ບົດບັນນາທິການ ທີ່ສະທ້ອນເຖິງນະໂຍບາຍ ຂອງລັດຖະບານສະຫະລັດ
ການພົບປະເມື່ອໄວໆມານີ້ ຢູ່ນະຄອນສຽມຣຽບ ລະຫວ່າງ ປະເທດສະມາຊິກຂອງອາຊຽນແລະຜູ້ຕາງໜ້າທາງດ້ານການຄ້າຂອງສະຫະລັດ ແມ່ນໂອກາດໃນການເນັ້ນໜັກໃຫ້ເຫັນເຖິງຄວາມໝາຍໝັ້ນຂອງສະຫະລັດ ຕໍ່ອາຊຽນ ແລະຂໍ້ລິເລີ້ມຕ່າງໆ ທີ່ພວມດຳເນີນຢູ່ຂອງພວກເຮົາ ເພື່ອເສີມຂະຫຍາຍຄວາມສຳພັນ ທາງດ້ານການຄ້າຫຼາຍຝ່າຍ ໃນທົ່ວຂົງເຂດເອເຊຍຕາເວັນອອກສຽງໃຕ້.
ທີ່ກອງປະຊຸມຖະແຫຼງຂ່າວກ່ອນການປຶກສາຫາລືນັ້ນ ຜູ້ຕາງໜ້າທາງດ້ານການຄ້າຂອງສະຫະລັດ ທ່ານນາງແຄັດເທີຣີນ ຕ່າຍ ຊຶ່ງເປັນປະທານຂອງກອງປະຊຸມຮ່ວມກັບທ່ານພັນ ສໍຣະສັກ ລັດຖະມົນຕີກະຊວງການຄ້າຂອງກຳປູເຈຍໃຫ້ຂໍ້ສັງເກດວ່າ “ອາຊຽນ ແມ່ນເປັນຕະຫຼາດທີ່ໃຫຍ່ອັນດັບ 4 ຂອງໂລກ. ສະຫະລັດມີການຄ້າ ແລະບໍລິການກັບອາຊຽນ ໃນມູນຄ່າ 442 ຕື້ໂດລາໃນປີ 2021 ເພີ້ມຂຶ້ນ 22 ເປີເຊັນ ປຽບທຽບໃສ່ໄລຍະດຽວກັນຂອງປີກ່ອນ.”
ຍ້ອນວ່າຄວາມສຳພັນຂອງສະຫະລັດກັບອາຊຽນ ມີຄວາມສຳຄັນສູງ ປະທານາທິບໍດີໂຈ ໄບເດັນ ຈຶ່ງໄດ້ປະກາດໃນເດືອນພຶດສະພາຜ່ານມາ ທີ່ກອງປະຊຸມສຸດຍອດນັດພິເສດ ລະຫວ່າງສະຫະລັດກັບອາຊຽນຢູ່ທີ່ນະຄອນຫຼວງວໍຊິງຕັນ ກ່ຽວກັບການສະໜອງທຶນ 150 ລ້ານໂດລາ ໃນຂໍ້ລິເລີ້ມ ເພື່ອລົງເລິກໃນຄວາມສຳ ພັນໃນດ້ານຕ່າງໆ ຮວມທັງໂດຍຜ່ານການລົງທຶນ ດ້ານພື້ນຖານໂຄງລ່າງພະງານທີ່ສະອາດ ໂຄງການຍົກລະດັບຄວາມຮູ້ຄວາມສາມາດ ການຊ່ວຍເຫຼືອລ້າຕໍ່ພາກເອກກະຊົນ ແລະການແລກປ່ຽນທາງດ້ານການສຶກສາ ແລະວັດທະນະທຳ.ເງິນທຶນດັ່ງກ່າວແມ່ນສົມທົບໃສ່ການລົງທຶນ 102 ລ້ານໂດລາ ທີ່ປະທານາທິບໍດີໄດ້ປະກາດຢູ່ກອງປະຊຸມສຸດຍອດປະຈຳປີສະຫະລັດ-ອາຊຽນ ໃນເດືອນຕຸລາປີ 2021 ເພື່ອເສີມຂະຫຍາຍການຮ່ວມມື ໃນດ້ານສາທາລະນະສຸກ ວິທະຍາສາດກ່ຽວກັບການປ່ຽນແປງຂອງອາກາດ ການອຳນວຍຄວາມສະດວກທາງດ້ານການຄ້າ ແລະອື່ນໆອີກ.
