Accessibility links

Breaking News

បទវិចារណកថា៖ បុណ្យ​រំឭក​គុណ Thanksgiving ឆ្នាំ២០២០


ផ្ទាំងគំនូរ​មួយ​ដែល​គូរ​ដោយ Jean Leon Gerome Ferris ដែល​មាន​ឈ្មោះ​ថា «The First Thanksgiving» ដែល​មាន​ន័យ​ថា «ការថ្លែងអំណរគុណ​លើកដំបូង» បង្ហាញ​អំពី​អ្នក​ធ្វើដំណើរ​ដែល​មក​ដល់​ឆ្នេរ​សមុទ្រ​នៃ​ទ្វីប​អាមេរិក​ខាងជើង និង​ជនជាតិដើម​អាមេរិក ​ជួបជុំ​គ្នា​ទទួលទាន​អាហារ។
ផ្ទាំងគំនូរ​មួយ​ដែល​គូរ​ដោយ Jean Leon Gerome Ferris ដែល​មាន​ឈ្មោះ​ថា «The First Thanksgiving» ដែល​មាន​ន័យ​ថា «ការថ្លែងអំណរគុណ​លើកដំបូង» បង្ហាញ​អំពី​អ្នក​ធ្វើដំណើរ​ដែល​មក​ដល់​ឆ្នេរ​សមុទ្រ​នៃ​ទ្វីប​អាមេរិក​ខាងជើង និង​ជនជាតិដើម​អាមេរិក ​ជួបជុំ​គ្នា​ទទួលទាន​អាហារ។

តទៅ​នេះ គឺ​ជា​បទ​វិចារណកថា​ដែល​ឆ្លុះ​បញ្ចាំង​អំពី​ឧត្តមគតិ​ និង​ស្ថាប័ន​អាមេរិកាំង

នៅ​ពេលមួយរវាង​ថ្ងៃ​ទី​២១ ខែ​កញ្ញា និង​ថ្ងៃទី១១ ខែ​វិច្ឆិកា​ឆ្នាំ១៦២១ ក្រុម​បុរស ស្ត្រី​និង​កុមារអង់គ្លេស​៥៣នាក់ បាន​ត្រូវ​ចូល​រួម​ដោយក្រុម​កុលសម្ព័ន្ធជនជាតិ​ដើម​អាមេរិក​ជា​អ្នកស្រុកប្រមាណ​៩០​នាក់ នៅ​ពិធី​ជប់លៀង​ធំ​មួយដើម្បី​អរគុណ​ព្រះ​ ចំពោះការ​ច្រូត​កាត់​ដំបូង​របស់​ពួក​គេ​នៅ​ក្នុងប្រទេស​ថ្មី​របស់​ពួក​គេ​ គឺដែនដី​អាណានិគម Plymouth នៅ​ក្នុងរដ្ឋ Massachusetts សព្វ​ថ្ងៃនេះ។

ពួកគេមានហេតុការណ៍​ច្រើន ត្រូវ​អរគុណព្រះ។ ​កាល​ពី​មួយឆ្នាំ​មុន​ពេល​នោះ ​គឺនៅ​ពាក់​កណ្តាលខែ​វិច្ឆិកា​ឆ្នាំ១៦២០​ ពួកគេជា​ផ្នែក​មួយ​នៃ​ក្រុមនិគមជន១០២​នាក់ និង​ក្រុម​នាវិក​៣០នាក់ ដែល​បានធ្វើ​ដំណើរ​មក​ដល់ឆ្នេរ​សមុទ្រ​នៃទ្វីប​អាមេរិក​ខាង​ជើង​នៅ​លើសំពៅ​មួយ​គ្រឿង​មានឈ្មោះ Mayflower។ ពួក​គេ​ជា​ក្រុម Puritans ជា​ក្រុម​បំបែក​ខ្លួន​ខាង​សាសនា​ ដែល​បានត្រូវចាត់ទុកថា​ ជាពួក​ជ្រុលនិយម​ ​ហើយ​រដ្ឋាភិបាល​នៃ​ប្រទេស​អង់គ្លេស​ដែលជា​ប្រទេស​កំណើតរបស់​ពួកគេ ក៏បានចាត់ទុក​ពួក​គេថា ​ជា​ក្រុមមិន​ត្រឹមត្រូវ​តាម​ច្បាប់​ផងដែរ។

