Accessibility links

Breaking News

ບົດບັນນາທິການ: ເສັ້ນທາງດ້ານການທູດ ແມ່ນເປີດກວ້າງ ໃຫ້ແກ່ຣັດເຊຍ


ລັດຖະມົນຕີການຕ່າງປະເທດສະຫະລັດ ທ່ານແອນໂທນີ ບລິງເກັນ ພວມກ່າວຖະແຫຼງ ທີ່ຫ້ອງຖະແຫຼງຂ່າວກະຊວງການຕ່າງປະເທດສະຫະລັດ ໃນນະຄອນຫຼວງວໍຊິງຕັນ ເມື່ອວັນທີ 7ມັງກອນ 2022.

ບົດບັນນາທິການ ທີ່ສະທ້ອນເຖິງນະໂຍບາຍ ຂອງລັດຖະບານສະຫະລັດ

ສະ​ຫະ​ລັດ ພ້ອມ​ກັບ​ບັນ​ດາ​ປະ​ເທດ​ພັນ​ທະ​ມິດ ແລະ​ພາ​ຄີ ພວມ​ທຳ​ການ​ພົວ​ພັນ​ກັບ​ຣັດ​ເຊຍ ໃນ​ການ​ຫາ​ລື​ທີ່​ມີ​ມາ​ເປັນ​ລຳ​ດັບ ​ໃນ​ອາ​ທິດນີ້ ເພື່ອ​ຫາ​ທາງ​ຫຼຸດ​ຜ່ອນວິ​ກິດ​ການ ​ທີ່​ເກີດ​ຈາກ​ການ​ເສີມ​ກຳ​ລັງ​ທະ​ຫານແບບ​ບໍ່​ມີ​ການ​ທ້​າ​ທາຍຂອງ​ຣັດ​ເຊຍ ໃກ້ໆ​ຊາຍ​ແດນ​ຢູ​ເຄ​ຣນ. ການ​ເຈ​ລະ​ຈາ​ເຫຼົ່າ​ນີ້​ແມ່ນ​ຮວມ​ທັງ​ການຫາ​ລື​ທາງ​ດ້ານ​ຍຸດ​ທະ​ສາດ​ເພື່ອ​ສ້າງ​ສະ​ຖຽນ​ລະ​ພາບ ລະ​ຫວ່າງ​ສະ​ຫະ​ລັດ ກັບ
ຣັດ​ເຊຍ ການ​ພົບ​ປະ​ລະ​ຫວ່າງ​ສະ​ພາ​ເນ​ໂຕ້​ກັບ​ຣັດ​ເຊຍ ແລະ​ການ​ພົບ​ປະ​ຂອງສະ​ພາ​ຖາ​ວອນ​ທີ່​ອົງ​ການ​ເພື່ອ​ຄວາມ​ໝັ້ນ​ຄົງ​ແລະ​ການ​ຮ່ວມ​ມື​ໃນ​ຢູ​ໂຣບ.

ໃນ​ການ​ຖະ​ແຫຼງ​ຕໍ່​ພວກ​ນັກ​ຂ່າວ ​ກ່ອນ​ການ​ຫາ​ລື​ກັນ​ນັ້ນ ລັດ​ຖະ​ມົນ​ຕີ​ການ​ຕ່າງ​ປະ​ເທດ​ສະ​ຫະ​ລັດ ທ່ານ​ແອນ​ໂທ​ນີ ບ​ລິງ​ເກັນ ກ່າວ​ວ່າ “ການ​ທູດ​ແມ່ນ​ຫົນ​ທາງທີ່​ຮັບ​ຜິດ​ຊອບ​ພຽງ​ທາງ​ດຽວເພື່ອ​ແກ້​ໄຂວິ​ກິດ​ການນີ້” ແລະ​ທ່ານ​ກ່າວ​ຢ້ຳ​ວ່າ ສະຫະ​ລັດ ພ້ອມ​ກັບ​ປະ​ເທດ​ພັນ​ທະ​ມິດແລະ​ພາ​ຄີ ແມ່ນ​ເຕັມ​ໃຈ​ທີ່​ຈະ​ຮັບ​ຟັງ​ກ່ຽວ​ກັບ​ຄວາມ​ເປັນ​ຫ່ວງ ​ທີ່​ຖືກ​ຕ້ອງ​ຕາມ​ກົດ​ໝາຍ​ທີ່ຣັດ​ເຊຍ​ມີ​ຢູ່ ແລະ​ຈະ​ພະ​ຍາ​ຍາມ​ຫາທາງ​ແກ້​ໄຂ “ຖ້າ​ຫາກວັງ​ເຄ​ຣັມ​ລິນ​ພ້ອມ​ແລ້ວ ​ທີ່​ຈະ​ສະ​ໜອງ​ຕອບ​ແບບ​ດຽວ​ກັນ ເມື່ອ​ເວົ້າ​ເຖິງ​ໄພ​ອັນ​ຕະ​ລາຍແລະ​ການ​ປະ​ພຶດ​ເພື່ອ​ທຳ​ລາຍ​ສະ​ຖຽນ​ລະ​ພາບຂອງ​ຕົນ.”

