ບົດບັນນາທິການ ທີ່ສະທ້ອນເຖິງນະໂຍບາຍ ຂອງລັດຖະບານສະຫະລັດ
ພວກທະຫານມຽນມາທີ່ເຂົ້າຢຶດອຳນາດເມື່ອວັນທີ 1 ກຸມພາ 2021 ຜ່ານ ມາ ໄດ້ເລີ້ມທຳການໂຈມຕີເພີ້ມຂຶ້ນ ຕໍ່ບັນດາຜູ້ນຳປະຊາທິປະໄຕ ທີ່ຖືກເລືອກ ແລະສະຖາບັນປະຊາທິປະໄຕຕ່າງໆ ແລະເພີ້ມທະວີການໂຈມຕີຢ່າງໂຫດຮ້າຍປ່າເຖື່ອນຕໍ່ປະຊາຊົນຊາວມຽນມາ.
ໃນວັນທີ 6 ທັນວາຜ່ານມານີ້ ສານແຫ່ງນຶ່ງໄດ້ຕັດສິນລົງໂທດ ອະດີດທີ່ປຶກສາລັດຖະບານ ທ່ານນາງອອງຊານ ຊູຈີ ແລະປະທານາທິບໍດີວິນ ມິນ ໃຫ້ຕິດຄຸກ 4 ປີ ຍ້ອນຖືກກ່າວຫາວ່າຍຸແຍ່ໃຫ້ເກີດຄວາມວຸ້ນວາຍ ແລະບໍ່ປະຕິບັດຕາມກົດລະບຽບໂຄວິດ-19. ເຖິງແມ່ນອຳນາດການປົກຄອງທະຫານ ໄດ້ຫຼຸດໂທດໃຫ້ 2 ປີ ທ່ານນາງອອງຊານ ຊູຈີ ແລະອະດີດເຈົ້າໜ້າທີ່ທີ່ຖືກເລືອກແບບປະຊາທິປະໄຕຄົນອື່ນໆຍັງປະເຊີນກັບຂໍ້ຫາທີ່ເສກສັນປັ້ນແຕ່ງອີກຫຼາຍໆຂໍ້ທີ່ອາດຈະຖືກຕິດຄຸກເປັນເວລາຫຼາຍສິບປີ.
ລັດຖະມົນຕີການຕ່າງປະເທດສະຫະລັດ ທ່ານແອນໂທນີ ບລິງເກັນ ເອີ້ນການລົງໂທດທ່ານນາງອອງຊານ ຊູຈີ ແລະການກົດຂີ່ຕໍ່ຕໍ່ພວກຜູ້ນຳທີ່ຖືກເລືອກແບບປະຊາທິປະໄຕນັ້ນວ່າ “ເປັນການສົບປະໝາດ ເພີ້ມຕື່ມ ຕໍ່ປະຊາທິປະໄຕ ແລະຄວາມຍຸຕິທຳຢູ່ໃນປະເທດມຽນມາ. ການສືບຕໍ່ບໍ່ໃຫ້ການເຄົາລົບຕໍ່ການປົກຄອງດ້ວຍຕົວບົດກົດໝາຍ ແລະການໃຊ້ຄວາມຮຸນແຮງຢ່າງແຜ່ກວ້າງ ຂອງອຳນາດການປົກຄອງຕໍ່ປະຊາຊົນຊາວມຽນມາ ແມ່ນໄດ້ເນັ້ນໃຫ້ເຫັນເຖິງຄວາມຈຳເປັນອັນຮີບດ່ວນສຳລັບການຟື້ນຟູເສັ້ນທາງໄປສູ່ປະຊາທິປະໄຕໃນມຽນມາ.”
ຫຼາຍປະເທດແລະອົງການຕ່າງໆຢູ່ໃນປະຊາຄົມສາກົນ ຍັງໄດ້ປະນາມການຕັດສິນຂອງສານໃນມຽນມາ.
ອົງການນິລະໂທດກຳສາກົນເອີ້ນການຕັດສິນດັ່ງກ່າວວ່າ “ເປັນເລື້ອງທີ່ໜ້າຕະລົກແລະຊົ່ວຮ້າຍ.” ກຸ່ມປົກປ້ອງສິດທິມະນຸດ Human Rights Watch ເອີ້ນມັນວ່າ ເປັນເລື້ອງທີ່ “ບໍ່ມີມູນຄວາມຈິງ.”
