Accessibility links

Breaking News

ບົດບັນນາທິການ: ການສະຫຼອງວັນຂອບຄຸນພະເຈົ້າ ປີ 2021


​ວັນ​ຂອບ​ຄຸນ​ພະ​ເຈົ້າ

ບົດບັນນາທິການ ທີ່ສະທ້ອນເຖິງນະໂຍບາຍ ຂອງລັດຖະບານສະຫະລັດ

ໃນ​ວັນ​ພະ​ຫັດ​ອາ​ທິດ​ທີ​ສີ່ ຂອງ​ເດືອນ​ພະ​ຈິກ ຊາວ​ອາ​ເມ​ຣິ​ກັນ ​ສະ​ຫຼອງວັນຂອບ​ຄຸນ​ພະ​ເຈົ້າ. ເຖິງ​ແມ່ນ​ວັນ​ພັກ​ດັ່ງ​ກ່າວຄ້າຍ​ຄື​ກັນ​ກັບ​ບຸນສະ​ຫຼອງ​ການ​ເກັບກ່ຽວຕາມ​ປະ​ເພ​ນີ ຊຶ່ງ​ປົກ​ກະ​ຕິ​ແລ້ວ​ມີ​ຂຶ້ນ​ຢູ່​ໃນ​ສັງ​ຄົມ​ກະ​ສິ​ກຳຢ້ອນ​ຄືນ​ໄປ​ເມື່ອຫຼາຍໆ​ພັນ​ປີ ແຕ່​ບຸນ​ຂອບ​ຄຸນ​ພະ​ເຈົ້າ​ແມ່ນ​ເຮັດຂຶ້ນ​ເພື່ອ​ເປັນ​ກຽດ​ໃຫ້​ແກ່​ປະ​ສົບພະ​ການ​ຂອງ​ຊາວ​ຢູ​ໂຣບ​ຈຸ​ທຳ​ອິດທີ່​ໄດ້​ເຂົ້າ​ມາ​ຕັ້ງ​ຖິ່ນຖານຢູ່​ໃນ​ເຂດ​ຊຶ່ງ​ທຸກມື້​ນີ້​ແມ່ນ​ພາກ​ຕາ​ເວັນ​ອອກ​ສຽງ​ເໜືອ​ຂອງ​ສະ​ຫະ​ລັດ.

​ເຂົາ​ເຈົ້າ​ແມ່ນ​ພວກ​ສະ​ແຫວງ​ບຸນ ໂດຍ​ສະ​ເພາະ​ແລ້ວ ​ແມ່ນ​ພວກ​ທີ່​ນັບ​ຖື​ລັດ​ທິ ຄານ​ວິນ ທີ່​ຢາກແຍກ​ອອກ​ຢ່າງ​ເດັດຂາດ​ຈາກ​ນິ​ກາຍ​ອັງ​ກ​ລີ​ກັນແລະ​ຕໍ່​ມາ​ກໍ​ໄດ້ຖືກ​ປະ​ຫັດ​ປະ​ຫານ​ຢູ່​ໃນ​ປະ​ເທດ​ອັງ​ກິດ ແລະ​ດ້ວຍ​ເຫດນີ້ ໃນ​ເດືອນ​ກັນ​ຍາຂອງປີ 1620 ​ພວກ​ທີ່​ມາ​ຕັ້ງ​ອາ​ນາ​ນິ​ຄົມ 102 ຄົນ ຊຶ່ງ​ສ່ວນ​ໃຫຍ່​ແລ້ວ​ເປັນ​ພວກ​ສະແຫວງ​ບຸນ ແລະ​ພວກ​ລູກ​ເຮືອ​ອີກ 30 ຄົນ ໄດ້​ອອກ​ເດີນ​ທາງ​ມາ​ທະ​ວີບ​ອາ​ເມ​ຣິກາ ໂດຍ​ກຳ​ປັ່ນ​ທີ່​ມີ​ຊື່​ວ່າ ເມ​ຟ​ລາວ​ເວີ.

