Accessibility links

Breaking News

ບົດບັນນາທິການ: ຄວາມຫວາດກົວ ຕໍ່ການບັງຄັບໃຫ້ຫາຍສາບສູນ ຕ້ອງຍຸຕິລົງ


ທ່ານ​ມາກ ແລະ​ດີບ​ຣາ ໄທ​ສ໌ ພໍ່​ແມ່​ຂອງ​ທ່ານອອ​ສ​ຕິນ ໄທ​ສ໌ ທີ່​ໄດ້​ຫ​າຍ​ສາບ​ສູນ​ຢູ່​ປະ​ເທດ​ຊີ​ເຣຍ ມາ​ໄດ້ເກືອບ 6 ປີ​ແລ້ວນັ້ນ.

​ສະ​ຫະ​ລັດ​ຂໍ​ກ່າວ​ຢ້ຳ​ເຖິງ​ຄວາມ​ໝັ້ນ​ໝາຍ ທີ່​ຈະ​ແກ້​ໄຂ​ບັນ​ຫາ​ການ​ບັງ​ຄັບ​ໃຫ້​ຫາຍ​ສາບ​ສູນ ແລະ​ຮຽກ​ຮ້ອງ​ໃຫ້​ລັດ​ຖະ​ບານ​ຂອງ​ປະ​ເທດ​ຕ່າງງໆ​ໃນ​ໂລກ ຢຸດ​ເຊົາ​ການ​ປະ​ຕິ​ບັດ​ດັ່ງ​ກ່າວ.

ບົດບັນນາທິການ ທີ່ສະທ້ອນເຖິງນະໂຍບາຍ ຂອງລັດຖະບານສະຫະລັດ

ປີນີ້ແມ່ນ​ຄົບ​ຮອບ​ 10 ປີ ໃນ​ການ​ຫາຍ​ສາບ​ສູນ​ຂອງ​ທ່ານອອ​ສ​ຕິນ ໄທ​ສ໌ ​ຢູ່ໃນ​ປະ​ເທດ​ຊີ​ເຣຍ. ທ່ານອອ​ສ​ຕິນ ໄທ​ສ໌ໄດ້​ຖືກ​ລັກ​ພາ​ໂຕເມື່ອ​ເດືອນ​ສິງ​ຫາ​ປີ 2012 ໃນ​ລະ​ຫວ່າງ​ທີ່​ເຮັດ​ວຽກ​ເປັນ​ນັກ​ຂ່າວແລະ​ຊ່າງ​ພາບ​ອິດ​ສະ​ຫຼະ​ຢູ່​ທີ່ນັ້​ນ. ຢູ່​ໃນ​ຖະແຫຼງ​ຂ່າວ ປະ​ທາ​ນາ​ທິ​ບໍ​ດີ​ໂຈ ໄບ​ເດັນ ກ່າວ​ວ່າ ທ່ານໄທ​ສ໌ “ຖື​ວ່າ​ ຄວາມ​ຈິງ​ມີ​ຄວາມ​ສຳ​ຄັນ​ກວ່າ​ໂຕ​ລາວ​ເອງ ແລະ​ໄດ້​ເດີນ​ທາງ​ໄປ​ປ​ະ​ເທດ​ຊີ​ເຣຍເພື່ອ​ສະ​ແດງ​ໃຫ້​ໂລກ​ເຫັນ ກ່ຽວ​ກັບ​ຄວາມ​ເສຍ​ຫາຍ​ທີ່​ແທ້​ຈິງ​ຂອງ​ສົງ​ຄາມ.”

ໃນ​ວັນ​ຄົບ​ຮອບ​ປີ​ທີ 10 ນີ້ ປະ​ທາ​ນາ​ທິ​ບໍ​ດີ​ໄບ​ເດັນ ໄດ້​ຮຽກ​ຮ້ອງ​ໃຫ້​ຊີ​ເຣຍ “ສິ້ນ​ສຸດ​ການ​ຫາຍ​ສາບ​ສູນນີ້ແລະ​ຊ່ວຍ​ພວກ​ເຮົາ​ນຳ​ເອົາ​ຜູ້​ກ່ຽວ​ກັບ​ຄືນ​ບ້ານ.” ມາ​ຮອດເວ​ລານີ້ ການ​ຮຽກ​ຮອງ​ດັ່ງ​ກ່າວ ​ຍັງ​ບໍ່​ທັນ​ມີ​ການ​ສະ​ໜອງ​ຕອບ​ແຕ່​ຢ່າງ​ໃດ. ລັດ​ຖະ​ບານ​ຊີ​ເຣຍ ຊຶ່ງ​ອີງ​ຕາມ​ກະ​ຊວງ​ການ​ຕ່າງ​ປະ​ເທດ​ແລ້ວ ໄດ້​ປະ​ຕິ​ເສດ​ບໍ່​ຍອມ​ຮັບ​ວ່າ​ຕົນ​ໄດ້​ຄຸມ​ຂັງ​ທ່ານ​ໄທ​ສ໌ ທັງໆ​ທີ່ໄດ້​ມີ​ການ​ກ່າວ​ຢ້ຳ​ຂອງປະ​ທາ​ນາ​ທິ​ບໍ​ດີ​ໄບ​ເດັນວ່າ ລັດ​ຖະ​ບານ​ສະ​ຫະ​ລັດ​ຮູ້​ຈັກ “ດ້ວຍ​ຄວາມ​ແນ່ນອນ” ວ່າ ທ່ານ​ໄທ​ສ໌​ຖືກ​ຄຸມ​ຂັງ​ໂດຍ​ລັດ​ຖະ​ບານ​ຊີ​ເຣຍ.

