Accessibility links

Breaking News

ບົດບັນນາທິການ: ລັດຖະມົນຕີບລິງເກັນ ກ່າວເຖິງກອງປະຊຸມສຸດຍອດ ຄັ້ງຈະມາຢູ່ນະຄອນມາດຣິດ ຂອງອົງການເນໂຕ້


ລັດ​ຖະ​ມົນ​ຕີ​ການ​ຕ່າງ​ປະ​ເທດ​ສະ​ຫະ​ລັດ ທ່ານ​ແອນ​ໂທ​ນີ ບ​ລິງ​ເກັນ ກ່າວ​ຕໍ່​ກອງ​ປ​ະ​ຊຸມ​ຖະ​ແຫຼງ​ຂ່າວ ຮ່ວມ​ກັບ​ເລ​ຂາ​ທິ​ການ​ໃຫຍ່​ ອົງ​ການ​ເນ​ໂຕ້ ທ່ານ​ເຈັນ​ສ໌ ສ​ໂຕ​ລ​ເຕັ​ນເບິກ ທີ່​ກະ​ຊວງ​ການ​ຕ່າງ​ປະ​ເທດ​ສະ​ຫະ​ລັດ ເມື່ອ​ວັນ​ທີ 1 ມິ​ຖຸ​ນາ 2022.

ໃນກອງປະຊຸມສຸດຍອດຂອງອົງການເນໂຕ້ ທີ່ນະຄອນມາດຣິດ ປະເທດສະເປນຄັ້ງຈະມານີ້ ກຸ່ມພັນທະມິດຈະຮັບຮອງເອົາຍຸດທະສາດໃໝ່ກ່ຽວກັບທິດທາງໃນການປະຕິບັດງານ.

ບົດບັນນາທິການ ທີ່ສະທ້ອນເຖິງນະໂຍບາຍ ຂອງລັດຖະບານສະຫະລັດ

ໃນ​ກອງ​ປະ​ຊຸມ​ສຸດຍອດ​ຂອງ​ອົງ​ການ​ເນ​ໂຕ້ ທີ່​ນະ​ຄອນ​ມາດ​ຣິດ ປະ​ເທດ​ສະ​ເປນ​ຄັ້ງ​ຈະມາ​ນີ້ ກຸ່ມ​ພັນ​ທະ​ມິດ​ຈະ​ຮັບ​ຮອງ​ເອົາຍຸດ​ທະ​ສາດໃໝ່​ກ່ຽວ​ກັບ​ທິດ​ທາງ​ໃນ​ການ​ປະ​ຕິ​ບັດ​ງານ. ຍຸດ​ທະ​ສາດ​ກ່ຽວ​ກັບ​ທິດ​ທາງ​ໃນ​ການ​ປະ​ຕິ​ບັດ​ງານ ແມ່ນ​ເອກ​ກະ​ສານ ​ທີ່​ແນ​ໃສ່​ເພື່ອ​ເນັ້ນ​ຢ້ຳ​ ໃຫ້​ເຫັນ​ເຖິງ​ໄພ​ຂົ່ມ​ຂູ່​ແລະ​ບັນ​ຫາ​ທ້າ​ທາຍ​ທີ່​ພວກ​ເຮົາ​ກຳ​ລັງ​ປະ​ເຊີນ​ຢູ່ ແລະ​ກຳ​ນົດ​ທິດ​ຂອງ​ອົງ​ການ​ເນ​ໂຕ້​ໃນ​ອະ​ນາຄົດ​ສຳ​ລັບ​ການ​ປັບ​ໂຕ. ແນວ​ຄິດ​ໃໝ່​ນີ້ຈະ​ເວົ້າ​ເຖິງ​ການ​ຮັບ​ມື​ກັບ​ບັນ​ຫາ​ທ້າ​ທາຍ​ຕ່າງໆ ຮວມ​ທັງ​ແຕ່​ກໍ​ບໍ່​ຈຳ​ກັດ​ຢູ່​ສະ​ເພາະ ​ແຕ່​ໃນ​ກິດ​ຈະ​ການ​ທີ່ມີ​ຈຸດ​ປະ​ສົງ​ມຸ່ງ​ຮ້າຍ​ທາງ​ດ້ານ​ໄຊ​ເບີ້ ຄວາມ​ພະ​ຍາ​ຍາມ ​ຂອງ​ຄູ່​ແຂ່ງທາງຍຸດ​ທະ​ສາດ ​ທີ່​ຈະ​ສ້າງ​ຄວາມ​ອ່ອນ​ແອ​ ໃຫ້​ລະ​ບົບ​ການ​ປົກ​ຄອງ​ດ້ວຍ​ຕົວ​ບົດ​ກົດ​ໝາ​ຍ​ຂອງ​ລະ​ຫວ່າງ​ປະ​ເທດ ແລະຜົນ​ກະ​ທົບ​ຕໍ່​ຄວາມ​ໝັ້ນ​ຄົງ​ຈາກ​ການ​ປ່ຽນ​ແປງ​ຂອ​ງ​ດິນ​ຟ້າ​ອາ​ກາດ.

