ບົດບັນນາທິການ ທີ່ສະທ້ອນເຖິງນະໂຍບາຍ ຂອງລັດຖະບານສະຫະລັດ
ສະຫະລັດ ໃນການປະສານງານກັບບັນດາປະເທດພັນທະມິດ ແລະພາຄີຂອງຕົນ ໄດ້ເອົາບາດກ້າວເພີ້ມຕື່ມເພື່ອທຳການລົງໂທດອັນເປັນຜົນທີ່ຕິດຕາມມາຕໍ່ການທີ່ປະທານາທິບໍດີຣັດເຊຍ ທ່ານວລາດີເມຍ ປູຕິນ ແລະພວກສະໜັບສະໜຸນທ່ານ ໃນການເຮັດສົງຄາມຂອງຣັດເຊຍ ແບບບໍ່ມີການເກາະຜິດແລະບໍ່ເປັນທຳ ຕໍ່ປະເທດຢູເຄຣນ.
ໃນການປະສານງານກັບກຸ່ມ ຈີ 7 ກະຊວງການເງິນຂອງສະຫະລັດໄດ້ປະກາດການລົງໂທດເມື່ອວັນທີ 27 ມິຖຸນາຜ່ານມາ ແນໃສ່ພື້ນຖານທາງດ້ານອຸດສາຫະກຳໃນການປ້ອງກັນປະເທດຂອງຣັດເຊຍ ຮວມທັງ ບໍລິສັດໂຣສເທັກ (Rostec) ຊຶ່ງກະຊວງການເງິນ ກ່າວວ່າ ເປັນ “ພາກສ່ວນສຳຄັນສຸດ ໃນດ້ານປ້ອງກັນປະເທດຂອງຣັດເຊຍ ອຸດສາຫະກຳ ເທັກໂນໂລຈີ ແລະຜູ້ຜະລິດ” ພ້ອມໆກັບ 29ສ່ວນບຸກຄົນຊາວຣັດເຊຍ. ລັດຖະມົນຕີກະຊວງການເງິນ ຂອງສະຫະລັດ ທ່ານນາງແຈແນັດ ແຢລເລັນກ່າວວ່າ “ການແນເປົ້າໝາຍໃສ່ອຸດສາຫະກຳດ້ານປ້ອງກັນປະເທດຂອງຣັດເຊຍຈະເຮັດໃຫ້ຄວາມສາມາດຂອງປູຕິນເຊື່ອມໂຊມລົງແລະ
ຈະຂັດຂວາງເພີ້ມຂຶ້ນຕໍ່ການເຮັດສົງຄາມຂອງລາວໃນຢູເຄຣນ ຊຶ່ງໄດ້ປະສົບກັບສະພາບຂວັນກຳລັງໃຈຕ່ຳ ຕ່ອງໂສ້ອຸບປະທານຖືກທັບມ້າງແລະຄວາມລົ້ມແຫຼວທາງດ້ານລໍຈິສຕິກ.”
ນອກນັ້ນ ທາງກະຊວງການເງິນຍັງໄດ້ປະກາດວ່າ ສະຫະລັດຮ່ວມກັບການາດາ ສະຫະຣາຊະອານາຈັກ ແລະຍີ່ປຸ່ນ ໄດ້ຫ້າມບໍ່ໃຫ້ມີການນຳເຂົ້າຄຳຂອງຣັດເຊຍ ຊຶ່ງເປັນການສົ່ງອອກທີ່ບໍ່ແມ່ນພາກສ່ວນພະລັງງານໃຫຍ່ສຸດຂອງສະຫະພັນຣັດເຊຍ.
ການເອົາມາດຕະການຂອງກະຊວງການເງິນແມ່ນມີຂຶ້ນຄຽງຄູ່ກັນໄປກັບກະຊວງການຕ່າງປະເທດ ຊຶ່ງໄດ້ທຳການລົງໂທດ ຕໍ່ 45 ບໍລິສັດ ແລະ 29 ສ່ວນບຸກຄົນ ພາຍໃຕ້ດຳລັດຂອງຝ່າຍບໍລິຫານເລກທີ 14024. ລາຍຊື່ທີ່ຖືກລະບຸ ແມ່ນຮວມທັງກົມກອງທະຫານທີ່ເຊື່ອວ່າມີສ່ວນພົວພັນໃນການລະເມີດສິດທິມະນຸດຢູ່ໃນຢູເຄຣນ ລວມມີການສັງຫານແບບຮວບຮັດຕັດຕອນ ການທຸບຕີພົນລະເຮືອນທີ່ບໍ່ຕິດອາວຸດ ແລະການທຳລາຍເຮືອນຊານບ້ານຊ່ອງ.
