ບົດບັນນາທິການ ທີ່ສະທ້ອນເຖິງນະໂຍບາຍ ຂອງລັດຖະບານສະຫະລັດ
ໃນປີ 2022 ສປປ ເກົາຫຼີ ໄດ້ຍິງລູກສອນໄຟຂີປະນາວຸດ 31 ເທື່ອ ຊຶ່ງໃນນັ້ນ 6 ເທື່ອແມ່ນເປັນລູກສອນໄຟຂີປະນາວຸດຂ້າມທະວີບ ແລະລູກສອນໄຟຂີປະນາວຸດຂະໜາດກາງ ແລະຢ່າງໜ້ອຍ 2 ເທື່ອ ມີການອ້າງວ່າເປັນລູກສອນໄຟປະເພດເຫວີ່ນ. ການຍິງລູກສອນໄຟທັງໝົດເຫຼົ່ານີ້ ແມ່ນເປັນການລະເມີດຕໍ່ມະຕິຫຼາຍໆສະບັບ ຂອງສະພາຄວາມໝັ້ນຄົງອົງການສະຫະປະຊາຊາດ. ຍິ່ງໄປກວ່ານັ້ນ ລາຍງານຍັງແຈ້ງວ່າ ພຽງຢາງພວມກະກຽມທີ່ຈະທຳການທົດລອງອາວຸດນິວເຄລຍເປັນເທື່ອທຳອິດ ໃນຮອບ 5 ປີ.
ທ່າມກາງການທ້າທາຍຍົ້ວຍຸເຫຼົ່ານີ້ ສະຫະລັດໄດ້ສະເໜີຍັດຕິສະບັບນຶ່ງຕໍ່ສະພາຄວາມໝັ້ນຄົງອົງການສະຫະປະຊາຊາດ ໃນເດືອນພຶດສະພາຜ່ານມາ ເພື່ອເສີມຂະຫຍາຍການລົງໂທດຕໍ່ ສປປ ເກົາຫຼີ ກ່ຽວກັບການຍິງລູກສອນໄຟ. ແຕ່ແນວໃດກໍຕາມ ນັບເປັນເທື່ອທຳອິດໃນຮອບ 15 ປີ ທີ່ໄດ້ມີການແຕກແຍກຢ່າງເປັນອັນຕະລາຍຢູ່ໃນສະພາຄວາມໝັ້ນຄົງກ່ຽວກັບເລື້ອງ ສປປ ເກົາຫຼີ. ໃນຂະນະທີ່ສະມາຊິກ 13 ປະເທດລົງຄະແນນສຽງເຫັນພ້ອມກັບຍັດຕິດັ່ງກ່າວ ແຕ່ຣັດເຊຍກັບສາທາລະນະລັດປະຊາຊົນຈີນ 2 ປະເທດສະມາຊິກຖາວອນຂອງສະພາຄວາມໝັ້ນຄົງ ໄດ້ໃຊ້ສິດຢັບຢັ້ງ ເພື່ອໃຫ້ຍັດຕິດັ່ງກ່າວເສຍໄຊ.
ເມື່ອວັນທີ 8 ມິຖຸນາຜ່ານມານີ້ ທີ່ກອງປະຊຸມສະມັດຊາໃຫຍ່ສະຫະປະຊາຊາດ ເພື່ອອະພິປາຍກ່ຽວກັບການໃຊ້ສິດຢັບຢັ້ງຂອງຣັດເຊຍ ແລະ ສປ ຈີນ ນັ້ນ ເອກອັກຄະລັດຖະທູດແຈັຟຟຣີ ດີລໍເຣັນຕິສ ທີ່ປຶກສາອະວຸໂສທາງດ້ານການເມືອງທິ່ສຳນັກງານຜູ້ຕາງໜ້າຂອງສະຫະລັດປະຈຳສະຫະປະຊາຊາດກ່າວວ່າ ການໃຊ້ສິດຢັບຢັ້ງດັ່ງກ່າວ ແມ່ນສະແດງໃຫ້ເຫັນເຖິງ “ການອະນຸມັດໂດຍປະລິຍາຍ” ຕໍ່ການກະທຳທີ່ເປັນອັນຕະລາຍແລະສ້າງຄວາມບໍ່ທຸ່ນທ່ຽງຂອງ ສປປ ເກົາຫຼີ: “13 ປະເທດສະມາຊິກຂອງສະພາຄວາມໝັ້ນຄົງ ໄດ້ເລືອກເອົາວິທີສົ່ງຄຳເຕືອນຢ່າງແຮງໄປຍັງ ສປປ ເກົາຫຼີ ທີ່ວ່າ ການພັດທະນາອາວຸດທີ່ມີອະນພາບຮ້າຍແຮງແລະລູກສອນໄຟຂີປະນາວຸດແບບຜິດກົດໝາຍ ຈະບໍ່ເປັນທີ່ຮັບເອົາໄດ້ ແລະເປັນການສົ່ງສັນຍານໄປຍັງພວກແຜ່ຜາຍອາວຸດທັງໝົດວ່າ ມັນຈະມີຜົນທີ່ຕິດຕາມມາສຳລັບເຂົາເຈົ້າ. ແຕ່ສອງປະເທດບໍ່ຍອມເຮັດ.”
