ປະມານຢ່າງໜ້ອຍ 240 ຄົນທີ່ໄດ້ຖືກລັກພາຕົວໄປໂດຍກຸ່ມຮາມາສ ໃນການໂຈມຕີຕໍ່ອິສຣາແອລ ເມື່ອວັນທີ 7 ຕຸລາ, ຈຳນວນ 110 ຄົນໄດ້ຖືກປ່ອຍຕົວສົງກັບຄືນໄປແລ້ວ. ໃນລະຫວ່າງການຢຸດຍິງເພື່ອມະນຸດສະທຳ ທີ່ໄດ້ຖືກບັງຄັບໃຊ້ ໃນວັນທີ 24 ພະຈິກ, ຕົວປະກັນຢ່າງໜ້ອຍ 10 ຄົນ ໄດ້ຖືກປ່ອຍຕົວໃນແຕ່ລະມື້. ແຕ່ຄວາມຫວັງທີ່ວ່າ ພວກນັກໂທດທີ່ຍັງເຫຼືອຢູ່ນັ້ນ ຈະຖືກປ່ອຍຕົວໃນບໍ່ເທົ່າໃດວັນຂ້າງໜ້ານີ້ ກໍໄດ້ຖືກຕັດໄປ ເມື່ອການສູ້ລົບເລີ້ມຄືນໃໝ່ ໃນວັນທີ 1 ທັນວາ.
“ພວກເຮົາຍັງຄົງສຸມໃສ່ຢ່າງຂຸ້ນຂ້ຽວຕໍ່ການນຳເອົາໝົດທຸກຄົນເມືອບ້ານ, ເອົາພວກຕົວປະກັນກັບຄືນມາ” ທ່ານລັດຖະມົນຕີການຕ່າງປະເທດ ແອນໂທນີ ບລິງເກັນ ໄດ້ກ່າວ ຫຼັງຈາກໄດ້ໄກ່ເກ່ຍການຢຸດຍິງຊົ່ວຄາວ.
ທ່ານກ່າວອີກວ່າ “ພວກເຮົາຍັງເພັ່ງເລັງຫຼາຍຢ່າງຍິ່ງ ຂະນະທີ່ພວກເຮົາກໍໄດ້ເຮັດມາຕະຫຼອດ, ຕໍ່ຄວາມພະຍາຍາມເພື່ອໃຫ້ແນ່ໃຈວ່າ ບັນຫາຂັດແຍ້ງນີ້ ຈະບໍ່ຂະຫຍາຍອອກໄປ, ທີ່ວ່າ ມັນຈະບໍ່ເພີ້ມຂຶ້ນຢູ່ໃນແຫ່ງອື່ນໆ.”
ແທ້ຈິງແລ້ວ ອັນນັ້ນເປັນສິ່ງນຶ່ງໃນສາມຄວາມເປັນຫ່ວງໃຫຍ່ ຂອງການກ້າວໄປໜ້າ, ຜູ້ຕາງໜ້າຖາວອນຂອງສະຫະລັດ ປະຈຳອົງການສະຫະປະຊາຊາດ ທ່ານນາງ ລິນດາ ທອມມັສ-ກຣີນຟີລ ໄດ້ກ່າວ.
ທ່ານນາງທອມມັສ-ກຣີນຟີລ ເວົ້າວ່າ “ໂດຍສະເພາະ, ສະຫະລັດບໍ່ຢາກເຫັນບັນຫາຂັດແຍ້ງຢູ່ໃນເລບານອນ ບ່ອນທີ່ການທະວີຂຶ້ນຈະມີຜົນກະທົບຮ້າຍແຮງຕໍ່ສັນຕິພາບ ແລະຄວາມໝັ້ນຄົງຢູ່ໃນພາກພື້ນ, ແລະສຳລັບຄວາມຢູ່ດີກິນດີຂອງປະຊາຊົນຊາວເລບານອນ. ການຟື້ນຟູຄວາມສະຫງົບຢູ່ຕາມເຂດຊາຍແດນລະຫວ່າງ ອິສຣາແອລ ກັບ ເລບານອນ ແມ່ນມີຄວາມສຳຄັນຢ່າງຍິ່ງ.”
ທ່ານນາງທອມມັສ-ກຣີນຟີລ ກ່າວຕື່ມວ່າ “ອັນທີສອງ, ພວກເຮົາຮູ້ສຶກ ບໍ່ສະບາຍໃຈຢ່າງເລິກເຊິ່ງຍ້ອນຄວາມຮຸນແຮງທີ່ເພີ້ມສູງຂຶ້ນຫຼາຍ ໂດຍພວກຕັ້ງຖິ່ນຖານໃໝ່ອິສຣາແອລຫົວຮຸນແຮງ ຕໍ່ຊາວປາແລັສໄຕນ໌ ຢູ່ໃນເຂດຝັ່ງຕາເວັນຕົກຂອງແມ່ນ້ຳຈໍແດນ.”
