ບົດບັນນາທິການ ທີ່ສະທ້ອນເຖິງນະໂຍບາຍ ຂອງລັດຖະບານສະຫະລັດ
ສະຫະລັດຂະຫຍາຍມາດຕະການລົງໂທດທາງດ້ານເສດຖະກິດຕໍ່ປະເທດຣັດເຊຍ ເພື່ອເປັນການຕອບໂຕ້ ຕໍ່ການບຸກລຸກເຂົ້າໄປໃນປະເທດຢູເຄຣນ. ໃນກາງເດືອນມີນານີ້ ປະທານາທິບໍດີໂຈ ໄບເດັນປະກາດວ່າສະຫະລັດຈະຢຸດເຊົາການນຳເຂົ້າເຊື້ອໄຟ ແລະຜະລິດຕະພັນທີ່ເຮັດຈາກເຊື້ອໄຟຂອງຣັດເຊຍ.
ນ້ຳມັນແລະແກັສທຳມະຊາດ ແມ່ນປະກອບເປັນ 63 ເປີເຊັນ ໃນການສົ່ງອອກຂອງຣັດເຊຍ ຊຶ່ງສ້າງລາຍໄດ້ປະມານ 40 ເປີເຊັນໃຫ້ລັດຖະບານກາງຂອງປະເທດດັ່ງກ່າວ. ຖ່ານຫີນແມ່ນການສົ່ງອອກທີ່ເປັນແຫຼ່ງລາຍໄດ້ ໃຫຍ່ອັນດັບ 5 ຂອງຣັດເຊຍ. ປະທານາທິບໍດີໄບເດັນ ກ່າວວ່າ ດັ່ງນັ້ນ “ສະຫະລັດຈະແນເປົ້າໝາຍໃສ່ເສັ້ນຊີວິດຫຼັກຂອງເສດຖະກິດຣັດເຊຍ.”
“ພວກເຮົາຫ້າມ ທຸກການນຳເຂົ້າ ນ້ຳມັນ ແກັສ ແລະ ພະລັງງານຂອງຣັດເຊຍ. ນັ້ນໝາຍຄວາມວ່າ ຈະບໍ່ມີການຮັບເອົານ້ຳມັນຂອງຣັດເຊຍອີກຢູ່ຕາມທ່າກຳປັ່ນຕ່າງໆ ແລະປະຊາຊົນຊາວອາເມຣິກັນຈະສ້າງຄວາມເສຍຫາຍຢ່າງຮ້າຍແຮງໃຫ້ແກ່ກົງຈັກສົງຄາມຂອງປູຕິນ.”
ເມື່ອວັນທີ 8 ມີນາຜ່ານມາ ປະທານາທິບໍດີໄບເດັນ ໄດ້ລົງນາມໃນດຳລັດຝ່າຍບໍລິຫານ ເພື່ອຫ້າມບໍ່ໃຫ້ນຳເຂົ້ານ້ຳມັນດິບແລະຜະລິດຕະພັນນ້ຳມັນບາງຊະນິດ ແກັສທຳມະຊາດແຫຼວ ແລະຖ່ານຫີນຈາກຣັດເຊຍ ມາຍັງສະຫະລັດ ດັ່ງນັ້ນວັງເຄຣັມລິນຈຶ່ງຈະບໍ່ໄດ້ຮັບເງິນລາຍໄດ້ຫຼາຍຕື້ໂດລາ.
ດຳລັດຝ່າຍບໍລິຫານດັ່ງກ່າວ ຍັງໄດ້ຫ້າມບໍ່ໃຫ້ສະຫະລັດໄປລົງທຶນໃໝ່ຕື່ມ ຢູ່ໃນພາກສ່ວນພະລັງງານຂອງຣັດເຊຍ ຊຶ່ງນີ້ແມ່ນເພື່ອຄ້ຳປະກັນບໍ່ໃຫ້ບໍລິສັດຕ່າງໆແລະພວກນັກລົງທຶນອາເມຣິກັນ ເຂົ້າໄປໃຫ້ການສະໜັບສະໜຸນ ທາງດ້ານການເງິນ ໃນຄວາມພະຍາຍາມເພື່ອຂະຫຍາຍການຜະລິດພະລັງງານຂອງປູຕິນຢູ່ໃນຣັດເຊຍ. ຍ້ອນເຫດຜົນດຽວກັນນີ້ ຊາວອາເມຣິກັນຍັງໄດ້ຖືກຫ້າມຕໍ່ການສະໜັບສະໜຸນທາງດ້ານການເງິນ ຫຼືຊຸກຍູ້ບໍລິສັດຕ່າງປະເທດ ທີ່ລົງທຶນໃນການຜະລິດພະລັງງານຂອງຣັດເຊຍ.