ເອກອັກຄະລັດຖະທູດດີລໍເຣັນຕິສໃຫ້ຂໍ້ສັງເກດວ່າ ໃນໄລຍະຕົ້ນໆຂອງປີນີ້ ຣັດເຊຍ ແລະ ສປ ຈີນ ໄດ້ໃຫ້ຄຳໝັ້ນສັນຍາຕໍ່ “ການເປັນພາຄີແບບບໍ່ມີຂໍ້ຈຳກັດ.”
ທ່ານກ່າວວ່າ “ພວກເຮົາຫວັງວ່າ ການໃຊ້ສິດຢັບຢັ້ງເຫຼົ່ານີ້ບໍ່ໄດ້ສະທ້ອນໃຫ້ເຫັນເຖິງການເປັນພາຄີ ທີ່ໄດ້ຍົກລະດັບໃຫ້ສູງຂຶ້ນກວ່າ ຜົນປະໂຫຍດຮ່ວມຂອງອົງການນີ້ ຫຼືສະຖາບັນຫຼາຍຝ່າຍ ທີ່ໄດ້ຖືກມອບໝາຍໃຫ້ຄ້ຳປະກັນຄວາມປອດໄພ ແລະຄວາມໝັ້ນຄົງຂອງພວກເຮົາທັງມວນ.”
ສະຫະລັດໄດ້ສະແດງໃຫ້ເຫັນຢ່າງຈະແຈ້ງຕະຫຼອດມາວ່າ ຕົນຢາກຈະເປີດການເຈລະຈາກັບພຽງຢາງແບບບໍ່ມີການຕັ້ງເງື່ອນໄຂລ່ວງໜ້າແລະຄວາມໝັ້ນໝາຍ ທາງດ້ານການທູດແມ່ນຍັງເປີດກວ້າງຢູ່ສຳລັບ ສປປ ເກົາຫຼີ. ນອກນັ້ນ ສະຫະລັດຍັງໄດ້ສະແດງໃຫ້ເຫັນຢ່າງຈະແຈ້ງວ່າ ຮ່ວມກັນກັບບັນດາປະເທດພັນທະມິດແລ້ວ ສະຫະລັດຍັງຈະສືບຕໍ່ ຮັກສາຄວາມສາມາດໃນການສະກັດກັ້ນຢ່າງແຂງຂັນ ແລະຈະຫາທາງຈັດຕັ້ງປະຕິບັດການລົງໂທດ ທັງຈາກຫຼາຍໆຝ່າຍແລະແຕ່ພຽງຝ່າຍດຽວຕາມລຳພັງ.
ທີ່ອົງການສະຫະປະຊາຊາດ ເອກອັກຄະລັດຖະທູດດີລໍເຣັນຕິສ ປະກາດວ່າສະຫະລັດຈະສືບຕໍ່ເຮັດວຽກ “ຕາມປົກກະຕິ ຢ່າງຕັ້ງໜ້າ ແລະແບບໂປ່ງໃສກັບສະພາຄວາມໝັ້ນຄົງສະຫະປະຊາຊາດ ພັນທະມິດແລະພາຄີຂອງພວກເຮົາແລະສະມາຊິກທຸກໆປະເທດ ທີ່ຢາກໃຫ້ ສປປ ເກົາຫຼີ ຢຸດເຊົາໂຄງການ ອາວຸດທີ່ມີອະນຸພາບຮ້າຍແຮງຜິດກົດໝາຍ ແລະລູກສອນໄຟຂີປະນາວຸດ ແລະຢຶດໝັ້ນໃນຫຼັກການຫ້າມບໍ່ໃຫ້ມີການແຜ່ຜາຍອາວຸດດ່ງກ່າວ.”