ທ່ານນາງທອມມັສ-ກຣີນຟີລ ເວົ້າວ່າ “ພວກຫົວຮຸນແຮງທີ່ໂຈມຕີພົນລະເຮືອນຢູ່ໃນເຂດຝັ່ງຕາເວັນຕົກຂອງແມ່ນ້ຳຈໍແດນ ຕ້ອງຖືກນຳມາຮັບຜິດຊອບຕໍ່ກົດໝາຍ ແລະຄວາມຮຸນແຮງນີ້ ຕ້ອງຍຸຕິ. ແລະປະທານາທິບໍດີ ໄບເດັນ ໄດ້ຊີ້ແຈງຢ່າງແຈ່ມແຈ້ງແລ້ວວ່າ ສະຫະລັດກຽມພ້ອມທີ່ຈະເອົາມາດຕະການ ທີ່ລວມທັງ ການງົດອອກວີຊາແກ່ພວກຫົວຮຸນແຮງທັງຫຼາຍເຫຼົານີ້. ພວກເຮົາຄັດຄ້ານຢ່າງແຂງຂັນຕໍ່ການຂະຫຍາຍການຕັ້ງຖິ່ນຖານໃໝ່ ຢູ່ໃນເຂດຝັ່ງຕາເວັນຕົກຂອງແມ່ນ້ຳຈໍແດນ ຊຶ່ງບ່ອນທຳລາຍຄວາມເປັນໄປໄດ້ຂອງການເປັນປະເທດຂອງຊາວປາແລັສໄຕນ໌ ທີ່ມີຊາຍແດນຮ່ວມກັນ.”
ທ່ານນາງກ່າວອີກວ່າ “ອັນທີສາມ, ພວກເຮົາຮຽກຮ້ອງຕໍ່ທຸກຝ່າຍຢູ່ໃນພາກພື້ນ ແລະປະຊາຊົນຢູ່ທົ່ວໂລກ ໃຫ້ລະເວັ້ນຈາກການໃຊ້ຄຳເວົ້າທີ່ສຽດສີທີ່ຈະເຮັດໃຫ້ຄວາມເຄັ່ງຕຶງແລະຄວາມກຽດຊັງ ຮ້າຍແຮງຂຶ້ນຕື່ມ.”
ທ່ານນາງທອມມັສ-ກຣີນຟີລ ເວົ້າວ່າ “ອັນນັ້ນລວມທັງ ຄຳເວົ້າທີ່ໄຫ້ມະນຸດສະ ທຳ. ຕະຫຼອດໄລຍະສອງເດືອນທີ່ຜ່ານມາ, ພວກເຮົາໄດ້ເຫັນຄວາມກຽດຊັງຊາວຢິວ ແລະຄວາມຢ້ານກົວອິສລາມ ເພີ້ມສູງຂຶ້ນ. ພວກເຮົາເຫັນເລື້ອງນີ້ເກີດຂຶ້ນທາງອອນໄລນ໌ທົ່ວທຸກສືີ່ສັງຄົມ ແລະພວກເຮົາຍັງເຫັນມັນຢູ່ໃນຊຸມຊົນຕ່າງໆຂອງພວກເຮົາ ບ່ອນທີ່ຄວາມກຽດຊັງເປັນຕົ້ນກຳເນີດຂອງຄວາມຮຸນແຮງ.”
“ເຖິງແມ່ນວ່າ ຂະນະທີ່ພວກເຮົາສຸມໃສ່ວຽກງານຢ່າງຮີບດ່ວນທີ່ຢູ່ຕໍ່ໜ້າພວກເຮົາ ກໍຕາມ, ພວກເຮົາຕ້ອງເບິ່ງໄປຂ້າໜ້າເພື່ອອະນາຄົດທີ່ດີກວ່າເກົ່າ” ເອກອັກຄະລັດຖະທູດ ທອມມັສ-ກຣີນຟີລ ໄດ້ກ່າວ.
ທ່ານນາງກ່າວຕໍ່ໄປວ່າ “ພວກເຮົາຕ້ອງການວິທີແກ້ໄຂແບບສອງປະເທດ ບ່ອນທີ່ເຂດກາຊາ ແລະຝັ່ງຕາເວັນ ຕົກຂອງແມ່ນ້ຳຈໍແດນ ແມ່ນມາຮ່ວມເຂົ້າກັນຄືນໃໝ່ ພາຍໃຕ້ໂຄງສ້າງການປົກ ຄອງອັນດຽວ ແລະໃນທີ່ສຸດພາຍໃຕ້ອຳນາດການປົກຄອງຂອງປາແລັສໄຕນ໌ ທີ່ໄດ້ຮັບການຟື້ນຟູ. ອັນນີ້ເປັນພຽງການຮັບປະກັນຂອງຄວາມປອດໄພ ແລະ ປະຊາທິປະໄຕຂອງອິສຣາແອລ ເທົ່ານັ້ນ. ອັນນີ້ເປັນພຽງການຮັບປະກັນຕໍ່ຄວາມໄຝ່ຝັນຂອງຊາວປາແລັສໄຕນ໌ ໃນຄວາມປາຖະໜາອັນຊອບທຳຂອງພວກເຂົາເຈົ້າ ກັບການມີປະເທດຂອງຕົນເອງ ເທົ່ານັ້ນ. ອັນນີ້ ເປັນພຽວິທີທາງທີ່ຈະຍຸຕິວົງຈອນຂອງຄວາມຮຸນແຮງດຽວນີ້ ແລະຄັ້ງສຸດທ້າຍ.”