ບົດບັນນາທິການ ທີ່ສະທ້ອນເຖິງນະໂຍບາຍ ຂອງລັດຖະບານສະຫະລັດ
ສະຫະລັດຍັງສືບຕໍ່ມີຄວາມໝັ້ນໝາຍອັນໜັກແໜ້ນ ຕໍ່ອິດສະຫຼະພາບໃນດ້ານສາສະໜາ ຫຼືໃນດ້ານຄວາມເຊື່ອ. ລັດຖະມົນຕີການຕ່າງປະເທດສະຫະລັດ ທ່ານແອນໂທນີ ບລິງເກັນ ກ່າວວ່າ “ຢູ່ຫຼາຍໆບ່ອນໃນທົ່ວໂລກ ພວກເຮົາຍັງສືບຕໍ່ເຫັນລັດຖະບານທຳການຮາວີ ຈັບກຸມ ຂົ່ມຂູ່ ຄຸມຂັງແລະສັງຫານສ່ວນບຸກຄົນ ຍ້ອນເຂົາເຈົ້າຢາກດຳລົງຊີວິດ ຕາມຄວາມເຊື່ອ ທີ່ພວກເຂົາເຈົ້າມີ.” ລັດຖະບານ ຂອງປະທານາທິບໍດີໄບເດັນແລະທ່ານນາງແຮຣິສ ມີຄວາມໝັ້ນໝາຍທີ່ຈະໃຫ້ການ ສະໜັບສະໜຸນຕໍ່ສິດທິຂອງທຸກໆຄົນ ກ່ຽວກັບອິດສະຫະພາບໃນດ້ານສາສະໜາຫຼືຄວາມເຊື່ອ ຮວມທັງການປະເຊີນໜ້າແລະການປາບປາມໃນການຝ່າ ຝືນແລະລ່ວງລະເມີດຕໍ່ສິດທິມະນຸດດັ່ງກ່າວ.
ໃນແຕ່ລະປີ ລັດຖະມົນຕີການຕ່າງປະເທດຂອງສະຫະລັດ ແມ່ນເປັນຜູ້ຮັບຜິດຊອບໃນການລະບຸຊື່ ລັດຖະບານຂອງປະເທດຕ່າງໆ ແລະພາກສ່ວນທີ່ບໍ່ແມ່ນລັດຖະບານຍ້ອນການລ່ວງລະເມີດຕໍ່ສິດເສລີພາບໃນດ້ານສາສະໜາ ແລະລະບຸຊື່ ໃນການກະທຳຄວາມດີ ພາຍໃຕ້ກົດໝາຍວ່າດ້ວຍອິດສະຫຼະພາບໃນການນັບຖືສາສະໜາລະຫວ່າງປະເທດ. ໃນປີນີ້ ລັດຖະມົນຕີການຕ່າງປະເທດບລິງເກັນໄດ້ລະບຸຊື່ມຽນມາ ສາທາລະນະລັດປະຊາຊົນຈີນ ເອຣິເທຣຍ ອີຣ່ານ ເກົາຫຼີເໜືອ ປາກິສຖານ ຣັດເຊຍ ຊາອຸດີ ອາຣາເບຍ ຕາຈິກກິສຖານແລະເຕີກເມ ນິສຖານ ເປັນປະເທດທີ່ໜ້າເປັນຫ່ວງພິເສດ ຍ້ອນໄດ້ມີການພົວພັນຫຼືປ່ອຍໃຫ້ມີ “ການລ່ວງລະເມີດອິດສະຫຼະພາບ ໃນການນັບຖືສາສະໜາ ຢ່າງເປັນລະບົບ ທີ່ຍັງດຳເນີນຢູ່ຕໍ່ມາ ແລະມີຄວາມຮ້າຍແຮງເປັນພິເສດ.”
ສຳລັບ ປາກິສຖານ ຊາອຸດີ ອາຣາເບຍ ຕາຈິກກິສຖານ ແລະ ເຕີກເມນິສຖານ ລັດຖະມົນຕີການຕ່າງປະເທດບລິງເກັນ ໄດ້ອອກໜັງສືຍົກເວັ້ນໃນການເອົາມາດຕະການຂອງປະທານາທິບໍດີ ໂດຍລົງຄວາມເຫັນວ່າ “ມີຄວາມສຳຄັນ ຕໍ່ຜົນປະໂຫຍດແຫ່ງຊາດຂອງສະຫະລັດຈຶ່ງຈຳເປັນຕ້ອງໄດ້ໃຊ້ອຳນາດໃຫ້ການຍົກເວັ້ນ” ດັ່ງທີ່ກຳນົດໄວ້ຢູ່ໃນກົດໝາຍວ່າດ້ວຍອິດສະຫຼະພາບໃນການນັບຖືສາສະໜາລະຫວ່າງປະເທດ.
