ບົດບັນນາທິການ ທີ່ສະທ້ອນເຖິງນະໂຍບາຍ ຂອງລັດຖະບານສະຫະລັດ
ສິດເສລີພາບໃນການນັບຖືສາສະໜາ ກໍເຊັ່ນດຽວກັນກັບສິດທິມະນຸດອື່ນໆ ແມ່ນເປັນສິດທິສາກົນ ນັ້ນຄືຄຳປະກາດ ຂອງລັດຖະມົນຕີການຕ່າງປະເທດສະຫະລັດ ທ່ານແອນໂທນີ ບລິງເກັນ ໃນພິທີ ນຳອອກເຜີຍແຜ່ ລາຍງານປະຈຳປີ ຂອງກະຊວງການຕ່າງປະເທດສະຫະລັດ ກ່ຽວກັບສິດເສີພາບ ໃນການນັບຖືສາສະໜາຂອງລະຫວ່າງປະເທດ.
“ທຸກໆຄົນ ບໍ່ວ່າຢູ່ແຫ່ງຫົນໃດກໍຕາມ ແມ່ນມີສິດທີ່ຈະໄດ້ຮັບ ບໍ່ວ່າເຂົາເຈົ້າຢູ່ບ່ອນໃດ ເຂົາເຈົ້ານັບຖືຫຍັງ ຫຼືເຂົາເຈົ້າບໍ່ນັບຖືຫຍັງກໍຕາມ.... ສິດເສລິີພາບໃນການນັບຖືສາສະນາບໍ່ສາມາດບັນລຸຜົນໄດ້ ນອກຈາກວ່າ ສິດທິມະນຸດອື່ນໆແມ່ນໄດ້ຮັບການເຄົາລົບ ແລະເວລາໃດທີ່ລັດຖະບານ ລະເມີດສິດທິຂອງປະຊາຊົນເຂົາ ເຈົ້າ ໃນການນັບຖືສາສະໜາຫຼືປະຕິບັດສາສະໜາກິດຢ່າງເສລີ ມັນເປັນອັນຕະລາຍຕໍ່ສິດທິອື່ນໆ.”
ສຳລັບຫຼາຍໆຄົນຢູ່ໃນທົ່ວໂລກ ສິດເສລີພາບໃນການນັບຖືສາສະໜາ ແມ່ນຍັງຢູ່ໄກເກີນເອື້ອມ. ຄວາມຈິງແລ້ວ ອີງຕາມສູນກາງຄົ້ນຄວ້າພິວ ມີ 56 ປະເທດ ຈຳກັດຮັດແຄບສິດເສລີພາບ ໃນການນັບຖືສາສະໜາ ຢ່າງເຄັ່ງຄັດ ຫຼືຢ່າງຮ້າຍແຮງ.
ອຳນາດການປົກຄອງຂອງອີຣ່ານ ຍັງສືບຕໍ່ຂົ່ມຂູ່ ຮາວີລົບກວນ ຈັບກຸມຄຸມຂັງສະມາຊິກຂອງສາສະໜາກຸ່ມນ້ອຍ ຮວມທັງສາສະໜາບາຮາຍ ສາສະໜາຄຣິສ ສາສະໜາຢິວ ສາສະໜາໂຊໂຣອາສຕຣຽນ ສາສະໜາອິສລາມນິກາຍຊຸນນີແລະນິກາຍຊູຟີ.
ຢູ່ປະເທດມຽນມາ ພວກຜູ້ນຳໃນການກໍ່ລັດຖະປະຫານ ແມ່ນຮວມຢູ່ໃນຈຳນວນພວກທີ່ຮັບຜິດຊອບໃນການກວດລ້າງຊົນຊາດຊົນເຜົ່າ ແລະການກໍ່ໂທດກຳອື່ນໆ ຕໍ່ພວກຊາວມຸສລິມໂຣຮິງຢາ.
