ໃນທົ່ວໂລກ, ພວກເຮົາເຫັນລັດຖະບານຜະເດັດການ ບໍ່ມີການຜ່ອນຜັນ ກັບ ຄວາມຄິດ, ຄວາມເຊື່ອ, ແລະ ການປະຕິບັດ ທີ່ແຕກຕ່າງຈາກເຂົາເຈົ້າຫຼາຍ ຂຶ້ນ,” ອີງຕາມການກ່າວຂອງທ່ານນາງ ອັສຣາ ເຊຢາ, ຮອງລັດຖະມົນຕີການຕ່າງປະເທດ ສະຫະລັດ ທີ່ຮັບຜິດຊອບສຳລັບຄວາມປອດໄພຂອງພົນລະເຮືອນ, ປະຊາທິປະໄຕ ແລະ ສິດທິມະນຸດ, ຢູ່ງານທີ່ຈັດຕ່າງຫາກໃນລະຫວ່າງກອງປະຊຸມໃຫຍ່ ພັນທະມິດເສລີພາບ ໃນການນັບຖືສາສະໜາ ຫຼື ຄວາມເຊື່ອສາກົນ.
ລັດຖະບານຜະເດັດການພວກນີ້ບໍ່ໃຫ້ຄວາມສົນໃຈ ແລະ ທຳລາຍສິດທິມະນຸດ, ປະຊາທິປະໄຕ ແລະ ລະບຽບກົດໝາຍທີ່ຖືກຮັບຮູ້ໃນສາກົນ, ກ່າວຢ້ຳໂດຍທ່ານນາງ ເຊຢາ, ຜູ້ທີ່ປະຕິບັດໜ້າທີ່ເປັນຜູ້ປະສານງານພິເສດຂອງ ສະຫະລັດ ສຳລັບບັນຫາຕ່າງໆ ກ່ຽວກັບ ທິເບດ.
ທ່ານນາງກ່າວວ່າ “ເຫດການທີ່ເສົ້າສະຫຼົດໃຈທີ່ໄດ້ເກີດຂຶ້ນໃນ ທິເບດ ເປັນພຽງຕົວຢ່າງນຶ່ງຂອງອຳນາດທີ່ມີບັນຫານີ້. ສາສະໜາພຸດທິເບດ, ເຊິ່ງແມ່ນສາສະໜາຂອງຊາວພຸດ ທິເບດ ນັ້ນແມ່ນຖືກອະທິບາຍວ່າໄດ້ຝັງເລິກໃນຄວາມເມດຕາກະລຸນາ, ຄວາມເຂົ້າເອິກເຂົ້າໃຈ, ແລະ ການບໍ່ໃຊ້ຄວາມຮຸນແຮງ, ແມ່ນນອນຢູ່ໃນໝາກຫົວໃຈຂອງມູນເຊື້ອທີ່ເປັນເອກະລັກ ແລະວັດທະນະທຳຂອງຊາວ ທິເບດ ແລະອີກຄັ້ງນຶ່ງ, ພວກເຈົ້າໜ້າທີ່ພັກຄອມມູນິສ ຈີນ, ແນວໃດກໍ່ຕາມໄດ້ພັນລະນາສາສະໜາແຫ່ງສັນຕິພາບນີ້ດັ່ງກັບໄພຂົ່ມຂູ່ທີ່ມີຢູ່ຕໍ່ສາທາລະນະລັດ ປະຊາຊົນ ຈີນ, ຫຼື ສປ ຈີນ.”
ຮອງລັດຖະມົນຕີ ເຊຢາ ກ່າວວ່າ “ຫຼາຍທົດສະວັດແລ້ວ, ສປ ຈີນ ໄດ້ພັດທະນາລະບົບການກົດຂີ່ທີ່ເຂັ້ມງວດ ທີ່ແນໃສ່ການເຮັດໃຫ້ສາສະໜາພຸດ ທິເບດ ເປັນ “ຄວາມບາບ.”