ພວກ​ສະ​ແຫວງ​ບຸນ​ຮູ້​ດີ​ວ່າ ການ​ເດີນ​ທາງ​ຂອງ​ພວກ​ເຂົາ​ເຈົ້າ ​ບໍ່​ໄດ້​ຮັບ​ການ​ສະ​ໜັບສະ​ໜຸນ​ໂດຍ​ລັດ​ຖະ​ບານ​ອັງ​ກິດແລະ​ກໍ​ບໍ່​ໄດ້​ມີ​ການ​ແຕ່ງ​ຕັ້ງ​ຜູ້​ນຳ ພວກ​ເຂົາເຈົ້າ​ໄດ້​ປົກ​ຄອງ​ກັນດ້ວຍ​ຄວາມ​ຍິນຍອມ​ຂອງ​ພວກ​ທີ່​ມາ​ຕັ້ງ​ອາ​ນາ​ນິ​ຄົມ​ດ້ວຍ​ກັນ. ດ້ວຍ​ເຫດ​ຜົນ​ດັ່ງ​ກ່າວ ກ່ອນ​ທີ່​ກຳ​ປັ່ນ​ເມ​ຟ​ລາວ​ເວີ​ ຈະ​ເຂົ້າ​ຈອດ​ດ້ວຍ​ຊ້ຳ ພວກ​ຜູ້​ໂດຍສານໄດ້​ພາ​ກັນ​ຮ່າງ​ຂໍ້​ຕົກ​ລົງ​ເມ​ຟ​ລາວ​ເວີ ຊຶ່ງ​ເປັນ​ເອກ​ກະ​ສານ​ທີ່​ໃຫ້​ຄຳ​ໝັ້ນສັນ​ຍາ​ວ່າ​ຈະໃຫ້​ການ​ຮ່ວມ​ມື​ກັນ​ຂອງ​ພວກ​ທີ່​ມາ​ຕັ້ງ​ຖິ່ນ​ຖານ​ທັງ​ໝົດ. ຂໍ້​ຕົກ​ລົງສະ​ບັບ​ນີ້ໄດ້​ກຳ​ນົດ​ວ່າ ​ການ​ຕັດ​ສິນ​ໃຈ​ຕ່າງໆຈະ​ມີ​ຂຶ້ນ​ດ້ວຍ​ການ​ລົງ​ຄະ​ແນນ​ສຽງ​ຊຶ່ງ​ເປັນການ​ທົດ​ລອ​ງ​ຄັ້ງ​ທຳ​ອິດໃນ​ປະ​ຊາ​ທິ​ປະ​ໄຕສຳ​ລັບ​ພວກ​ຊາວ​ຢູ​ໂຣບ​ໃນ​ທະ​ວີບ​ອາເມ​ຣິ​ກາ​ເໜືອ. ຂໍ້​ຕົກ​ລົງ​ນີ້​ໄດ້​ມີ​ການ​ລົງ​ນາມ​ໂດຍຜູ້​ໂດຍ​ສານ​ທີ່​ເປັນ​ຊາຍ​ສະ​ກັນ​ຫຼາຍກວ່າ​ເຄິ່ງ ທັງ​ພວກ​ທີ່​ສະ​ແຫວງ​ບຸນ ແລະ​ບໍ່​ສະ​ແຫວງ​ບຸນ ແລະ​ດັ່ງ​ນັ້ນ​ຈຶ່ງໄດ້​ຮັບ​ການ​ໃຫ້​ສັດ​ຕະ​ຍາ​ບັນ​ດ້ວຍ​ການ​ປົກ​ຄອງ​ສຽງ​ສ່ວນ​ຫຼາຍ.

