ບົດບັນນາທິການ ທີ່ສະທ້ອນເຖິງນະໂຍບາຍ ຂອງລັດຖະບານສະຫະລັດ
ເດືອນເມສາ ແມ່ນຂີດໝາຍວັນຄົບຮອບນຶ່ງປີ ນັບແຕ່ໄດ້ມີການປະກາດກ່ຽວກັບການຢຸດຍິງຢູ່ເຢເມນ. ກ່ອນໜ້າການຢຸດຍິງນັ້ນ ບັນຫາຂັດແຍ້ງແມ່ນໄດ້ເກີດການຕໍ່ສູ້ກັນ ລະຫວ່າງພວກກະບົດຮູຕີທີ່ອີຣ່ານໜຸນຫຼັງ ກັບລັດຖະບານເຢເມນ ທີ່ນາໆຊາດຮັບຮູ້ ຊຶ່ງໄດ້ຮັບການສະໜັບສະໜຸນ ໂດຍແນວໂຮມ ພາຍໃຕ້ການນຳພາຂອງຊາອຸດີ ອາຣາເບຍ ແລະ ສະຫະລັດອາຣັບເອເມີເຣັສ. ການຢຸດຍິງທີ່ໄກ່ເກ່ຍໂດຍສະຫະປະຊາຊາດ ໄດ້ພາໃຫ້ເກີດຄວາມສະຫງົບ ທີ່ດົນນານທີ່ສຸດ ນັບແຕ່ປີ 2014 ເປັນຕົ້ນມາ.
ກ່ອນໜ້າການຢຸດຍິງ ຄວາມຮຸນແຮງທີ່ດຳເນີນມາເປັນເວລາ 7 ປີ ໄດ້ທຳລາຍ ເສດຖະກິດຂອງເຢເມນ ແລະໄດ້ກໍ່ໃຫ້ເກີດນຶ່ງໃນວິກິດການທາງດ້ານມະນຸດສະທຳທີ່ຮ້າຍແຮງທີ່ສຸດໃນໂລກ. ໃນທຸກມື້ນີ້ ມີຫຼາຍກວ່າ 21 ລ້ານ 6 ແສນຄົນແມ່ນຈຳເປັນຕ້ອງໄດ້ຮັບການຊ່ວຍເຫຼືອທາງດ້ານມະນຸດສະທຳ. ຊາວເຢເມນປະມານ 6 ລ້ານຄົນຕ້ອງໄດ້ອົບພະຍົບຫຼົບໄພ ແລະອີກຫຼາຍໆຮ້ອຍພັນຄົນ ພວມ ປະເຊີນກັບສະພາບຄວາມບໍ່ໝັ້ນຄົງທາງດ້ານອາຫານໃນຫຼາຍລະດັບ ໂດຍທີ່ຈຳນວນນຶ່ງແມ່ນບໍ່ມີອາຫານການກິນເລີຍ.
ການຢຸດຍິງເຮັດໃຫ້ຄວາມຮຸນແຮງເກືອບທັງໝົດຍຸຕິລົງແລະແຜ້ວທາງໄປສູ່ການແກ້ໄຂໃນອະນາຄົດ ແຕ່ກໍບໍ່ໄດ້ເຮັດໃຫ້ການສູ້ລົບຢຸດເຊົາລົງຢ່າງສິ້ນເຊີງ. ແຕ່ແນວໃດກໍຕາມ ບັນຍາກາດທີ່ຂ້ອນຂ້າງມີຄວາມສະຫງົບ ລາຍງານວ່າ ໄດ້ເຮັດໃຫ້ການບາດເຈັບລົ້ມຕາຍຂອງພົນລະເຮືອນຫຼຸດລົງ 60 ເປີເຊັນ. ມີຫຍັງອີກຕື່ມ ສະພາບການທີ່ວ່ານີ້ໄດ້ເອື້ອອຳນວຍໃຫ້ມີການເປີດສະໜາມບິນທີ່ນະຄອນຫຼວງຊານາອາ ໃຫ້ແກ່ຖ້ຽວບິນພານິດ. ໃນຂະນະດຽວກັນ ກໍໄດ້ມີການເອົາບາດກ້າວ ເພື່ອອຳນວຍຄວາມສະດວກໃນການນຳເຂົ້າເຊື້ອໄຟ ປັບປຸງການເຂົ້າເຖິງນ້ຳສະອາດ ໄຟຟ້າ ການປິ່ນປົວສຸຂະພາບແລະການບໍລິການອື່ນໆອີກ. ນອກນັ້ນການຢຸດເຊົາສູ້ລົບຍັງໄດ້ເປີດໂອກາດໃຫ້ກຸ່ມຊ່ວຍເຫຼືອທາງດ້ານມະສຸດສະທຳເຂົ້າເຖິງຜູ້ຄົນທີ່ມີຄວາມຕ້ອການຄວາມຊ່ວຍເຫຼືອຕື່ມຂຶ້ນ.
