Accessibility links

Breaking News

ບົດບັນນາທິການ: ເຄີຊອນ ຊາໂປຣິສເຊຍ ໂດແນັດ ແລະລູຮານ ແມ່ນຢູເຄຣນ


ຜູ້​ຄົນທີ່​ເດີນ​ທາງ​ໄປ​ຈາກ​ເຂດ​ເຄີ​ຊອນ ທີ່​ຣັດ​ເຊຍ​ຜະ​ໜວກ ລໍ​ຖ້າ​ການ​ຍົກ​ຍ້າຍ​ຕື່ມ​ອີກ ຈາກ​ສະ​ຖາ​ນີ​ລົດ​ໄຟ ​​ຊານກອຍ ໃນ​ແຫຼມ​ໄຄ​ຣ​ເມຍ ເມື່ອ​ວັນ​ທີ 21 ຕຸ​ລາ 2022.

ເອກອັກຄະລັດຖະທູດທໍມັສ ກຣີນຟິລ ກ່າວວ່າ ຄວາມ​ພະ​ຍາ​ຍາມຂອງຣັດເຊຍ ທີ່​ຈະ​ຜ​ະ​ໜວກ ເອົາ 4 ເຂດ​ຂອ​ຢູ​ເຄ​ຣນ ບໍ່ມີສະຖານທີ່ຮອງຮັບຢູ່ໃນໂລກສະໄໝໃໝ່ຂອງພວກເຮົາ.

ບົດບັນນາທິການ ທີ່ສະທ້ອນເຖິງນະໂຍບາຍ ຂອງລັດຖະບານສະຫະລັດ

ເມື່ອ​ວັນ​ທີ 30 ກັນ​ຍາ​ຜ່ານ​ມາ ປະ​ທາ​ນາ​ທິ​ບໍ​ດີ​ວ​ລາ​ດີ​ເມຍ ປູ​ຕິນ ແຫ່ງ​ຣັດ​ເຊຍ ໄດ້​ປະ​ກາດ​ໃຫ້​ຊາບ​ກ່ຽວ​ກັບ​ຄວາມ​ພະ​ຍາ​ຍາມ​ຂອງ​ຣັດ​ເຊຍ​ທີ່​ຈະ​ຜະ​ໜວກ​ຫຼື​ຮວມ​ເອົາ 4 ເຂດ​ຂອງ​ຢູ​ເຄ​ຣນເຂົ້າ​ເປັນ​ສ່ວນ​ນຶ່ງ​ຂອງ​ດິນ​ແດນ​ຕົນ ປະ​ກອບ​ດ້ວຍ​ໂດ​ແນັດ ລູນ​ຮານ ເຄີ​ຊອນ ແລະ​ຊາ​ໂປ​ຣິ​ສ​ເຊຍ. ເຂດ​ທັງ 4 ​ຍັງບໍ່​ທັນໄດ້​ຢູ່​ພາຍ​ໃຕ້​ການ​ຄວບ​ຄຸມ​ຂອງ​ຣັດ​ເຊຍຢ່າງ​ຄົບ​ຖ້ວນ​ແຕ່​ປະ​ການ​ໃດ. ການ​ປະ​ກາດ​ຂອງ​ປູ​ຕິນ ໄດ້​ຕິດ​ຕາມ​ມາ​ຢ່າງວ່ອງ​ໄວ​ດ້ວຍ​ການ​ຈັດ “ການ​ລົງປະ​ຊາ​ມະ​ຕິ” ​ທີ່​ຈະ​ແຈ້ງ​ວ່າເປັນ​ການ​ຫຼອກ​ລວງ​ ເພື່ອ​ຢາກ​ສະ​ແດງ​ໃຫ້​ເຫັນ​ວ່າ ປະ​ຊາ​ຊົນ​ຢູເຄ​ຣນ ທີ່​ອາ​ໄສ​ຢູ່​ໃນ​ເຂດ​ເຫຼົ່າ​ນີ້ ເຫັນ​ພ້ອມ​ກັບ​ຄວາມ​ພະ​ຍາ​ຍາມ​ຂອງ​ຣັດ​ເຊຍໃນ​ການ​ຜະ​ໜວກ​ເອົາ​ດິນ​ແດນ​ດັ່ງ​ກ່າວ.

