ບົດບັນນາທິການ ທີ່ສະທ້ອນເຖິງນະໂຍບາຍ ຂອງລັດຖະບານສະຫະລັດ
ປະທານາທິບໍດີໂຈ ໄບເດັນ ໄດ້ພົບປະກັບນາຍົກລັດຖະມົນຕີຍີ່ປຸ່ນ ທ່ານກິຊະດະ ຟູມີໂອະ ທີ່ນະຄອນຫຼວງວໍຊິງຕັນໃນເດືອນແລ້ວນີ້ ເພື່ອປຶກສາຫາລືກ່ຽວກັບອະນາຄົດຂອງຄວາມສຳພັນ ລະຫວ່າງສະຫະລັດກັບຍີ່ປຸ່ນ. ຢູ່ໃນຖະແຫຼງການຮ່ວມ ຜູ້ນຳທັງສອງໄດ້ໃຫ້ການຢືນຢັນອີກເທື່ອນຶ່ງ ເຖິງຄວາມໝາຍໝັ້ນຂອງພວກທ່ານ ຕໍ່ “ການຮ່ວມມືແບບບໍ່ເຄີຍມີມາກ່ອນ” ລະຫວ່າງສະຫະລັດກັບຍີ່ປຸ່ນໂດຍອີງຕາມເປົ້າໝາຍແລະບູລິມະສິດຮ່ວມຂອງປະເທດທັງສອງ ດັ່ງທີ່ປະທານາທິບໍດີໄບເດັນກ່າວວ່າ:
“ຫຼັກຄຸນຄ່າປະຊາທິປະໄຕຮ່ວມເຫຼົ່ານີ້ແມ່ນແຫຼ່ງຂອງຄວາມເຂັ້ມແຂງພວກເຮົາ ແຫຼ່ງຂອງການເປັນພັນທະມິດຂອງພວກເຮົາແລະແຫຼ່ງໃນຄວາມສາມາດທີ່ສະໜອງຕອບຕໍ່ປະຊາຊົນຂອງພວກເຮົາທຸກໆຄົນ.”
ນອກຈາກເປັນການເສີມຄວາມເຂັ້ມແຂງ ໃນດ້ານປ້ອງກັນປະເທດ ຕໍ່ການທ້າທາຍທີ່ເພີ້ມທະວີຂຶ້ນ ຢູ່ໃນເຂດອິນໂດປາຊີຟິກແລ້ວ ຖະແຫຼງການຮ່ວມຍັງໄດ້ຫາລືກັນກ່ຽວກັບແຜນການຕ່າງໆ ເພື່ອເສີມຂະຫຍາຍຄວາມອາດສາມາດຂອງປະເທດທັງສອງ ເພື່ອໃຫ້ສາມາດຮັບມືກັບບັນຫາໃໝ່ແລະໄພຂົ່ມຂູ່ທີ່ພວມກໍ່ໂຕຂຶ້ນ.
ສະຫະລັດ ແລະຍີ່ປຸ່ນ ໄດ້ລົງນາມໃນຂອບຂໍ້ຕົກລົງການຮ່ວມມືທາງດ້ານອະວະກາດ. ເປົ້າໝາຍຂອງຂໍ້ຕົກລົງເຫຼົ່ານີ້ກໍແມ່ນ “ເພື່ອສ້າງຄວາມກ້າວໜ້າທາງດ້ານວິທະຍາສາດແລະການສຳຫຼວດອະວະກາດຂອງມະນຸດ” ນັ້ນຄືຄຳເວົ້າຂອງທ່ານລັດຖະມົນຕີການຕ່າງປະເທດ ແອນໂທນີ ບລິງເກັນ ທີ່ກ່າວຢູ່ໃນຖະແຫຼງການ. “ຮ່ວມກັນແລ້ວ ພວກເຮົາໄດ້ສ້າງຄວາມກ້າວໜ້າ ໃຫ້ແກ່ເຂດແດນສຳລັບຄວາມພະຍາຍາມຂອງມະນຸດແລະຄວາມຮູ້ທາງດ້ານວິທະຍາສາດ ໂດຍຜ່ານການເປັນພາຄີ ນັບແຕ່ການສ້າງຕັ້ງສະຖານີອະວະກາດນາໆຊາດໄປສູ່ການພັດທະນາປະ
ຕູດວງເດືອນ ຊຶ່ງເປັນສູນກາງຄົ້ນຄວ້າທີ່ຈະໂຄຈອນອ້ອມດວງຈັນ ແລະນຳໃຊ້ເພື່ອການກະກຽມສຳລັບການເດີນທາງໄປຍັງດາວພະອັງຄານໃນອະນາຄົດ.”
ນອກນັ້ນ ສະຫະລັດແລະຍີ່ປຸ່ນຍັງວາງແຜນທີ່ຈະປັບປຸງຄວາມໝັ້ນຄົງທາງດ້ານເສດຖະກິດຂອງຕົນ ໂດຍເສີມສ້າງຄວາມສາມາດໃນການປັບໂຕ ຂອງຕ່ອງໂສ້ອຸບປະທານ ເພື່ອປົກປ້ອງຄຸ້ມຄອງຈາກຂົ່ມຂູ່ເຊັ່ນການບີບບັງຄັບທາງດ້ານເສດຖະກິດ ນະໂຍບາຍແລະການກະທຳທີ່ບໍ່ແມ່ນການຕະຫຼາດ ແລະໄພພິບັດທຳມະຊາດ.
ຍິ່ງໄປກວ່ານັ້ນ ຍ້ອນຍີ່ປຸ່ນແລະສະຫະລັດແມ່ນເສດຖະກິດປະຊາທິປະໄຕໃຫຍ່ທີ່ສຸດໃນໂລກ ຖະແຫຼງການຮ່ວມໃຫ້ຄຳໝັ້ນສັນຍາ ທີ່ຈະເສີມສ້າງ ເສດຖະກິດໂລກ ເພື່ອໃຫ້ບັນລຸຄວາມເທົ່າທຽມແລະສະເໝີພາບທາງເພດ ສ້າງຄວາມກ້າວໜ້າແບບຍືນຍົງ ເພື່ອໃຫ້ມີການປ່ອຍແກັສເຮືອນແກ້ວສຸດທິເປັນສູນ ແລະ “ປັບປຸງການຮ່ວມມືປະສານງານຂອງຜູ້ໃຫ້ສິນເຊື່ອເພື່ອສະໜອງການບັນເທົາໜີ້ສິນ.”
ສະຫະລັດມອງເຫັນວ່າຍີ່ປຸ່ນແມ່ນນຶ່ງໃນປະເທດພັນທະມິດທີ່ໃກ້ຊິດທີ່ສຸດ “ທີ່ໃຫ້ຄວາມໝັ້ນໝາຍຄັ້ງໃໝ່ເພື່ອໃຫ້ບັນລຸສັນຕິພາບແລະຄວາມອຸດົມຮັ່ງມີ ບໍ່ພຽງແຕ່ ຜ່ານຄຳເວົ້າຂອງພວກເຮົາ ແຕ່ຜ່ານການກະທຳຂອງພວກເຮົາ. ເວລາແມ່ນຮຽກຮ້ອງຕ້ອງການຫຼາຍໄປກວ່ານັ້ນ.”