ບົດບັນນາທິການ ທີ່ສະທ້ອນເຖິງນະໂຍບາຍ ຂອງລັດຖະບານສະຫະລັດ
ລັດຖະມົນຕີກະຊວງປ້ອງກັນປະເທດສະຫະລັດ ທ່ານລອຍ ອອສຕິນ ໄດ້ເດີນທາງໄປຢ້ຽມຢາມ 3 ປະເທດ ໃນເຂດທະເລດຳ ເມື່ອໄວໆມານີ້ ທີ່ປະກອບດ້ວຍຈໍເຈຍ ຢູເຄຣນ ແລະໂຣມາເນຍ.
ທ່ານໄດ້ກ່າວຊົມເຊີຍການເປັນພາຄີທີ່ເຂັ້ມແຂງທາງດ້ານຄວາມໝັ້ນຄົງແລະຄຸນຄ່າຂອງປະເທດເຫຼົ່ານີ້ ມີຮ່ວມກັນກັບສະຫະລັດ ຮັບຮູ້ເຖິງການເສຍສະຫຼະຂອງຈໍເຈຍແລະໂຣມາເນຍ ທີ່ໄດ້ມີຂຶ້ນໃນຖານະທີ່ເປັນສ່ວນນຶ່ງຂອງກຳລັງແນວໂຮມ ທີ່ໄດ້ສູ້ລົບຢູ່ໃນອີຣັກ ແລະອັຟການິສຖານ ແລະໄດ້ກ່າວຢ້ຳເຖິງການໃຫ້ຄວາມສະໜັບສະໜຸນຂອງສະຫະລັດຕໍ່ອະທິປະໄຕຂອງແລະຜືນແຜ່ນດິນອັນຄົບຖ້ວນ ຂອງປະເທດທັງສາມ ໃນຂະນະທີ່ພວກເຂົາເຈົ້າຍັງສືບຕໍ່ປະເຊີນກັບການກົດດັນຈາກກິດຈະກຳ ທີ່ເປັນໄພຂອງລັດຖະບານຣັດເຊຍ.
ລັດຖະມົນຕີກະຊວງປ້ອງກັນປະເທດອອສຕິນ ກ່າວວ່າ “ມັນຜ່ານໄປໂດຍບໍ່ມີໃຜເວົ້າວ່າເຂດດັ່ງກ່າວມີຄວາມຫຼໍ່ແຫຼມຕໍ່ການຮຸກຮານຂອງຣັດເຊຍ ແລະພວກເຮົາໄດ້ເຫັນຫຼັກຖານທີ່ວ່ານັ້ນ ໃນການຮຸກຮານທີ່ຍັງດຳເນີນຢູ່ຕໍ່ມາໃນພາກຕາເວັນອອກຂອງຢູເຄຣນ ການຢຶດຄອງບາງເຂດຂອງຈໍເຈຍ ການເຮັດໃຫ້ທະເລດຳເປັນເຂດເຄື່ອນໄຫວທາງທະຫານ ແລະການທ້າທາຍເກາະຜິດທັງຢູ່ໃນເຂດນ່ານຟ້າແລະໃນທ້ອງທະເລ. ກິດຈະກຳການສ້າງຄວາມບໍ່ທຸ່ນທ່ຽງຂອງຣັດເຊຍແມ່ນໄດ້ສະທ້ອນໃຫ້ເຫັນເຖິງຄວາມໄຝ່ຝັນຂອງປະເທດດັ່ງກ່າວ ທີ່ຢາກຈະມີບົດບາດແບບຄອບງຳຄືນໃໝ່ຢູ່ໃນຂົງເຂດ ແລະຂັດຂວາງບໍ່ໃຫ້ຢູໂຣບ ບັນລຸຄວາມເປັນເອກກະພາບ ເສລີພາບ ແລະມີສັນຕິພາບ.”
ລັດຖະມົນຕີກະຊວງປ້ອງກັນປະເທດອອສຕິນ ກ່າວຕໍ່ພວກນັກຂ່າວວ່າ ສະຫະລັດ “ໃຫ້ຄວາມສຳຄັນຢ່າງໃຫຍ່ຫຼວງ ຕໍ່ການເປັນພາຄີແລະການຮ່ວມມືທີ່ພວກເຮົາໄດ້ຮັບຈາກຄູ່ຮ່ວມງານຂອງພວກເຮົາ” ຢູ່ໃນຂົງເຂດ ແລະໃຫ້ຂໍ້ສັງເກດວ່າ ສະຫະລັດຈະສືບຕໍ່ສະໜອງການຊ່ວຍເຫຼືອ ເພື່ອເສີມສ້າງຄວາມເຂັ້ມແຂງ ໃນຄວາມສາມາດທາງທະເລຂອງຈໍເຈຍ ຢູເຄຣນ ແລະໂຣມາເນຍ ພ້ອມໆກັນກັບປະເທດບູລກາເຣຍ ເພື່ອສະໜັບສະໜຸນການດຳເນີນຄວາມພະຍາຍາມໃນການ
ສະກັດກັ້ນແລະປ້ອງກັນ ຕໍ່ຕ້ານກິດຈະກຳທີ່ເປັນໄພຂອງຣັດເຊຍ.
