ບົດບັນນາທິການ ທີ່ສະທ້ອນເຖິງນະໂຍບາຍ ຂອງລັດຖະບານສະຫະລັດ
ສະຫະລັດຂໍຮຽກຮ້ອງໃຫ້ປະເທດຕ່າງໆຢູ່ໃນທົ່ວໂລກ ຈົ່ງທຳການລົງໂທດແລະໃສ່ໂທດ ກຸ່ມກໍ່ການຮ້າຍເຮັສໂບລລາ ທີ່ໄດ້ຮັບການໜຸນຫລັງຈາກອີຣ່ານ.
ການຮຽກຮ້ອງດັ່ງກ່າວມີຂຶ້ນໃນວັນຄົບຮອບການໂຈມຕີທີ່ໂຫດຮ້າຍ 2 ຄັ້ງຂອງກຸ່ມເຮັສໂບລລາ. ຄັ້ງທຳອິດແມ່ນການວາງລະເບີດ ໃນວັນທີ 18 ກໍລະກົດ ປີ 1994 ໃສ່ສູນກາງປະຊາຄົມຊາວຢິວ ໃນອາເຈັນຕີນາ ຫຼື AMIA ທີ່ນະຄອນບູແອນົສແອເຣັສ. ຄັ້ງທີ 2 ແມ່ນການໂຈມຕີດ້ວຍລະເບີດໃສ່ລົດນັກທ່ອງທ່ຽວອິສຣາແອລ ທີ່ປະເທດບຸລກາເຣຍ ເມື່ອ 18 ປີຕໍ່ມາໃນມື້ດຽວກັນ.
ການໂຈມຕີຕໍ່ສູນກາງປະຊາຄົມຊາວຢິວ ໃນອາເຈັນຕີນາໄດ້ສັງຫານ 85 ຄົນ ແລະບາດເຈັບອີກຫຼາຍຮ້ອຍຄົນ. ທີ່ປະເທດບຸນກາເຣຍ ມີຊາວອິສຣາແອລ 5 ຄົນເສຍຊີວິດ ແລະຊາວໜຸ່ມອິສຣາແອລ 45 ຄົນບາດເຈັບ.
ການໂຈມຕີທັງສອງນີ້ມີຂຶ້ນໄດ້ກໍຍ້ອນໄດ້ຮັບຄວາມສະໜັບສະໜຸນຈາກເຈົ້າໜ້າທີ່ອີຣ່ານ. ໃນຖະແຫຼງການເນື່ອງໃນວັນຄົບຮອບນັ້ນ ໂຄສົກກະຊວງການຕ່າງປະເທດສະຫະລັດ ທ່ານເນດ ໄພຣສ໌ໃຫ້ຂໍ້ສັງເກດວ່າການໂຈມຕີຕໍ່ສູນກາງ AMIA ທີ່ນະຄອນບູແອນົສແອເຣັສແມ່ນ “ການໂຈມຕີຕໍ່ຕ້ານຊາວຢິວທີ່ຮ້າຍແຮງສຸດໃນຮອບເຄິ່ງສັດຕະວັດກວ່າໆ” ຊຶ່ງທ່ານເອີ້ນວ່າ “ເປັນຕົວຢ່າງອັນຈະແຈ້ງໃນການໃຫ້ຄວາມສະໜັບສະໜຸນຂອງອີຣ່ານ ຕໍ່ການກໍ່ການຮ້າຍລະຫວ່າງປະເທດ.”
ທ່ານຂຽນຕື່ມອີກວ່າ “ເຈົ້າໜ້າທີ່ລະດັບສູງຂອງລັດຖະບານອີຣ່ານ ແມ່ນມີການພົວພັນໂດຍກົງກັບການໂຈມຕີ ແລະກຸ່ມເຮັສໂບລລາເປັນຜູ້ລົງມືກະທຳຕາມຄຳແນະນຳຂອງອຳນາດການປົກຄອງອີຣ່ານ. ໃນຂະນະທີ່ຍັງບໍ່ທັນມີບຸກຄົນໃດທີ່ຮັບຜິດຊອບຖືກນຳໂຕມາລົງໂທດ ສະຫະລັດເຊື່ອວ່າ ຊາວອາເຈັນຕີນາທັງໝົດ
ສົມຄວນໃຫ້ນຳເອົາຜູ້ກໍ່ການທັງໝົດມາຮັບຜິດຊອບຕໍ່ການກະທຳທີ່ຕ່ຳຊ້າແລະຂີ້ຂາດຕາຂາວດັ່ງກ່າວນີ້.”
