ບົດບັນນາທິການ ທີ່ສະທ້ອນເຖິງນະໂຍບາຍ ຂອງລັດຖະບານສະຫະລັດ
ໄພແຫ້ງແລ້ງທີ່ຮ້າຍແຮງເປັນປະຫວັດການ ພວມຂົ່ມຂູ່ຕໍ່ຊີວິດຫຼາຍລ້ານຄົນໃນເຂດແຫຼມຮອນຂອງອາຟຣິກາ. ເພື່ອນຳເອົາການຊ່ວຍເຫຼືອໄປຊ່ວຍບັນເທົາຕໍ່ຜູ້ທີ່ຕົກຢູ່ໃນຄວາມຂັດສົນຫຼາຍທີ່ສຸດນັ້ນ ສະຫະລັດ ໂດຍຜ່ານອົງການພັດທະນາສາກົນ ຫຼືຢູເສດ ໄດ້ສະໜອງການຊ່ວຍເຫຼືອທາງດ້ານມະນຸດສະທຳເກືອບ 105 ລ້ານໂດລາ.
ປີນີ້ແມ່ນປີທີ 4 ລຽນຕິດ ທີ່ຟ້າຝົນບໍ່ມາຕາມລະດູການ ຊຶ່ງມີທ່າທາງວ່າຈະເຮັດໃຫ້ປະຊາຊົນຫລາຍຮ້ອຍພັນຄົນ ໃນເຂດແຫຼມຮອນ ຂອງອາຟຣິກາ ປະສົບກັບຄວາມອຶດຢາກ. ສຳລັບລະດູຝົນຂອງປີທີ 5 ຊຶ່ງມີການພະຍາກອນວ່າ ຈະແຫ້ງແລ້ງກວ່າປົກກະຕິ ຍິ່ງຈະເປັນໄພເພີ້ມຂຶ້ນ ຕໍ່ຊີວິດການເປັນຢູ່ ຂອງບັນດາຄອບຄົວ ທີ່ເພິ່ງພາອາໄສຫຼືກາງຕໍ່ຜົນລະປູກແລະສັດລ້ຽງມາເປັນອາຫານເພື່ອໃຫ້ມີຊີວິດຢູ່ລອດ. ດ້ວຍເຫດຜົນດັ່ງກ່າວຫຼາຍກວ່າ 16 ລ້ານຄົນແມ່ນຕ້ອງການຄວາມຊ່ວຍເຫຼືອທາງດ້ານມະນຸດສະທຳໃນທັນທີ. ໂຕເລກນີ້ ຄາດວ່າຈະເພີ້ມຂຶ້ນສູ່ລະດັບ ແບບທີ່ບໍ່ເຄີຍມີມາກ່ອນ ຄືມີເຖິງ 20 ລ້ານຄົນ ຕ້ອງການຄວາມຊ່ວຍເຫຼືອພາຍໃນເດືອນກັນຍາປີນີ້.
ເງິນທຶນເພີ້ມຕື່ມຈະຊ່ວຍໃຫ້ພາຄີຂອງອົງການຢູເສດສະໜອງອາຫານ ການບໍລິການດ້ານປິ່ນປົວສຸຂະພາບແລະສະໜອງສານອາຫານຕະຫຼອດທັງການເຂົ້າເຖິງນ້ຳສະອາດ. ເງິນທຶນດັ່ງກ່າວຍັງຈະໃຫ້ການສະໜັບສະໜຸນເພື່ອໃຫ້ບ່ອນຢູ່ທີ່ປອດໄພແລະການຄຸ້ມຕໍ່ພວກແມ່ຍິງ ແລະເດັກຍິງທີ່ຕ້ອງໄດ້ອົບພະຍົບຍ້ອນໄພແຫ້ງແລ້ງ.
