ບົດບັນນາທິການ ທີ່ສະທ້ອນເຖິງນະໂຍບາຍ ຂອງລັດຖະບານສະຫະລັດ
ລັດຖະມົນຕີການຕ່າງປະເທດສະຫະລັດ ທ່ານແອນໂທນີ ບລິງເກັນ ກ່າວລຸນຫຼັງການພົບປະ ກັບລັດຖະມົນຕີການຕ່າງປະເທດຂອງເກົາຫຼີໃຕ້ ແລະຍີປຸ່ນວ່າ “ນັບເປັນເວລາຫຼາຍທົດສະວັດມາແລ້ວ ການເປັນພັນທະມິດຂອງສະຫະລັດກັບຍີປຸ່ນ ແລະສາທາລະນະລັດເກົາຫຼີ ແມ່ນຮວມຢູ່ໃນຄວາມສຳພັນທີ່ສຳຄັນສຸດຂອງພວກເຮົາ ບໍ່ແມ່ນພຽງແຕ່ໃນເຂດອິນໂດປາຊີຟິກເທົ່ານັ້ນ ແຕ່ຢູ່ໃນທົ່ວໂລກນຳດ້ວຍ.”
ເມື່ອພິຈາລະນາແລ້ວທັງໄພຂົ່ມຂູ່ທີ່ພວມມີຂຶ້ນແລະໂອກາດສຳລັບນະວັດຕະກຳ ໃໝ່ ການຮ່ວມມືລະຫວ່າງສາທາລະນະລັດເກົາຫຼີ ຍີປຸ່ນ ແລະສະຫະລັດ ແມ່ນຈຳເປັນໃນການນຳສະເໜີຍຸດທະສາດເພື່ອໃຫ້ເຂດອິນໂດປາຊີຟິກເປັນເຂດທີ່ເສລີແລະເປີດກວ້າງ. ນີ້ແມ່ນຮວມທັງການດຳເນີນຄວາມພະຍາຍາມເພື່ອຍຸຕິໂຣກລະບາດໂຄວິດ-19 ແລະຮັບມືກັບການປ່ຽນແປງຂອງດິນຟ້າອາກາດ ແລະເສີມຂະຫຍາຍຄວາມໝັ້ນຄົງທາງດ້ານເສດຖະກິດ. ໂດຍສະເພາະແລ້ວ ເຂດອິນໂດປາຊີຟິກທີ່ເສລີ ແລະເປີດກວ້າງ ຈຳເປັນຕ້ອງໄດ້ “ເສີມສ້າງຄວາມເຂັ້ມແຂງໃຫ້ແກ່ຕ່ອງໂສ້ອຸບປະທານທີ່ມີຄວາມອ່ອນໄຫວ ຊຶ່ງໄດ້ຮັບຜົນກະທົບ ຈາກໂຣກລະ
ບາດ ຈາກເຊມີຄອນດັກເຕີ້ ຕະຫຼອດທັງແຮ່ທາດຫາຍາກທີ່ສຳຄັນຕ່າງໆ ຊຶ່ງຈະເຮັດໃຫ້ພວກເຮົາເພິ່ງພາໜ້ອຍລົງ ຕໍ່ພວກສະໜອງສິນຄ້າທີ່ລະເມີດສິດທິມະນຸດຫຼືບໍ່ປະຕິບັດຕາມມາດຕະຖານທາງດ້ານສິ່ງແວດລ້ອມ” ນັ້ນຄືຄຳເວົ້າຂອງລັດຖະມົນຕີບລິງເກັນ.
ຍຸດທະສາດທັງໝົດເຫຼົ່ານີ້ ແມ່ນງ່າຍຂຶ້ນຫຼາຍທີ່ຈະປະຕິບັດກັບສາມປະເທດທີ່ກ້າວໜ້າທາງດ້ານເສດຖະກິດ ກວ່າສອງຫຼືນຶ່ງປະເທດ ນັ້ນຄືຄຳເວົ້າຂອງທ່ານ.
