ບົດບັນນາທິການ ທີ່ສະທ້ອນເຖິງນະໂຍບາຍ ຂອງລັດຖະບານສະຫະລັດ
ກຸ່ມຕາລີບານ ໄດ້ຫ້າມບໍ່ໃຫ້ສະຖານີໂທລະພາບເອກກະຊົນ ໃນອັຟການິສຖານອອກອາກາດ ລາຍການຂອງສຽງອາເມຣິກາ ອົງການກະຈາຍສຽງຂອງອັງກິດ ແລະລາຍການຂອງອົງການກະຈາຍສຽງ Deutche Welle ຂອງເຢຍຣະມັນ.
ວີໂອເອຂໍປະນາມກຸ່ມຕາລີບານທີ່ໄດ້ງົດບໍ່ໃຫ້ອອກອາກາດລາຍການຂອງຕົນ. ຢູ່ໃນຖະແຫຼງການນັ້ນ ຮັກສາການຜູ້ອຳນວຍການຂອງວີໂອເອ ທ່ານນາງໂຢລານດາ ໂລເປັສ ກ່າວວ່າ “ພວກເຮົາໄດ້ຮ້ອງຂໍໃຫ້ກຸ່ມຕາລີບານ ພິຈາລະນາຄືນໃໝ່ກ່ຽວກັບການຕັດສິນໃຈ ທີ່ເປັນບັນຫາແລະບໍ່ເປັນຈັ່ງໂຊກດັ່ງກ່າວ. ເນື້ອໄນຂອງການຈຳກັດຮັດແຄບທີ່ກຸ່ມຕາລີບານພະຍາຍາມຈະວາງອອກນັ້ນແມ່ນກົງກັນຂ້າມກັບສິດເສລີພາບໃນການສະແດງອອກຊຶ່ງຄວາມຄິດຄວາມເຫັນທີ່ປະຊາຊົນຊາວອັຟການິສຖານສົມຄວນໄດ້ຮັບ.”
ວີໂອເອຜະລິດລາຍການຂ່າວສັ້ນເປັນເວລາເຄິ່ງຊົ່ວໂມງໃນພາສາປາສໂຕແລະດາຣີ ຊຶ່ງເປັນພາສາຫຼັກ ທີ່ເວົ້າກັນໃນອັຟການິສຖານ, 5 ມື້ຕໍ່ອາທິດ ສຳລັບຄູ່ຮ່ວມງານໃນອັຟການິສຖານ ອົງການຂ່າວໂຕໂລ ແລະໂທລະພາບແຊມຊັສ.
ທ່ານນາງໂລເປັສກ່າວວ່າ ວີໂອເອຍັງສືບຕໍ່ມີຄວາມໝັ້ນໝາຍທີ່ຈະອອກອາກາດກ່ຽວກັບຄວາມຈິງ “ຄວາມໝັ້ນໝາຍຂອງພວກເຮົາ ທີ່ຈະສະໜອງຂໍ້ມູນ ທີ່ເປັນ
ຄວາມຈິງຕໍ່ປະຊາຊົນຊາວອັຟການິສຖານແມ່ນນຶ່ງໃນສິ່ງທີ່ວີໂອເອຈະສືບຕໍ່ອອກອາກາດທາງໂທລະພາບ ວິທະຍຸແລະອິນເຕີແນັດ ທີ່ www.pashtovoa.com ແລະ www.darivoa.com ຕະຫຼອດທັງຜ່ານທາງສື່ສັງຄົມ.”
ຫົວໜ້າຮັບຜິດຊອບດ້ານພາສາ ຂອງອົງການຂ່າວ ບີບີຊີໂລກ ທ່ານທາຣິກ ຄາລີຟາ ຮຽກຮ້ອງໃຫ້ກຸ່ມຕາລີບານ ຟື້ນຟູລາຍການຂ່າວສັ້ນໂດຍທັນທີ. ທ່ານກ່າວວ່າ ການຫ້າມດັ່ງກ່າວ “ແມ່ນເລື້ອງທີ່ໜ້າເປັນຫ່ວງ ໃນເວລາທີ່ເກີດຄວາມບໍ່ແນ່ນອນແລະຄວາມວຸ້ນວາຍສຳລັບປະຊາຊົນຊາວອັຟການິສຖານ.”