ທ່ານນາງກ່າວວ່າ “ເຂົາເຈົ້າພະຍາຍາມທີ່ຈະຈັດປະເພນີທີ່ອຸດົມສົມບູນ ແລະ ຈິດໃຈທີ່ມີຊີວິດຊີວານີ້ເຂົ້າໃນໂຄງຮ່າງການເມືອງຂອງ ສປ ຈີນ ແລະ ປ່ຽນແປງແກນທິດສະດີຂອງເຂົາເຈົ້າ ໃຫ້ສອດຄ່ອງກັບຄຸນຄ່າຂອງພັກຄອມມູນິສຈີນ.”
ຮອງລັດຖະມົນຕີ ເຊຢາ ໄດ້ອ້າງເຖິງສິ່ງທີ່ເອີ້ນວ່າ “ການໂຄສະນານ້ຳໃຈຮັກຊາດ” ທີ່ບັງຄັບໃຫ້ຄູບາ ແລະ ແມ່ຊີສັນຍາຄວາມຈົງຮັກພັກດີຕໍ່ລັດ ຈີນ, ການລົງທະບຽນຂອງ ສປ ຈີນ ກ່ຽວກັບ ການຮັບຮູ້ ລາມະ ຢ່າງເປັນທາງການ, ຈຸດປະສົງທີ່ຊັດເຈນຂອງເຂົາເຈົ້າເພື່ອເລືອກຜູ້ສືບທອດອົງ ດາໄລ ລາມະ, ແລະ ການຫ້າມຂອງລັດຖະບານ ກ່ຽວກັບ ເຜີຍແຜ່ຊາວ ທິເບດ, ລວມທັງການຫ້າມເດັກນ້ອຍຈາກການເຂົ້າຮ່ວມໃນກິດຈະກຳທາງສາສະໜາ.
ຮອງລັດຖະມົນຕີ ເຊຢາ ກ່າວວ່າ “ຂ້າພະເຈົ້າພູມໃຈທີ່ ສະຫະລັດ ສືບຕໍ່ການນຳພາເພື່ອນຳເອົາຄວາມສົນໃຈມາສູ່ການລ່ວງລະເມີດສິດທິມະນຸດຂອງ ສປ ຈີນ.”
ທ່ານນາງກ່າວວ່າ “ພວກເຮົາຈະສືບຕໍ່ເພື່ອຂະຫຍາຍຄວາມສາມັກຄີສາກົນ ໃນການສະໜັບສະໜູນສິດທິມະນຸດຂອງຊາວ ທິເບດ ແລະ ການປົກປັກຮັກສາວັດທະນະທຳທີ່ພິເສດ, ສາສະໜາ ແລະ ເອກະລັກໃນພາສາຂອງເຂົາເຈົ້າ… ພວກເຮົາຈະສືບຕໍ່ຮຽກຮ້ອງໃຫ້ ສປ ຈີນ ສືບຕໍ່ການສົນທະນາທີ່ມີຄວາມໝາຍ ແລະ ໂດຍກົງກັບອົງ ດາໄລ ລາມະ ຫຼື ຜູ້ແທນຂອງເພິ່ນ, ໂດຍປາສະຈາກເງື່ອນໄຂລ່ວງໜ້າ, ໃນລະດັບສູງສຸດຂອງລັດຖະບານຂອງພວກເຮົາ.”
ຮອງລັດຖະມົນຕີ ເຊຢາ ປະກາດວ່າ “ຄວາມຕັ້ງໃຈຂອງ ສະຫະລັດ ແມ່ນບໍ່ປ່ຽນແປງ, ແລະພວກເຮົາຈະສືບຕໍ່ເຮັດວຽກຢ່າງບໍ່ອິດເມື່ອຍເພື່ອພັດທະນາສິດທິມະນຸດ ແລະ ກຽດສັກສີຂອງຊາວ ທິເບດ ໝົດທຸກຄົນ.”