ບົດບັນນາທິການ ທີ່ສະທ້ອນເຖິງນະໂຍບາຍ ຂອງລັດຖະບານສະຫະລັດ
ມີຫຼັກຖານເພີ້ມຂຶ້ນເລື້ອຍໆທີ່ສະແດງໃຫ້ເຫັນວ່າ ມີຄວາມກ່ຽວພັນໂດຍກົງລະຫວ່າງຄວາມສະເໝີພາບແລະການມອບອຳນາດໃຫ້ແກ່ພວກແມ່ຍິງ ແລະສະຖຽນລະພາບຂອງປະເທດ. ແຕ່ມັນມີການເຊື່ອມໂຍງທີ່ອຳນາດການປົກຄອງໃນອີຣ່ານໄດ້ປະຕິເສດ ບໍ່ຍອມຮັບຮູ້ເລື້ອງນີ້.
ຫຼັງຈາກການເສຍຊີວິດ ຂອງນາງມາຊາ ອາມີນີ ອາຍຸ 22 ປີໃນເດືອນກັນຍາ ປີກາຍ ລະຫວ່າງການຄວບຄຸມໂຕ ຂອງ “ຕຳຫຼວດສິນທຳ” ອີຣ່ານ ທີ່ໄດ້ຈັບນາງຍ້ອນກົດລະບຽບເຄື່ອງນຸ່ງສາສະໜາອິສລາມອີຣ່ານ ການເດີນຂະບວນປະທ້ວງຂະໜາດໃຫຍ່ໄດ້ລະເບີດຂຶ້ນໃນທົ່ວປະເທດ. ຫຼາຍໆພັນຄົນທີ່ນຳພາໂດຍພວກແມ່ຍິງ ແຕ່ໄດ້ຮ່ວມສົມທົບໂດຍສາມີເຂົາເຈົ້າ ລູກຊາຍ ອ້າຍນ້ອງແລະໝູ່ເພື່ອນ ລົງສູ່ຖະໜົນຫົນທາງ ໃນການເສຍຊີວິດຂອງນາງອາມີນີ ແລະຕໍ່ຕ້ານຄຳສັ່ງທີ່ບັງຄັບໃຫ້ແມ່ຍິງຕ້ອງໃສ່ຮີຈາບ ເພື່ອປົກຜົມເຂົາເຈົ້າ ແລະນຸ່ງເຄື່ອງນຸ່ງຫຼົມໆ ເພື່ອປິດບັງຮູບຮ່າງຂອງເຂົາເຈົ້າ. ການປະທ້ວງເຫຼົ່ານັ້ນ ດ້ວຍການໂຮມຊຸມນຸມ ທີ່ຮ້ອງຂຶ້ນວ່າ “ແມ່ຍິງ! ຊີວິດ! ອິດສະຫຼະພາບ!” ໄດ້ກາຍເປັນການປະທ້ວງຕໍ່ຕ້ານການສໍ້ລາດບັງຫຼວງ, ການບໍລິຫານງານທີ່ຜິດພາດແລະອຳນາດການປົກຄອງທີ່ກົດຂີ່. ມັນເປັນການທ້າທາຍທີ່ໃຫຍ່ທີ່ສຸດ ຕໍ່ການປົກຄອງຂອງສາທາລະນະລັດອິສລາມອີຣ່ານ ນັບຕັ້ງແຕ່ມີການສ້າງຕັ້ງຂຶ້ນມາໃນປີ 1979.
ພວກຜູ້ນຳຂອງອີຣ່ານໄດ້ຮັບມື ໂດຍການສັ່ງໃຫ້ຢຸດເຊົາຊົ່ວຄາວໃນລາດຕະເວນຂອງຕຳຫຼວດສິນທຳ ແຕ່ດ້ວຍການປາບປາມ ທີ່ໂຫດຮ້າຍປ່າເຖື່ອນຕໍ່ພວກປະທ້ວງນັ້ນ ມີ 500 ຄົນຖືກຂ້າຕາຍ 20,000 ຄົນຖືກຈັບແລະຢ່າງໜ້ອຍ 7 ຄົນ ໄດ້ຖືກປະຫານຊີວິດ.
