ບົດບັນນາທິການ ທີ່ສະທ້ອນເຖິງນະໂຍບາຍ ຂອງລັດຖະບານສະຫະລັດ
ສະມັດຊາໃຫຍ່ ອົງການສະຫະປະຊາຊາດ ໄດ້ລົງຄະແນນສຽງໂຈະການເປັນສະມາຊິກຂອງຣັດເຊຍຢູ່ໃນສະພາສິດທິມະນຸດສະຫະປະຊາຊາດ ຊຶ່ງເປັນຄັ້ງທີສອງທີ່ປະເທດໃດປະເທດນຶ່ງ ໄດ້ຖືກລົງຄະແນນສຽງຂັບໄລ່ອອກຈາກສະພາດັ່ງກ່າວ ແລະນີ້ແມ່ນເທື່ອທຳອິດທີ່ມີສະມາຊິກຖາວອນຂອງສະພາຄວາມໝັ້ນຄົງສະຫະປະຊາຊາດໄດ້ຖືກຂັບໄລ່.
ມະຕິ ຊຶ່ງໄດ້ຖືກຮັບຜ່ານດ້ວຍຄະແນນສຽງ 93 ຕໍ່ 24 ໂດຍມີ 54 ປະເທດບໍ່
ອອກສຽງ ແມ່ນໄດ້ສະແດງ “ຄວາມເປັນຫ່ວງຢ່າງເລິກຕໍ່ວິກິດການດ້ານສິດທິມະນຸດ ແລະມະນຸດສະທຳ ທີ່ພວມເກີດຂຶ້ນໃນປະເທດຢູເຄຣນ ໂດຍສະເພາະ ແມ່ນລາຍງານການລ່ວງລະເມີດແລະປະຕິບັດທີ່ບໍ່ຖືກຕ້ອງໃນດ້ານສິດທິມະນຸດ ແລະການລະເມີດຕໍ່ກົດໝາຍມະນຸດສະທຳລະຫວ່າງປະເທດໂດຍສະຫະພັນຣັດເຊຍ ຮວມທັງການລ່ວງລະເມີດ ແລະປະຕິບັດແບບບໍ່ຖືກຕ້ອງ ຢ່າງເປີດແປນ ແລະເປັນລະບົບ ໃນດ້ານສິດທິມະນຸດ.”
ຂໍ້ລິເລີ້ມເພື່ອໂຈະການເປັນສະມາຊິກຂອງຣັດເຊຍ ຢູ່ໃນສະພາສິດທິມະນຸດສະຫະປະຊາຊາດ ແມ່ນນຳພາໂດຍຢູເຄຣນ ຮວມກັບບັນດາປະເທດພາຄີຈາກທຸກ
ເຂດຂອງໂລກ ຮວມທັງສະຫະລັດ ຫຼັງຈາກຮູບພາບທີ່ໜ້າຢ້ານກົວກ່ຽວກັບການ
ທໍລະມານແລະສັງຫານພົນລະເຮືອນໃນເຂດເມືອງບູຊາ ແລະຫົວເມືອງອື່ນໆໃກ້
ກັບນະຄອນຫຼວງກີຢິບ ຫຼັງຈາກການຖອຍອອກໄປຂອງກຳລັງທະຫານຣັດເຊຍ ຈາກເຂດດັ່ງກ່າວ.
ຫຼັງຈາກໄດ້ມີການລົງຄະແນນສຽງດ້ວຍຜົນສຳເລັດແລ້ວ ເອກອັກຄະລັດຖະທູດສະຫະລັດປະຈຳອົງການສະຫະປະຊາຊາດ ທ່ານນາງລິນດາ ທໍມັສ ກຣີນຟິລກໍ
ກ່າວວ່າ “ມື້ນີ້ ປະຊາຄົມນາໆຊາດ ໄດ້ເອົາບາດກ້າວຮ່ວມ ໄປໃນທິດທາງທີ່ຖືກ
ຕ້ອງ. ພວກເຮົາໄດ້ໃຫ້ການຄ້ຳປະກັນ ປະເທດທີ່ລ່ວງລະເມີດສິດທິມະນຸດແບບຊ້ຳໆຊາກໆແລະຮ້າຍແຮງເປັນພິເສດນັ້ນ ຈະບໍ່ໃຫ້ອະນຸຍາດຄອບຄອງຕຳແໜ່ງ
ຜູ້ນຳໃນດ້ານສິດທິມະນຸດ ຢູ່ທີ່ອົງການສະຫະປະຊາຊາດ. ຂໍໃຫ້ພວກເຮົາສືບຕໍ່ຖື
ວ່າຣັດເຊຍເປັນຜູ້ຮັບຜິດຊອບ ຕໍ່ສົງຄາມທີ່ບໍ່ມີການທ້າທາຍເກາະຜິດ ບໍ່ເປັນທຳ ແລະໄຮ້ສາມັນສຳນຶກດັ່ງກ່າວນີ້.”