ຢູ່ໃນປະເທດຣັດເຊຍ ພວກເຈົ້າໜ້າທີ່ຍັງສືບຕໍ່ຮາວີລົບກວນ ຈັບກຸມຄຸມຂັງແລະ ຢຶດຊັບສິນຂອງພວກທີ່ນັບຖືສາສະໜາເຈໂຮວາວິດແນັດ ພ້ອມທັງພວກຊາວມຸສລິມກຸ່ມນ້ອຍ ໃນຂໍ້ອ້າງໂດຍຖືກກ່າວຫາວ່າເປັນພວກຫົວຮຸນແຮງຈັດ.
ຊາອຸດີ ອາຣາເບຍ ຍັງສືບຕໍ່ເປັນພຽງປະເທດດຽວໃນໂລກ ທີບໍ່ມີວັດຂອງສາສະໜາຄຣິສ ເຖິງແມ່ນມີຊາວຄຣິສຕຽນຫຼາຍກວ່າ 1 ລ້ານຄົນ ອາໄສຢູ່ໃນປະເທດຊາອຸດີ ອາຣາເບຍກໍຕາມ.
ແລະສາທາລະນະລັດປະຊາຊົນຈີນ ໂດຍທົ່ວໄປແລ້ວ ຖືວ່າ ການສະແດງອອກທາງດ້ານສາສະໜາເປັນສິ່ງທີ່ຜິດກົດໝາຍ ແລະຍັງສືບຕໍ່ກໍ່ໂທດກຳຕ້ານມະນຸດຊາດ ແລະຂ້າລ້າງເຜົ່າພັນພວກຊາວມຸສລິມວີເກີ້ ຕະຫຼອດທັງສະມາຊິກຂອງສາສະໜາແລະຊົນກຸ່ມນ້ອຍອື່ນໆ ຢູ່ໃນເຂດຊິນຈຽງ.
ແຕ່ທ່ານບລິງເກັນ ກ່າວວ່າ ຢູ່ໃນບາງປະເທດ ກໍພວມມີການເອົາບາດກ້າວເພື່ອໃຫ້ສິດເສລີພາບຫຼາຍຂຶ້ນໃນການນັບຖືສາສະໜາ:
“ໃນປີກາຍນີ້ ລັດຖະບານໄລຍະຂ້າມຜ່ານພາຍໃຕ້ການນຳພາຂອງພົນລະເຮືອນຢູ່ປະເທດຊູດານ ກໍໄດ້ຍົກເລີກ ການອອກຈາກສາສະໜາ ແລະກົດໝາຍຄວາມເປັນລະບຽບຂອງສັຄົມ ທີ່ໃຊ້ຮາວີລົບກວນ ສະມາຊິກສາສະໜາກຸ່ມນ້ອຍຕ່າງໆ. ລັດຖະບານອຸຸສເບັກກິສຖານໄດ້ປ່ອຍປະຊາຊົນຫຼາຍຮ້ອຍຄົນທີ່ຖືກຄຸກຍ້ອນການເຊື່ອຖືສາສະໜາຂອງພວກເຂົາເຈົ້າ ເຕີກເມນິສຖານ ກໍໄດ້ປ່ອຍພວກທີ່ນັບຖືສາສະໜາເຈໂຮວາວິສແນັດ 16 ຄົນຜູ້ທີ່ມີຄວາມຄັດຄ້ານທາງຈິດສຳນຶກ ແລະປະຕິເສດບໍ່ຍອມຮັບໃຊ້ເຂົ້າເປັນທະຫານ.”
ພວກເຮົາຈະສືບຕໍ່ຮັກສາການເປັນຜູ້ນຳພາຂອງອາເມຣິກາທີ່ມີມາເປັນເວລາດົນນານກ່ຽວສິດເສລີພາບໃນການນັບຖືສາສະໜາ ນັ້ນຄືຄຳເວົ້າຂອງທ່ານບລິງເກັນແລະຈະສືບຕໍ່ເຮັດວຽກ ກັບພວກສົ່ງເສີມສິດທິມະນຸດ ແລະປະຊາຄົມສາສະໜາ ເພື່ອທັບມ້າງທຸກຮູບແບບຂອງຄວາມຄຽດຊັງ ແລະການຈຳແນກກີດກັນທີ່ມີແຮງຈູງໃຈມາຈາກສາສະໜາ.