ນອກນັ້ນແລ້ວ ລັດຖະມົນຕີການຕ່າງປະເທດບລິງເກັນ ຍັງໄດ້ຈັດເອົາ ອາລຈີ-ເຣຍ ໂກໂມໂຣສ ຄິວບາ ແລະນິກາຣາກົວ ເຂົ້າໄວ້ໃນບັນຊີລາຍຊື່ລັດຖະບານ ທີ່ຖືກຕິດຕາມສິ້ງຊອມເປັນພິເສດ ໃນການພົວພັນຫຼືປ່ອຍໃຫ້ມີ “ການລະເມີດທີ່ຮ້າຍແຮງຕໍ່ອິດສະຫຼະພາບທາງດ້ານສາສະໜາ.” ໃນທີ່ສຸດ ທ່ານບລິງເກັນ ໄດ້ລະບຸຊື່ ກຸ່ມອາລ-ຊາບາບ ກຸ່ມໂບໂກຮາຣາມ ກຸ່ມຮາຍຢັດ ຕາເຣຍ ອາລ-ຊາມ ກຸ່ມອັນຊາຣາລລາ ຊຶ່ງໃນບາງຄັ້ງເອີ້ນວ່າ ກຸ່ມກະບົດຮູຕີ ກຸ່ມໄອຊິສ ກຸ່ມໄອຊິສໃນເຂດທະເລຊາຍຊາຮາຣາ ກຸ່ມໄອຊິສໃນເຂດອາຟຣິກາຕາເວັນຕົກ ກຸ່ມຈາມັດ ນາເຊີ ອາລ-ອິສລາມ ວາລ-ມຸສລີມິນແລະກຸ່ມຕາລີບານເປັນອົງການທີ່ໜ້າເປັນ ຫ່ວງພິເສດ.
ລັດຖະມົນຕີການຕ່າງປະເທດບລິງເກັນ ເຕືອນວ່າ “ບັນຫາທ້າທາຍຕໍ່ອິດສະຫຼະພາບໃນການນັບຖືສາສະໜາ ຢູ່ໃນທົ່ວໂລກ ທຸກມື້ນີ້ ແມ່ນມີຢູ່ ຢ່າງເປັນລະບົບແຜ່ກວ້າງ ແລະລົງເລິກ. ມັນມີຢູ່ໃນທຸກໆປະເທດ. ມັນຈຳເປັນ ຕ້ອງໄດ້ມີການໃຫ້ຄວາມໝັ້ນໝາຍແບບຍືນຍົງ ຂອງທຸກໆປະເທດ ໃນທົ່ວໂລກ ທີ່ບໍ່ຍອມຮັບເອົາຄວາມຄຽດຊັງ ບໍ່ຍອມໂຍະຍານຜ່ອນຜັນແລະການປະຫັດປະຫານ ທີ່ເປັນສະຖານະພາບໃນປັດຈຸບັນ. ມັນຈຳເປັນທີ່ປະຊາຄົມນາໆຊາດຕ້ອງໃຫ້ຄວາມສົນ
ໃຈຢ່າງຮີບດ່ວນ.”
ສະຫະລັດຈະສືບຕໍ່ກົດດັນໃຫ້ລັດຖະບານຂອງທຸກໆປະເທດ ເປັນຜູ້ຮັບຜິດຊອບຕໍ່ພວກທີ່ກະທຳຜິດ. ສະຫະລັດຍັງມີຄວາມໝັ້ນໝາຍທີ່ຈະເຮັດວຽກກັບປະເທດຕ່າງໆ ອົງການຈັດຕັ້ງທາງດ້ານສັງຄົມພົນລະເຮືອນແລະບັນດາສະມາຊິກຂອງປະຊາຄົມສາສະໜາເພື່ອສ້າງຄວາມກ້າວໜ້າໃຫ້ແກ່ອິດສະຫຼະພາບໃນການນັບຖືສາສະໜາຢູ່ໃນທົ່ວໂລກ ແລະແກ້ໄຂບັນຫາຂອງສ່ວນບຸກຄົນ ແລະປະຊາຄົມທີ່ພວມປະເຊີນໜ້າກັບການລ່ວງລະເມີດ ການຮາວີລົບກວນ ແລະການຈຳແນກ
ກີດກັນ ຕໍ່ສິ່ງທີ່ພວກເຂົາເຈົ້າເຊື່ອ ຫຼືບໍ່ເຊື່ອນັ້ນ.