ທ່ານ​ນາງ​ລິນ​ດາ ທໍ​ມັ​ສ ກ​ຣິນ​ຟິ​ລ ເອກ​ອັກ​ຄະ​ລັດ​ຖະ​ທູດ​ສະ​ຫະ​ລັດ ປະ​ຈຳ​ອົງ​ການ​ສະ​ຫະ​ປະ​ຊາ​ຊາດ ກ່າວ​ໃນ​ລະ​ຫວ່າງກອ​ງ​ປະ​ຊຸມ​ນັດ​ພິ​ເສດ​ຂອງ​ສະ​ມັດ​ຊາ​ໃຫຍ່​ສະ​ຫະ​ປະ​ຊາ​ຊາດ ກ່ຽວ​ກັບ​ການ​ຮຸກ​ຮານ​ຂອງ​ຣັດ​ເຊຍ​ເຂົ້າ​ໄປ​ໃນ​ຢູ​ເຄ​ຣນ ເມື່ອ​ກາງ​ເດືອນ​ຕຸ​ລາ​ຜ່ານ​ມານີ້​ວ່າ “ມາ​ຈົນ​ຮອດ​ປີ 2014 (ເວ​ລາ​ປູ​ຕິນປະ​ກາດຜະ​ໜວກ​ເອົາ​ແຫຼມ​ໄຄ​ຣ​ເມຍ​ຂອງ​ຢູ​ເຄ​ຣນ) ຣັດ​ເຊຍ​ແມ່ນ​ທົດ​ສອບ​ເບິ່ງ​ການ​ຕັດ​ສິນ​ໃຈ​ຂອງ​ໂລກ ໃນ​ການ​ລຸກ​ຂຶ້ນ​ຕ້ານ​ຢັນ​ຫຼັກ​ແກນ​ກາງ​ຂອງ​ກົດ​ໝາຍ​ລະ​ຫວ່າງ​ປະ​ເທດ.” ​ທ່າ​ນ​ນາງ​ກ່າວ​ຕື່ມ​ວ່າ:

“ມີທາງ​ອື່ນ​ອີກບໍ ​ທີ່​ທ່ານ​ສາ​ມາດ​ໃຫ້​ການ​ອະ​ທິ​ບາຍ ​ກ່ຽວ​ກັບ​ການ​ບໍ່​ເອົາ​ຫົວ​ຊາ​ຢ່າງ​ຈະ​ແຈ້ງ ຕໍ່​ຄຸນ​ຄ່າ​ຂອ​ງ​ອະ​ທິ​ປະ​ໄຕ ຜືນ​ແຜ່ນ​ດິນ​ອັນ​ຄົບ​ຖ້ວນ ແລະ​ສັນ​ຕິ​ພາບ​ແລະ​ຄວາມ​ໝັ້ນ​ຄົງ? ມີທາ​ງ​ອື່ນ​ອີກ​ບໍ ​ທີ່​ທ່ານ​ສາ​ມາດ​ໃຫ້​ການ​ອະ​ທິ​ບາຍ​ກ່ຽວ​ກັບ​ການ​ໂຈມ​ຕີ​ທີ່​ໜ້າ​ຢ້ານ​ກົວ​ຕໍ່​ພົນ​ລະ​ເຮືອນແລະ​ພື້ນ​ຖານ​ໂຄງ​ລ່​າງ​ຂອງ​ ພົນ​ລະ​ເຮືອນທີ່​ພວກ​ເຮົາ​ໄດ້​ເຫັນ​ໃນ​ອາ​ທິດນີ້? ມີ​ທາງ​ອື່ນ​ອີກ​ບໍ​ທີ່​ທ່ານ​ສາ​ມາດ ໃຫ້​ການ​ອະ​ທິ​ບາຍ​ກ່ຽວ​ກັບ​ການ​ຂົ່ມ​ຂູ່​ດ້ວຍ​ກຳ​ລັງ​ທະ​ຫານຂອງປູ​ຕິນແລະ​ການຂົ່ມ​ຂູ່​ແບບ​ຄຸມ​ເຄືອ ​ທີ່​ຈະ​ສົ່ງ​ກຳ​ລັງ​ນິວ​ເຄ​ລຍ ​ໄປ​ປະ​ຈຳ​ການ. ສິ່ງ​ເຫຼົ່າ​ນີ້​ແມ່ນການ​ຂົ່ມ​ຂູ່​ຕໍ່​ສະ​ຖາ​ບັນ. ມັນ​ແມ່ນ​ການ​ຂົ່ມ​ຂູ່​ຕໍ່​ພວກ​ເຮົາ​ທຸກໆ​ຄົນ.”