ຮອງໂຄສົກກະຊວງການຕ່າງປະເທດ ທ່ານວີແດນ ພາແທລກ່າວວ່າ “ການຢຸດຍິງພາຍໃຕ້ການນຳພາຂອງສະຫະປະຊາຊາດແລະການອຳນວຍຄວາມສະດວກທາງດ້ານການທູດຂອງສະຫະລັດໄດ້ຍຸຕິການສູ້ລົບກັນສ່ວນໃຫຍ່ ຊ່ວຍຊີວິດພົນລະເຮືອນຫຼາຍພັນຄົນ ແຕ່ແນວໃດກໍຕາມ ສະຫະລັດຮັບຮູ້ວ່າການຢຸດຍິງແມ່ນເປັນພຽງບາດກ້າວອັນທຳອິດເທົ່ານັ້ນ ໄປສູ່ຂັ້ນຕອນທາງດ້ານການເມືອງ ເພື່ອແກ້ໄຂຮອບດ້ານຢ່າງເປັນການຖາວອນ ຕໍ່ບັນຫາຂັດແຍ້ງໃນເຢເມນ.”
ປະທານາທິບໍດີໄບເດັນ ກ່າວຢູ່ໃນຖະແຫຼງການວ່າ ການຢຸດຍິງແມ່ນເຫດການທີ່ສຳຄັນ. “ການຄຸ້ມຄອງການຢຸດຍິງ ແລະເສີມຂະຫຍາຍຄວາມກ້າວໜ້າໄປສູ່ສັນຕິພາບ ແມ່ນຈຸດເພັ່ງເລັງຫຼັກຂອງລັດຖະບານຂ້າພະເຈົ້າໃນການພົວພັນກັບບັນດາພາຄີຂອງພວກເຮົາໃນພາກຕາເວັນອອກກາງ. ການເພັ່ງເລັງດັ່ງກ່າວ ຍັງຈະດຳເນີນຕໍ່ໄປຢ່າງຂຸ້ນຂ້ຽວ ໃນຂະນະທີ່ພວກເຮົາພວມຊອກຫາຊ່ອງທາງທີ່ຈະສືບສານຕໍ່ ຄວາມກ້າວໜ້າພິເສດອັນນີ້ ແລະສະໜັບສະໜຸນທຸກການດຳເນີນຄວາມພະຍາຍາມໄປສູ່ການແກ້ໄຂຮອບດ້ານຕໍ່ບັນຫາຂັດແຍ້ງທີ່ໜ້າຢ້ານກົວດັ່ງກ່າວ.
“ສະຫະລັດຍັງສືບຕໍ່ມີຄວາມໝັ້ນໝາຍຕໍ່ບັນດາພາຄີຂອງພວກເຮົາຢູ່ໃນຂົງເຂດ ໂດຍເຕັມ ແລະສະໜັບສະໜຸນຊາອຸດີ ອາຣາເບຍ ແລະສະຫະລັດອາຣັບເອເມີເຣັສ ຈາກການຊຸກຍູ້ໃຫ້ມີການໂຈມຕີໂດຍອີຣ່ານ. ຄວາມຈິງກໍຄືວ່າການໂຈມຕີຂ້າມຊາຍແດນຈາກເຢເມນ ໄດ້ຢຸດເຊົາໃນປີກາຍນີ້ ຕະຫຼອດທັງການໂຈມຕີທາງອາກາດຢູ່ໃນເຢເມນ ກໍແມ່ນຜົນໃນທາງບວກອີກອັນນຶ່ງຂອງການຢຸດຍິງ” ນັ້ນຄືຄຳເວົ້າຂອງປະທານາທິບໍດີໄບເດັນ. “ຂ້າພະເຈົ້າຫວັງວ່າຈະໄດ້ສືບຕໍ່ເຮັດວຽກຮ່ວມກັບພາຄີທຸກໆປະເທດຢູ່ໃນຂົງເຂດ ເພື່ອຍຸຕິສົງຄາມຢູ່ໃນເຢເມນຢ່າງເປັນການຖາວອນ.”