ບົດບັນນາທິການ ທີ່ສະທ້ອນເຖິງນະໂຍບາຍ ຂອງລັດຖະບານສະຫະລັດ
ສະພາຄຸ້ມຄອງອົງການພະລັງງານປະລະມານູສາກົນ ຫຼື IAEA ໄດ້ລົງຄະແນນສຽງຢ່າງຖ້ວມລົ້ນຕ້ອງຕິລັດຖະບານອີຣ່ານ ທີ່ບໍ່ສາມາດຕອບຄຳຖາມຢ່າງຄົບ ຖ້ວນ ກ່ຽວກັບຮ່ອງຮອຍຂອງທາດຢູເຣນຽມ ຊຶ່ງໄດ້ຖືກພົບເຫັນ ຢູ່ 3 ບ່ອນ ທີ່ບໍ່ໄດ້ມີການປະກາດໃຫ້ຊາບໃນອີຣ່ານ.
ການລົງຄະແນນສຽງໄດ້ມີຂຶ້ນ ໃນວັນທີ 8 ມິຖຸນາຜ່ານມາ ຫຼັງຈາກຜູ້ອຳນວຍການຂອງອົງການພະລັງງານປະລະມານູສາກົນ ທ່ານຣາຟາແລ ກຣອສຊີໄດ້ຍື່ນລາຍງານຕໍ່ຄະນະສະພາຄຸ້ມຄອງໂດຍໃຫ້ເຫດຜົນວ່າອີຣ່ານບໍ່ໃຫ້ການຮ່ວມ ມືກັບອົງການພະລັງງານປະລະມານູສາກົນ ໃນການສືບສວນກ່ຽວກັບເລື້ອງນີ້. ທີ່ກອງປະຊຸມຖະແຫຼງຂ່າວ ເມື່ອວັນທີ 6 ມິຖຸນາຜ່ານມາ ຜູ້ອຳນວຍການໃຫຍ່ ກຣອສຊີກ່າວວ່າ “ອີຣ່ານບໍ່ໄດ້ໃຫ້ຄຳອະທິບາຍວ່າ ມັນມີຄວາມໜ້າເຊື່ອຖືທາງ
ດ້ານເຕັກນິກຫຼືບໍ່ ໃນຄວາມສຳພັນລະຫວ່າງການພົບເຫັນຂອງທາງອົງການ ຢູ່ສະຖານທີ່ 3 ບ່ອນໃນປະເທດອີຣ່ານ.” ນອກນັ້ນ ທ່ານຍັງໃຫ້ຂໍ້ສັງເກດວ່າ ອີຣ່ານແມ່ນຍັງອີກ ບໍ່ເທົ່າໃດອາທິດທໍ່ນັ້ນ ກໍຈະມີທາດຢູເຣນຽມທີ່ກັ່ນແລ້ວໃນລະດັບສູງ “ໃນຈຳນວນທີ່ສຳຄັນ.”
30 ໃນຈຳນວນທັງໝົດ 35 ປະເທດໄດ້ລົງຄະແນນສຽງເຫັນພ້ອມກັບມະຕິຂອງ
ອົງການພະລັງງານປະລະມະນູສາກົນ. ສອງປະເທດ ມີຣັດເຊຍ ແລະຈີນ ໄດ້ລົງຄະແນນສຽງຄັດຄ້ານ ແລະອີກ 3 ປະເທດ ມີອິນເດຍ ປາກິສຖານ ແລະລີເບຍ ໄດ້ພາກັນບໍ່ອອກສຽງ.
ສະຫະລັດ ຢູ່ໃນຖະແຫຼງການຮ່ວມ ກັບປະເທດຝຣັ່ງ ເຢຍຣະມັນ ແລະສະຫະຣາຊະອານາຈັກ ໄດ້ສະແດງຄວາມຊົມເຊີຍຕໍ່ມະຕິອົງການພະລັງງານປະລະມານູສາກົນ “ເພື່ອສະໜອງຕອບ ຕໍ່ການໃຫ້ຄວາມຮ່ວມມືບໍ່ພຽງພໍ ຂອງອີຣ່ານກ່ຽວ ກັບບັນຫາການຄຸ້ມຄອງຢ່າງເຂັ້ມງວດ ແລະພົ້ນເດັ່ນ ທີ່ພົວພັນກັບພັນທະຂອງອີຣ່ານ ພາຍໃຕ້ຂໍ້ຕົກລົງ NPT ທີ່ມີການບັງຄັບນັ້ນ.”