ມີ​ພຽງ​ແຕ່ 53 ຄົນ​ຂອງ​ພວກ​ທີ່​ມາ​ຕັ້ງ​ຖິ່ນ​ຖານດັ້ງ​ເດີມ ຢູ່​ລອດ​ມາ​ເຫັນ​ລະ​ດູ​ບານໃໝ່​ຂອງ​ປີ​ຕໍ່​ມາ ແຕ່​ໃນ​ລະ​ດູ​ຮ້ອນ ຜົນ​ການ​ເກັບ​ກ່ຽວ​ແມ່ນ​ໄດ້​ດີ​ເປັນ​ພິ​ເສດ ແລະໃນ​ລະ​ດູ​ໃບ​ໄມ້​ຫຼົ່ນ​ຂອງ​ປີ 1621 ສະ​ມາ​ຊິກ​ທີ່​ຍັງ​ເຫຼືອ​ຢູ່​ຂອງ​ອາ​ນາ​ນິ​ຄົມພ​ລີ​ມັດ ຊຶ່ງ​ເປັນ​ຊື່​ທີ່​ເຂົາ​ເຈົ້າ ​ໄດ້​ເອີ້ນ​ບ້ານ​ໃໝ່​ຂອງ​ພວກ​ເຂົາ​ເຈົ້າ ຈຶ່ງໄດ້ມາ​ເຕົ້າ​ໂຮມ​ກັນສະ​ເຫຼີມ​ສະ​ຫຼອງ​ການ​ລອດ​ຊີ​ວິດ​ມາ​ໄດ້​ຂອງ​ພວກ​ເຂົາ​ເຈົ້າ. ​ພວກ​ຊົນ​ເຜົ່າ​ວາມ​ປາ​ໂນ​ອັກ​ປະ​ມານ 90 ຄົນ ໄດ້​ມາ​ຮ່ວມ​ການ​ສະ​ຫຼອງ ຊຶ່ງ​ພວກ​ເຂົາ​ເຈົ້າ​ໄດ້​ໃຫ້​ການ​ຊ່ວຍ​ເຫຼືອ​ແກ່​ພວກ​ມາ​ຕັ້ງ​ຖິ່ນ​ຖານ​ທີ່​ລອດ​ຊີ​ວິດ​ມາ​ໄດ້ ດ້ວຍ​ການ​ນຳ​ເອົາ​ອາ​ຫານ​ມາ​ໃຫ້ ແລະສອນ​ພວກ​ມາ​ຕັ້ງ​ຖິ່ນ​ຖານ​ໃຫ້​ສ້າງ​ບ້ານ​ເຮືອນ​ທີ່​ສາ​ມາດ​ທົນ​ທານ​ຕໍ່ສະ​ພາບ​ດິນ​ຟ້າ​ອາ​ກາດ.

ການ​ສະ​ເຫຼີມ​ສະ​ຫຼອງ​ ໄດ້​ໃຊ້​ເວ​ລາ 3 ມື້ ຊຶ່ງ​ໃນ​ລະ​ຫວ່າງນັ້ນ ພວກ​ຊາວ​ອາ​ນາ​ນິຄົມ​ອັງ​ກິດ ແລະ​ພວກ​ຊົນ​ເຜົ່າ​ພື້ນ​ເມືອງໄດ້​ພາ​ກັນ​ຊຸມ​ແຊວ​ເວົ້າ​ນົວ​ຫົວ​ມ່ວນ​ດ້ວຍຄວາມ​ສະ​ຫງົບ. ສຳ​ລັບ​ງານ​ລ້ຽງ​ຂອງ​ພວກ​ເຂົາ​ເຈົ້າ​ນັ້ນ ພວກ​ສະ​ແຫວງ​ບຸນ​ກໍ​ໄດ້ກະ​ກຽມ​ຜັກ​ໝີ່​ຂອງ​ຊົນ​ເຜົ່າ​ພື້ນ​ເມືອງ ເປັດ​ແລະ​ຫ່ານ ແລະ​ພວກ​ຊົນ​ເຜົ່າ​ວາມ​ປາ​ໂນ​ອັກ ກໍ​ໄດ້​ເອົາ​ຊີ້ນກວາງ​ມາ​ຮ່ວມ​ສົມ​ທົບ.

