Accessibility links

Breaking News

ບົດບັນນາທິການ: ສະຫະລັດ ລົງໂທດເພີ້ມຕື່ມ ຕໍ່ພວກຜູ້ນຳອີຣ່ານ ຍ້ອນການກົດຂີ່ ທີ່ໃຊ້​ຄວາມຮຸນແຮງ


ແຟ້ມ - ການ​ປະ​ທ້ວງ​ທີ່​ມະ​ຫາ​ວິ​ທະ​ຍາ​ໄລ ນໍ​ຊີ​ວາ​ນີ (Noshirvani University) ໃນ​ປະ​ເທດ​ອີ​ຣ່ານ (File)

ເຈົ້າໜ້າທີ່ອີຣ່ານໄດ້ສັງຫານປະຊາຊົນຫຼາຍຮ້ອຍຄົນ ໃນການປາບປາມທີ່ຮຸນແຮງ ຮວມທັງພວກເດັກນ້ອຍຫຼາຍໆສິບຄົນ.

ບົດບັນນາທິການ ທີ່ສະທ້ອນເຖິງນະໂຍບາຍ ຂອງລັດຖະບານສະຫະລັດ

ການ​ປະ​ທ້ວງ​ຢ່າງກວ້າງ​ຂວາງ ຍັງ​ດຳ​ເນີນ​ຢູ່​ຕໍ່​ມາ ໃນ​ປະ​ເທດ​ອີ​ຣ່ານ ຫຼັງ​ຈາກ​ການ​ເສຍ​ຊີ​ວິດ ຂອງ​ນາງ​ມາ​ຊາ ອາ​ມີ​ນີ ອາ​ຍຸ 22 ປີ ໃນ​ລະ​ຫວ່າງ​ທີ່​ຢູ່​ພາຍ​ໃຕ້​ການ​ຄຸ້ມ​ຄອງຂອງ​ອັນ​ທີ່​ເອີ້ນ​ວ່າ “ຕຳ​ຫຼວດສິນ​ທຳ” ທີ່​ໄດ້​ຈັບ​ນາງ​ຍ້ອ​ນ “ໃສ່​ຜ້າ​ປົກ​ຫົວ​ທີ່​ບໍ່​ເໝາະ​ສົມ.”

ນັບ​ເປັນ​ເວ​ລາ​ສອງ​ເດືອນກວ່າໆ​ແລ້ວ ການ​ເດີນ​ຂະ​ບວນ​ໄດ້​ເລີ້ມ​ຂຶ້ນ​ຢູ່​ຕາມ​ຖະ​ໜົນ​ຫົນ​ທາງ​ສາຍ​ຕ່າງໆ ໃນ​ຫົວ​ເມືອງທັງ​ໃຫຍ່​ແລະ​ນ້ອຍ​ຂອງ​ອີ​ຣ່ານ ຊຶ່ງ​ການ​ເດີນ​ຂະ​ບວນ​ສ່ວນ​ໃຫຍ່​ແລ້ວ​ແມ່ນ​ນຳ​ພາ​ໂດຍ​ພວກ​ແມ່​ຍິງ ​ແລະ​ເຂົ້າ​ຮ່ວມ​ໂດຍ​ຜູ້​ເປັນ​ພໍ່ ເປັນ​ອ້າຍ​ເປັນ​ນ້ອງ ແລະ​ສາ​ມີ​ຂອງ​ພວກ​ເຂົາ​ເຈົ້າ. ພວກ​ນັກ​ສຶກ​ສາ​ຢູ່ຕາມ​ມະ​ຫາ​ວິ​ທະ​ຍາ​ໄລ​ຕ່າງໆ​ໃນ​ທົ່ວ​ປະ​ເທດ ກໍ​ໄດ້​ພາ​ກັນ​ລຸກ​ຂຶ້ນ ເຂົ້າ​ຮ່ວມ​ໃນ​ການ​ປະ​ທ້ວງ​ຕໍ່​ຕ້ານ​ການ​ກົດ​ຂີ່​ຂອງ​ລັດ​ຖະ​ບານ.

