ພາຍຫຼັງຈາກການເຂັ່ນຂ້າທີ່ໄດ້ກະທຳຕໍ່ອິສຣາແອລໂດຍກຸ່ມຮາມາສນັ້ນ ລັດຖະມົນຕີການຕ່າງປະເທດ ແອນໂທນີ ບລິງເກັນ ໄດ້ເດີນທາງໄປຍັງຕາເວັນອອກກາງ. ທ່ານໄດ້ເລີ້ມການເດີນທາງຂອງທ່ານຢູ່ໃນອິສຣາແອລ ແລະຕໍ່ຈາກນັ້ນ ເດີນທາງໄປຈໍແດນ, ບາຫ໌ເຣນ, ກາຕ້າ, ສະຫະລັດອາຣັບເອເມີເຣັສ, ຊາອຸດີອາຣາເບຍ ແລະອີຈິບ.
“ພວກເຮົາມາດ້ວຍວັດຖຸປະສົງສີ່ປະການ” ທ່ານໄດ້ກ່າວ.
ທ່ານເວົ້າວ່າ “ເພື່ອເຮັດໃຫ້ເປັນທີ່ຈະແຈ້ງວ່າ ສະຫະລັດ ຢືນຢູ່ກັບອິສຣາແອລ; ເພື່ອສະກັດກັ້ນບໍ່ໃຫ້ບັນຫາຂັດແຍ້ງແຜ່ລາມອອກໄປແຫ່ງອືນໆ; ເພື່ອເຮັດວຽກກ່ຽວກັບການປ່ອຍພວກໂຕປະກັນ, ລວມທັງພົນລະເມືອງຂອງອາເມຣິກາ; ແລະ ເພື່ອແກ້ໄຂວິກິດການດ້ານມະນຸດສະທຳ ທີ່ມີຢູ່ໃນເຂດແຫຼມກາຊາ.”
“ມີສອງວິໄສທັດທີ່ຕ່າງກັນສຳລັບອະນາຄົດ ແລະສິ່ງທີ່ຕາເວັນອອກກາງ ສາມາດ ແລະຄວນເປັນ” ທ່ານລັດຖະມົນຕີ ບລິງເກັນ ກ່າວ.
ທ່ານເວົ້າວ່າ “ມີວິໄສທັດທີ່ພວກເຮົາຮັບຮອງເອົາຢ່າງແຂງຂັນຫຼາຍ ທີ່ວ່າປະເທດທັງຫຼາຍຢູ່ໃນພາກພື້ນ ໃຫ້ມີຄວາມສຳພັນເປັນປົກກະຕິນຳກັນ, ຮ່ວມກັນເປັນກຸ່ມ, ເຮັດວຽກຮ່ວມກັນໂດຍມີວັດຖຸປະສົງອັນດຽວກັນ, ແລະຢຶດຖື ແລະຍົກສູູງສິດທິ ແລະຄວາມປາຖະໜາຂອງປະຊາຊົນຊາວປາແລັສໄຕນ໌.”
“ມີອີກວິໄສທັດນຶ່ງ ທີ່ກຸ່ມຮາມາສ ໄດ້ສາທິດໃຫ້ເຫັນໃນທາງທີ່ໂຫດຮ້າຍທີ່ສຸດ, ແລະອັນນັ້ນ ແມ່ນວິໄສທັດແຫ່ງຄວາມຕາຍ, ແຫ່ງຄວາມພັງພິນາດ, ແຫ່ງການທຳລາຍລ້າງ, ແຫ່ງການກໍ່ການຮ້າຍ” ທ່ານລັດຖະມົນຕີ ບລິງເກັນ ກ່າວ.
ທ່ານເວົ້າວ່າ “ອັນນັ້ນເປັນວິໄສທັດທີ່ບໍ່ເຮັດຫຍັງເລີຍທີ່ຈະສ້າງຄວາມກ້າວໜ້າແກ່ຄວາມປາຖະໜາສຳລັບຊາວປາແລັສໄຕນ໌, ທີ່ບໍ່ເຮັດຫຍັງເລີຍທີ່ຈະຊ່ອຍສ້າງອະນາຄົດທີ່ດີກວ່າເກົ່າສຳລັບປະຊາຊົນຢູ່ໃນພາກພື້ນ, ແລະເຮັດທຸກສິ່ງທຸກຢ່າງທີ່ຈະນຳເອົາຄວາມມືດມົນທັງມວນແກ່ທຸກຄົນທີ່ມັນຈະສາມາດກະທົບໄດ້..........ແລະຂ້າພະເຈົ້າບໍ່ມີຂໍ້ສົງໄສເລີຍວ່າ ເສັ້ນທາງອັນໃດ ທີ່ປະຊາຊົນສ່ວນໃຫຍ່ຢ່າງຖ້ວມລົ້ນຢູ່ໃນຂົງເຂດນີ້ ຈະເລືອກເອົາ ແລະ ຢາກຈະເອົາ ຖ້າຫາກໄດ້ມີໂອກາດທີ່ຈະເລືອກ.”
ທ່ານລັດຖະມົນຕີບລິງເກັນ ໄດ້ກ່າວວ່າ “ພວກພົນລະເຮືອນບໍ່ຄວນໄດ້ຮັບຄວາມທຸກຍາກລຳບາກຍ້ອນຄວາມໂຫດຮ້າຍຂອງພວກຮາມາສ. ບັດນີ້ພວກເຮົາໄດ້ພົວພັນຢ່າງຫ້າວຫັນແທ້ໆກັບບັນດາປະເທດທັງຫຼາຍໃນພາກພື້ນ, ກັບອົງການສະຫະປະຊາຊາດ, ກັບອິສຣາແອລ, ເພື່ອເຮັດໃຫ້ໝັ້ນໃຈ, ເພື່ອຄວາມອາດສາມາດທີ່ດີທີ່ສຸດຂອງພວກເຮົາ, ທີ່ວ່າ ປະຊາຊົນສາມາດອອກໄປຈາກໄພອັນຕະລາຍໄດ້ ແລະວ່າ ການຊ່ອຍເຫຼືອທີ່ພວກເຂົາຕ້ອງການ ຄື ອາຫານ ນ້ຳສະອາດ, ຢຸກຢາ ສາມາດເຂົ້າໄປເຖິງ.” ເພື່ອທີ່ຈະເຮັດດັ່ງນັ້ນໄດ້ ເຂດຣາຟາ, ທີ່ຢູ່ຈຸດໃຕ້ສຸດຂອງທາງອອກຈາກແຫຼມກາຊາ ທີ່ເຂົ້າໄປໃນແຫຼມຊາຍນາຍຂອງອີຈິບ “ຈະຖືກເປີດຄືນໃໝ່” ທ່ານລັດຖະມົນຕີບລິງເກັນ ກ່າວ.
ທ່ານກ່າວຕກໍ່ໄປວ່າ “ອັນນີ້ເປັນເວລາທີ່ຍາກລຳບາກ ແລະທ້າທາຍ, ແຕ່ກໍຍັງມີຄວາມມຸ້ງໝັ້ນ....ເພື່ອຜ່ານຜ່າມັນໄປໄດ້, ແລະເພື່ອເຮັດອັນນັ້ນຮ່ວມກັນ.”