ກ່ຽວ​ກັບ​ບັນ​ຫາ​ຢູ​ເຄ​ຣນນັ້ນ ສະ​ຫະ​ລັດ​ຈະ​ສືບ​ຕໍ່​ຈັດ​ສົ່ງ​ການ​ຊ່ວຍ​ເຫຼືອ​ທີ່​ມີ​ຄວາມ​ຈຳ​ເປັນ​ຕ່າງ​ໆ​ໄປ​ໃຫ້. ລັດ​ຖະ​ມົນ​ຕີ​ການ​ຕ່າງ​ປະ​ເທດ​ແອນ​ໂທ​ນີ ບ​ລິງ​ເກັນ​ກ່າວຢູ່​ທີ່ກອງ​ປະ​ຊຸມ​ຖະ​ແຫຼງ​ຂ່າວ​ເມື່ອ​ໄວໆ​ມານີ້​ວ່າ:

“ປະ​ທາ​ນາ​ທິ​ບໍ​ດີ​ໄບ​ເດັນ ໄດ້​ປະ​ກາດ​ກ່ຽວ​ກັບ​ແຜນ​ການ​ໃຫ້​ຄວາມ​ຊ່ວຍ​ເຫຼືອ​ທາງ​ດ້ານ​ຄວາມ​ໝັ້ນ​ຄົງ​ທີ່​ສຳ​ຄັນ ເພື່ອ​ໃຫ້​ຢູ​ເຄ​ຣນ ​ມີ​ຄວາມ​ສາ​ມາດ​ເພີ້ມ​ຂຶ້ນ​ດ້ວຍ​ອາ​ວຸດ​ທີ່​ທັນ​ສະ​ໄໝ ມີ​ຄວາມ​ແມ່ນ​ຢຳ ໃນ​ອັນ​ທີ່​ພວກ​ເຂົາ​ເຈົ້າ​ຕ້ອງ​ການ​ ເພື່ອ​ປ້ອງ​ກັນ​ໂຕ​ ຕ້ານ​ການ​ຮຸກ​ຮານ​ທີ່​ພວມ​ດຳ​ເນີນ​ຢູ່​ຂອງ​ຣັດ​ເຊຍ. ພວກ​ເຮົາ​ໄດ້​ດຳ​ເນີນ​ການ​ຢ່າງວ່ອງ​ໄວເພື່ອ​ຈັດ​ສົ່ງ​ອາ​ວຸດ​ແລະ​ລູກ​ກະ​ສຸນ​ໃນ​ຈຳ​ນວນ​ທີ່​ສຳ​ຄັນ​ໄປ​ໃຫ້​ຢູ​ເຄ​ຣນເພືຶ່ອ​ໃຫ້​ພວກ​ເຂົາ​ເຈົ້າ​ສາ​ມາດ​ຂັບ​ໄລ່​ການ​ຮຸກ​ຮານ​ຂອງ​ຣັດ​ເຊຍແລະດ້ວຍເຫດນີ້ ໃຫ້​ພວກ​ເຂົາ​ເຈົ້າ​ຢູ່​ໃນ​ທ່າ​ທີ​ທີ່​ເຂັ້ມ​ແຂງ​ທີ່​ສຸດ​ເທົ່າ​ທີ່​ເປັນ​ໄປ​ໄດ້ ຢູ່​ທີ່​ໂຕະ​ເຈ​ລະ​ຈາ​ທີ່​ອາດ​ມີ​ຂຶ້ນ​.”