4 ປະເທດກ່າວວ່າ ການລົງຄະແນນຢ່າງຖ້ວມລົ້ນຂອງສຽງສ່ວນຫຼາຍຕ່ໍມະຕິດັ່ງກ່າວ “ໄດ້ສົ່ງສານແບບບໍ່ຄຸມເຄືອໄປຍັງອີຣ່ານວ່າ ຕົນຕ້ອງໄດ້ປະຕິບັດຕາມພັນທະໃນການຄຸ້ມຄອງ ແລະສະໜອງການໃຫ້ຄວາມກະຈ່າງແຈ້ງທີ່ໜ້າເຊື່ອຖືທາງດ້ານເຕັກນິກກ່ຽວກັບບັນຫາຄຸ້ມຄອງທີ່ສຳຄັນຕ່າງໆ.”
ສະຫະລັດ ຝຣັ່ງ ເຢຍຣະມັນ ແລະສະຫະຣາຊະອານາຈັກ ຂໍແນະນຳໃຫ້ອີຣ່ານ ເອົາໃຈໃສ່ຕໍ່ຄຳຮຽກຮ້ອງຂອງປະຊາຄົມນາໆຊາດໃຫ້ເຮັດຫຼ້ອນພັນທະທາງດ້ານກົດໝາຍຂອງຕົນ ແລະໃຫ້ການຮ່ວມມືກັບອົງການພະລັງງານປະລະມານູສາກົນ ເພື່ອໃຫ້ຄວາມກະຈ່າງແຈ້ງຢ່າງຄົບຖ້ວນ ແລະແກ້ໄຂບັນຫາຕ່າງໆ ໂດຍປາສະຈາກການຊັກຊ້າໃດໆ.”
ການຮັບຮອງເອົາມະຕິຂອງອົງການພະລັງງານປະລະມານູສາກົນ ມີຂຶ້ນໃນລະຫວ່າງການຢຸດພັກ ໃນການເຈລະຈາລະຫວ່າງອີຣ່ານແລະກຸ່ມຫ້າປະເທດບວກນຶ່ງ ເພື່ອໃຫ້ສະຫະລັດ ແລະອີຣ່ານກັບຄືນໄປສູ່ການຈັດຕັ້ງປະຕິບັດໂດຍເຕັມຕໍ່ຂໍ້ຕົກລົງນິວເຄລຍ ຊຶ່ງເປັນທີ່ຮູ້ກັນໃນຊື່ JCPOA. ການເຈລະຈາເປັນເວລານຶ່ງປີ ທີ່ນະຄອນວຽນນາ ໄດ້ຕົກຢູ່ໃນສະພາບບໍ່ໄປບໍ່ມາ ເມື່ອມໍ່ໆມານີ້ ກ່ຽວກັບບັນຫາທີ່ບໍ່ພົວພັນໃນເລື້ອງນິວເຄລຍ ທີ່ຢູ່ນອກຂອບເຂດຂອງຂໍ້ຕົກລົງ JCPOA.
ໂຄສົກຂອງທຳນຽບຂາວ ທ່ານນາງແຄຣີນ ຊັງປີແອ ກ່າວວ່າ ສະຫະລັດຖືວ່າບັນຫາການຄຸ້ມຄອງຄວາມປອດໄພນິວເຄລຍຂອງອົງການພະລັງງານປະລະມານູສາກົນຈະຢູ່ໃນອີກເສັ້ນທາງນຶ່ງ ໃນການເຈລາ ຂອງກຸ່ມ 5 ປະເທດບວກນຶ່ງ. ທ່ານນາງກ່າວວ່າ “ມີການຕົກລົງກັນຢູ່ໂຕະເຈລະຈາ ທີ່ອາດຈະພາໃຫ້ເກີດຜົນ ຕໍ່ການປະຕິບັດ ເພື່ອການປະຕິບັດ ໃຫ້ກັບຄືນໄປສູ່ຂໍ້ຕົກລົງ JCPOA ໂດຍບໍ່ຕ້ອງຮັບມື ກັບບັນຫາທີ່ບໍ່ກ່ຽວຂ້ອງອື່ນໆ. ຂໍ້ຕົກລົງນັ້ນ ແມ່ນມີຢູ່ ສຳລັບອີຣ່ານ ພວກເຂົາຄວນຮັບເອົາມັນ.”