរបួសរបស់មនុស្សស្លូតត្រង់និងអ្នកគាំទ្រគណបក្សប្រឆាំងរាប់សិបនាក់ ក៏ដូចជាចំពោះអំពើហិង្សាប្រឆាំងនឹងអ្នកកាសែតដែលបានកើតឡើងនៅមុន ក្នុងអំឡុងពេល និងក្រោយពេលបោះឆ្នោតផងដែរ»។
លោក Blinken បានបន្តថា៖ «អង្គការសង្គមស៊ីវិលនិងសកម្មជននានាដែលធ្វើការដើម្បីគាំទ្រដល់ស្ថាប័នបោះឆ្នោតនិងដំណើរការបោះឆ្នោតដែលមានតម្លាភាព ត្រូវបានយាយី គំរាមកំហែង ចាប់ខ្លួន បញ្ជូនចេញ និងចោទប្រកាន់តាមផ្លូវច្បាប់ដោយមិនសមហេតុផល ក៏ដូចជាត្រូវបានរារាំងលទ្ធភាពនៅក្នុងការប្រើគណនីធនាគាររបស់ពួកគេផងដែរ»។
លោក Blinken បានបន្ថែមថា៖ «រដ្ឋាភិបាលអ៊ូហ្គាន់ដាបានដាក់កំហិតចំពោះការទទួលស្គាល់ជាផ្លូវការនូវអ្នកសង្កេតការណ៍បោះឆ្នោតទាំងក្នុងប្រទេសនិងអន្តរជាតិ និងសង្គមស៊ីវិល ប៉ុន្តែសម្រាប់អ្នកដែលអាចសង្កេតការណ៍ដំណើរការបោះឆ្នោតនេះបាន បានកត់សម្គាល់ឃើញនូវភាពមិនប្រក្រតីជាច្រើននៅមុន ក្នុងអំឡុងពេល និងក្រោយពេលបោះឆ្នោត។ ភាពមិនប្រក្រតីនេះបានបំផ្លាញដល់ភាពដែលអាចជឿទុកចិត្តបានរបស់ការបោះឆ្នោត»។
បន្ទាប់មក លោក Blinken បានប្រកាសថា សហរដ្ឋអាមេរិកនឹងដាក់កំហិតទិដ្ឋាការលើអ្នកណាដែលខ្លួនជឿថាជាអ្នកទទួលខុសត្រូវចំពោះការបំផ្លាញដំណើរការប្រជាធិបតេយ្យនៅក្នុងប្រទេសអ៊ូហ្គាន់ដា ដែលក្នុងនោះរួមមានទាំងក្នុងអំឡុងពេលនៃការបោះឆ្នោត និងក្នុងអំឡុពេលឈានទៅដល់ការបោះឆ្នោតផងដែរ។
ករណីនេះមានន័យថា បុគ្គលដែលរងការដាក់ទណ្ឌកម្មទាំងនេះមិនមានសិទ្ធិចូលមកក្នុងសហរដ្ឋអាមេរិកនោះទេ។ ការដាក់កំហិតទាំងនេះក៏ប្រហែលជាអាចសំដៅផងដែរដល់ក្រុមគ្រួសាររបស់អ្នកទាំងនោះ។
លោករដ្ឋមន្ត្រី Blinken បាននិយាយថា៖ «រដ្ឋាភិបាលអ៊ូហ្គាន់ដាត្រូវតែកែលម្អប្រវត្តិរបស់ខ្លួនឲ្យបានប្រសើរឡើងវិញ និងឲ្យអ្នកដែលធ្វើឲ្យការបោះឆ្នោតមានបញ្ហា និងដែលបង្កអំពើហិង្សានិងការគំរាមកំហែង ឲ្យទទួលខុសត្រូវចំពោះមុខច្បាប់»។
លោក Blinken បានបន្ថែមថា សហរដ្ឋអាមេរិកប្រហែលជាចាត់វិធានការបន្ថែមប្រឆាំងនឹងបុគ្គលដែលទទួលខុសត្រូវនៅក្នុងការបំផ្លាញលទ្ធិប្រជាធិបតេយ្យនិងសិទ្ធិមនុស្សនៅក្នុងប្រទសអ៊ូហ្គាន់ដា ក៏ដូចជាសមាជិកផ្ទាល់នៃក្រុមគ្រួសាររបស់ពួកគេផងដែរ។
មុនការបោះឆ្នោត មន្ត្រីសហរដ្ឋអាមេរិកបានបញ្ជាក់យ៉ាងច្បាស់ថា សហរដ្ឋអាមេរិកមិនគាំទ្របេក្ខជនណាម្នាក់នោះទេ ប៉ុន្តែគាំទ្រដំណើរការប្រជាធិបតេយ្យដោយសេរីនិងយុត្តិធម៌។ ជាអកុសល ដំណើរការនោះដែលធ្វើឡើងក្រោមការទទួលខុសត្រូវរបស់រដ្ឋាភិបាលអ៊ូហ្គាន់ដាមិនបានជោគជ័យដូចការរំពឹងទុកនោះទេ។
ទោះជាយ៉ាងនេះក្ដី «សហរដ្ឋអាមេរិកក៏បានសង្កត់ធ្ងន់ផងដែរថា សហរដ្ឋអាមេរិកគាំទ្រខ្លាំងក្លាចំពោះប្រជាពលរដ្ឋអ៊ូហ្គាន់ដា ហើយសហរដ្ឋអាមេរិកនៅតែប្ដេជ្ញាធ្វើការរួមគ្នាដើម្បីធ្វើឲ្យប្រសើរឡើងនូវលទ្ធិប្រជាធិបតេយ្យនិងវិបុលភាពទៅវិញទៅមកសម្រាប់ប្រទេសយើងទាំងពីរ»៕