ບົດບັນນາທິການ ທີ່ສະທ້ອນເຖິງນະໂຍບາຍ ຂອງລັດຖະບານສະຫະລັດ
ເປັນເວລາຫ້າປີແລ້ວ ນັບແຕ່ພວກທະຫານພະມ້າໄດ້ເລີ້ມການປຸກລະດົມຂ້າລ້າງເຊື້ອຊາດເຜົ່າພັນຕໍ່ຊາວໂຣຮິງຢາ. ຈຳນວນຊາວອົບພະຍົບໂຣຮິງຢາທີ່ໄດ້ຫຼົບໜີເຂົ້າໄປໃນບັງກລາແດັສທີ່ເປັນເພື່ອນບ້ານແມ່ນເປັນທີ່ບົ່ງບອກກ່ຽວກັບເລື້ອງນີ້. ນັບແຕ່ປີ 2017 ມາ ມີ 750,000 ຄົນ ພາກັນຫຼົບໜີຄວາມຮຸນແຮງເຂົ້າໄປຂໍລີ້ໄພ ເຮັດໃຫ້ຈຳນວນຊາວໂຣຮິງຢາ ອາໄສຢູ່ຕາມສູນອົບພະຍົບຕ່າງໆໃນບັງກລາແດັສເວລານີ້ ຮວມກັນແລ້ວປະມານນຶ່ງລ້ານຄົນ.
ສະຫະລັດຮັບຮູ້ເຖິງຄວາມເອື້ອເຟື້ອເພື່ອແຜ່ຂອງລັດຖະບານແລະປະຊາຊົນບັງກລາແດັສ ທີ່ໄດ້ໃຫ້ການຕ້ອນຮັບພວກອົບພະຍົບເຫຼົ່ານີ້ ໂດຍໄດ້ຮັບຄວາມສະໜັບສະໜຸນຈາກອົງການໃຫ້ຄວາມຊ່ວຍເຫຼືອ ແລະມະນຸດສະທຳ ລະຫວ່າງປະເທດ. ສະຫະລັດຍັງເປັນຜູ້ນຳໜ້າ ໃນການບໍລິຈາກ ທາງດ້ານມະນຸດສະທຳ ຕໍ່ພວກທີ່ຊີວິດການເປັນຢູ່ຂອງພວກເຂົາເຈົ້າໄດ້ຖືກທຳລາຍຍ້ອນຄວາມຮຸນແຮງຢູ່ໃນລັດຣາໄຄນ໌ ຂອງພະມ້າ. ໃນໄລຍະ 5 ປີຜ່ານມານີ້ ສະຫະລັດໄດ້ສະໜອງ ການຊ່ວຍເຫຼືອຫຼາຍກວ່າ 1 ພັນ 900 ລ້ານໂດລາ ແກ່ປະຊາຊົນທີ່ໄດ້ຮັບຜົນກະທົບຢູ່ໃນພະມ້າ ບັງກລາແດັສ ແລະບ່ອນອື່ນໆຢູ່ໃນຂົງເຂດ ສຳລັບຊາວໂຣຮິງຢາ ແລະປະຊາຄົມທີ່ໃຫ້ການຕ້ອນຮັບເຂົາເຈົ້າ. ນອກນັ້ນ ສະຫະລັດຍັງສືບຕໍ່ມີຄວາມໝັ້ນໝາຍ ທີ່ຈະໃຫ້ຄວາມເປັນທຳແກ່ຜູ້ເຄາະຮ້າຍແລະຄວາມຮັບຜິດຊອບຂອງພວກທະຫານພະມ້າໃນການກໍ່ອາຊະຍາກຳທີ່ຊົ່ວຮ້າຍຕໍ່ຊາວໂຣຮິງຢາ ແລະການສ້າງຄວາມກ້າວໜ້າໃຫ້ແກ່ການແກ້ໄຂໄລຍະຍາວສຳລັບອົບພະຍົບໂຣຮິງຢາ ຮວມທັງການເດີນທາງກັບຄືນໄປພະມ້າຂອງພວກເຂົາເຈົ້າ ດ້ວຍຄວາມສະໝັກໃຈ ປອດໄພ ແບບມີກຽດສັກສີ ແລະຍືນຍົງ ເວລາເງື່ອນໄຂຕ່າງໆ ອຳນວຍໃຫ້. ໃນເວລານີ້ ເງື່ອນໄຂຢູ່ໃນມຽນມາ ຍັງບໍ່ມີຄວາມປອດໄພສຳລັບພວກອົບພະຍົບເທື່ອ ທີ່ຈະເດີນທາງກັບຄືນປະເທດ.