ອົງ​ການ​ພັນ​ທະ​ມິດ​ເນ​ໂຕ້ ພ້ອມ​ກັບ​ພາ​ຄີ​ອື່ນໆ ໄດ້​ທຳ​ການ​ລົງ​ໂທດທີ່​ຮ້າຍ​ແຮງ​ສຸດຕໍ່​ລັດ​ຖະ​ບານ​ຣັດ​ເຊຍ ແລະ ​ພວກ​ສະ​ໜັບ​ສະ​ໜຸນ ແບບ​ທີ່​ບໍ່​ເຄີຍ​ມີ​ມາ​ກ່ອນ ດ້ວຍ​ການ​ຄວບ​ຄຸມ​ການ​ສົ່ງ​ອອກ ແລະ​ການ​ກົດ​ດັນ​ທາງ​ດ້ານ​ການ​ທູດ. ມີ​ຊາວ​ຢູ​ເຄ​ຣນ​ເກືອບ 7 ລ້ານ​ຄົນ ​ໄດ້​ຖືກ​ບັງ​ຄັບ​ໃຫ້​ຕ້ອງ​ຫຼົບ​ໜີ ​ອອກ​ຈາກ​ປະ​ເທດ​ຂອງພວກ​ເຂົາ​ເຈົ້າ ແລະ​ອີກ​ຈຳ​ນວນ​ຫຼວງ​ຫຼາຍ​ຕ້ອງ​ໄດ້​ອົ​ບ​ພະ​ຍົບ​ຫຼົ​ບ​ໄພ​ຢູ່​ພາຍ​ໃນ​ຢູ​ເຄ​ຣນ. ປະ​ເທດ​ຕ່າງໆ​ໃນ​ທົ່ວ​ທະ​ວີບ​ຢູ​ໂຣບແລະ​ໄກ​ໄປ​ກວ່ານັ້ນ ​ຮວມ​ທັງ​ສະ​ຫະ​ລັດ ໄດ້​ໃຫ້​ການ​ຕ້ອນ​ຮັບ​ແກ່​ຊາວ​ຢູ​ເຄ​ຣນ​ທີ່​ພາ​ກັນ​ຫຼົບ​ໜີ​ຈາກ​ຄວາມ​ຮຸນ​ແຮງ.

ອົງ​ການ​ເນ​ໂຕ້​ພວມ​ກະ​ກຽມ​ທີ່​ຈະ​ປະ​ເຊີນ​ໜ້າ​ກັບ​ບັນ​ຫາ​ທ້າ​ທາຍ​ຕ່າງໆ ເຊັ່ນ​ວ່າ​ການ​ປ້ອງ​ກັນ​ທີ່​ເຂັ້ມ​ແຂງ​ທາງ​ດ້ານ​ໄຊ​ເບີ້, ເທັກ​ໂນ​ໂລ​ຈີ​ທີ່​ກ້າວ​ໜ້າ​ທັນ​ສະ​ໄໝ ແລະ​ເສີມ​ຂະ​ຫຍາຍ​ການ​ເປັນ​ພາ​ຄີ​ກັບ​ປະ​ເທດ​ຕ່າງໆ​ຢູ່​ໃນ​ທົ່ວ​ໂລກ. ລັດ​ຖະ​ມົນຕີ​ການ​ຕ່າງ​ປະ​ເທດບ​ລິງ​ເກັນກ່າວ​ວ່າ “ພວກ​ເຮົາ​ຈະ​ເຮັດ​ໃຫ້​ເປັນ​ທີ່​ແນ່​ນອນ​ວ່າພວກ​ເຮົາ​ຈະ​ປົກ​ປ້ອງ​ດິນ​ແດນ​ຂອງ​ອົງ​ການ​ເນ​ໂຕ້​ທຸກໆ​ຕາ​ລາງນິ້ວ. ນັບ​ແຕ່​ສົງ​ຄາມ​ເລີ້ມ​ຂຶ້ນ ພວກ​ເຮົາ​ໄດ້​ສົ່ງ​ກຳ​ລັງ​ທະ​ຫານ​ໄປ​ຕື່ມ 20,000 ຄົນຢູ່​ເຂດ​ພາກ​ຕາ​ເວັນ​ອອກ​ຂອງ​ອົງ​ການ​ເນ​ໂຕ້.”

