ບົດບັນນາທິການ ທີ່ສະທ້ອນເຖິງນະໂຍບາຍ ຂອງລັດຖະບານສະຫະລັດ
ສະຫະລັດປະກາດວ່າ ຕົນໄດ້ເສັດສິ້ນໃນການເຮັດຂໍ້ຕົກລົງສະບັບໃໝ່ທາງດ້ານການຄ້າ ຊຶ່ງເປັນພາກສ່ວນທຳອິດຂອງຂໍ້ລິເລີ້ມສອງຝ່າຍ ທີ່ໄດ້ເລີ້ມຂຶ້ນໃນປີກາຍນີ້ ທີ່ມີຊື່ວ່າ “ຂໍ້ລິເລີ້ມທາງດ້ານການຄ້າ ສະຫະລັດ-ໄຕ້ຫວັນ ໃນສັດຕະວັດທີ 21.”
ສະຫະລັດ ແລະໄຕ້ຫວັນ ໄດ້ທຳການເຈລະຈາ ພາຍໃຕ້ການໃຫ້ຄຳແນະນຳ ຂອງສະຖາບັນອາເມຣິກັນທີ່ໄຕ້ຫວັນ ທີ່ເອີ້ນຫຍໍ້ວ່າ AIT ແລະຫ້ອງການຜູ້ຕາງໜ້າທາງດ້ານເສດຖະກິດແລະວັດທະນະທຳຂອງໄທເປ ທີ່ສະຫະລັດ ຫຼື TECRO.
ດັ່ງທີ່ ຫ້ອງການຜູ້ຕາງໜ້າທາງດ້ານການຄ້າ ຂອງສະຫະລັດ ໃຫ້ຂໍ້ສັງເກດໃນເດືອນມິຖຸນາປີ 2022 ຂໍ້ລິເລີ້ມດັ່ງກ່າວນີ້ແມ່ນແນໃສ່ເພື່ອພັດທະນາຊ່ອງທາງຫຼັກໃນການລົງເລິກ ຄວາມສຳພັນທາງດ້ານເສດຖະກິດ ແລະການຄ້າຂອງທັງສອງຝ່າຍ ສ້າງຄວາມກ້າວໜ້າໃຫ້ແກ່ບູລິມະສິດໃນການຄ້າສອງທາງ ອີງຕາມຫຼັກຄຸນຄ່າຮ່ວມ ແລະຊຸກຍູ້ນະວັດຕະກຳໃໝ່ແລະການເຕີບໂຕຂອງເສດຖະກິດຮ່ວມສຳລັບພວກຄົນງານແລະທຸລະກິດຕ່າງໆ.
ໃນຖະແຫຼງການປະກາດຂໍ້ຕົກລົງນີ້ ຫ້ອງການຂອງຜູ້ຕາງໜ້າທາງດ້ານການຄ້າ ສະຫະລັດໃຫ້ຂໍ້ສັງເກດວ່າ ຂໍ້ຕົກລົງສະບັບທຳອິດນີ້ “ກວມເອົາຂົງເຂດຕ່າງໆ ຂອງອົງການຄຸ້ມຄອງພາສີ ແລະຜູ້ອຳນວຍຄວາມສະດວກທາງດ້ານການຄ້າ ການປະຕິບັດທີ່ດີທາງດ້ານລະບຽບການ ກົດລະບຽບຂອງການບໍລິການໃນປະເທດ ການຕໍ່ຕ້ານສໍ້ລາດບັງຫຼວງ ແລະວິສາຫະກິດຂະໜາດນ້ອຍແລະຂະໜາດກາງ. ໂດຍຜ່ານຂໍ້ກົດນົດຕ່າໆໆເຫຼົ່ານີ້ ພວກນັກທຸລະກິດສະຫະລັດຈະສາມາດນຳເອົາຜະລິດຕະພັນຫຼາຍຂຶ້ນໄປຍັງໄຕ້ຫວັນແລະພວກລູກຄ້າຊາວໄຕ້ຫວັນ ໃນຂະນະທີ່ມີການສ້າງຕັ້ງລະບຽບການທີ່ມີຄວາມໂປ່ງໃສ່ຕື່ມຂຶ້ນ ແລະຂັ້ນຕອນໃນການປະຕິບັດງ່າຍຂຶ້ນ ທີ່ສາມາດອຳນວຍຄວາມສະດວກໃນການລົງທຶນແລະໂອກາດທາງດ້ານເສດຖະກິດ ຢູ່ໃນຕະຫຼາດທັງສອງ ໂດຍສະເພາະແລ້ວສຳລັບວິສາຫະກິດຂະໜາດນ້ອຍແລະຂະໜາດກາງ.”