ໃນຕົ້ນປີນີ້ ສະຫະລັດໄດ້ໃຫ້ການຢືນຢັນເຖິງຄວາມສຳຄັນກ່ຽວກັບມາດຕະຖານທາງດ້ານແຮງງານແລະສິ່ງແວດລ້ອມ ສຳລັບທຸກໆຄົນຢູ່ໃນຂົງເຂດ ຮວມທັງໂດຍຜ່ານຂອບການຈັດແຈງທາງດ້ານການຄ້າແລະການລົງທຶນອາຊຽນ-ສະຫະລັດ ແລະໃນລະຫວ່າງການປຶກສາຫາລືທາງດ້ານການຄ້າແລະແຮງງານສະຫະລັດ-ອາຊຽນ.
ທ່ານນາງຕ່າຍ ຜູ້ຕາງໜ້າທາງດ້ານການຄ້າຂອງສະຫະລັດກ່າວວ່າ “ຄວາມສຳເລັດເຫຼົ່ານີ້ແມ່ນເປັນສ່ວນນຶ່ງໃນຄວາມພະຍາຍາມຂອງລັດຖະບານທ່ານໄບເດັນ ເພື່ອສ້າງຕັ້ງການແຂ່ງຂັນຂອງໂລກໄປສູ່ຈຸດສຸດຍອດທາງດ້ານການຄ້າ ທີ່ຍຶດໝັ້ນໃນສິດທິຂອງພວກຄົນງານ ປົກປ້ອງໂລກມະນຸດ ແລະສ້າງໂອກາດໃຫ້ແກ່ພວກເຮົາທຸກໆຄົນ.”
ຢູ່ໃນຖະແຫຼງການຮ່ວມ ຫຼັງຈາກມີການປຶກສາຫາລືກັນແລ້ວ ບັນດາປະເທດສະມາຊິກຂອງອາຊຽນແລະສະຫະລັດ ຮວມຢູ່ໃນເລື້ອງອື່ນໆແມ່ນໄດ້ຕົບມືຊົມເຊີຍ “ຕໍ່ການພົວພັນຢ່າງຂຸ້ນຂ້ຽວໂດຍພວກເຈົ້າໜ້າທີ່ ໃນການປຶກສາຫາລື ເຖິງຊ່ອງທາງທີ່ເປັນໄປໄດ້ ແລະວິທີການຕ່າງໆເພື່ອຈັດຕັ້ງປະຕິບັດ ອະນາຄົດທາງດ້ານເສດຖະກິດສະຫະລັດ-ອາຊຽນ ອັນເປັນພາກສ່ວນນຶ່ງຂອງຂໍ້ລິເລີ້ມໃໝ່ເພື່ອຂະຫຍາຍການເປັນພາຄີຍຸດທະສາດ ສະຫະລັດ-ອາຊຽນ ທີ່ໄດ້ລິເລີ້ມຂຶ້ນໂດຍປະທານາທິບໍດີໄບເດັນ.” ນອກນັ້ນແລ້ວ ພວກເຂົາເຈົ້າຍັງໃຫ້ຂໍ້ສັງເກດວ່າ “ການພົບປະໄດ້ເນັ້ນໃຫ້ເຫັນຄວາມສຳຄັນ ຂອງນະໂຍບາຍການຕົກລົງກັນຈາກຫຼາຍຝ່າຍ ການຢຶດໝັ້ນໃນກົດໝາຍລະຫວ່າງປະເທດ ແລະການນັບຖືອະທິປະໄຕໃນການປະກອບສ່ວນຕໍ່ສັນຕິພາບຂອງໂລກ ແລະຂອງຂົງເຂດ ສະຖຽນລະພາບແລະຄວາມອຸດົມຮັ່ງມີ.”
ສະຫະລັດຍັງສືບຕໍ່ມີຄວາມໝັ້ນໝາຍນຕໍ່ບັນດາພັນທະມິດແລະພາຄີຂອງພວກເຮົາຢູ່ໃນເຂດເອເຊຍຕາເວັນອອກສຽງໃຕ້ ຊຶ່ງເປັນຈຸດສູນກາງໃນການສ້າງຕັ້ງແລະຮັກສາອະນາຄົດ ຂອງເຂດອິນໂດ-ປາຊີຟິກ ດັ່ງທີ່ປະທານາທິບໍດີໄບເດັນໄດ້ກ່າວໄວ້ “ເປັນເຂດທີ່ເສລີແລະເປີດກວ້າງ ມີສະຖຽນລະພາບ ແລະຄວາມອຸດົມຮັ່ງມີ ແລະປັບໂຕໄດ້ງ່າຍ ແລະກໍມີຄວາມໝັ້ນຄົງ.”