ການ​ຕອບ​ໂຕ້​ຂອງ​ລັດ​ຖະ​ບານ ​ອີ​ຣ່ານ​ແມ່ນ​ດຳ​ເນີນ​ໄປ ​ດ້ວຍ​ຄວາມ​ໂຫດ​ຫ້ຽມ​ແລະ​ພາ​ໃຫ້​ມີ​ການ​ເສຍ​ຊີ​ວິດ​ເພີ້ມ​ຂຶ້ນ​ນັບ​ມື້. ເຈົ້າ​ໜ້າ​ທີ່​ອີ​ຣ່ານ​ໄດ້​ສັງ​ຫານ​ປະ​ຊາ​ຊົນ​ຫຼາຍ​ຮ້ອຍ​ຄົນ ໃນ​ການ​ປາບ​ປາມ​ທີ່​ຮຸນ​ແຮງ ຮວມ​ທັງ​ພວກ​ເດັກ​ນ້ອຍ​ຫຼາຍໆສິບ​ຄົນ. ອົງ​ການ​ນິ​ລະ​ໂທດ​ກຳ​ສາ​ກົນ​ພົບ​ວ່າ ມີ​ຢ່າງ​ໜ້ອຍ 82 ຄົນ​ໄດ້​ຖືກ​ຂ້າຕາຍ​ທີ່​ແຂວງຊາ​ຮີ​ດານ ຊິ​ສ​ຕານ ແລະ​ບາ​ລູ​ຈິ​ສ​ຕານ ພຽງ 3 ແຂວງ​ເທົ່າ​ນັ້ນ ໃນ​ຂະ​ນະ​ທີ່​ກຳ​ລັງ​ຮັກ​ສາ​ຄວາມ​ສະ​ຫງົບ ​ໄດ້​ຍິງ​ປືນ​ເຂົ້າ​ໃສ່​ພວກ​ເດີນ​ຂະ​ບວນ ​ປະ​ທ້ວງ​ດ້ວຍ​ຄວາ​ມ​ສະ​ຫງົບ​ຢູ່​ທີ່ນັ້ນ. ຍິ່ງ​ໄປ​ກວ່ານັ້ນ ຍັງ​ມີ​ອີກ​ຫຼາຍໆ​ພັນ​ຄົນຖືກ​ຈັບ ຮວມ​ທັງ​ພວກ​ນັກ​ຂ່າວ ນັກ​ໜັງ​ສື​ພິມ ພວກ​ນັກ​ສຶກ​ສາແລະ​ບຸກ​ຄົນ​ສຳ​ຄັນ​ທາງ​ດ້ານ​ວັດ​ທະ​ນະ​ທຳ. ລັດ​ຖະ​ບານ​ອີ​ຣ່ານ​ຍັງ​ໄດ້​ລົບ​ກວນ​ການ​ໃຊ້​ອິ​ນ​ເຕີແນັດ ສຳ​ລັບ​ປະ​ຊາ​ຊົນ​ຊາວ​ອີ​ຣ່ານ​ສ່ວນ​ໃຫຍ່ 80 ລ້ານ​ກວ່າ​ຄົນ.

ສະ​ຫະ​ລັດ​ຂໍ​ປະ​ນາມ​ຢ່າງ​ແຮງ​ຕໍ່​ການ​ປາ​ບ​ປາມ​ພວກ​ປະ​ທ້ວງ​ແບບ​ສັນ​ຕິທີ່​ຮຽກ​ຮ້ອງ​ໃຫ້​ເຄົາ​ລົບ​ສິດ​ທິ​ມະ​ນຸດ ແລະ​ກຽດ​ສັກ​ສີ​ພື້ນ​ຖານ​ຂອງ​ພວກ​ເຂົາ​ເຈົ້າ. ປະ​ທາ​ນາ​ທິ​ບໍ​ດີ​ໄບ​ເດັນ ກ່າວ​ຢູ່​ໃນ​ຖະ​ແຫຼງ​ການ​ສະ​ບັບ​ນຶ່ງ ເມື່ອ​ວັນ​ທີ 3 ຕຸ​ລາ​ທີ່ຜ່ານ​ມານີ້​ວ່າ “ສະ​ຫະ​ລັດ​ຂໍ​ຢືນ​ຢູ່​ກັບ​ພວກ​ແມ່​ຍິງ​ຊາວ​ອີ​ຣ່ານ ແລະ​ປະຊາ​ຊົນ​ຊາວອີ​ຣ່ານ​ທັງ​ຫຼາຍ ​ທີ່​ໄດ້​ເຮັດ​ໃຫ້​ໂລກ​ຊຶມ​ຊາບເຖິງ​ຄວາມ​ກ້າ​ຫານ​ຂອງ​ພວກ​ເຂົາ​ເຈົ້າ.” ທ່ານ​ໃຫ້​ຂໍ້​ສັງ​ເກດ​ວ່າ ສະ​ຫະ​ລັດ​ໄດ້​ເອົາ​ມາດ​ຕະ​ການເພື່ອ​ເຮັດ​ໃຫ້ເປັນ​ການ​ງ່າຍ​ຂຶ້ນສຳ​ລັບ​ຊາວ​ອີ​ຣ່ານ​ສາ​ມາດ​ເຂົ້າ​ເຖິງ​ອິນ​ເຕີ​ແນັດ ແລະ​ໄດ້​ລົງ​ໂທດ​ເຈົ້າ​ໜ້າ​ທີ່ ແລະພະ​ແນກ​ການ​ຂອງ​ອີ​ຣ່ານ ​ຫຼາຍໆພະ​ແນກ ຮວມ​ທັງ​ຕຳ​ຫຼວດ​ສິນ​ທຳ.