ການເຈລະຈາກ່ຽວກັບຂໍ້ຕົກລົງທີ່ຫາກໍສະຫຼຸບເມື່ອໄວໆມານີ້ ໃຊ້ເວລາບໍ່ຮອດນຶ່ງປີ. ຜູ້ຕາງໜ້າທີ່ດ້ານການຄ້າຂອງສະຫະລັດ ທ່ານນາງແຄເທີຣີນ ຕ່າຍ ກ່າວຢູ່ໃນຖະແຫຼງການວ່າ “ການສຳເລັດເສັດສິ້ນລົງນີ້ ແມ່ນສະແດງໃຫ້ເຫັນເຖິງບາດກ້າວທີ່ສຳຄັນໄປໜ້າ ໃນການເສີມຂະຫຍາຍຄວາມສຳພັນທາງດ້ານເສດຖະກິດລະຫວ່າງສະຫະລັດ ກັບໄຕ້ຫວັນ. ມັນໄດ້ສະແດງໃຫ້ເຫັນວ່າພວກເຮົາສາມາດເຮັດວຽກຮ່ວມກັນ ແລະສ້າງຄວາມກ້າວໜ້າໃຫ້ແກ່ບູລິມະສິດທາງດ້ານການຄ້າຮ່ວມກັນໄດ້ແນວໃດ ສຳລັບປະຊາຊົນຂອງພວກເຮົາ.”
ຮວມຢູ່ໃນຫຼາຍໆຂົງເຂດວຽກງານທີ່ກ່າວເຖິງນັ້ນ ບັນທຶກຂອງການເຈລະຈາໄດ້ມອບໝາຍໃຫ້ທັງສອງຝ່າຍສ້າງຕັ້ງມາດຕະການຕໍ່ຕ້ານການສໍ້ລາດບັງຫຼວງຮອບດ້ານເພື່ອປ້ອງກັນ ແລະປາບປາມການໃຫ້ເງິນສິນບົນ. ຈຸດເພັ່ງເລັງອີກອັນນຶ່ງກໍແມ່ນຊອກຫາທາງ ເພື່ອຊຸກຍູ້ໂອກາດທາງດ້ານການຄ້າ ແລະ ການລົງທຶນລະຫວ່າງສະຫະລັດ ແລະໄຕ້ຫວັນສຳລັບວິສາຫະກິດຂະໜາດນ້ອຍແລະຂະໜາດກາງຫຼື SME. ສິ່ງເຫຼົານີ້ແມ່ນຮວມທັງໂຄງການຝຶກອົບຮົມ ການສຶກສາທາງດ້ານການຄ້າ ການເງິນກ່ຽວກັບການຄ້າ ການປະຕິບັດງານທາງດ້ານການຄ້າ ແລະການປັບປຸງເຮັດໃຫ້ SME ເຂົ້າເຖິງເງິນທຶນແລະສິນເຊື່ອໄດ້ງ່າຍຂຶ້ນ.
ຫ້ອງການເຈລະຈາທາງດ້ານການຄ້າຂອງໄຕ້ຫວັນ ໄດ້ຊົມເຊີຍຂໍ້ຕົກລົງສະບັບນີ້ວ່າ “ມີຄວາມສຳຄັນປະຫວັດສາດ” ແລະໄດ້ສະແດງຄວາມໝາຍໝັ້ນໝາຍ ໃນການທີ່ຈະສຳເລັດເສັດສິ້ນ ການເຈລະຈາກ່ຽວກັບບັນຫາຕ່າງໆ ທີ່ຍັງຄົງຄ້າງໃນໄວໆນີ້.
ຂໍ້ຕົກລົງດັ່ງກ່າວ ຈະມີການລົງນາມກັນ ໃນໄລຍະສອງສາມອາທິດຕໍ່ໜ້າ ລະຫວ່າງອົງການ AIT ແລະ TECRO.
ເອກອັກຄະລັດຖະທູດຕ່າຍ ກ່າວວ່າ “ພວກເຮົາຫວັງວ່າ ຈະມີການສືບຕໍ່ການເຈລະຈາເຫຼົ່ານີ້ ແລະສະຫຼຸບຂໍ້ຕົກລົງການຄ້າທີ່ມີຄວາມເຂັ້ມແຂງແລະມາດຕະຖານສູງ ເພື່ອແກ້ໄຂບັນຫາທ້າທາຍອັນຮີບດ່ວນທາງດ້ານເສດຖະກິດຂອງສັດຕະວັດທີ 21.