ໃນ​ການ​ຖະ​ແຫຼງ​ກ່ອນ​ໜ້າ​ການ​ລົງ​ຄະ​ແນນ​ສຽງ​ຂອງກອງ​ປະ​ຊຸມ​ສະ​ມັດ​ຊາ​ໃຫຍ່​ອົງ​ການ​ສະ​ຫະ​ປະ​ຊາ​ຊາດ ​ກ່ຽວ​ກັບຍັດ​ຕິ​ທີ່​ຮຽກ​ຮ້ອງ​ໃຫ້​ປະ​ເທດ​ຕ່າງໆ​ບໍ່​ໃຫ້​ຮັບຮູ້​ການ​ດຳ​ເນີນ​ຄວາມ​ພະ​ຍາ​ຍາມ​ຂອງ​ຣັດ​ເຊຍ ທີ່​ຈະ​ຜະ​ໜວກ​ເອົາ 4 ເຂດ​ຂອງ​ຢູ​ເຄ​ຣນນັ້ນ ເອກ​ອັກ​ຄະ​ລັດ​ຖະ​ທູດ​ທໍ​ມັ​ສ ກ​ຣີນ​ຟິ​ລ ກ່າວ​ວ່າ ການ​ກະ​ທຳ​ຂອງ​ຣັດ​ເຊຍ ບໍ່​ມີ​ສະ​ຖານ​ທີ່​ຮອງ​ຮັບ​ຢູ່​ໃນ​ໂລກ​ສະ​ໄໝ​ໃໝ່ຂອງ​ພວກ​ເຮົາ.

“ນີ້​ຄື​ເຫດ​ຜົນ​ທີ່​ວ່າ​ເປັນ​ຫຍັງ​ ຍັດ​ຕິ​ສະ​ບັບ​ນີ້ ​ຈຶ່ງ​ຮຽກ​ຮ້ອງ​ໃຫ້​ມີ​ສັນ​ຕິ​ພາບ ແລະ​ຍັງ​ຮຽກ​ຮ້ອງ​ໃຫ້​ຫຼຸດ​ຜ່ອນ​ຄວາມ​ເຄັ່ງ​ຕຶງ ແຕ່​ໃນ​ຂ​ະ​ນະ​ດຽວ​ກັນ ​ກໍ​ໄດ້​ສ​ແດງ​ໃຫ້​ເຫັນ​ຢ່າງ​ຈະ​ແຈ້ງວ່າ ພວກ​ເຮົາ​ໄດ້​ປະ​ຕິ​ເສດ​ຕໍ່​ຄວາມ​ພ​ະ​ຍາ​ຍາມ​ທີ່​ຈະ​ຜະ​ໜວກເອົາດິນ​ແດນ​ຂອງ​ຣັດ​ເຊຍ ພວກ​ເຮົາ​ໄດ້​ປະ​ຕິ​ເສດ​ຕໍ່​ການໝິ່ນ​ປະ​ໝາດ​ຢ່າງ​ເປີດ​ແປນ​ຕໍ່​ຜືນ​ແຜນ​ດິນ​ອັນ​ຄົບ​ຖ້ວນ ຕໍ່​ອະ​ທິ​ປະ​ໄຕ​ແຫ່ງ​ຊາດ ຕໍ່​ສັນ​ຕິ​ພາບ ​ແລະຕໍ່​ຄວາມ​ໝັ້ນ​ຄົງ."

ຍັດ​ຕິ​ສະ​ບັບ​ນີ້ ໄດ້​ຖືກ​ຮັບ​ຮອງ​ເອົາ​ໂດຍ​ມີ 143 ປະ​ເທດ​ໃຫ້​ການ​ສະ​ໜັບ​ສະ​ໜຸນ 5 ປະ​ເທດ​ຄັດ​ຄ້ານ ແລະ 35 ປະ​ເທດ​ບໍ່​ອອກ​ສຽງ.