ນອກນັ້ນແລ້ວ ກະຊວງການຕ່າງປະເທດສະຫະລັດ ຍັງໄດ້ລະບຸຊື່ອົງການຄຸ້ມຄອງຄວາມປອດໄພຂອງສະຫະພັນຣັດເຊຍ ທີ່ເອີ້ນຫຍໍ້ວ່າ FSB ໃນການລະເມີດສິດທິມະນຸດ ໂດຍສະເພາະແລ້ວແມ່ນອ້າງອີງໃສ່ “ການພົວພັນທີ່ເປັນຈຸດໃຈກາງ” ໃນການບໍລິຫານງານສູນຄັດເລືອກ ຂອງອົງການ FSB ບ່ອນທີ່ປະຊາຊົນຊາວຢູເຄຣນ ໄດ້ຖືກບັງຄັບໃຫ້ຍົກຍ້າຍຖິ່ນຖານ ເຂົ້າໄປຢູ່ໃນເຂດທີ່ຣັດເຊຍຄວບຄຸມ ຫຼືແມ່ນກະທັງໃນປະເທດຣັດເຊຍເອງ ແລະໄດ້ຖືກສອບປາກຄຳແບບຍືດຍາວແລະຂຸ້ນຂ້ຽວ.
ກະຊວງການຕ່າງປະເທດສະຫະລັດຍັງໄດ້ລະບຸຊື່ພະແນກການທີ່ພົວພັນໃນດ້ານປ້ອງກັນປະເທດຂອງສະຫະພັນຣັດເຊຍຈຳນວນນຶ່ງ ແລະ ຈຳກັດຮັດແຄບບໃນການອອກວີຊາໃຫ້ແກ່ນາຍທະຫານຣັດເຊຍ 511 ຄົນ ທີ່ໄດ້ຂົ່ມຂູ່ ຫຼືລະເມີດອະທິປະໄຕແລະຜືນແຜ່ນດິນອັນຄົບຖ້ວນຂອງຢູເຄຣນ ຕະຫຼອດທັງຈຳກັດຮັດແຄບຕໍ່ການອອກວີຊາໃຫ້ແກ່ຊາວຣັດເຊຍອີກ 18 ຄົນ ທີ່ພົວພັນນຳການກົດຂີ່ຕໍ່ພວກຄັດຄ້ານລັດຖະບານ.
ການລົງໂທດແລະການຄວບຄຸມໃນການສົ່ງອອກຂອງຣັດເຊຍ ໃນຮອບເດືອນທີ່ຜ່ານມາໂດຍສະຫະລັດ ແລະບັນດາປະເທດພາຄີແມ່ນໄດ້ມີຜົນກະທົບຢ່າງຮ້າຍແຮງ. ບໍລິສັດຕ່າງປະເທດຈຳນວນນຶ່ງ ໄດ້ພາກັນຖອນຕົວອອກຈາກປະເທດດັ່ງກ່າວ ການນຳເຂົ້າສິນຄ້າຂອງຣັດເຊຍຈາກປະເທດຕ່າງໆໃນໂລກໄດ້ຫຼຸດລົງ 40 ເປີເຊັນ ໂຮງງານຕ່າງໆຂອງຣັດເຊຍພວມດີ້ນຮົນເພື່ອຮັກສາລະດັບໃນການຜະລິດ. ອັດຕາເງິນເຟີ້ໄດ້ເພີ້ມຂຶ້ນ 20 ກວ່າເປີເຊັນແລະນັບເປັນເທື່ອທຳອິດໃນໄລຍະດົນກວ່ານຶ່ງສັດຕະວັດ ຣັດເຊຍຜິດນັກການຊຳລະໜີ້ສິນຂອງປະເທດ.
ດັ່ງທີ່ ລັດຖະມົນຕີການຕ່າງປະເທດສະຫະລັດ ທ່ານແອນໂທນີ ບລິງເກັນ ໄດ້ກ່າວໄວ້ ສະຫະລັດ “ຈະສືບຕໍ່ເຮັດວຽກ ຮ່ວມກັບບັນດາພັນທະມິດ ແລະພາຄີຂອງພວກເຮົາ ໃນການລົງໂທດເພື່ອເຮັດໃຫ້ຣັດເຊຍຕ້ອງໃຊ້ຈ່າຍໜັກຂຶ້ນ ຖ້າປະເທດດັ່ງກ່າວຍັງເຮັດສົງຄາມທາງເລືອກຂອງຕົນຢູ່ຕໍ່ໄປ.”