ສະຫະລັດ ກ່ອນໜ້ານີ້ໄດ້ຊັ່ງຊາວ່າ ສະມາຊິກຂອງກຳລັງທະຫານ ວລາດີເມຍ ປູຕິນ ໄດ້ກໍ່ອາຊະຍາກຳສົງຄາມຢູ່ໃນຢູເຄຣນແລະສະຫະລັດກໍໄດ້ດຳເນີນການ
ຮ່ວມກັບປະເທດພັນທະມິດແລະພາຄີເພື່ອໃຫ້ການສະໜັບສະໜຸນຕໍ່ການດຳເນີນຄວາມພະຍາຍາມຂອງຄະນະກຳມາທິການສືບສວນສະພາສິດທິມະນຸດເພື່ອຮວບຮວມຫຼັກຖານໃຫ້ພວກກໍ່ອາຊະຍາກຳສົງຄາມເປັນຜູ້ຮັບຜິດຊອບ.
ໃນການກ່າວຊົມເຊີຍຕໍ່ການລົງຄະແນນສຽງຂອງສະມັດຊາໃຫຍ່ອົງການສະຫະປະຊາຊາດທີ່ໄດ້ໂຈະການເປັນສະມາຊິກຂອງຣັດເຊຍໃນສະພາສິດທິມະນຸດນັ້ນ
ລັດຖະມົນຕີການຕ່າງປະເທດສະຫະລັດ ທ່ານແອນໂທນີ ບລິງເກັນ ກ່າວວ່າ “ສິ່ງທີ່ຜິດ ໄດ້ກາຍເປັນຖືກ” ທ່ານໄດ້ຂຽນລົງໃນຄຳຖະແຫລງວ່າ “ການກໍ່ໂທດກຳທີ່ໂລກໄດ້ຮູ້ເຫັນເປັນພະຍານປາກົດວ່າແມ່ນເປັນຫຼັກຖານເພີ້ມຂຶ້ນໃນການກໍ່ອາຊະຍາກຳສົງຄາມ ຊຶ່ງມີໜ້າທີ່ ເປັນເຄື່ອງບົ່ງບອກ ອີກອັນນຶ່ງວ່າ ຣັດເຊຍບໍ່ ຄວນມີບ່ອນ ຢູ່ໃນອົງການຊຶ່ງມີໜ້າທີ່ຕົ້ນຕໍແມ່ນເພື່ອຊຸກຍູ້ໃຫ້ມີການເຄົາລົບນັບຖືສິດທິມະນຸດນັ້ນ.”
ລັດຖະມົນຕີບລິງເກັນປະກາດວ່າ ດ້ວຍການລົງຄະແນນສຽງເພື່ອໂຈະການເປັນສະມາຊິກຂອງຣັດເຊຍນັ້ນ “ໂລກໄດ້ສົ່ງສັນຍານຢ່າງຈະແຈ້ງອີກອັນນຶ່ງໃຫ້ຮູ້ວ່າ
ຣັດເຊຍຕ້ອງຢຸດເຊົາ ການເຮັດສົງຄາມຮຸກຮານຕໍ່ຢູເຄຣນໃນທັນທີແລະໂດຍປາສະຈາກເງື່ອນໄຂໃດໆທັງສິ້ນ ແລະເຄົາລົບຕໍ່ຫຼັກການຕ່າງໆ ທີ່ໄດ້ຮັບການເທີດທູນໂດຍກົດບັດສະຫະປະຊາຊາດ. ປະຊາຄົມນາໆຊາດ ຈະສືບຕໍ່ຖືວ່າ ຣັດເຊຍ
ເປັນຜູ້ຮັບຜິດຊອບ ແລະສະຫະລັດກໍຈະສືບຕໍ່ຢືນຢູ່ຄຽງບ່າຄຽງໄຫຼ່ກັບປະຊາຊົນ
ຊາວຢູເຄຣນ ໃນຂະນະທີ່ພວກເຂົາເຈົ້າຕໍ່ສູ້ເພື່ອປົກປ້ອງ ອະທິປະໄຕ ປະຊາທິປະໄຕ ແລະອິດສະຫຼະພາບຂອງພວກເຂົາເຈົ້າ.”