ນອກນັ້ນ ປະ​ທາ​ນາ​ທິ​ບໍ​ດີ​ໄບ​ເດັນ ຍັງ​ກ່າວ​ວ່າ ສະ​ຫະ​ລັດ ຈະ​ສືບ​ຕໍ່​ຖື​ວ່າ​ເຈົ້າ​ໜ້າ​ທີ່​ອີ​ຣ່ານ ເປັນ​ຜູ້​ຮັບ​ຜິດ​ຊອບ​ຕໍ່​ການ​ປາບ​ປາມ​ຢ່າງ​ຮຸນ​ແຮງ. ເມື່ອ​ວັນ​ທີ 6 ຕຸ​ລາ​ຜ່ານ​ມາ ກະ​ຊວງ​ການ​ເງິນ​ສະ​ຫະ​ລັດ​ໄດ້​ປະ​ກາດ ການ​ລົງ​ໂທດ​ຮອບ​ໃໝ່​ຕໍ່​ພວກຜູ້​ນຳ​ອະ​ວຸ​ໂສ​ອີກ 7 ຄົນ​ຂອງ​ອີ​ຣ່ານຍ້ອນ​ມີ​ສ່ວນ​ໃນ​ການ​ປາບ​ປາມ​ຢ່າງ​ຮຸນ​ແຮງ​ຕໍ່​ປະ​ຊາ​ຊົນ​ຊາວ​ອີ​ຣ່ານແລະ​ການ​ປິດ​ລະ​ບົບ​ອິນ​ເຕີ​ແນັດ​ຂອງ​ອີ​ຣ່ານ. ພວກ​ທີ່​ຕົກເປັນ​ເປົ້າ​ແມ່ນ​ຮວມ​ທັງ​ລັດ​ຖະ​ມົນ​ຕີ​ກະ​ຊວງ​ພາຍ​ໃນ ອາ​ໝັດ ວາ​ຮີ​ດີ ແລະ​ລັດ​ຖະ​ມົນ​ຕີ​ກະ​ຊວງ​ຄົມ​ມະ​ນາ​ຄົມອາຍ​ຊາ ຊາ​ເຣ​ປົວ ຍ້ອນ​ບົດ​ບາດ​ໃນ​ການ​ຕັດ​ລະບົບ​ອິນ​ໂຕ​ແນັດ​ບໍ່​ໃຫ້​ເຊື່ອມ​ຕໍ່​ກັບ​ອິນ​ເຕີ​ແນັດ​ໂລກ. ສ່ວນ​ອີກ​ 5 ຄົນ​ນັ້ນ​ແມ່ນ​ເຈົ້າ​ໜ້າ​ທີ່​ອະ​ວຸ​ໂສ​ໃນ​ດ້ານ​ຄວາມ​ປອດ​ໄພ ທີ່​ພົວ​ພັນ​ກັບ​ໜ່ວຍ​ປ​ະ​ຕິ​ບັດ​ກົດ​ໝາຍຂອງ​ ອີ​ຣ່ານ ຕຳ​ຫຼວດ​ໄຊ​ເບີ​ຂອງ​ອີ​ຣ່ານ ແລະ​ກຳ​ລັງ​ພິ​ທັກ​ປະ​ຕິ​ວັດ​ອິ​ສ​ລາມ.

ໂຄ​ສົກ​ກະ​ຊວງ​ການ​ຕ່າງ​ປະ​ເທດ​ສະ​ຫະ​ລັດ ທ່ານ​ເນດ ໄພ​ຣ​ສ໌ ກ່າວ​ຢູ່​ໃນ​ທວີດ​ເຕີ້​ວ່າ “ພວກ​ເຮົາ​ຂໍ​ປະ​ນາມ ການ​ປາບ​ປາມ​ຂອງ​ລັດ​ຖະ​ບານ​ອີ​ຣ່ານ ຕໍ່​ການ​ໃຊ້ສິດ​ເສ​ລີ​ພາບ​ຂອງ​ປະ​ຊາ​ຊົນ ເພື່ອ​ສະ​ແດງ​ຄວາມ​ຄິດ​ຄວາມ​ເຫັນ ແລະ​ເຕົ້າ​ໂຮມກັນ​ແບບ​ສັນ​ຕິ. ພວກ​ເຮົາ​ຈະ​ສືບ​ຕໍ່​ນຳ​ໃຊ້​ການ​ລົງ​ໂທດ​ຂອງ​ພວກ​ເຮົາ ຕາບ​ໃດ​ທີ່ອີ​ຣ່ານ​ຍັງ​ບໍ່​ໃຫ້​ການ​ເຄົາ​ລົບ​ຕໍ່​ສິດ​ທິ​ປະ​ຊາ​ຊົນ​ຂອງ​ຕົນ.”

XS
SM
MD
LG