ວັນ​ຂອບ​ຄຸນ​ພະ​ເຈົ້າ ດັ່ງ​ທີ່​ສະ​ຫຼອງ​ກັນ​ໃນ​ທຸກມື້ນີ້ ແມ່ນ​ມີ​ກົກ​ເຄົ້າ​ເຫງົ້າ​ກໍ​ມາ​ຈາກສັດ​ຕະ​ວັດ​ທີ 19. ມັນ​ໄດ້​ກາຍ​ເປັນ​ວັນ​ພັກ​ຢ່າງ​ ເປັນ​ທາງ​ການ ໃນ​ລະ​ຫວ່າງ​ສົງ​ຄາມ​ກາງ​ເມືອງເພື່ອ​ເປັນ​ຊ່ອງ​ທາງສຳ​ລັບ​ຊຸກ​ຍູ້​ໃຫ້​ມີ​ຄວາມ​ເປັນ​ເອກ​ກະ​ພາບ​ແຫ່ງ​ຊາດ ແລະ​ໄກ່​ງວງ ຊຶ່ງ​ກາຍ​ມາເປັນ​ອາ​ຫານ​ຫຼັກ​ ຂອງ​ການ​ສ​ະ​ຫຼອງວັນ​ຂອບ​ຄຸນ​ພະ​ເຈົ້າ ​ໃນ​ທຸກມື້ນີ້ ຍ້ອນ​ວ່າ​ໄກ່​ ທີ່​ມີ​ຂະ​ໜາດ​ໃຫຍ່​ດັ່ງ​ກ່າວ​ ສາ​ມາດ​ໃຫ້​ຜູ້​ຄົນ​ໄດ້​ກິນ​ໝົດ​ທັງ​ຄອບ​ຄົວ ໃນ​ລາ​ຄາ​ທີ່​ຍ່ອມ​ເຍົາ.

ເຖິງ​ແມ່ນ​ວັນ​ພັກ​ດັ່ງ​ກ່າ​ວ​ໄດ້​ວິ​ວັດ​ມາ​ເປັນ​ເວ​ລາ​ຫຼາຍໆ​ສັດ​ຕະ​ວັດ​ແລ້ວ​ກໍ​ຕາມ ແຕ່ວັນ​ຂອບ​ຄຸນ​ພະ​ເຈົ້າແລະ​ພາບ​ພົດ​ຂອງ​ພວກ​ສະ​ແຫວງ​ບຸນພ້ອມ​ທັງ​ພວກ​ຊົນ​ເຜົ່າ​ພື້ນ​ເມືອງ ພາ​ກັນ​ສະ​ເຫຼີມ​ສະ​ຫຼອງ​ຮ່ວມ​ກັນ​ນັ້ນ ໄດ້​ກາຍ​ມາ​ເປັນ​ສັນ​ຍາ​ລັກ​ ​ຂອງສະ​ຫງົບ​ສຸກ​ ທາງ​ດ້ານ​ວັດ​ທະ​ນະ​ທຳ ອິດ​ສະ​ຫຼະ​ພາບ​ທາງ​ດ້ານ​ສາ​ສະ​ໜາ ແລະ​ຄວາມ​ອຸ​ດົມ​ຮັ່ງ​ມີ​ ທີ່​ສະ​ຫະ​ລັດ​ຍັງ​ສື​ບ​ຕໍ່​ມອບ​ໃຫ້​ປະ​ຊາ​ຊົນ​ຂອງ​ຕົນ ແລະ​ພວກ​ທີ່​ມາ​ຮອດໃໝ່ໆ​ຈາກ​ທົ່ວ​ໂລກ.

XS
SM
MD
LG