ແຕ່ແນວໃດກໍຕາມ ສະຖານະການສຳລັບຜູ້ຫຼົບໄພຊາວໂຣຮິງຢາຍັງຢູ່ໃນອັນຕະລາຍ. ເຖິງແມ່ນບັງກລາແດັສ ຈະມີຄວາມເອື້ອເຟື້ອເພື່ອແຜ່ ກໍຈິງຢູ່ ແຕ່ເລື້ອງ ຄວາມປອດໄພ ແລະການມີຜູ້ຄົນຫຼາຍເກີນຂອບເຂດຢູ່ໃນສູນແຫ່ງຕ່າງໆແມ່ນຍັງເປັນບັນຫາ ໃນຂະນະທີ່ບໍ່ມີການຈ້າງວຽກ ອິດສະຫຼະພາບໃນການເດີນທາງໄປມາ ແລະການເຂົ້າເຖິງການບໍລິການຂັ້ນພື້ນຖານຕ່າງໆ.
ໃນຖານະທີ່ເປັນສ່ວນນຶ່ງ ໃນການເປັນພາຄີແບບບໍ່ມີການປ່ຽນແປງ ຂອງສະຫະລັດ ກັບລັດຖະບານບັງກລາແດັສແລະການໃຫ້ຄວາມສະໜັບສະໜຸນຕໍ່ຜູ້ຫຼົບໄພຊາວໂຣຮິງຢານັ້ນ ໃນເດືອນແລ້ວນີ້ ລັດຖະມົນຕີກະຊວງຕ່າງປະເທດສະຫະລັດ ທ່ານແອນໂທນີ ບລິງເກັນ ໄດ້ປະກາດກ່ຽວກັບການຈັດຕັ້ງໂຄງການຕັ້ງຖິ່ນຖານໃໝ່ສຳລັບອົບພະຍົບຊາວໂຣຮິງຢາທີ່ມີຄວາມຫຼໍ່ແຫຼມທີ່ໃຫ້ການຮ່ວມມືກັບລັດຖະບານບັງກລາແດັສ ແລະຂ້າຫຼວງໃຫຍ່ດ້ານອົບພະຍົບຂອງສະຫະປະຊາຊາດ.
“ໂຄງການນີ້ ຊຶ່ງຈະເປັນສ່ວນນຶ່ງ ຂອງໂຄງການຮັບເອົາອົບພະຍົບຂອງສະຫະລັດໃນທົ່ວໂລກ ແມ່ນອົງປະກອບອັນນຶ່ງໃນການຮັບມືຮອບດ້ານຕໍ່ວິກິດການອົບພະຍົບໂຣຮິງຢາ ຊຶ່ງມີຈຸດເພັ່ງເລັງຫຼັກ ໃສ່ການກະກຽມໃຫ້ຊາວໂຣຮິງຢາ ເດີນທາງກັບຄືນປະເທດ ດ້ວຍຄວາມສະໝັກໃຈ ປອດໄພ ແບບມີກຽດສັກສີ ແລະຍືນຍົງ. ສະຫະລັດຈະພິຈາລະນາການສະເໜີເພື່ອຕັ້ງຖິ່ນຖານໃໝ່ໂດຍອົງການຂ້າຫຼວງໃຫຍ່ ດ້ານອົບພະຍົບຂອງສະຫະປະຊາຊາດ” ນັ້ນຄືຄຳເວົ້າ ຂອງລັດຖະມົນຕີບລິງເກັນ ຢູ່ໃນຖະແຫຼງການ.
“ການຕັ້ງຖິ່ນຖານໃໝ່ ຂອງຊາວໂຣຮິງຢາທີ່ມີຄວາມຫຼໍ່ແຫຼມ ຈາກບັງກລາແດັສ ແມ່ນໄດ້ສະທ້ອນໃຫ້ເຫັນ ເຖິງການເປັນຜູ້ນຳທີ່ມີມາເປັນເວລາດົນນານໃນດ້ານການຕັ້ງຖິ່ນຖານຂອງອົບພະຍົບທ່າມກາງການປະເຊີນໜ້າກັບວິກິດການອົບພະ ຍົບຫຼົບໄພແບບທີ່ບໍ່ເຄີຍມີມາກ່ອນ ຂະນະທີ່ຜູ້ຄົນຫຼາຍເປັນປະຫວັດການໃນທົ່ວໂລກໄດ້ຖືກບັງຄັບໃຫ້ຫຼົບໜີຈາກສົງຄາມ ການປະຫັດປະຫານ ແລະການຂາດສະຖຽນລະພາບ” ລັດຖະມົນຕີບລິງເກັນ ກ່າວຕື່ມວ່າ “ພວກເຮົາຂໍຂອບໃຈ ລັດຖະບານບັງກລາແດັສ ໃນຖານະເຈົ້າພາບທີ່ເອື້ອເຟື້ອເພື່ອແຜ່ຕ້ອນຮັບອົບພະຍົບ ແລະການສະໜັບສະໜຸນຂອງພວກເຂົາເຈົ້າຕໍ່ຂໍ້ລິເລີ້ມການຕັ້ງຖິ່ນຖານໃໝ່ນີ້.”