តទៅនេះ គឺជាបទវិចារណកថាដែលឆ្លុះបញ្ចាំងពីទស្សនៈរបស់រដ្ឋាភិបាលសហរដ្ឋអាមេរិក
អ្នកនាំពាក្យសេតវិមានអ្នកស្រី Jen Psaki បាននិយាយថា «រដ្ឋបាលលោក Biden នឹងមិនបញ្ជូនមន្រ្តីការទូត ឬអ្នកតំណាងជាផ្លូវការទៅចូលរួមក្នុងព្រឹត្តិការណ៍កីឡាអូឡាំពិករដូវរងារ និងកីឡាប៉ារ៉ាឡាំពិក(កីឡាជនពិការ)នៅទីក្រុងប៉េកាំងឆ្នាំ២០២២ទេ ដោយសារតែការបន្តប្រព្រឹត្តនូវអំពើប្រល័យពូជសាសន៍ និងឧក្រិដ្ឋកម្មប្រឆាំងមនុស្សជាតិនៅតំបន់ស៊ីនជាំង (Xinjiang) និងការរំលោភសិទ្ធិមនុស្សផ្សេងទៀត(របស់សាធារណរដ្ឋប្រជាមានិតចិន)»។ អ្នកស្រី Jen Psaki បាននិយាយទៀតថា ក៏ប៉ុន្តែ ទោះបីជាយ៉ាងនេះក្តី អត្តពលិកអាមេរិក នឹងចូលរួមក្នុងការប្រកួតកីឡាអូឡាំពិករដូវរងារនេះ។ អ្នកស្រី Jen Psaki ថា៖ «ក្រុមកីឡាករ Team USA នឹងទទួលការគាំទ្ររបស់យើងយ៉ាងពេញទំហឹង»។
អ្នកស្រីបានពន្យល់ថា៖ «មន្រ្តីការទូតសហរដ្ឋអាមេរិក ឬអ្នកតំណាងផ្លូវការ នឹងចូលរួមការប្រកួតកីឡា[អូឡាំពិក និងប៉ារ៉ាឡាំពិក]ទាំងនេះ ដូចជាការប្រកួតធម្មតា ទោះបីជាសាធារណរដ្ឋប្រជាមានិតចិនបានរំលោភសិទ្ធិមនុស្ស និងប្រព្រឹត្តអំពើឃោរឃៅយ៉ាងធ្ងន់ធ្ងរនៅក្នុងតំបន់ Xinjiang ក៏ដោយ។ ប៉ុន្តែយើង មិនអាចធ្វើអ៊ីចឹងបានទេ»។
តំបន់ Xinjiang គឺជាជម្រករបស់ជនជាតិភាគតិច Uyghurs ប្រហែល១៤លាននាក់ដែលភាគច្រើនជាអ្នកកាន់សាសនាអ៊ិស្លាម និងជនជាតិភាគតិច និងក្រុមអ្នកកាន់សាសនាផ្សេងទៀតដែលនិយាយភាសាតួកគី។ របាយការណ៍សិទ្ធិមនុស្សថ្មីបំផុតរបស់ក្រសួងការបរទេសអាមេរិកបានឲ្យដឹងថា អំពើប្រល័យពូជសាសន៍ និងឧក្រិដ្ឋកម្មប្រឆាំងមនុស្សជាតិ កំពុងបន្តកើតមានឡើងទៅលើជនជាតិភាគតិច Uyghurs និងសមាជិកនៃក្រុមជនជាតិភាគតិច និងក្រុមអ្នកកាន់សាសនាផ្សេងទៀតនៅក្នុងតំបន់ Xinjiang។ ឧក្រិដ្ឋកម្មទាំងនេះរួមមាន ការចាប់ដាក់ពន្ធនាគារតាមអំពើចិត្ត ឬការដកហូតសិទ្ធិសេរីភាពផ្នែករាងកាយរបស់ជនស៊ីវិលជាងមួយលាននាក់។ ការក្រៀវដោយបង្ខំ ការរំលូតកូនដោយបង្ខំ និងការអនុវត្តកាន់តែតឹងរ៉ឹងនូវគោលនយោបាយរបស់ប្រទេសចិនក្នុងការត្រួតពិនិត្យការបង្កកំណើត ការរំលោភ ការធ្វើទារុណកម្ម ពលកម្មដោយបង្ខំ និងការដាក់កំហិតយ៉ាងខ្លាំងទៅលើសេរីភាពខាងសាសនា ឬជំនឿ និងសេរីភាពនៃការធ្វើចលនា។
ជនជាតិភាគតិច Uyghurs ជាងមួយលាននាក់ និងសមាជិកផ្សេងទៀតនៃក្រុមជនជាតិភាគតិចដែលភាគច្រើនកាន់សាសនាអ៊ិស្លាម ស្ថិតនៅក្នុងជំរុំឃុំឃាំងក្រៅប្រព័ន្ធយុត្តិធម៌ ហើយមនុស្សពីរលាននាក់ទៀត ត្រូវទទួលរងនូវអ្វីដែលគេហៅថា ការបណ្តុះបណ្តាល«ការអប់រំឡើងវិញ»។
លោកប្រធានាធិបតី Joe Biden បានបញ្ជាក់យ៉ាងច្បាស់ទៅកាន់ប្រធានាធិបតីចិនលោក Xi Jinping ថា សហរដ្ឋអាមេរិក មានការប្តេជ្ញាចិត្តជាមូលដ្ឋានក្នុងការលើកកម្ពស់សិទ្ធិមនុស្សនៅក្នុងប្រទេសចិន និងប្រទេសផ្សេងៗទៀត។ អ្នកនាំពាក្យសេតវិមានអ្នកស្រី Psaki បានប្រកាសថា «ការមិនបញ្ជូនគណៈប្រតិភូការទូត [ទៅចូលរួមក្នុងព្រឹត្តិការណ៍កីឡាអូឡាំពិក និងប៉ារ៉ាឡាំពិកក្នុងទីក្រុងប៉េកាំង]នេះ គឺជាការបញ្ជាក់អំពីសារនោះ»៕