“ຄວາມໝັ້ນຄົງທາງດ້ານເສດຖະກິດຂອງພວກເຮົາ ຍັງກາງຕໍ່ການປະຕິບັດຕາມ ກົດຈະລາຈອນ ທີ່ສາມາດເຮັດໃຫ້ມີຄວາມໝັ້ນຄົງ ເປັນເວລາຫຼາຍໆທົດສະວັດແບບບໍ່ເຄີຍມີມາກ່ອນສຳລັບປະຊາຊົນຂອງພວກເຮົາ ແລະຄວາມອຸດົມຮັ່ງມີໃນທົ່ວຂົງເຂດແລະຢູ່ໃນທົ່ວໂລກ. ນີ້ແມ່ນຮວມທັງຄ້ຳປະກັນວ່າຄົນງານແລະທຸລະກິດຂອງພວກເຮົາ ສາມາດແຂ່ງຂັນແບບເປັນທຳ ແລະໃນລະດັບເທົ່າທຽມກັນ ພ້ອມທັງປົກປ້ອງເສລີພາບໃນການເດີນເຮືອແລະການບິນຜ່ານ ຮວມທັງຢູ່ໃນເຂດທະເລຈີນໃຕ້ ແລະທະເລຈີນຕາເວັນອອກ.”
ເຂດອິນໂດປາຊີຟິກທີ່ເສລີແລະເປີດກວ້າງຍັງມີຄວາມຈຳເປັນທີ່ຈະຕ້ອງໄດ້ເຮັດວຽກຮ່ວມກັນ ເພື່ອກຳນົດມາດຕະຖານໃໝ່ ກ່ຽວກັບເທັກໂນໂລຈີທີ່ຫາກໍຄົ້ນພົບ ຊຶ່ງເປັນແຮງຂັບດັນພາກສ່ວນທີ່ສຳຄັນໆຂອງເສດຖະກິດ ແລະມີຜົນຕໍ່ເກືອບວ່າທຸກໆດ້ານຂອງຊີວິດຜູ້ຄົນ.
ສະຫະລັດ ເກົາຫຼີໃຕ້ ແລະຍີປຸ່ນ ຍັງໄດ້ຫາລືກັນກ່ຽວກັບວ່າຈະສ້າງຄວາມກ້າວໜ້າແບບໃດໃຫ້ແກ່ເປົ້າໝາຍຮ່ວມກັນຂອງພວກເຂົາເຈົ້າ ໃນການເຮັດໃຫ້ແຫຼມເກົາຫຼີເປັນເຂດປອດນິວເຄລຍຢ່າງສິ້ນເຊີງ ແລະຊອກຫາຊ່ອງທາງເພື່ອໃຫ້ມີສັນຕິພາບ ຢ່າງເປັນການຖາວອນຢູ່ທີ່ນັ້ນ ລັດຖະມົນຕີການຕ່າງປະເທດບລິງເກັນກ່າວ.
“ພວກເຮົາຂໍປະນາມ ການຍິງລູກສອນໄຟ ເມື່ອໄວໆມານີ້ ຂອງ ສປປ ເກົາຫຼີ ແລະໂຄງການອາວຸດນິວເຄລຍແລະລູກສອນໄຟຂີປະນາວຸດທີ່ຜິດກົດໝາຍ ຊຶ່ງເປັນການລະເມີດຢ່າງຈະແຈ້ງຕໍ່ມະຕິຕ່າງໆຂອງສະພາຄວາມໝັ້ນຄົງແລະພວກເຮົາຈະສືບຕໍ່ເຮັດວຽກ ເພື່ອຊອກຫາທາງໃຫ້ ສປປ ເກົາຫຼີເປັນຜູ້ຮັບຜິດຊອບດັ່ງ
ທີ່ພວກເຮົາໄດ້ທຳການລົງໂທດຕໍ່ 8 ສ່ວນບຸກຄົນ ທີ່ພົວພັນ ກັບ ສປປ ເກົາຫຼີ.ສະຫະລັດຍັງສືບຕໍ່ເປີດກວ້າງເພື່ອການເຈລະຈາຫາລື ໂດຍປາສະຈາກການຕັ້ງເງື່ອນໄຂລ່ວງໜ້າ ຖ້າພຽງຢາງຫາກເລືອກເສັ້ນທາງນັ້ນ.”
ລັດຖະມົນຕີບລິງເກັນກ່າວວ່າ ຄວາມສຳພັນຂອງສະຫະລັດ ກັບເກົາຫຼີໃຕ້ ແລະຍີປຸ່ນ ຍັງຈະສືບຕໍ່ “ເປັນການໃຫ້ຄວາມໝັ້ນໝາຍທີ່ແນ່ວແນ່ ຂອງອາເມຣິກາທີ່ຈະປົກປ້ອງພັນທະມິດທັງສອງ ທາງດ້ານເສດຖະກິດ ທີ່ລົງເລິກແລະຂະຫຍາຍໂຕຂອງພວກເຮົາ ແລະຄວາມສຳພັນທາງດ້ານການຄ້າ ແລະຄວາມເຊື່ອມໂຍງຕະຫຼອດໄປລະຫວ່າງປະຊາຊົນຂອງພວກເຮົາ.”