ລັດ​ຖະ​ມົ​ນ​ຕີບ​ລິງ​ເກັນ ກ່າວ​ຢ້ຳ​ວ່າ ມັນ​ແມ່ນ​ການ​ກະ​ທຳ​ແບບ​ຮຸກ​ຮານ​ຂອງ​ມົ​ສ​ກູ​ ທີ່​ພາ​ໃຫ້​ເກີດ​ວິ​ກິດ​ການ ຮວມ​ທັງ​ການ​ເສີມ​ກຳ​ລັງ​ທະ​ຫານ ​ແລະ​ອຸບ​ປະ​ກອນ​ຂະ​ໜາດ​ໃຫຍ່ ໃກ້ໆ​ຊາຍ​ແດນ​ຂອງ​ຢູ​ເຄ​ຣນ ແລະ​ນີ້​ແມ່ນ​ເປັນ​ພຽງ​ນຶ່ງ ໃນ​ການ​ກະທຳ​ ແບບ​ຮຸກ​ຮານ ​ທີ່​ມີ​ມາ​ເປັນ​ລຳ​ດັບຂອງ​ຣັດ​ເຊຍ ຕໍ່​ບັນ​ດາ​ປະ​ເທດ​ເພື່ອນ​ບ້ານຂອງ​ຕົນ ໃນ​ໄລ​ຍະ​ສອງ​ທົດ​ສະ​ວັດ​ທີ່​ຜ່ານ​ມານີ້ ຮວມ​ທັງ ​ຕໍ່​ປະ​ເທດ​ຈໍ​ເຈຍ ໂມ​ລ​ໂດ​ວາ ແລະ​ຢູ​ເຄ​ຣນ​ເອງ ເວ​ລາ​ຣັດ​ເຊຍ​ທຳ​ການ​ຮຸກ​ຮານ ແລະ​ເຂົ້າ​ຢຶດ​ເອົາ​ແຫຼມໄຄ​ຣ​ເມຍ ໃນ​ປີ 2014.

ການ​ຂົ່ມ​ຂູ່​ຂອງ​ຣັດ​ເຊຍ​ຕໍ່​ຢູ​ເຄ​ຣນ​ໃນ​ເວ​ລານີ້ ບໍ່​ພຽງ​ແຕ່​ເປັນ​ການ​ຂົ່ມ​ຂູ່​ຕໍ່​ປະ​ເທດ​ຢູ​ເຄ​ຣນ​ ນັ້ນ​ຄື​ຄຳ​ເວົ້າ​ຂອງລັດ​ຖະ​ມົນ​ຕີ​ການ​ຕ່າງ​ປະ​ເທດ ບ​ລິງ​ເກັນ ແລະ​ທ່ານ​ກ່າວ​ຕື່ມ​ວ່າ “ການ​ກະ​ທຳ​ຂອງ​ມົ​ສ​ກູ​ຍັງ​ເປັນ​ໄພ​ຂົ່ມ​ຂູ່​ທີ່​ຈະ​ສ້າງ​ຕົວ​ຢ່າງ​ໃໝ່​ແບບ​ທີ່​ບໍ່​ເຄີຍ​ມີ​ມາ​ກ່ອນຢູ່​ໃນ​ດິນ​ແດນ​ຂອງ​ຢູ​ໂຣບບ່ອນ​ທີ່​ຫຼັກ​ການ​ພື້ນ​ຖານ​ຂອງ​ລະ​ຫວ່າງປະ​ເທດ ທີ່​ມີ​ຄວາມ​ສຳ​ຄັນ​ຕໍ່​ສັນ​ຕິ​ພາບ​ແລະ​ຄວາມ​ໝັ້ນ​ຄົງ​ໄດ້​ຖືກ​ຍົກ​ຂຶ້ນ​ມາ​ອະ​ພິປາຍ​ກັນ ຊາຍ​ແດນ​ແລະ​ຜືນ​ແຜ່ນ​ດິນ​ອັນ​ຄົບ​ຖ້ວນ​ຂອງ​ປະ​ເທດ​ໃດ​ນຶ່ງ ບໍ່​ສາ​ມາດທີ່​ຈະ​ປ່ຽນ​ແປງ​ດ້ວຍ​ກຳ​ລັງ ວ່າ​ມັນແມ່ນ​ສິດ​ທິໂດຍ​ກຳ​ເນີດ ​ຂອງ​ປະ​ຊາ​ຊົນ​ໃນລະ​ບອບ​ປະ​ຊາ​ທິ​ປະ​ໄຕ ຈະ​ເຮັດ​ການ​ຕັດ​ສິນ​ໃຈກ່ຽວ​ກັບ​ປະ​ເທດ​ຂອ​ງ​ພວກ​ເຂົາເຈົ້າ ແລະ​ຊີ້​ຊະ​ຕາ​ກ່ຽວ​ກັບອະ​ນາ​ຄົດ​ຂອງ​ປະ​ເທດ​ຊາດ ​ສະ​ມາ​ຊິກທຸກໆ​ປະ​ເທດ​ຂອງປະ​ຊາ​ຄົມ​ນາໆ​ຊາດ​ແມ່ນ​ຜູກ​ມັດໂດຍ​ກົດ​ລະ​ບຽບ​ທົ່ວ​ໄປ​ແລະ​ຈະ​ປະ​ເຊີນ​ກັບຄ່າ​ເສຍ​ຫາຍ ຖ້າ​ພວກ​ເຂົາ​ຫາກ​ບໍ່​ປະ​ຕິ​ບັດ ຢ່າງ​ຈິງ​ຈັງ ​ຕາມ​ຄວາມ​ໝັ້ນ​ໝາຍ​ທີ່​ພວກ​ເຂົາ​ເຈົ້າ​ໄດ້​ໃຫ້​ໄວ້.”