ຂ້າຫຼວງໃຫຍ່ດ້ານສິດທິມະນຸດຂອງອົງການສະຫະປະຊາຊາດ ທ່ານນາງມີແຊລ ບາເຊີແລັດ ກ່າວວ່າ “ການຕັດສິນໂທດທີ່ປຶກສາຂອງລັດຖະບານ ມີຂື້ຶ້ນລຸນຫຼັງ ການດຳເນີນຄະດີແບບຈອມປອມ ໂດຍເປັນທາງລັບ ຢູ່ຕໍ່ໜ້າສານ ຊຶ່ງຄວບຄຸມໂດຍພວກທະຫານ ບໍ່ມີຫຍັງໝົດ ນອກຈາກມີຈຸດປະສົງທາງດ້ານການເມືອງ.”
ທ່ານໂຈເຊັບ ບໍແຣລ ຜູ້ຕາງໜ້າລະດັບສູງໃນດ້ານນະໂຍບາຍການຕ່າງປະເທດແລະຄວາມໝັ້ນຄົງຂອງສະຫະພາບຢູໂຣບ ປະກາດວ່າ ການຕັດສິນລົງໂທດດັ່ງກ່າວ ແມ່ນເປັນ “ອີກບາດກ້າວນຶ່ງ ໄປສູ່ການທັບມ້າງການປົກຄອງດ້ວຍຕົວບົດກົດໝາຍແລະເປັນການລະເມີດສິດທິມະນຸດຢ່າງເປີດແປນຫຼາຍຂຶ້ນຢູ່ໃນປະເທດມຽນມາ.”
ນັບແຕ່ໄດ້ມີການກໍ່ລັດຖະປະຫານຂອງພວກທະຫານເມື່ອວັນທີ 1 ກຸມພາຜ່ານມາ ອຳນາດການປົກຄອງມຽນມາໄດ້ທຳການໂຈມຕີຢ່າງບໍ່ຢຸດຢ່ອນ ແລະດ້ວຍຄວາມຮຸນແຮງຕໍ່ສິດທິຂອງປະຊາຊົນຊາວມຽນມາ. ກຳລັງຮັກສາຄວາມສະຫງົບໄດ້ໃຊ້ກຳລັງທີ່ຮ້າຍແຮງຕໍ່ພວກປະທ້ວງທີ່ສະຫງົບ. ອຳນາດການປົກຄອງເປັນຜູ້ຮັບຜິດຊອບໃນການສັງຫານປະຊາຊົນຫຼາຍກວ່າ 1,300 ຄົນແລະຈັບກຸມຄຸມຂັງອີກ 10,000 ກວ່າຄົນ.
ລັດຖະມົນຕີການຕ່າງປະເທດ ແອນໂທນີ ບລິງເກັນ ຮຽກຮ້ອງໃຫ້ອຳນາດການປົກຄອງມຽນມາ ປ່ອຍທ່ານນາງອອງຊານ ຊູຈີ ແລະພວກທີ່ຖືກຈັບກຸມຄຸມຂັງ ແບບບໍ່ເປັນທຳທັງໝົດຢູ່ໃນປະເທດມຽນມາ. ລັດຖະມົນຕີການຕ່າງປະເທດບລິງເກັນ ກ່າວວ່າ “ພວກເຮົາຂໍກ່າວຢ້ຳໃນການຮຽກຮ້ອງຂອງພວກເຮົາ ໃຫ້ອຳນາດການປົກຄອງ ພົວພັນໃນການໂອ້ລົມແບບສ້າງສັນ ກັບທຸກພັກຝ່າຍເພື່ອຫາທາງແກ້ໄຂດ້ວຍສັນຕິວິທີ ເພື່ອເຫັນແກ່ຜົນປະໂຫຍດຂອງປະຊາຊົນ ດັ່ງທີ່ໄດ້ມີການຕົກລົງກັນຢູ່ໃນຂໍ້ສະເໜີ ທີ່ເປັນເອກກະສັນ 5 ຂໍ້ຂອງອາຊຽນ. ພວກເຮົາຂໍຮ່ວມກັບປະຊາຊົນມຽນມາທີ່ມີຄວາມປາຖະໜາຢ່າງແຮງກ້າຢາກມີສິດເສລີພາບແລະປະຊາທິປະໄຕ ແລະຮຽກຮ້ອງໃຫ້ອຳນາດການປົກຄອງ ຢຸດເຊົາການໃຊ້ຄວາມຮຸນແຮງ ໃຫ້ການເຄົາລົບຕໍ່ຄວາມໄຝ່ຝັນຂອງປະຊາຊົນແລະຟື້ນຟູການຫັນປ່ຽນໄປສູ່ປະຊາທິປະໄຕໃນປະເທດມຽນມາ.”