ທ່ານນາງເດໂບຣາ ລິບສຕາດ ທູດພິເສດຂອງສະຫະລັດ ຮັບຜິດຊອບໃນການຕິດຕາມສິ້ງຊອມແລະປາບປາມການຕໍ່ຕ້ານຊາວຢິວ ຊຶ່ງໄດ້ເດີນທາງໄປອາເຈັນຕີນາ ໃນລະຫວ່າງວັນຄົບຮອບຂອງການໂຈມຕີນີ້ ຍັງໄດ້ໃຫ້ການຢືນຢັນອີກຄັ້ງນຶ່ງເຖິງການໃຫ້ຄວາມສະໜັບສະໜຸນຂອງສະຫະລັດຕໍ່ຜູ້ທີ່ “ຢາກໃຫ້ນຳເອົາໂຕ ຜູ້ຮັບຜິດຊອບ ໃນການກະທຳທີ່ໜ້າຢ້ານກົວມື້ນັ້ນ ມາລົງໂທດ.”
ທີ່ປະເທດບຸລກາເຣຍ ໜ່ວຍປະຕິບັດງານຂອງກຸ່ມເຮັສໂບລລາ 2 ຄົນ ໄດ້ຖືກຕັດສິນໂທດລັບຫຼັງ ໃນການພົວພັນກັບການໂຈມຕີດ້ວຍລະເບີດໃສ່ລົດນັກທ່ອງທ່ຽວ ແຕ່ເນື່ອງຈາກຍັງບໍ່ຮູ້ຈັກວ່າ ບຸກຄົນທັງສອງລີ້ຢູ່ໃສແທ້ ການນຳໂຕມາລົງໂທດຈຶ່ງຍັງບໍ່ມີຂຶ້ນເທື່ອ.
ໂຄສົກກະຊວງການຕ່າງປະເທດເນດ ໄພຣສ໌ ກ່າວວ່າ “ສະຫະລັດມີຄວາມໝັ້ນໝາຍທີ່ຈະຕໍ່ຕ້ານ ອິດທິພົນທີ່ເປັນໄພອັນຕະລາຍ ຂອງກຸ່ມເຮັສໂບລລາແລະອີຣ່ານ. ການໃຫ້ທຶນສະໜັບສະໜຸນ ການຝຶກແອບ ດ້ານອາວຸດແລະການສະໜັບອື່ນໆ ທີ່ອີຣ່ານໄດ້ສະໜອງ ໃຫ້ແກ່ກຸ່ມເຮັສໂບລລາ ເພື່ອສະໜັບສະນຸນການກໍ່ການຮ້າຍ ທີ່ສະຫຼັບຊັບຊ້ອນແລະຕ່ຳຊ້າຕ່າງໆ ເຊັ່ນການກະທຳເຫຼົ່ານີ້ເປັນຕົ້ນ.” ທ່ານປະກາດວ່າ “ການສັງຫານພົນລະເຮືອນ ທີ່ໄຮ້ຄວາມຮູ້ສຶກດັ່ງກ່າວ ແມ່ນເປັນທີ່ ຍອມຮັບເອົາບໍ່ໄດ້. ດ້ວຍການສະໜັບສະໜຸນຂອງພວກເຮົາມີຫຼາຍກວ່າສິບປະເທດ ຈາກຢູໂຣບ ອາເມຣິກາໃຕ້ ອາເມຣິກາກາງ ແລະຈາກຂົງເຂດປາຊີຟິກໄດ້ອອກການລະບຸຊື່ລະດັບຊາດ ຫ້າມຫຼືການຈຳກັດອື່ນໆຕໍ່ກຸ່ມເຮັສໂບລລາ. ພວກເຮົາຂໍຮຽກຮ້ອງໃຫ້ປະເທດອື່ນໆອີກ ເອົາມາດຕະການທີ່ຄ້າຍຄືກັນນີ້ ຊຶ່ງຈະເຮັດໃຫ້ເປັນການຍາກຂຶ້ນຕໍ່ກຸ່ມເຮັສໂບລລາ ຫຼືຜູ້ໃຫ້ການສະໜັບສະໜຸນຢູ່ເຕຫະຣ່ານ ຈະທຳການຂົ່ມຂູ່ຕໍ່ສັນຕິພາບ ແລະຄວາມໝັ້ນຄົງຢູ່ໃນທົ່ວໂລກ.”