ລັດ​ຖະ​ມົນ​ຕີ​ການ​ຕ່າງ​ປະ​ເທດບ​ລິງ​ເກັນ​ໄດ້​ສະ​ແດງ​ໃຫ້​ເຫັນ​ຢ່າງ​ຈະ​ແຈ້ງວ່າ ຖ້າ​ຣັດ​ເຊຍ​ຫາກ​ຍັງ​ຮຸກ​ຮານ​ຢູ​ເຄ​ຣນ​ອີກ​ຕໍ່​ໄປ ປະ​ເທດ​ດັ່ງ​ກ່າວ​ກໍ​ຈະ​ປ​ະ​ເຊີນ​ໜ້າ​ກັບ​ການລົງ​ໂທດ​ຢ່າງ​ໜັກ ທາງ​ດ້ານ​ເສດ​ຖະ​ກິດ ການ​ເງິນ ແລະ​ມາດ​ຕະ​ການ​ອື່ນໆ​ອີກ​ຈາກ​ສະ​ຫະ​ລັດ ຈາກ​ປະ​ເທດ​ພັນ​ທະ​ມິດ ແລະ​ພາ​ຄີ ໃນ​ລະ​ດັບ​ທີ່​ບໍ່​ເຄີຍ​ເຫັນມາ​ກ່ອນ. ລັດ​ຖະ​ມົນ​ຕີ​ການ​ຕ່າງ​ປະ​ເທດບ​ລິງ​ເກັນ ​ກ່າວ​ວ່າ “ພວກ​ເຮົາ​ຫວັງ​ວ່​າ ຣັດ​ເຊຍ​ຈະ​ເອົາ​ທາ​ງ​ເລືອກ​ທີ່​ຕ່າງ​ອອກ​ໄປ. ພວກ​ເຮົາ​ມີ​ຄວາມ​ໝັ້ນ​ໝາຍ​ຕໍ່​ການປຶກ​ສາ​ຫາ​ລື​ທີ່​ມີ​ການ​ສະ​ໜອງ​ຕອບ​ກັບ​ຣັດ​ເຊຍ ດັ່ງ​ດຽວ​ກັນ​ກັບ​ພວກ​ເຮົາ​ມີ​ຄວາມໝັ້ນ​ໝາຍ​ຢ່າງ​ເຕັມ​ທີ່ ຕໍ່​ການ​ປຶກ​ສາ​ຫາ​ລື ແລະ​ການ​ປະ​ສານ​ງານ​ກັບ​ບັນ​ດາ​ປະ​ເທດ​ພັນ​ທະ​ມິດ ແລະ​ພາ​ຄີ​ຂອງ​ພວກ​ເຮົາ ຮວມ​ທັງ​ສະ​ຫະ​ພາບ​ຢູ​ໂຣບ ໃນ​ການປຶກ​ສາ​ຫາ​ລື​ທັງ​ໝົດ​ຂອງ​ພວກ​ເຮົາ​ໃນ​ທຸກ​ຮູບ​ແບບ ພວກ​ເຮົາ​ເຊື່ອ​ວ່າ ມີ​ຂົງ​ເຂດ​ວຽກ​ງານ​ທີ່​ພວກ​ເຮົາ​ສາ​ມາດ​ສ້າງ​ຄວາມ​ກ້າວ​ໜ້າ​ໄດ້.”

XS
SM
MD
LG