ບົດບັນນາທິການ ທີ່ສະທ້ອນເຖິງນະໂຍບາຍ ຂອງລັດຖະບານສະຫະລັດ
ສະຫະລັດມີຄວາມເປັນຫ່ວງກັງວົນຢ່າງເລິກເຊິ່ງ ທີ່ເຈົ້າໜ້າທີ່ກຳປູເຈຍຂັດຂວາງບໍ່ໃຫ້ພັກແສງທຽນ ຊຶ່ງເປັນພັກຝ່າຍຄ້ານທີ່ໃຫຍ່ສຸດຂອງປະເທດເຂົ້າຮ່ວມ ໃນການເລືອກຕັ້ງແຫ່ງຊາດປີ 2023. ສະພາລັດຖະທຳມະນູນ ໄດ້ປະຕິເສດໄດ້ປະຕິເສດທີ່ຈະຕ່າວປີ້ນການຕັດສິນໃຈ ບໍ່ໃຫ້ພັກດັ່ງກ່າວຈົດທະບຽນຍ້ອນມີການກ່າວຫາກ່ຽວກັບບັນຫາເລື້ອງເຈ້ຍສໍ.
ທ່ານກິມຊົວ ພິຣິດ ໂຄສົກຂອງພັກແສງທຽນກ່າວວ່າ ທ່ານ “ເສຍໃຈ” ກ່ຽວກັບ ການຕັດສິນໃຈຂອງສະພາດັ່ງກ່າວ ທີ່ໄດ້ປະຕິເສດ ຕໍ່ພວກສະໜັບສະໜຸນຂອງພັກຢູ່ໃນທົ່ວປະເທດເພື່ອໃຫ້ມີທາງເລືອກຢ່າງແທ້ຈິງໃນການໄປປ່ອນບັດ. “ການບໍ່ໄດ້ເຂົ້າຮ່ວມ ຂອງພັກແສງທຽນ ໃນການເລືອກຕັ້ງ ແມ່ນໝາຍຄວາມວ່າ ສຽງຂອງປະຊາຊົນບໍ່ໄດ້ມີຄວາມສຳຄັນ. ການເຄື່ອນໄຫວແບບນັ້ນ ຈະບໍ່ມີຂຶ້ນ ຢູ່ໃນປະເທດປະຊາທິປະໄຕຢ່າງແທ້ຈິງ” ທ່ານກິມຊົວ ພິຣິດ ກ່າວ.
ອີງຕາມລາຍງານສະບັບຫຼ້າສຸດ ວ່າດ້ວຍການເຄົາລົບນັບຖືສິດທິມະນຸດຂອງກະຊວງການຕ່າງປະເທດແລ້ວ ພັກການເມືອງອິດສະຫຼະຂອງກຳປູເຈຍແມ່ນໄດ້ຖືກ “ຈຳແນກກີດກັນທາງດ້ານກົດໝາຍ ເລືອກປະຕິບັດໃນດ້ານກົດໝາຍ ຂົ່ມຂູ່ ລຳອຽງໃນການລາຍງານຂ່າວ ຂອງສື່ມວນຊົນ. ພາກສ່ວນເຫຼົ່ານີ້ ແມ່ນມີເຫດຜົນທີ່ ສຳຄັນ (ເຮັດໃຫ້ພັກປະຊາຊົນກຳປູເຈຍ) ຜູກຂາດຢ່າງມີປະສິດທິຜົນໃນການກຳອຳນາດທາງການເມືອງ.”