ການ​ບໍ່​ຍອມ​ໃຫ້​ຄຳ​ຕອບ​ແມ່ນ​ພາ​ໃຫ້​ເກີດ​ໃນ​ອັນ​ທີ່​ລັດ​ຖະ​ມົນ​ຕີ​ການ​ຕ່າງ​ປະ​ເທດ​ສະ​ຫະ​ລັດ ທ່ານ​ແອນ​ໂທ​ນີ ບ​ລິງ​ເກັນ ເອີ້ນ​ວ່າ “ປະ​ສົບ​ພະ​ການອັນ​ເຈັບ​ປວດ ​ທີ່​ບໍ່​ສາ​ມາດ​ເຂົ້າ​ໃຈ​ໄດ້” ຂອງ​ຄອບ​ຄົວ​ທ່ານ​ໄທ​ສ໌. ແນວ​ໃດ​ກໍ​ຕາມຄອບ​ຄົວ​ຂອງ​ທ່ານ​ໄທ​ສ໌​ບໍ່​ແມ່ນ​ຄອບ​ຄົວ​ດຽວ​ຕ​າ​ມ​ລຳ​ພັງ. ຍັງ​ມີ​ພວກ​ຜູ້​ຊາຍ ແມ່​ຍິງ ແລະ​ເດັກ​ນ້ອຍ ບໍ່​ຕ່ຳ​ກວ່າ 102,000 ຄົນ ທີ່​ເຄືອ​ຂ່າຍ​ສິດ​ທິ​ມະ​ນຸດ​ໃນ​ຊີ​ເຣຍ​ລາຍ​ງານ​ວ່າ ໄດ້​ຫ​າຍ​ສາບ​ສູນ​ໄປ ​ໃນ​ປະ​ເທດ​ຊີ​ເຣຍ ນັບ​ແຕ່​ສົງ​ຄາມ​ກາງ​ເມືອງ​ ໃນ​ປີ 2011 ເປັນ​ຕົ້ນ​ມາ ໂດຍ​ບໍ່​ຮູ້​ຈັກ​ວ່າ ​ຊະ​ຕາ​ກຳ​ຂອງ​ຜູ້​ທີ່​ເຂົາ​ເຈົ້າ​ຮັກ​ເປັນຕາຍ​ຮ້າຍ​ດີ​ແນວ​ໃດ​ ແລະ​ກໍ​ບໍ່​ຮູ້​ຈັກ​ວ່າ ​ພວກ​ເຂົາ​ເຈົ້າ​ຢູ່​ໃສ​ໃນ​ເວ​ລານີ້. ຄອບ​ຄົວ​ຊາວ​ຊີ​ເຣຍ​ເກືອບ​ທັງ​ໝົດ ​ທີ່​ປະ​ສົບ​ກັບ​ບັນ​ຫາ​ແບບນີ້ ບໍ່​ວ່າ​ພວກ​ທີ່​ຫ​າຍ​ສາບ​ສູນ ​ແມ່ນ​ເປັນ​ຜົນ​ມາ​ຈາກ​ການ​ກະ​ທຳ​ ຂອງ​ອຳ​ນາດ​ການ​ປົກ​ຄອງ​ອາ​ຊາດ ກຸ່ມ​ລັດ​ອິສ​ລາມຫຼື​ພັກ​ຝ່າຍ​ອື່ນໆ​ໃນ​ບັນ​ຫາ​ຂັດ​ແຍ້ງ​ຫຼື​ບໍ່​ກໍ​ຕາມ.

