ບົດບັນນາທິການ ທີ່ສະທ້ອນເຖິງນະໂຍບາຍ ຂອງລັດຖະບານສະຫະລັດ
ອົງການສະຫະປະຊາຊາດໃຫ້ຄຳຈຳກັດຄວາມ ກ່ຽວກັບຄຳວ່າ ຫິວໂຫຍ ແມ່ນຊ່ວງໄລຍະເວລາທີ່ຜູ້ຄົນບໍ່ມີຄວາມໝັ້ນຄົງຢ່າງຮ້າຍແຮງທາງດ້ານອາຫານການກິນ ໂດຍບໍ່ໄດ້ກິນເຂົ້າ ມາເປັນເວລາຫຼາຍໆມື້ຕິດຕໍ່ກັນ.
ຜູ້ຄົນບໍ່ໄດ້ຫິວໂຫຍ ຍ້ອນໂລກຂອງເຮົາບໍ່ໄດ້ຜະລິດອາຫານການກິນພຽງພໍສຳລັບທຸກໆຄົນ. ເຖິງແມ່ນວ່າໂລກຂອງເຮົາມີອາຫານການກິນ ຫຼາຍກວ່່າພຽງພໍສຳລັບລ້ຽງດູທຸກໆຄົນກໍຈິງ ແຕ່ຍັງມີ 746 ລ້ານຄົນຢູ່ໃນທົ່ວໂລກ ພາກັນໄປ
ນອນໂດຍບໍ່ໄດ້ກິນເຂົ້າແລງໃນແຕ່ລະຄືນ.
ໃນວັນທີ 28 ພຶດສະພາຜ່ານມາ ພວກເຮົາໄດ້ລະນຶກເຖິງວັນອຶດຫິວຂອງໂລກ. ປີນີ້ ແມ່ນຂີດໝາຍຄົບຮອບປີທີ 10 ໃນການລະນຶກເຖິງວັນດັ່ງກ່າວ ຊຶ່ງຈະແນຄວາມສົນໃຈໄປໃສ່ຄວາມຈິງທີ່ວ່າ ເຖິງແມ່ນໂລກຂອງເຮົາ ໄດ້ສ້າງຄວາມກ້າວໜ້າ ໃນທຸກໆປີ ແຕ່ມີປະມານ 9 ລ້ານຄົນ ໄດ້ເສຍຊີວິດ ອັນເປັນຜົນເນື່ອງມາຈາກຄວາມອຶດຫິວ.
ນັບເປັນເວລານຶ່ງທົດສະວັດມາແລ້ວ ຈຳນວນຜູ້ຄົນ ທີ່ມີການຂາດອາຫານການກິນແບບເຮື້ອຮັງໄດ້ຫຼຸດລົງຢ່າງຫຼວງຫຼາຍ ອີງຕາມລາຍງານຂອງອົງການສະຫະປະຊາຊາດ. ໃນຂະນະທີ່ 15 ເປີເຊັນຂອງປະຊາກອນໂລກໄດ້ຮັບອາຫານການກິນບໍ່ພຽງພໍໃນໄລຍະ 4 ປີທຳອິດຂອງສັດຕະວັດນີ້ ຈຳນວນດັ່ງກ່າວໄດ້ຫຼຸດລົງ
ເປັນໜ້ອຍກວ່າ 9 ເປີເຊັນ ພາຍໃນປີ 2015. ແຕ່ແນວໃດກໍຕາມ ໃນໄລຍະ 5 ປີກວ່າຕໍ່ມາ ມີຜູ້ຄົນໃນຈໍານວນຫຼາຍຂຶ້ນເລື້ອຍໆ ເລີ້ມຕົກຢູ່ໃນສະພາບທີ່ບໍ່ມີອາຫານການກິນພຽງພໍເພີ້ມຂຶ້ນ ສ່ວນໃຫຍ່ກໍເນື່ອງມາຈາກບັນຫາຂັດແຍ້ງ ສະພາບອາກາດທີ່ຮ້າຍແຮງຈັດແລະເຫດການທີ່ກໍ່ໃຫ້ເກີດຄວາມປັ່ນປ່ວນທາງດ້ານເສດຖະກິດອື່ນໆ. ໃນລະຫວ່າງປີ 2018 ຫາ 2019 ເທົ່ານັ້ນ ຈຳນວນຜູ້ຄົນທີ່ບໍ່ມີອາຫານການກິນພຽງພໍໄດ້ເພີ້ມຂຶ້ນ 10 ລ້ານຄົນ.