ພັກແສງທຽນ ຊຶ່ງເປັນຜູ້ສືບທອດຢ່າງບໍ່ເປັນທາງການຂອງພັກກູ້ຊາດກຳປູເຈຍ ໄດ້ເປັນຜູ້ທ້າທາຍທີ່ສຳຄັນຕໍ່ພັກຂອງທ່ານຮຸນເຊນກ່ອນການເລືອກຕັ້ງປີ 2018. ພັກດັ່ງກ່າວໄດ້ຖືກຍຸບ ໂດຍສານສູງສຸດ ບໍ່ເທົ່າໃດເດືອນ ກ່ອນການເລືອກຕັ້ງ. ດ້ວຍເຫດຜົນທີ່ວ່ານັ້ນ ພັກປະຊາຊົນກຳປູເຈຍ ຊຶ່ງເປັນພັກລັດຖະບານ ຈຶ່ງໄດ້ຊະນະບ່ອນນັ່ງທັງໝົດ 125 ບ່ອນ ໃນການເລືອກຕັ້ງແຫ່ງຊາດປີ 2018 ເຮັດໃຫ້ກຳປູເຈຍ ໃນຄວາມເປັນຈິງແລ້ວກາຍເປັນລັດທີ່ປົກຄອງດ້ວຍພັກການເມືອງໂທນ. ມີພວກນັກການເມືອງຝ່າຍຢ່າງໜ້ອຍ 39 ຄົນ ຖືກຄຸມຂັງຢູ່ໃນຄຸກຂອງກຳປູເຈຍ ອີງຕາມອົງການນິລະໂທດກຳສາກົນ.
ໂຄສົກກະຊວງການຕ່າງປະເທດຂອງສະຫະລັດ ທ່ານແມັດທິວ ມິລເລີ ກ່າວວ່າ “ແຜນການໃນດ້ານກົດໝາຍ ການຂົ່ມຂູ່ ການຮາວີລົບກວນ ການຟ້ອງຮ້ອງໃນດ້ານອາຍາ ທີ່ມີຈຸດປະສົງທາງການເມືອງ ທີ່ແນເປົ້າໝາຍໃສ່ພັກຝ່າຍຄ້ານ ສື່ ມວນຊົນອິດສະຫຼະ ແລະກຸ່ມສັງຄົມພົນລະເຮືອນ ບ່ອນທຳລາຍຕໍ່ພັນທະສາກົນຂອງກຳປູເຈຍ ເພື່ອພັດທະນາລະບອບປະຊາທິປະໄຕແບບມີຫຼາຍພັກຂອງກຳປູເຈຍ.”
ທ່ານມີລເລີ ກ່າວວ່າ “ເພາະສະນັ້ນ ສະຫະລັດຈຶ່ງບໍ່ມີແຜນການ ທີ່ຈະສົ່ງເຈົ້າໜ້າທີ່ສັງເກດການ ໄປຮ່ວມການເລືອກຕັ້ງໃນເດືອນກໍລະກົດ ຊຶ່ງເປັນສ່ວນນຶ່ງຂອງຂັ້ນຕອນການເລືອກຕັ້ງທີ່ບັນດານັກຊ່ຽວຊານອິດສະຫຼະແລະລະຫວ່າງປະເທດຊັ່ງຊາວ່າ ບໍ່ມີທັງເສລີແລະຄວາມຍຸຕຳທຳ” ແລະທ່ານກ່າວຕື່ມວ່າ “ພວກ ເຮົາຂໍຮຽກຮ້ອງຢ່າງແຂງຂັນໃຫ້ພວກເຈົ້າໜ້າທີ່ກຳປູເຈຍ ຕ່າວປີ້ນທິດທາງເພື່ອຄ້ຳປະກັນ ຕໍ່ປະຊາຊົນຂອງຕົນ ສາມາດປ່ອນບັດ ໃນການເລືອກຕັ້ງທີ່ເປັນທຳ ແບບປະຊາທິປະໄຕຫຼາຍພັກ ທີ່ສອດຄ່ອງກັບລັດຖະທຳມະນູນກຳປູເຈຍ ແລະສາມາດຊົມໃຊ້ສິດທິມະນຸດ ຂອງພວກເຂົາເຈົ້າໄດ້ຢ່າງເສລີ ຮວມທັງ ສິດເສລີພາບໃນການຄົບຄ້າສະມາຄົມ ໂຮມຊຸມນຸມຢ່າງສັນຕິ ແລະສະແດງຄວາມຄິດຄວາມເຫັນໂດຍປາສະຈາກຄວາມຢ້ານກົວທີ່ຈະຖືກແກ້ແຄ້ນ.”