ບົດບັນນາທິການ ທີ່ສະທ້ອນເຖິງນະໂຍບາຍ ຂອງລັດຖະບານສະຫະລັດ
ສະຫະລັດພວມເອົາບາດກ້າວ ເພື່ອໃຫ້ບັນລຸຕ່ອງໂສ້ອຸບປະທານທີ່ມີຄວາມໝັ້ນຄົງຕື່ມຂຶ້ນ ແລະປັບໂຕໄດ້ ໂດຍສະເພາະແລ້ວໃນດ້ານແຮ່ທາດທີ່ສຳຄັນໆ. ກະຊວງພະລັງງານຂອງສະຫະລັດ ໃຫ້ຂໍ້ສັງເກດວ່າ ແຮ່ທາດທີ່ມີຄວາມສ່ຽງສູງ ແມ່ນສຳຄັນຕໍ່ຄວາມໝັ້ນຄົງແຫ່ງຊາດ ແລະການພັດທະນາເສດຖະກິດຂອງສະຫະລັດ.
ແຮ່ທາດທີ່ມີຄວາມສ່ຽງສູງ ແມ່ນແຮ່ທາດທີ່ນຳເຂົ້າຂອງສະຫະລັດ ແລະມີຄວາມຫຼໍ່ແຫຼມເປັນພິເສດ ຕໍ່ການລົບກວນຕ່ອງໂສ້ອຸບປະທານ. ອີງຕາມກະຊວງພະລັງງານແລ້ວ ສະຫະລັດພວມປະເຊີນໜ້າກັບການຂາດແຄນແຮ່ທາດທີ່ມີຄວາມສ່ຽງສູງບາງຊະນິດ ທີ່ສະໜັບສະໜຸນເທັກໂນໂລຈີພະລັງງານສະອາດ ເຊັ່ນເຄື່ອງກຳເນີດໄຟຟ້າສຳລັບໃບພັດລົມ ແລະເທັກໂນໂລຈີທີ່ສຳຄັນອື່ນໆ ເຊັ່ນເຊມີຄອນດັກເຕີ້ເປັນຕົ້ນ.
ເພື່ອແກ້ໄຂບັນຫານີ້ ສະຫະລັດໄດ້ເປັນເຈົ້າພາບຈັດກອງປະຊຸມ ການສົນທະນາຫາລືລະຫວ່າງສະຫະລັດ ມົງໂກເລຍ ສາທາລະນະລັດເກົາຫຼີ ກ່ຽວກັບແຮ່ທາດທີ່ມີຄວາມສ່ຽງສູງ. ຈຸດປະສົງໃນການສົນທະນາຫາລືດັ່ງກ່າວ ແມ່ນເພື່ອເນັ້ນຢ້ຳເຖິງຄວາມສຳຄັນ ແລະບົດບາດບົ່ມຊ້ອນທີ່ມົງໂກເລຍອາດຈະເອົາ ໃນການສະໜອງຕອບ ດ້ານແຮ່ທາດທີ່ມີຄວາມສ່ຽງສູງ ທີ່ໂລກຂອງເຮົາຕ້ອງການນັ້ນ.
“ແຮ່ທາດທີ່ມີຄວາມສ່ຽງສູງມີບົດບາດສຳຄັນຫຼາຍຂຶ້ນນັບມື້ ໃນເສດຖະກິດຂອງພວກເຮົາ” ຮອງລັດຖະມົນຕີກະຊວງການຕ່າງປະເທດ ຮັບຜິດຊອບ ດ້ານການເຕີບໂຕທາງດ້ານເສດຖະກິດ ພະລັງງານ ແລະສິ່ງແວດລ້ອມ ທ່ານໂຮເຊ ດັບເບິນຢູ ເຟີຣານເດສ ຂຽນລົງໃນທະວີດເຕີ້. “ໃນຖານະທີ່ມົງໂກເລຍ ເປັນພາຄີຍຸດທະສາດນັ້ນ ພວກເຮົາມີຜົນປະໂຫຍດຮ່ວມກັນໃນການເສີມຂະຫຍາຍດ້ານເສດຖະກິດແລະເຮັດໃຫ້ມັນສາມາດປັບໂຕໄດ້ຫຼາຍຂຶ້ນ.”
ເພື່ອຈະສືບຕໍ່ການຮ່ວມມືນີ້ ສະຫະລັດ ໄດ້ລົງນາມໃນບົດບັນທຶກຄວາມເຂົ້າໃຈ ກັບມົງໂກເລຍ. ບົດບັນທຶກຄວາມເຂົ້າໃຈດັ່ງກ່າວ ແມ່ນຮວມທັງຂອບສຳລັບມົງໂກເລຍແລະສະຫະລັດ ຈະ “ເຮັດວຽກຮ່ວມກັນໃນຂົງເຂດດ້ານເທັກນິກເພື່ອສະໜັບສະໜຸນການດຳເນີນຄວາມພະຍາຍາມເພີ້ມຕື່ມຂອງມົງໂກເລຍທີ່ຈະພັດທະນາຄວາມອາດສາມາດ ເພື່ອຊຸກຍູ້ການລົງທຶນໃນພາກສ່ວນຊັບພະຍາກອນແຮ່ທາດຂອງຕົນ.”
ສາທາລະນະລັດເກົາຫຼີ ແລະຜູ້ເຂົ້າຮ່ວມອື່ນໆ ໃນການສົນທະນາຫາລືກ່ຽວກັບແຮ່ທາດທີ່ມີຄວາມສ່ຽງສູງ ແມ່ນຜູ້ນຳຂອງກຸ່ມພາຄີແຮ່ທາດດ້ານຄວາມໝັ້ນຄົງ ຫຼື MSP. ກຸ່ມ MSP ນີ້ແມ່ນຂໍ້ລິເລີ້ມທີ່ມີຄວາມທະເຍີທະຍານ ລະຫວ່າງສະຫະລັດແລະບັນດາປະເທດພາຄີທີ່ສຳຄັນອື່ນໆ ເພື່ອຄ້ຳປະກັນວ່າ ແຮ່ທາດທີ່ມີຄວາມສ່ຽງສູງໄດ້ມີການຜະລິດ ດຳເນີນການ ແລະນຳມາໃຊ້ຄືນອີກ ໃນວິທີທີ່ໃຫ້ແຕ່ລະປະເທດບັນລຸຄວາມບົ່ມຊ້ອນທາງດ້ານເສດຖະກິດໂດຍເຕັມ.
ຄວາມຮຽກຮ້ອງຕ້ອງການແຮ່ທາດທີ່ມີຄວາມສ່ຽງສູງ ຊຶ່ງມີຄວາມຈຳເປັນສຳລັບພະລັງງານທີ່ສະອາດ ແລະເທັກໂນໂລຈີອື່ນໆນັ້ນ ຈະມີການຂະຫຍາຍຕົວທີ່ສຳຄັນໃນຫຼາຍໆທົດສະວັດຕໍ່ໜ້າ. ນັ້ນຄືວ່າເປັນຫຍັງສະຫະລັດ ຈຶ່ງມີຄວາມໝັ້ນໝາຍທີ່ຈະຂະຫຍາຍການເປັນພາຄີກັບມົງໂກເລຍ ສາທາລະນະລັດເກົາຫຼີ ຊຶ່ງຈະມີຄວາມຈຳເປັນເພື່ອໃຫ້ໄດ້ຮັບການຄ້ຳປະກັນໃນຕ່ອງໂສ້ອຸບປະທານການສະໜອງແຮ່ທາດທີ່ມີຄວາມສ່ຽງສູງ.