ນີ້ແມ່ນມາດຕະການຫຼ້າສຸດ ໃນການເຄື່ອນໄຫວທີ່ມີມາເປັນລຳດັບ ຂອງກຸ່ມຕາລີບານ ເພື່ອປິດປາກປິດສຽງ ບໍ່ໃຫ້ມີການສະແດງອອກ ຊຶ່ງສິດເສລີພາບໃນການປາກເວົ້າຢູ່ໃນອັຟການິສຖານ ນັບຕັ້ງແຕ່ໄດ້ເຂົ້າຢຶດອຳນາດຢູ່ທີ່ປະເທດດັ່ງກ່າວນັບແຕ່ເດືອນສິງຫາເປັນຕົ້ນມາ. ອີງຕາມການສຳຫຼວດ ທີ່ນຳອອກເຜີຍແຜ່ໂດຍອົງການນັກຂ່າວບໍ່ມີພົມແດນເມື່ອເດືອນທັນວາແລ້ວນີ້ ມີອົງການສື່ມວນຊົນອັຟການິສຖານຢ່າງໜ້ອຍ 40 ເປີເຊັນໄດ້ຫາຍສາບສູນໄປ ແລະພວກນັກຂ່າວແມ່ຍິງຫຼາຍກວ່າ 80 ເປີເຊັນ ໄດ້ສູນເສຍວຽກການຂອງເຂົາເຈົ້າ ນັບແຕ່ກຸ່ມຕາລີບານໄດ້ເຂົ້າຄວບຄຸມປະເທດ.
ນັກຄົ້ນຄວ້າຂອງກຸ່ມປົກປ້ອງສິດທິມະນຸດ Human Rights Watch ເຟເຣັສຕາ ອັບບາສີ ລາຍງານໃນເດືອນກຸມພາຜ່ານມານີ້ວ່າ “ກຸ່ມຕາລີບານໄດ້ຮາວີລົບກວນແລະໂຈມຕີພວກນັກຂ່າວ ຢູ່ນອກເຂດເທດສະບານທີ່ສຳຄັນໆ ສ່ວນໃຫຍ່ແລ້ວແມ່ນໄດ້ມີຂຶ້ນ ໂດຍບໍ່ມີການລາຍງານ ເຮັດໃຫ້ອົງການຂ່າວຕ່າງໆຢູ່ໃນບັນດາແຂວງທາງນອກ ກວດກາຕົນເອງ ຫຼືບໍ່ດັ່ງນັ້ນກໍຖືກປິດລົງ.”
ທ່ານນາງກ່າວຕື່ມວ່າ “ໃນຫຼາຍໆຄັ້ງ ກຸ່ມຕາລີບານ ແມ່ນເກືອບວ່າໄດ້ລຶບລ້າງລາຍງານຕ່າງໆໃນຂອບເຂດທີ່ກວ້າງຂວາງຂອງບັນຫາຕ່າງໆ ແລະໄດ້ຜັກດັນໃຫ້ພວກນັກຂ່າວແມ່ຍິງອອກຈາກອາຊີບນີ້ໄປເລີຍ.”
ໂຄສົກຂອງກະຊວງການຕ່າງປະເທດສະຫະລັດ ທ່ານເນດ ໄພຣສ໌ ກ່າວຢູ່ໃນຖະແຫຼງການວ່າ “ສະຫະລັດມີຄວາມໝັ້ນໝາຍ ທີ່ຈະໃຫ້ການສະໜັບສະໜຸນຕໍ່ສິດເສລີພາບໃນການປາກເວົ້າຢູ່ໃນທົ່ວໂລກ ໂດຍສະເພາະແລ້ວແມ່ນພວກນັກຂ່າວແລະພວກທີ່ຕໍ່ສູ້ເພື່ອປົກປ້ອງສິດທິມະນຸດໃຫ້ປະຕິບັດງານໄດ້ຢ່າງເສລີໂດຍປາສະຈາກຄວາມຢ້ານກົວທີ່ຈະເກີດຄວາມຮຸນແຮງຕໍ່ພວກເຂົາເຈົ້າ.”
ສະຫະລັດມີຄວາມໝັ້ນໝາຍທີ່ຈະໃຫ້ການສະໜັບສະໜຸນຕໍ່ສິດເສລີພາບໃນການສະແດງຄວາມຄິດຄວາມເຫັນແລະສືບຕໍ່ຢືນຢູ່ຄຽງຂ້າງປະຊາຊົນຊາວອັຟການິສຖານ.