ແລະ​ຊີ​ເຣຍ​ກໍ​ບໍ່​ແມ່ນ​ເປັນ​ພຽງ​ປະ​ເທດ​ດຽວ​ທີ່​ມີ​ຫຼາຍໆ​ສິບ​ພັນ​ຄົນ​ໄດ້​ຖືກ​ບັງ​ຄັບ​ໃຫ້​ຫາຍ​ສາບ​ສູນ​ໄປ​ຈາກ​ຄອບ​ຄົວ​ແລະ​ປະ​ຊາ​ຄົມ​ຂອງ​ພວກ​ເຂົາ​ເຈົ້າໃນ​ໄລ​ຍະ​ບໍ່​ເທົ່າ​ໃດ​ປີ​ທີ່​ຜ່ານ​ມານີ້. ດັ່ງ​ທີ່​ອົງ​ການ​ນິ​ລະ​ໂທດ​ກຳ​ສາ​ກົນ​ໃຫ້​ຂໍ້​ສັງ​ເກດ​ວ່າ “ການ​ຫ​າຍ​ສາບ​ສູນ​ໃນ​ເວ​ລາ​ນີ້ ແມ່ນ​ເກີດ​ຂຶ້ນ​ຢູ່​ໃນ​ທຸກໆ​ເຂດ​ຂອງ​ໂລກ ​ແລະ​ຢູ່ໃນ​ຂອບ​ເຂດ​ທີ່ກວ້າງ​ຂວາງ. ໂດຍ​ທົ່ວ​ໄປ​ແລ້ວແມ່ນ​ມັກ​ເກີດ​ຂຶ້ນ​ຍ້ອນ​ບັນ​ຫາ​ຂັດ​ແຍ້ງ​ພາຍ​ໃນ ໂດຍ​ສະ​ເພາະ​ແມ່ນ​ລັດ​ຖະ​ບານ​ພະ​ຍາ​ຍາມ​ກົດ​ຂີ່​ພວກ​ຄັດ​ຄ້ານ​ທາງ​ດ້ານ​ການ​ເມືອງ​ຫຼື​ບໍ່​ກໍ​ໂດຍ​ກຸ່ມ​ກຳ​ລັງ​ປະ​ກອບ​ອາ​ວຸດ​ທີ່​ຄັດ​ຄ້ານ​ລັດ​ຖະ​ບານ.”

ເມື່ອ​ວັນ​ທີ 30 ສິງ​ຫາ​ຜ່ານ​ມານີ້ ຊຶ່ງ​ເປັນ​ວັນລະ​ນຶກ​ເຖິງ​ຜູ້​ເຄາະ​ຮ້າຍ​ທີ່​ຖືກ​ບັງ​ຄັບ​ໃຫ້​ຫາຍ​ສາບ​ສູນຂອງ​ລະ​ຫວ່າງ​ປະ​ເທດ ລັດ​ຖະ​ມົນ​ຕີ​ການ​ຕ່າງ​ປະ​ເທດບ​ລິງ​ເກັນ ໄດ້​ກ່າ​ວ​ປະ​ນາມ​ຕໍ່​ອັນ​ທີ່​ທ່ານ​ເອີ້ນ​ວ່າ “ການ​ລະ​ເມີດ​ຢ່າງ​ຮ້າຍ​ແຮ​ງ​ຕໍ່​ສິດ​ທິ​ມະ​ນຸດ​ທີ່​ຖືກ​ຫ້າມ​ໂດຍ​ກົດ​ໝາຍ​ລະ​ຫວ່າງ​ປະ​ເທດ…ສະ​ຫະ​ລັດ” ທ່ານ​ປະ​ກາດ​ຢູ່​ໃນ​ຖະ​ແຫຼງ​ການ​ວ່າ “ຂໍ​ກ່າວ​ຢ້ຳ​ອີກເທື່ອ​ນຶ່ງ​ໃນ​ຄວາມ​ໝັ້ນ​ໝາຍ​ທີ່​ຈະ​ແກ້​ໄຂ​ການບັງ​ຄັບ​ໃຫ້​ຫ​າຍ​ສາບ​ສູນ ແລະ​ຂໍ​ຮຽກ​ຮ້ອງ​ໃຫ້​ລັດ​ຖະ​ບານ​ຂອງ​ປະ​ເທດ​ຕ່າງໆ ​ຢູ່​ໃນ​ທົ່ວ​ໂລກ ຈົ່ງ​ຢຸດ​ເຊົາ​ໃນ​ການ​ປະ​ຕິ​ບັດນີ້ ເອົາ​ໂຕ​ຜູ້​ທີ່​ຮັບ​ຜິດ​ຊອບ​ມາ​ລົງ​ໂທດ ເປີດ​ເຜີຍໃຫ້​ຮູ້​ຊະ​ຕາ​ກຳ​ຂອງ​ພວກ​ທີ່​ຫາຍ​ສາບ​ສູນແລະ​ໃຫ້​ເຄົາ​ລົບ​ນັບ​ຖື​ສິດ​ທິ​ມະ​ນຸດ​ແລະ​ສິດ​ເສ​ລີ​ພາບ​ຂັ້ນ​ພື້ນ​ຖານ​ຂອງ​ທຸກໆ​ຄົນ.”

XS
SM
MD
LG