ບົດບັນນາທິການ ທີ່ສະທ້ອນເຖິງນະໂຍບາຍ ຂອງລັດຖະບານສະຫະລັດ
ບັນຫາຂັດແຍ້ງດ້ວຍກຳລັງອາວຸດ ໄດ້ມີຜົນກະທົບທີ່ຮ້າຍແຮງຕໍ່ພວກເດັກນ້ອຍ. ອີງຕາມລາຍງານຂອງອົງການສະຫະປະຊາຊາດທີ່ນຳອອກເຜີຍແຜ່ເມື່ອວັນທີ 18 ກໍລະກົດແຈ້ງວ່າ ໃນປີ 2021 ທີ່ຜ່ານມານີ້ ມີການລ່ວງລະເມີດຢ່າງຮ້າຍແຮງຕໍ່ພວກເດັກນ້ອຍຈຳນວນ 23,982 ຄົນ ທີ່ໄດ້ຮັບການກວດສອບແລ້ວ ຊຶ່ງເກືອບນຶ່ງສ່ວນສາມຂອງເດັກນ້ອຍທີ່ເຄາະຮ້າຍແມ່ນເປັນເດັກຍິງ. ການລັກພາໂຕ ແລະຄວາມຮຸນແຮງທາງເພດ ຕໍ່ພວກເດັກນ້ອຍ ແມ່ນເພີ້ມຂຶ້ນ 20 ເປີ ເຊັນລື່ນປີກາຍນີ້ ບ່ອນທີ່ພວກເດັກຍິງແມ່ນປະກອບເປັນ 98 ເປີເຊັນຂອງພວກທີ່ລອດມາໄດ້ ຈາກການຂົ່ມຂືນສຳເລົາ ແລະຮູບແບບອື່ນໆຂອງຄວາມຮຸນແຮງທາງເພດ.
ເອກອັກຄະລັດຖະທູດ ເຈັຟຟຣີ ດີລໍເຣັນຕິສ ທີ່ປຶກສາອະວຸໂສກ່ຽວກັບກິດຈະການພິເສດດ້ານການເມືອງ ຂອງສະຫະລັດ ກ່າວວ່າ “ລາຍງານກ່ຽວກັບພວກເດັກນ້ອຍແລະບັນຫາຂັດແຍ້ງດ້ວຍອາວຸດ ໃນປີນີ້ ໄດ້ສະໜອງໃຫ້ເຫັນຮູບພາບ ຂອງສະພາບການໂຕຈິງກ່ຽວກັບວ່າບັນຫາຂັດແຍ້ງມີຜົນກະທົບແບບໃດຕໍ່ພວກເດັກນ້ອຍ.”
ທ່ານໃຫ້ຂໍ້ສັງເກດວ່າ “ຢູ່ປະເທດເອທິໂອເປຍ ມີພວກເດັກນ້ອຍຫຼາຍພັນຄົນໄດ້ຖືກບັງຄັບ ໃຫ້ຫລົບໜີໄປຈາກເຮືອນຊານບ້ານຊ່ອງ ຂອງພວກເຂົາເຈົ້າ ແຍກຈາກຄອບຄົວຂອງພວກເຂົາເຈົ້າ ແລະໄດ້ຖືກບັງຄັບຈາກການກໍ່ຄວາມຮຸນແຮງທາງເພດ.”
ຄ້າຍຄືກັນນັ້ນ ຢູ່ທີ່ປະເທດເຢເມນ ບັນຫາຂັດແຍ້ງຍັງເຮັດໃຫ້ “ພວກເດັກນ້ອຍແມ່ນໄດ້ຮັບຄວາມທຸກທໍລະມານຢ່າງຫຼວງຫຼາຍ ຮວມທັງໄດ້ຖືກປະຕິເສດບໍ່ໃຫ້ເຂົ້າເຖິງການຊ່ວຍທາງດ້ານມະນຸດສະທຳແລະພວກເດັກນ້ອຍກໍໄດ້ຖືກສັງຫານ ເຮັດໃຫ້ກາຍເປັນຄົນພິການ ໄດ້ຖືກບັງຄັບຈາກການກໍ່ຄວາມຮຸນແຮງທາງເພດ ຖືກເກນແລະນຳໃຊ້ຢູ່ໃນບັນຫາຂັດແຍ້ງ.”
ເອກອັກຄະລັດຖກະທູດ ດີລໍເຣັນຕິສ ກ່າວວ່າ ຫຼັງຈາກນັ້ນ ກໍແມ່ນສົງຄາມທີ່ໂຫດຮ້າຍປ່າເຖື່ອນ ແລະບໍ່ມີການເກາະຜິດ ຂອງຣັດເຊຍຕໍ່ຢູເຄຣນ ຊຶ່ງ “ໄດ້ເພີ້ມບົດຕອນທີ່ມືດມົນອີກອັນນຶ່ງ ເຂົ້າໃນການໂຈມຕີຕໍ່ພວກເດັກນອຍ.”