ដោយ​ធុញ​ទ្រាន់​នឹងការ​ធ្វើ​ទុក្ខបុកម្នេញ​ក្នុង​ទ្វីប​អឺរ៉ុប​ ក្រុម​ជន​ទាំង​នេះ​ បានធ្វើដំណើរ​សំដៅ​ទៅ​ដែនដី​អាណានិគម​ Virginia។ ក៏ប៉ុន្តែ ធាតុអាកាស​នៅ​រដូវ​ធ្លាក់​ទឹក​កក​ បាន​បង្ខំ​ពួកអ្នក​ដំណើរ​ទាំង​នេះ​ឲ្យ​បោះ​យុថ្កានៅ​តំបន់​ Cape Cod ចម្ងាយ​ជាង​៣៥០​គ.ម​ ទិសឦសាន​នៃ​គោលដៅដែល​ពួក​គេ​បានជ្រើសរើស។

យ៉ាង​ណា​ក៏​ដោយ​ ក៏ពួក​និគមជន​ទាំងនេះ បានសម្រេចចិត្តតាំងលំនៅដ្ឋាននៅ​លើ​ដី​គោកស្ថិត​នៅ​ម្ខាង​ទៀតនៃ​ឆក​សមុទ្រពី​កន្លែង​បោះ​យុថ្កាដំបូង​របស់​ពួក​គេនៅ Cape Cod ហើយ​បាន​ចាប់​ផ្តើម​បង្កើត​សហគមន៍​មួយ ដែលនៅទី​នោះ​ពួក​គេអាច​រស់​នៅតាម​ជំនឿសាសនា​របស់ពួក​គេ​ផ្ទាល់។​

រយៈពេលឆ្នាំទី​មួយ​ពួក​គេ​ជួប​ការ​លំបាក​ច្រើន ហើយ​ហៀប​តែ​បញ្ចប់​សហគមន៍​អាណានិគម​នេះ នៅមុន​ពេល​វា​ចាក់ឫស​គល់។ ក្នុង​ពេល​មួយ​ឆ្នាំ ​ចំនួន​ជិត​ពាក់​កណ្តាលនៃ​ក្រុម​និគមជន​១០២​នាក់​ បានស្លាប់ដោយសារទុរ្ភិក្ស​ ជំងឺ ​និង​ធាតុអាកាសអាក្រក់​ខ្លាំង។ ក៏​ប៉ុន្តែមាន​ការ​ច្រូត​កាត់ផល​ដំណាំ​ល្អក្នុង​រដូវ​ក្តៅ ហើយ​ក្នុង​រដូវស្លឹកឈើ​ជ្រុះ​ បុរស​២២នាក់​ ស្ត្រី៤​នាក់ និងយុវជន​ជំទង់៩​នាក់​ យុវនារីជំទង់៥​នាក់​ និង​កុមារ ​១៣នាក់​ បានអង្គុយ​រួម​គ្នា​អបអរ​សាទរ​ប្រារព្ធភោគ​ផលល្អ​ជា​មួយ​ក្រុម​ជនជាតិ​ដើម​អាមេរិក​អំបូរ Wampanoag ជាអ្នក​ស្រុកដើម​ ជា​អ្នក​ជិតខាង​ពួក​គេ។