ການເດີນທາງໄປຢ້ຽມຢາມ ປະເທດທັງສາມ ຂອງລັດຖະມົນຕີປ້ອງກັນປະເທດ ອອສຕິນ ຍັງໄດ້ເນັ້ນຢ້ຳໃຫ້ເຫັນຜົນປະໂຫຍດຂອງອົງການເນໂຕ້ໃນດ້ານຄວາມໝັ້ນຄົງຢູ່ທະເລດຳ ໂຣມາເນຍໃນຖານະພັນທະມິດທີ່ສຳຄັນສຸດຂອງອົງການເນໂຕ້ ຊຶ່ງມີຢູເຄຣນ ແລະຈໍເຈຍເປັນປະເທດພາຄີຊຶ່ງມີຄວາມໄຝ່ຝັນຢາກເຂົ້າເປັນສະມາຊິກຂອງອົງການເນໂຕ້.
ລັດຖະມົນຕີກະຊວງປ້ອງກັນປະເທດຂອງສະຫະລັດ ເອີ້ນໂຣມາເນຍວ່າ “ເປັນປະເທດຕົວແບບທີ່ສຳຄັນ ສຳລັບການໃຫ້ຄວາມໝັ້ນໝາຍຂອງພັນທະມິດ ໃນການແບ່ງປັນຄວາມຮັບຜິດຊອບຮ່ວມ ການປັບປຸງດ້ານປ້ອງກັນປະເທດໃຫ້ທັນສະໄໝ ແລະການປະກອບສ່ວນໃນການປະຕິບັດງານຂອງອົງການເນໂຕ້ຢູ່ໃນຢູໂຣບ ແລະໄກໄປກວ່ານັ້ນ.” ນອກນັ້ນ ທ່ານຍັງໄດ້ກ່າວຊົມເຊີຍໂຣມາເນຍ ຊຶ່ງເປັນນຶ່ງໃນຈຳນວນບໍ່ເທົ່າໃດປະເທດຂອງພັນທະມິດເນໂຕ້ທີ່ໄດ້ເປັນເຈົ້າພາບໃຫ້
ການຕ້ອນຮັບແກ່ກຳລັງໝູນວຽນ ໃນຈຳນວນທີ່ສຳຄັນຂອງສະຫະລັດ.
ຢູ່ທີ່ປະເທດຈໍເຈຍແລະຢູເຄຣນ ລັດຖະມົນຕີກະຊວງປ້ອງກັນປະເທດ ອອສຕິນໄດ້ສະແດງໃຫ້ເຫັນຢ່າງຈະແຈ້ງວ່າ ການເສີມຄວາມເຂັ້ມແຂງໃຫ້ແກ່ສະຖາບັນປະຊາທິປະໄຕ ຍັງເປັນກຳລັງແພງຕ້ານການສໍ້ລາດບັງຫຼວງ ແລະການຮຸກຮານ ແລະທ່ານໄດ້ຊຸກຍູ້ໃຫ້ລັດຖະບານຂອງປະເທດທັງສອງ ທຳການປະຕິຮູບຕໍ່ໄປທີ່ຈະສ້າງຄວາມກ້າວໜ້າໃຫ້ແກ່ຄວາມໄຝ່ຝັນຂອງພວກເຂົາເຈົ້າ ໃນການເປັນກຸ່ມແອັດແລນຕິກຢູໂຣບ.
ລັດຖະມົນຕີອອສຕິນ ກ່າວວ່າ “ຄວາມໝັ້ນຄົງແລະສະຖຽນລະພາບຂອງທະເລດຳ ແມ່ນນອນຢູ່ໃນຜົນປະໂຫຍດແຫ່ງຊາດຂອງສະຫະລັດແລະມີຄວາມສຳຄັນຕໍ່ຄວາມໝັ້ນຄົງໃນເຂດພາກຕາເວັນອອກຂອງອົງການເນໂຕ້. ພວກເຮົາຈະສືບຕໍ່ໃຫ້ການເພັ່ງເລັງກ່ຽວກັບເລື້ອງນີ້ ແລະພວກເຮົາຈະສືບຕໍ່ເຮັດວຽກຮ່ວມກັບພາຄີຂອງພວກເຮົາ ຢູ່ໃນຂົງເຂດດັ່ງກ່າວ.”