“ພວກເດັກນ້ອຍໃນຢູເຄຣນ ແມ່ນຕົກຢູ່ໃນອັນຕະລາຍ ເພີ້ມຂຶ້ນນັບມື້ ໃນຂະນະທີ່ກຳລັງທະຫານຣັດເຊຍທຳການໂຈມຕີຫຼາຍຂຶ້ນຕໍ່ໂຮງໝໍແລະໂຮງຮຽນ. ມີລາຍງານວ່າ ກຳລັງທະຫານຣັດເຊຍໄດ້ບັງຄັບໃຫ້ຍົກຍ້າຍພົນລະເຮືອນຊາວຢູເຄຣນຫຼາຍກວ່ານຶ່ງລ້ານຄົນໄປຍັງປະເທດຣັດເຊຍ ໂດຍຜ່ານຂັ້ນຕອນໃນອັນທີ່ເອີ້ນວ່າ ‘ການກັ່ນກອງ’ ຮວມທັງພວກເດັກນ້ອຍ ຫຼາຍກວ່າ 260,000 ຄົນ. ໃນຂະນະດຽວກັນ ກຳມາທິການເພື່ອສິດທິເດັກນ້ອຍຂອງຣັດເຊຍ ຄຸຍໂມ້ວ່າ ຄວາມພະ ຍາຍາມຄັ້ງໃໝ່ຂອງວັງເຄຣັມລິນນີ້ແມ່ນເພື່ອຮັບເອົາພວກເດັກນ້ອຍຈາກຢູເຄຣນໃຫ້ມາເປັນລູກບຸນທຳຢ່າງວ່ອງໄວຂຶ້ນ.”
ນັ້ນແມ່ນສະແດງໃຫ້ເຫັນວ່າ ຍັງມີຂ່າວດີຢູ່ຈຳນວນນຶ່ງ.
ອີງຕາມລາຍງານ ຂອງອົງການສະຫະປະຊາຊາດແລ້ວ ມີເດັກນ້ອຍ 12,214 ຄົນໄດ້ຖືກປ່ອຍອອກມາ ຈາກກຸ່ມກຳລັງປະກອບອາວຸດ ຢູ່ໃນຫລາຍໆປະເທດ ຮວມສາທາລະນະລັດອາຟຣິກາກາງ ໂຄລອມເບຍແລະສາທາລະນະລັດປະຊາທິປະໄຕຄອງໂກ. ໃນຂະນະດຽວກັນ ການຢຸດຍິງເພື່ອເຫັນແກ່ມະນຸດສະທຳໃນພາກເໜືອຂອງເອທິໂປເປຍແມ່ນເປັນທີ່ໃຫ້ກຳລັງໃຈ ເຊັ່ນດຽວກັນ ກັບການຢຸດຍິງໃນປະເທດເຢເມນ. ຄວາມຫວັງກໍແມ່ນວ່າ ທຸກພັກຝ່າຍກໍໄດ້ສວຍໃຊ້ການຍຸຕິຄວາມຮຸນແຮງ ເພື່ອທຳການເຈລະຈາໄປສູ່ການຢຸດຍິງທີ່ຖາວອນ.
ແນວໃດກໍຕາມ ເອກອັກຄະລັດຖະທູດດີລໍເຣັນຕິສ ກ່າວວ່າ “ມັນເປັນທີ່ຈະແຈ້ງທີ່ພວກເຮົາບໍ່ໄດ້ດຳເນີນການ ເປັນທີ່ພຽງພໍ ໃນການໃຫ້ການຄຸ້ມຄອງແກ່ພວກເດັກນ້ອຍ ເພື່ອໃຫ້ໄດ້ຮັບຜົນກະທົບຈາກບັນຫາຂັດແຍ້ງ. ເວລາພວກເຮົາເອົາບາດກ້າວໃຫ້ການຄຸ້ມຄອງຕໍ່ພວກເດັກນ້ອຍ ພວກເຮົາແມ່ນໄດ້ປ້ອງກັນ ແລະໃຫ້ການປົກປັກຮັກສາອະນາຄົດຮ່ວມຂອງພວກເຮົາແລະເອົາບາດກ້າວເພື່ອຢຸດເຊົາບັນຫາຂັດແຍ້ງ. ການປົກປ້ອງພວກເດັກນ້ອຍ ແມ່ນວຽກການທີ່ສຳຄັນອັນນຶ່ງໃນການປົກປັກຮັກສາສັນຕິພາບແລະຄວາມໝັ້ນຄົງລະຫວ່າງປະເທດ.”