រដ្ឋ Massachusetts មិន​មែន​ជា​កន្លែង​ទី​មួយដែល​អះអាង​ថា ​រដ្ឋ​របស់​ពួក​គេជា​រដ្ឋ​ដំបូង​ដែល​បាន​ប្រារព្ធបុណ្យរំឭក​គុណ ​Thanksgiving។ ឯកសារ​ប្រវត្តិសាស្ត្រ​ជា​ច្រើន​បញ្ជាក់ថា ​ក្រុម​អ្នករុករក​កំណើត​អេស្ប៉ាញ និងនិគមជន​អង់គ្លេស​ឯ​ទៀតៗបានប្រារព្ធ​ពិធីរំឭក​គុណ​ខាង​សាសនា​បែប Thanksgiving នេះ ​នៅក្នុង​រដ្ឋ Florida Texas រដ្ឋ Maine និង​រដ្ឋ Virginia នៅ​មុន​ឆ្នាំ១៦២០។ ប៉ុន្តែការប្រារព្ធ​ទាំង​នោះ មាន​ធ្វើ​ដាច់​ពី​គ្នា​តាម​មូលដ្ឋាន​ដែលរសាត់​បាត់​តាម​ពេល​វេលា។ ដូច្នេះ ដោយសារ​មានការ​ជ្រោមជ្រែងឱ្យ​មាន​ការ​គាំទ្រ​ច្រើន​ដោយ​រដ្ឋ Massachusetts ពិធី​បុណ្យរំឭក​គុណ Thanksgiving សម័យទំនើប បាន​ត្រូវ​បង្កើត​ដំបូងជា​ផ្លូវការ​នៅ​ក្នុង​រដ្ឋ​ទាំងអស់​របស់​សហរដ្ឋ​អាមេរិក កាល​ពី​ឆ្នាំ១៨៦៣ ដោយ​សេចក្តីប្រកាសប្រធានាធិបតី​របស់​លោក Abraham Lincoln។ លោក​ប្រធានាធិបតី Franklin Roosevelt បាន​ប្តូរ​ការប្រារព្ធ​ពិធី​បុណ្យ​នេះ ​ទៅ​សប្តាហ៍​ទី​បួននៃ​ខែ​វិច្ឆិកា។

ពិធីបុណ្យ Thanksgiving ​បានចាប់ផ្តើម​ជាពិធីសូត្រ​ធម៌សម្តែង​អំណរ​គុណដល់ព្រះ ដោយ​ក្រុម​ជនចំណាកស្រុក​ ដែល​ប្រសិន​បើ​គ្មានការ​ជួយពី​ក្រុមអ្នក​ជិតខាងពួក​គេ​ដែល​ជា​អ្នក​ស្រុក​ដើមទេនោះ​ ពួក​គេ​ទំនង​ជាមិនអាច​នៅ​រស់​រាន​បាន​ទេ​ក្នុង​រយៈពេល​មួយ​ឆ្នាំ​ដំបូង​របស់ពួក​គេក្នុង​ផ្នែក​ខាង​ជើង​នៃ​ប្រទេសអាមេរិក។

នៅ​ពេល​សព្វ​ថ្ងៃនេះ ទោះណា​ជាបុណ្យ Thanksgiving ជា​ការ​ជួបជុំ​គ្រួសារ​ និង​មិត្តភក្តិ​តាម​ប្រពៃណី​ក៏​ដោយ ក៏​ការ​គំរាមកំហែង​ដល់​ជិវិត និង​សុខភាព​ដោយការ​រាតត្បាតជា​សាកល​នៃ​ជំងឺ​កូវីដ១៩ នាំ​ឱ្យមនុស្សជា​ច្រើន​នាក់​ ​ប្រារព្ធបុណ្យនេះនៅ​ក្នុង​ផ្ទះតែ​ឯង​ ដោយ​សម្តែងអំណរគុណ​របស់ពួក​គេចំពោះឱកាសនៃ​អនាគត​មួយ​ដែល​នឹង​ត្រចះត្រចង់៕

XS
SM
MD
LG