ບົດບັນນາທິການ ທີ່ສະທ້ອນເຖິງນະໂຍບາຍ ຂອງລັດຖະບານສະຫະລັດ
ໂຊມາເລຍ ໄດ້ທົນທຸກທໍລະມານ ຜ່ານຜ່າໄພແຫ້ງແລ້ງ ທີ່ແກ່ຍາວແບບບໍ່ເຄີຍມີມາກ່ອນ. ລະດູຝົນໃນໄລຍະ 5 ປີທີ່ບໍ່ມາຕາມເວລາແລະປີທີ 6 ຊຶ່ງຄາດວ່າຈະມີຂຶ້ນໃນລະດູບານໃໝ່ນີ້ໄດ້ຍັງຜົນໃຫ້ເກີດການອຶດຢາກຢ່າງແຜ່ກວ້າງໃນທົ່ວປະເທດ. ສະຖານະການທີ່ພວມຊຸດໂຊມລົງໄດ້ກໍ່ໃຫ້ເກີດບັນຫາຂັດແຍ້ງເຊັ່ນນຶ່ງໃນນັ້ນ ແມ່ນກໍ່ຂຶ້ນໂດຍກຸ່ມອາລ-ຊາບາບ ຫຼືບໍ່ກໍການບຸກໂຈມຕີແບບບໍ່ມີການທ້າທາຍເກາະຜິດຂອງຣັດເຊຍຕໍ່ຢູເຄຣນ ຊຶ່ງເປັນນຶ່ງໃນບັນດາປະເທດສົ່ງອອກອາຫານທີ່ໃຫຍ່ທີ່ສຸດໃນໂລກ ແລະເຮັດໃຫ້ສະຖານະການທີ່ຮ້າຍແຮງຢູ່ແລ້ວຊຸດ ໂຊມລົງຕື່ມ ກໍແມ່ນຜົນສະທ້ອນຈາກໂຣກລະບາດໂຄວິດ ຊຶ່ງໄດ້ກໍ່ໃຫ້ເກີດວິກິດການໃນຕ່ອງໂສ້ອຸບປະທານ.
ຜູ້ຕາງໜ້າຖາວອນຂອງສະຫະລັດ ປະຈຳອົງການສະຫະປະຊາຊາດ ທ່ານນາງລິນດາ ໂທມາສ ກ່າວວ່າ “ສະຖານະການດ້ານມະນຸດສະທຳໃນໂຊມາເລຍແມ່ນເປັນຕາຢ້ານ ຄືກັນກັບຢູ່ບ່ອນອື່ນໆຂອງໂລກ ໃນເວລານີ້. ການປະສົມປະສານລະຫວ່າງໂຄວິດ ກັບບັນຫາຂັດແຍ້ງແລະການປ່ຽນແປງຂອງດິນຟ້າອາກາດໄດ້ນຳເອົາຄຳເວົ້າທີ່ໜ້າຢ້ານກົວ ໄພອຶດຫິວ ກັບຄືນມາສູ່ໂຊມາເລຍອີກ.”
ທ່ານນາງກ່າວຕື່ມວ່າ “ໄພອຶດຫິວແມ່ນຄວາມລົ້ມແຫຼວຂັ້ນສຸດທ້າຍ ຂອງປະຊາຄົມນາໆຊາດ. ໃນໂລກທີ່ມີອາຫານການກິນຢ່າງເຫຼືອເຟືອນັ້ນ ປະຊາຄົມທັງໝົດບໍ່ຄວນ ບໍ່ຄວນທີ່ຈະອຶດຢາກເຖິງຕາຍ.”
ແຕ່ມີຊາວໂຊມາເລຍຫຼາຍໆສິບພັນຄົນຄາດກັນວ່າໄດ້ເສຍຊີວິດຍ້ອນຄວາມອຶດຢາກ ແຕ່ກໍບໍ່ມີໂຕເລກທີ່ແນ່ນອນວ່າມີຈຳນວນເທົ່າໃດກັນແທ້. ອີງຕາມອົງການຢູນີເຊັບແລ້ວ ມີເດັກນ້ອຍໂຊມາເລຍອາຍຸຕ່ຳກວ່າ 5 ປີຫຼາຍກວ່າ 5 ແສນຄົນ ປະສົບກັບ ການຂາດແຄນສານອາຫານຢ່າງຮ້າຍແຮງ. ທົ່ງໄຮ່ທົ່ງນາທີ່ຄາດໄຖແລ້ວຖືກປະປ່ອຍຖິ້ມໄວ້ ແລະສັດລ້ຽງຫຼາຍລ້ານໂຕກໍເສຍຊີວິດ ຊຶ່ງພາໃຫ້ເກີດຄວາມຍາກລຳບາກເພີ້ມຕື່ມ.
