ບົດບັນນາທິການ ທີ່ສະທ້ອນເຖິງນະໂຍບາຍ ຂອງລັດຖະບານສະຫະລັດ
ໃນລະຫວ່າງການເດີນທາງໄປຢ້ຽມຢາມຍີ່ປຸ່ນເມື່ອໄວໆມານີ້ ລັດຖະມົນຕີກະຊວງປ້ອງກັນປະເທດຂອງສະຫະລັດ ທ່ານລອຍ ອອສຕິນ ເອີ້ນສະພາບການໃນປັດຈຸບັນນີ້ວ່າ “ຊ່ວງເວລາແຫ່ງແຮງກະຕຸ້ນປະຫວັດສາດໃນການເປັນພັນທະມິດລະຫວ່າງສະຫະລັດແລະຍີ່ປຸ່ນ.”
“ກອງທັບຂອງພວກເຮົາກຳລັງປະຕິບັດງານແລະຝຶກແອບຮ່ວມກັນແບບທີ່ບໍ່ເຄີຍມີມາກ່ອນ ເພື່ອຮັກສາສັນຕິພາບ ສະກັດກັ້ນການຮຸກຮານ ແລະຮັບມືກັບວິກິດການຕ່າງໆ.”
ທີ່ກອງປະຊຸມຖະແຫຼງຂ່າວ ຮ່ວມກັບລັດຖະມົນຕີກະຊວງປ້ອງກັນປະເທດຍີ່ປຸ່ນ ທ່ານຮາມາດະ ຢາຊຸກາຊຸ ລັດຖະມົນຕີກະຊວງປ້ອງກັນປະເທດອອສຕິນ ໄດ້ກ່າວເຖິງບັນຫາທ້າທາຍຫຼາຍໆຢ່າງທີ່ມີຢູ່ໃນເວລານີ້:
“ພວກເຮົາມີຄວາມເປັນຫ່ວງຢ່າງແທ້ຈິງກ່ຽວກັບການປະພຶດແບບບີບບັງຄັບຂອງ ສປ ຈີນ ແລະຄວາມພະຍາຍາມທີ່ຈະບ່ອນທຳລາຍ ຫຼັກການຂອງລະຫວ່າງປະເທດທີ່ອີງໃສ່ລະບຽບກົດໝາຍ ແລະໃນຂະນະດຽວກັນ ຣັດເຊຍຍັງສືບຕໍ່ເຮັດສົງຄາມທີ່ໂຫດຮ້າຍແລະສົງຄາມທາງເລືອກທີ່ບໍ່ມີການເກາະຜິດຂອງຕົນໃນຢູເຄຣນ ພວກເຮົາຮູ້ສຶກຊາບຊຶ້ງ ໃນການຊ່ວຍເຫຼືອຂອງຍີ່ປຸ່ນ ຕໍ່ຢູເຄຣນແລະການນຳພາຂອງທ່ານ ທີ່ຄັດຄ້ານຕໍ່ທຸກຄວາມພະຍາຍາມ ທີ່ຈະປ່ຽນແປງສະຖານະພາບໃນປັດຈຸບັນ ດ້ວຍການໃຊ້ກຳລັງ.”
ໂຄງການອາວຸດນິວເຄລຍແລະລູກສອນໄຟ ທີ່ເປັນອັນຕະລາຍແລະທຳລາຍສະຖຽນລະພາບຂອງເກົາຫຼີເໜືອ ຮວມທັງການສົ່ງດາວທຽມທີ່ປະສົບກັບຄວາມລົ້ມແຫຼວເມື່ອໄວໆມານີ້ ຍັງເປັນໄພຂົ່ມຂູ່ຕໍ່ສັນຕິພາບແລະສະຖຽນລະພາບຢູ່ໃນຂົງເຂດ.
“ໃນຂະນະທີ່ພວກເຮົາປະເຊີນໜ້າກັບບັນຫາທ້າທາຍຮ່ວມກັນເຫຼົ່ານີ້ ຂ້າພະເຈົ້າມາທີ່ນີ້ ເພື່ອໃຫ້ການຢືນຢັນອີກເທື່ອນຶ່ງເຖິງຄວາມໝັ້ນໝາຍແບບບໍ່ມີການປ່ຽນແປງຂອງອາເມຣິກາທີ່ມີຕໍ່ຍີ່ປຸ່ນ. ນີ້ແມ່ນຮວມທັງການສະກັດກັ້ນທີ່ສະໜອງການຄຸ້ມຄອງຢ່າງເຕັມອັດຕາໃນຄວາມສາມາດທາງດ້ານອາວຸດທຳມະດາແລະອາວຸດນິວເຄລຍຂອງສະຫະລັດ.”
