Saddex maalmood dabayaaqadii bishii March, dalalka xubnaha ka ah Qaramada Midoobay ayaa isu yimid dadaal lagu dardargelinayo horumarka laga gaarayo Hadafka 6 ee Himilada Horumarka Joogtada ah ee Qaramada Midoobay – helidda guud ee biyo ammaan ah iyo fayadhowr marka la gaaro 2030-ka.
Waqtigan xaadirka ah, horumarku aad buu uga fog yahay jidka. Sida laga soo xigtay Ururka Caafimaadka Adduunka, ku dhawaad laba bilyan oo qof adduunka oo dhan, ama mid ka mid ah afartii, ma helaan biyo nadiif ah oo la cabbo. Ku dhawaad 3.6 bilyan oo qof, ku dhawaad kala bar dadka adduunka, ayaa la’aanta fayadhowr ammaan ah. Biyaha wasakhaysan iyo nadaafadda oo aan ku filnayn awgeed, qiyaastii 1.4 milyan oo qof ayaa u dhinta cudurrada biyaha ka dhasha sannad kasta halka 74 milyan oo kalena ay nolol gaaban ku nool yihiin. Way ka sii daraysaa - haddii dhibaatadan la ogolaado inay sii socoto, baahida biyaha adduunka waxay kordhin doontaa 55 boqolkiiba 2050.
Tani waa sababta maamulka Biden-Harris uu go'aansaday inuu maalgashi ballaaran ku sameeyo amniga biyaha adduunka.
"Si wax looga qabto xilligan, maamulka Biden-Harris wuxuu bilaabay hab dowladeed oo dhan si loo sugo kheyraadka biyaha ee jiilka hadda jira iyo kuwa soo socda," ayay tiri Xoghayaha Arrimaha Gudaha ee Mareykanka Deb Haaland maalintii ugu horreysay ee shirka biyaha.
"Sharaf ayay ii tahay inaan ku dhawaaqo in iyada oo qayb ka ah ballanqaadyadayada ajendaha biyaha, Maraykanku wuxuu ku tabarucay ilaa $ 49 bilyan oo maalgashi si loo hubiyo in biyaha iyo nadaafadda u adkeysata cimilada ay weli yihiin mudnaanta adduunka
Tan waxaa ku jira sii deynta Qorshaha Waxqabadka Aqalka Cad ee Amniga Biyaha Caalamiga ah iyo Istaraatiijiyada Biyaha Caalamiga ah ee Mareykanka. Labaduba waxay xoojin doonaan nidaamyada maxalliga ah iyo kuwa caalamiga ah si loo daboolo baahiyaha bulshooyinka aan la daboolin." ayay sheegtay.
"Biyuhu waa nolol," ayay tiri Xoghaye Haaland. "Waa lama huraan wax kasta oo aan sameyno, laga bilaabo karinta cunnadayada iyo korinta carruurtayada ilaa beerista dalagyada iyo joojinta faafitaanka fayraska dilaaga ah inta lagu jiro aafo caalami ah. Hadafka Horumarka Joogtada ah ee 6 ayaa udub dhexaad u ah buuxinta dhammaan yoolalkayaga Caalamiga ah. Laakin waxaa noo harsan waddo dheer,” ayay tiri..
“Abaarta iyo dhibaatooyinka kale ee ka dhasha cimiladu ma yaqaanaan xuduud, bulshooyinka ugu dhaqaalaha yar si ay isu difaacaanna dhibka ugu badan ayaa soo gaara. Tani waxay ka dhigaysaa dadaalkeena wadajirka ah, loo dhan yahay xitaa mid aad muhiim u ah."
"Si wada jir ah, waddamadeenu waxay wajahayaan waqti muhim ah oo ku saabsan shaqadeena si aan wax uga qabanno cimilada is-dhex-galka ah iyo dhibaatooyinka biyaha," ayay tiri Xoghaye Haaland oo intaas raacisay "Himiladayada Horumarineed ee Joogtada ah ayaa ah - ugu muhiimsan - qiyamka la wadaago si loo ballaariyo fursadaha dhaqaale, daryeelka meereheena, ilaalinta iyo difaaca xuquuqda aadanaha, iyo inaan hubinno in qof ama bulsho aan laga tegin."
Tani waxay aheyd faallo ka turjumeysa aragtida dowladda Mareykanka.