ເລີ້ມແຕ່ສົກງົບປະມານ ປີ 2022 ເປັນຕົ້ນມາ ສະຫະລັດໄດ້ໃຫ້ການຊ່ວຍເຫຼືອຫຼາຍກວ່າ 2 ພັນ 500 ລ້ານໂດລາ ຕໍ່ເຂດແຫຼມຮອນຂອງອາຟຣິກາ ແລະ 1 ພັນ 300 ລ້ານໂດລາ ແມ່ນຊ່ວຍໂຊມາເລຍໂດຍກົງ. ເມື່ອວັນທີ 29 ມັງກອນ ຜ່ານມານີ້ ເອກອັກຄະລັດຖະທູດໂທມາສ ກຣີນຟິລ ໄດ້ປະກາດວ່າ ສະຫະລັດໂດຍຜ່ານອົງການພັດທະນາສົນຫຼືຢູເສດ ໃຫ້ເງິນກ້ອນໃໝ່ 41 ລ້ານໂດລາເພື່ອໃຫ້ຄວາມຊ່ວຍເຫຼືອທີ່ມີຄວາມຕ້ອງການຢ່າງຮີບດ່ວນແກ່ໂຊມາເລຍ.
“ການໃຫ້ຄວາມຊ່ວຍເຫຼືອຂອງພວກເຮົາໃນປີກາຍ ປະກອບເປັນຫຼາຍກວ່າ 80 ເປີເຊັນ ສຳລັບການປະຕິບັດງານສຸກເສີນຂອງໂຄງການອາຫານໂລກຢູ່ໃນເຂດແຫຼມຮອນຂອງອາຟຣິກາ. ສີ່ເທົ່າໃຫຍ່ກວ່າການບໍລິຈາກຂອງປະເທດອື່ນໆຮວມກັນ. ການຊ່ວຍເຫຼືອນັ້ນໄດ້ນຳເອົາອາຫານ ນ້ຳ ບ່ອນຢູ່ອາໄສ ມາໃຫ້ປະຊາຊົນຊາວໂຊມາເລຍ” ນັ້ນຄືຄຳເວົ້າຂອງເອກອັກຄະລັດຖະທູດໂທມາສ ກຣິນຟິລ.
ທ່ານນາງກ່າວຕື່ມວ່າ “ສະຫະລັດບໍ່ສາມາດທີ່ຈະດຳເນີນການສິ່ງນີ້ໄດ້ຕາມລຳພັງ. ນີ້ແມ່ນຄວາມຮັບຜິດຊອບຮ່ວມກັນ. ນີ້ແມ່ນກ່ຽວກັບ ຄວາມເປັນມະນຸດຊາດຮ່ວມກັນຂອງພວກເຮົາ.”
“ສະຫະລັດຂໍຮ້ອງຕໍ່ປະເທດທີ່ໃຫ້ການບໍລິຈາກອື່ນໆແລະໂລກຈົ່ງໃຫ້ການຊ່ວຍເຫຼືອຫຼາຍຂຶ້ນ ແລະກ້າຫານຫຼາຍຂຶ້ນ. ນີ້ແມ່ນໂອກາດເວລາທີ່ຈະເສີມຂະຫຍາຍ
ການປະກອບສ່ວນທາງດ້ານມະນຸດສະທຳ. ເພື່ອສ້າງຄວາມແຕກຕ່າງໃຫ້ແກ່ຊີວິດຂອງພວກທີ່ຕົກຢູ່ໃນອັນຕະລາຍ. ເພື່ອສະໜອງອາຫານການກິນແລະສານອາຫານທີ່ເປັນປະໂຫຍດ ແລະການເຂົ້າເຖິງການປິ່ນປົວສຸຂະພາບ ເຂົ້າເຖິງນ້ຳ ສຸຂາພິບານ ແລະບ່ອນພັກພາອາໄສ. ເພື່ອຊ່ວຍຊີວິດ. ເພື່ອໃຫ້ຜູ້ຄົນມີກຽດສັກສີ.”