ລັດຖະມົນຕີກະຊວງປ້ອງກັນປະເທດອອສຕິນ ກ່າວຊົມເຊີຍການປັບປຸງນະໂຍບາຍຄວາມໝັ້ນຄົງແຫ່ງຊາດຂອງຍີ່ປຸ່ນ ຮວມທັງການຕັດສິນໃຈທີ່ຈະເພີ້ມການໃຊ້ຈ່າຍໃນດ້ານປ້ອງກັນປະເທດແລະການຊອກຫາຊ່ອງທາງໃນຄວາມສາມາດເພື່ອໂຈມຕີຕອບໂຕ້. ທ່ານໃຫ້ຂໍ້ສັງເກດ ດ້ວຍຄວາມພາກພູມໃຈ ກ່ຽວກັບການຕັດສິນໃຈຂອງສະຫະລັດ ທີ່ຈະປັບປຸງການວາງກຳລັງອາເມຣິກັນຢູ່ໃນປະເທດ ຍີ່ປຸ່ນ ໂດຍເຮັດໃຫ້ຄ້າຍທະຫານ ທີ່ສະໜັບສະໜຸນການປະຕິບັດງານ ມີຄວາມ
ສາມາດແບບອະເນກປະສົງ ເຄື່ອນທີ່ ແລະປັບໂຕໄດ້ ຮວມທັງກອງພັນຮັກສາແຄມຝັ່ງຂອງທະຫານມາຣີນ.
ປະເທດທັງສອງຍັງໄດ້ເສີມຂະຫຍາຍການແບ່ງປັນຂໍ້ມູນ ຕະຫຼອດທັງເຮັດວຽກຮ່ວມກັນກ່ຽວກັບເທັກໂນໂລຈີທີ່ກ້າວໜ້າທັນສະໄໝ ຮວມທັງລະບົບອິດສະຫຼະ ທີ່ປະກອບດ້ວຍເຮືອບິນລົບອາຍພົ່ນແລະລະບົບປ້ອງກັນໄພທາງອາກາດທີ່ທັນສະໄໝແລະການຮ່ວມມືເພີ້ມຂຶ້ນລະຫວ່າງຕ່ອງໂສ້ອຸບປະທານໃນດ້ານປ້ອງກັນປະເທດແລະອຸດສາຫະກຳຖານທັບຕ່າງໆຂອງສະຫະລັດແລະຍີ່ປຸ່ນ.
ລັດຖະມົນຕີກະຊວງປ້ອງກັນປະເທດອອສຕິນຍັງໃຫ້ຂໍ້ສັງເກດເຖິງຄວາມສຳຄັນໃນວຽກການທີ່ສະຫະລັດແລະຍີ່ປຸ່ນກຳລັງເຮັດກັບບັນດາປະເທດພາຄີທີ່ມີຈິດໃຈແບບດຽວກັນ ຮວມທັງອອສເຕຣເລຍ ສາທາລະນະລັດເກົາຫຼີ ອິນເດຍແລະຟີລິບປິນ “ທີ່ມີຫຼັກຄຸນຄ່າ ແລະມີເປົ້າໝາຍແບບດຽວກັນ ທີ່ຈະສືບຕໍ່ຊຸກຍູ້ໃຫ້ເຂດອິນໂດປາຊີຟິກ ເປັນເຂດທີ່ເສລີແລະເປີດກວ້າງ.”
ລັດຖະມົນຕີກະຊວງປ້ອງກັນປະເທດອອສຕິນ ປະກາດກ່ຽວກັບ ການຢ້ຽມຢາມຂອງທ່ານວ່າ “ນີ້ແມ່ນຂໍ້ສະຫຼຸບ ສະຫະລັດແລະຍີ່ປຸ່ນ ໄດ້ສ້າງຄວາມກ້າວໜ້າທີ່ໜ້າປະທັບໃຈຮ່ວມກັນແລະຂ້າພະເຈົ້າມີຄວາມເຊື່ອໝັ້ນວ່າ ການເປັນພັນທະມິດຂອງພວກເຮົາ ຈະເຕີບໃຫຍ່ຂະຫຍາຍໂຕ ແລະແມ່ນກະທັງ ມີຄວາມເຂັ້ມແຂງ ກວ່າເກົ່າ ໃນຂະນະທີ່ພວກເຮົາຍັງສືບສານຕໍ່ ແຮງກະຕຸ້ນອັນນີ້.”