ການຮຸກຮານແບບໂຫດຮ້າຍປ່າເຖື່ອນຂອງຣັດເຊຍ ໃນການເຮັດສົງຄາມແບບບໍ່ມີການເກາະຜິດຕໍ່ຢູເຄຣນ ເຮັດໃຫ້ວິກິດການທາງດ້ານອາຫານຮ້າຍແຮງຂຶ້ນຕື່ມ ໃນເຂດແຫຼມຮອນຂອງອາຟຣິກາ ໃນຂະນະທີ່ລາຄາອາຫານ ເຊື້ອໄຟ ແລະຝຸ່ນວິທະຍາສາດ ຖີບໂຕສູງຂຶ້ນແລະການຂາດແຄນແມ່ນຮ້າຍແຮງກວ່າເກົ່າ. ຄືກັນກັບເຂດອື່ນໆໃນພາກຕາເວັນອອກກາງ ແລະອາຟຣິກາ ແຫຼມຮອນກໍບໍ່ສາມາດນຳ ເຂົ້າເບລ່ ແລະອາຫານປະເພດເມັດອື່ນໆຈາກຢູເຄຣນ ຍ້ອນການຮຸກຮານຢ່າງເຕັມອັດຕາຂອງຣັດເຊຍ ເຮັດໃຫ້ພວກແມ່ຍິງ ຜູ້ຊາຍແລະເດັກນ້ອຍຫຼາຍໆລ້ານຄົນຕົກຢູ່ໃນຄວາມສ່ຽງ ຕໍ່ການເສຍຊີວິດ ຖ້າພວກເຂົາຫາກບໍ່ສາມາດຊອກຫາອາຫານມາກິນໄດ້. ເກືອບ 70 ເປີເຊັນ ຂອງອາຫານປະເພດເມັດໃນໂຊມາເລຍ ແລະເກືອບ 10 ເປີເຊັນຢູ່ປະເທດເຄນຢາ ແມ່ນມາຈາກຢູເຄຣນ.
ສະຫະລັດ ແມ່ນເປັນພຽງປະເທດດຽວເທົ່ານັ້ນ ທີ່ໃຫ້ການບໍລິຈາກທາງດ້ານມະນຸດສະທຳຫຼາຍທີ່ສຸດແກ່ເຂດແຫຼມຮອນຂອງອາຟຣິກາ, ໂດຍສະໜອງເງິນຫຼາຍເງິນຫຼາຍກວ່າ 507 ລ້ານໂດລາ ໃນທົ່ວຂົງເຂດ ນັບແຕ່ເລີ້ມຕົ້ນສົກງົບປະມານ ປີ 2022 ເປັນຕົ້ນມາ. ແຕ່ເງິນທຶນເພີ້ມຕື່ມແມ່ນມີຄວາມຈຳເປັນສຳລັບປະເທດທີ່ໃຫ້ບໍລິຈາກອື່ນໆ. ເມື່ອເວົ້າເຖິງຄວາມຮ້າຍແຮງຂອງໄພແຫ້ງແລ້ງ ແລະຂອບເຂດຂອງຄວາມຕ້ອງການໃນດ້ານມະນຸດສະທຳແລ້ວ ລັດຖະບານສະຫະລັດ ຂໍຮຽກຮ້ອງບັນດາປະເທດທີ່ໃຫ້ການບໍລິຈາກອື່ນໆເພີ້ມການໃຫ້ຄວາມຊ່ວຍເຫຼືອຂອງເຂົາເຈົ້າເພື່ອປ້ອງກັນບໍ່ໃຫ້ເກີດໄພອຶດຢາກແລະຊ່ວຍຊີວິດຂອງຫຼາຍໆລ້ານຄົນ.
ສະຫະລັດບໍ່ສາມາດສະໜອງຕອບຕໍ່ຄວາມຕ້ອງການໃນການໃຫ້ຄວາມຊ່ວຍເຫຼືອໄດ້ຕາມລຳພັງ ມັນເຖິງເວລາແລ້ວທີ່ປະຊາຄົມໃຫ້ການບໍຈາກມາຮ່ວມແຮງຮ່ວມໃຈກັນເພື່ອປ້ອງກັນບໍ່ໃຫ້ເກີດຄວາມທຸກທໍລະມານເພີ້ມຕື່ມ ແລະຊ່ວຍຊີວິດຂອງຜູ້ຄົນ.