ປະທານາທິບໍດີໄບເດັນກ່າວວ່າ ສະຫະລັດບໍ່ໄດ້ດຳເນີນການຕາມລຳພັງໃນການຕັດສິນໃຈດັ່ງກ່າວ.
“ພວກເຮົາໄດ້ເຮັດການຕັດສິນໃຈນີ້ ໂດຍມີການປຶກສາຫາລືຢ່າງໃກ້ຊິດ ກັບພັນທະມິດ ແລະພາຄີຂອງພວກເຮົາ ຢູ່ໃນທົ່ວໂລກ ໂດຍສະເພາະແລ້ວ ໃນຢູໂຣບຍ້ອນການຕອບໂຕ້ ທີ່ເປັນຈິດນຶ່ງໃຈດຽວ ຕໍ່ການຮຸກຮານຂອງປູຕິນ ໄດ້ເປັນຈຸດເພັ່ງເລັງທີ່ສຳຄັນສຸດຂອງຂ້າພະເຈົ້າ ເພື່ອໃຫ້ອົງການເນໂຕ້ທັງໝົດແລະສະຫະພາບຢູໂຣບທຸກໆປະເທດ ແລະພັນທະມິດຂອງພວກເຮົາມີຄວາມປຸ້ມລຸມສາມັກຄີກັນຢ່າງແໜ້ນແກ່ນ.”
ປະທານາທິບໍດີໄບເດັນ ກ່າວຕື່ມວ່າ “ສະຫະລັດຜະລິດນ້ຳມັນພາຍໃນປະເທດ ຫຼາຍກວ່າບັນດາປະເທດໃນຢູໂຣບທັງໝົດຮວມກັນ. ດັ່ງນັ້ນ ພວກເຮົາສາມາດ
ເອົາບາດກ້າວນີ້ ໃນເມື່ອປະເທດອື່ນໆບໍ່ສາມາດເຮັດໄດ້.”
ໃນປີກາຍນີ້ ປະມານ 45 ເປີເຊັນ ຂອງແກັສທຳມະຊາດທັງໝົດທີ່ນຳເຂົ້າໂດຍສະຫະພາບຢູໂຣບ ແມ່ນມາຈາກຣັດເຊຍ. ໃນມື້ດຽວກັນ ກັບທີ່ປະທານາທິບໍດີໄບເດັນໄດ້ປະກາດການຫ້າມນຳເຂົ້າເຊື້ອໄຟຣັດເຊຍນັ້ນ ສະຫະພາບຢູໂຣບກໍໄດ້ປະກາດແຜນການຂອງຕົນ ທີ່ຈະຫຼຸດການຊື້ແກັສຈາກຣັດເຊຍ ລົງສອງສ່ວນສາມ ກ່ອນທ້າຍປີນີ້.
ປະທານາທິບໍດີໄບເດັນ ກ່າວວ່າ “ພວກເຮົາໄດ້ເຮັດວຽກຮ່ວມກັນຢ່າງໃກ້ຊິດກັບຢູໂຣບແລະພາຄີຂອງພວກເຮົາ ເພື່ອພັດທະນາຍຸດທະສາດໄລຍະຍາວ ສຳລັບຫຼຸດຜ່ອນ ການເພິ່ງພາຕໍ່ພະລັງງານຂອງຣັດເຊຍ ເຊັ່ນດຽວກັນ.”
“ຊາວອາເມຣິກັນ ມີຄວາມເປັນຈິດນຶ່ງໃຈດຽວກັນ ເພື່ອໃຫ້ການສະໜັບສະໜຸນຕໍ່ປະຊາຊົນຊາວຢູເຄຣນ ແລະໄດ້ສະແດງໃຫ້ເຫັນຢ່າງຈະແຈ້ງວ່າ ພວກເຮົາຈະບໍ່ ມີສ່ວນຮ່ວມ ໃນການໃຫ້ເງິນອຸດໜຸນຕໍ່ການເຮັດສົງຄາມຂອງປູຕິນ.”