ຫຼັງຈາກນັ້ນກໍແມ່ນໂຣກລະບາດໂຄວິດ-19 ແລະຜົນກະທົບທີ່ຕິດຕາມມາ. ເສດຖະກິດທີ່ເກີດບັນຫາ ແມ່ນເປັນຜົນມາຈາກຕະຫຼາດວຽກງານທີ່ດຳເນີນໄປບໍ່ຄ່ອຍດີແລະການຫຼຸດລົງຂອງລາຍໄດ້. ໃນຂະນະດຽວກັນການລົບກວນຕໍ່ຕ່ອງໂສ້ອຸບປະທານທາງດ້ານອາຫານການກິນ ອັນເປັນຜົນເນື່ອງມາຈາກລາຄາທີ່ແພງຂຶ້ນ. ຜົນກະທົບຕໍ່ປະຊາກອນ ຜູ້ທີ່ທຸກຍາກແລະມີຄວາມຫຼໍ່ແຫຼມທີ່ສຸດ ພວກທີ່ໄດ້ປະ ສົບກັບການຂາດແຄນອາຫານການກິນແລະຂາດສານອາຫານຢູ່ແລ້ວນັ້ນ ແມ່ນຮ້າຍແຮງໜັກໜ່ວງ ແລະຍ້ອນໂຄວິດ-19 ໄດ້ກໍ່ໃຫ້ເກີດການລົບກວນຕໍ່ລະບົບຂົນສົ່ງຂອງໂລກ ມັນຈຶ່ງເປັນການຍາກຕື່ມຂຶ້ນທີ່ຈະເຂົ້າເຖິງປະຊາຄົມທີ່ກຳລັງຕົກຢູ່ໃນສະພາບທີ່ຕ້ອງການຄວາມຊ່ວຍເຫຼືອທາງດ້ານອາຫານການກິນ.
ສະຫະລັດ ທີ່ຈິງແລ້ວ ແມ່ນຜູ້ໃຫ້ການຊ່ວຍເຫຼືອທາງດ້ານອາຫານການກິນລາຍໃຫຍ່ທີ່ສຸດໃນໂລກ. ໂດຍເຮັດວຽກຜ່ານການລ້ຽງດູໃນອະນາຄົດ ຂໍ້ລິເລີ້ມ ຂອງລັດຖະບານສະຫະລັດ ເພື່ອຮັບມືກັບຄວາມອຶດຫິວຂອງໂລກ ແລະຄວາມບໍ່ໝັ້ນຄົງທາງດ້ານອາຫານການກິນ ຕະຫຼອດທັງໂຄງການໃຫ້ຄວາມຊ່ວຍເຫຼືອທີ່
ຢູ່ພາຍໃຕ້ໂຄງການໃຫ້ຄວາມຊ່ວຍເຫຼືອອື່ນໆ 3 ໂຄງການ ພາຍໃຕ້ຄວາມອຸບປະຖຳຂອງອົງການຢູເສດ ກະຊວງການຕ່າງປະເທດ ແລະກະຊວງກະເສດນັ້ນ ສະຫະລັດຈະສືບຕໍ່ເປັນຜູ້ນຳພາໃນການຕໍ່ສູ້ກັບຄວາມອຶດຫິວ ທີ່ມີມາເປັນເວລາດົນນານແລ້ວນັ້ນ.