ເອກ​ອັກ​ຄະ​ລັດ​ຖະ​ທູດ​ທໍ​ມັ​ສ ກ​ຣີນ​ຟິ​ລ ກ່າວ​ວ່າ “ຍັດ​ຕິ​ສະ​ບັບ​ນີ້​ໄດ້​ສົ່ງ​ສັນ​ຍານ​ທີ່​ມີ​ຄວາມສຳ​ຄັນ​ຂະ​ໜາດ​ໃຫຍ່ ​ໄປ​ໃຫ້​ມົ​ສ​ກູ ແລະ​ໃຫ້​ທຸກໆ​ຄົນ."

“ມັນ​ບໍ່​ສຳ​ຄັນ​ວ່າ ຖ້າ​ທ່ານ​ຫາກ​ເປັນ​ປະ​ເທດ​ໃຫຍ່ຫຼື​ປະ​ເທດ​ນ້ອຍ ຮັ່ງ​ມີ​ຫຼື​ທຸກ​ຍາກ
ປະ​ເທດ​ເກົ່າ​ຫຼື​ປະ​ເທດ​ໃໝ່. ຖ້າ​ທ່ານ​ເປັນປະ​ເທດ​ສະ​ມາ​ຊິກ​ ຂອງ​ອົງ​ການ​ສະ​ຫະ​ປະ​ຊາ​ຊາດ ຊາຍ​ແດນ​ຂອງ​ທ່ານ​ແມ່ນ​ເປັນ​ຂອງ​ທ່ານ ແລະ​ໄດ້​ຮັບ​ການ​ຄຸ້ມ​ຄອງ​ຈາກ​ກົດ​ໝາຍ​ລະ​ຫວ່າງ​ປະ​ເທດ ແລະ​ນັ້ນ​ແມ່ນ​ສຳ​ລັບ​ທຸກໆ​ປະ​ເທດ​ໃນ​ຢູ່​ສະ​ຫະ​ປະ​ຊາ​ຊາດ. ​ມັນ​ຈະ​ບໍ່​ສາ​ມາດ​ຖືກ​ແບ່ງ​ໃໝ່ ໂດຍ​ຜູ້​ໃດ​ກໍ​ຕາມ ດ້ວຍ​ການ​ໃຊ້​ກຳ​ລັງ.”

ເອກ​ອັກ​ຄະ​ລັດ​ຖະ​ທູດ​ທໍ​ມັ​ສ ກ​ຣີນ​ຟິ​ລ ກ່າວ​ວ່າ “ການ​ລົງ​ຄະ​ແນນສຽງ​ແມ່ນ​ມີ​ຜົນ​ບັງ​ຄັບ. ມັນ​ໝາຍ​ຄວາມ​ວ່າ​ຢູ່​ໃນ​ສາຍ​ຕາ​ຂອງ​ໂລກແລະ​ອົງ​ການ​ສະ​ຫະ​ປະ​ຊາດ​ຊາດ​ແລ້ວ ຊາຍ​ແດນ​ຂອງ​ຢູ​ເຄ​ຣນ ຍັງ​ບໍ່​ມີ​ການ​ປ່ຽນ​ແປງ​ຫຍັງ​ເລີຍ.”

ດັ່ງ​ທີ່​ເອກ​ອັກ​ຄະ​ລັດ​ຖະ​ທູດ​ທໍ​ມັ​ສ ກ​ຣີນ​ຟິ​ລ​ ໄດ້​ກ່າວ​ໄວ້ “ເຂດ​ເຄີ​ຊອນ​ ແມ່ນ​ຢູ​ເຄ​ຣນ. ເຂດ​ຊາ​ປໍ​ຣິ​ສ​ເຊຍ ແມ່ນ​ຢູ​ເຄ​ຣນ. ເຂດ​ໂດ​ແນັດ ແມ່ນ​ຢູ​ເຄ​ຣນ ​ເຂດ​ລູ​ຮານ​ແມ່ນ​ຢູ​ເຄ​ຣນ ແລະ​ຢູ​ເຄ​ຣນ​ຍັງ​ເປັນ​ຢູ​ເຄ​ຣນ​ຢູ່​ຄື​ເກົ່າ.”

XS
SM
MD
LG