ເວລານີ້ ສອງເດືອນກ່ອນວັນຄົບຮອບໃນການຈັບນາງມາຊາ ອາມີນີ ເຈົ້າໜ້າທີ່ຕຳຫຼວດໄດ້ປະກາດວ່າ “ເລີ້ມຕົ້ນໃນທັນທີ” ຕົນຈະທຳການລາດຕະເວນຄືນອີກ ຢູ່ຕາມຖະໜົນຫົນທາງ ເພື່ອເຕືອນໃນເທື່ອທຳອິດ ແລະຫຼັງຈາກນັ້ນກໍຈັບແມ່ຍິງທີ່ໄດ້ລະເມີດກົດລະບຽບໃນການນຸ່ງເຄື່ອງ. ການປະກາດມີຂຶ້ນລຸນຫຼັງທີ່ເຈົ້າໜ້າທີ່ໄດ້ຝຶກແອບໃນຕົ້ນປີນີ້ ເພື່ອອັດທຸລະກິດຕ່າງໆ ທີ່ພວກເຂົາກ່າວຫາວ່າໃຫ້ບໍລິການແກ່ພວກລູກຄ້າທີ່ບໍ່ໃສ່ຮີຈາບ. ຍິ່ງໄປກວ່ານັ້ນບຸກຄົນທີ່ມີຊື່ສຽງຫຼາຍຄົນໄດ້ປະເຊີນກັບການດຳເນີນຄະດີຍ້ອນລະເມີດກົດໝາຍໂດຍບໍ່ໃສ່ຜ້າປົກຫົວທີ່ເໝາະສົມ ຮວມທັງດາລາສາວ ອາຊາເດ ຊາມາດີ.
ສະຫະລັດມີຄວາມເປັນຫ່ວງກ່ຽວກັບລາຍງານຂ່າວການປາບປາມຮອບໃໝ່ຢູ່ໃນອີຣ່ານຕໍ່ພວກແມ່ຍິງ ໃນການໃສ່ຜ້າປົກຫົວ. “ເບິ່ງຄືວ່າອຳນາດການປົກຄອງບໍ່ໄດ້ຮຽນຮູ້ຫຍັງເລີຍ ຈາກການປະທ້ວງເມື່ອໄວໆມານີ້” ໂຄສົກກະຊວງການຕ່າງປະເທດ ທ່ານແມັດທິວ ມິລເລີ້ ກ່າວ.
ຜູ້ປະສານງານຍຸດທະສາດດ້ານການສື່ສານຄົມມະນາຄົມຂອງສະພາຄວາມໝັ້ນຄົງແຫ່ງຊາດ ທ່ານຈອນ ເຄີບີປະກາດວ່າ “ແມ່ຍິງອີຣ່ານຄວນມີຄວາມສາມາດໃນການຕັດສິນໃຈສຳລັບເຂົາເຈົ້າເອງ ກ່ຽວກັບວ່າເຂົາເຈົ້າຄວນປະຕິບັດຄວາມເຊື່ອຂອງພວກເຂົາເຈົ້າແບບໃດ ແລະເຂົາເຈົ້າຈະນຸ່ງເຄື່ອງແບບໃດໃນທີ່ສາທາລະນະ.” ທ່ານໃຫ້ຂໍ້ສັງເກດວ່າ ສະຫະລັດໄດ້ທຳການລົງໂທດໄປແລ້ວ ສະມາຊິກຕຳຫຼວດສິນທຳອີຣ່ານ ແລະອົງການອື່ນໆທີ່ພົວພັນກັບການປາບປາມຢ່າງໂຫດຮ້າຍປ່າເຖື່ອນ ທີ່ນຳໄປສູ່ການເສຍຊີວິດ ແລະໄດ້ຮັບບາດເຈັບຂອງພວກປະທ້ວງ. “ຖ້າພວກເຮົາເຊື່ອວ່າ ພວກເຮົາຈຳເປັນ ຕ້ອງໄດ້ເອົາມາດຕະການເພີ້ມຕື່ມ ເພື່ອທຳຄວາມກົນດັນຕື່ມອີກ ຕໍ່ອຳນາດການປົກຄອງ” ທ່ານກ່າວວ່າ “ພວກເຮົາກໍຈະເຮັດເຊັ່ນນັ້ນ.