ລັດ​ຖະ​ມົນ​ຕີ​ການ​ຕ່າງ​ປະ​ເທດບ​ລິ​ງ​ເກັນ ໃຫ້​ຂໍ້​ສັງ​ເກດ​ວ່າ “ພັນ​ທະ​ມິດ​ຫຼາຍໆປະ​ເທດ​ກໍ​ໄດ້​ເພີ້ມ​ການ​ມີ​ໜ້າ​ທາງ​ດ້ານ​ທະ​ຫານ​ຢູ່​ໃນ​ພາກ​ຕາ​ເວັນ​ອອກ​ແລະ​ພາກ​ໃຕ້​ຂອງ​ຢູ​ໂຣບ. ໃນ​ເດືອນ​ແລ້ວນີ້ ຟິ​ນ​ແລນ​ແລະ​ສະ​ວີ​ເດັນ ​ສອງ​ປະ​ເທດພາ​ຄີ​ທີ່ມີ​ມາ​ເປັນ​ເວ​ລາ​ດົນ​ນານ​ຂອ​ງ​ອົງ​ການ​ເນ​ໂຕ້ກໍ​ໄດ້​ຕັດ​ສິນ​ໃຈ​ເພື່ອ​ຂໍ​ເຂົ້າ​ເປັນ​ສະ​ມາ​ຊິກ​ຂອງ​ອົງ​ການ​ເນ​ໂຕ້.”

“ສະ​ຫະ​ລັດ​ໃຫ້​ການ​ສະ​ໜັບ​ສະ​ໜຸນ​ຢ່າງ​ແຂງ​ຂັນ​ຕໍ່​ການ​ຍື່ນ​ຄຳ​ຮ້ອງ​ຂໍ​ເປັນ​ສະ​ມາ​ຊິກ​ຂອງ​ຟິນ​ແລນ​ແລະ​ສະ​ວີ​ເດັນ. ປະ​ເທດ​ທັງ​ສອງ ​ແມ່ນ​ມີ​ຄຸນ​ນະ​ສົມ​ບັດ​ ຫຼາຍ​ໄປກວ່າ​ທີ່​ຈະເປັນ​ສະ​ມາ​ຊິກ​ໂດຍ​ເຕັມ​ຂອງ​ກຸ່ມ​ພັນ​ທະ​ມິດ ໂດ​ຍ​ໄວ​ເທົ່າ​ທີ່​ຈະ​ໄວ​ໄດ້. ດ້​ວຍ​ການ​ເຂົ້າ​ຮ່ວມ​ອົງ​ການ​ເນ​ໂຕ້ ພວກ​ເຂົາ​ເຈົ້າ ຈະ​ເສີມ​ຄວາມ​ເຂັ້ມ​ແຂງ​ໃຫ້ແກ່​ອົງ​ການ​ເນ​ໂຕ້. ພວກ​ເຮົາ​ຫວັງ​ວ່າຈະ​ນຳ​ເອົາ​ປະ​ເທດ​ທັງ​ສອງ​ເຂົ້າມາ​ຮ່ວ​ມກຸ່ມ​ພັນ​ທະ​ມິດ​ເພື່ອການ​ປ້ອງ​ກັນ​ທີ່​ເຂັ້ມ​ແຂງ​ທີ່​ສຸດ​ໃນ​ປະ​ຫວັດ​ສາດ.”

ສະ​ຫະ​ລັດ​ຫວັງ​ວ່າ​ຈະ​ໄດ້​ຢືນ​ຢູ່​ຄຽງ​ຂ້າງ​ກັບ​ບັນ​ດາ​ປະ​ເທດ​ພັນ​ທະ​ມິດ​ທີ່ກອງ​ປະ​ຊຸມ​ສຸດຍອດ​ຂອງ​ອົງ​ການ​ເນ​ໂຕ້​ທີ່​ນະ​ຄອນ​ມາດ​ຣິດ ເພື່ອ​ໃຫ້​ການ​ຄ້ຳ​ປະ​ກັນ​ວ່າ ອົງ​ການ​ເນ​ໂຕ້​ຍັງ​ຈະ​ເປັນ​ອົງ​ການ​ທີ່​ເຂັ້​ມ​ແຂງ ຄົງ​ທົນ ແລະ​ພ້ອມ​ແລ້ວ​ທີ່​ຈະ​ຮັບມື​ກັບ​ບັນ​ຫາ​ທ້າ​ທາຍ​ໃນ​ປັດ​ຈຸ​ບັນ ແລະ​ໃນ​ອະ​ນາ​ຄົດ​ຂ້າງ​ໜ້າ.

XS
SM
MD
LG