Accessibility links

Breaking News

ບົດບັນນາທິການ: ສະຫະລັດເປັນຫ່ວງ ເລື້ອງການສົ່ງຍານບໍ່ມີຄົນຂັບ ຂອງອີຣ່ານ ໄປໃຫ້ຣັດເຊຍ


ເຈົ້າ​ໜ້າ​ທີ່​ດັບ​ເພີງ ພາ​ກັນ​ມອດ​ໄຟ ຫຼັງ​ຈາກ​ການ​ໂຈມ​ຕີ​ຕຶກ​ອາ​ຄານ ຂອງ​ໂດ​ຣນ​ອີ​ຣ່ານ ທີ່​ນະ​ຄອນ​ຫຼວງ​ກີ​ຢິບ ເມື່ອ​ວັນ​ທີ 17 ຕຸ​ລາ 2022.

ການໂຈມຕີຢ່າງຮ້າຍແຮງຂອງຣັດເຊຍ ໂດຍໃຊ້ໂດຣນຂ້າໂຕຕາຍຂອງອີຣ່ານ ຍັງດຳເນີນຢູ່ຕໍ່ມາ ເພື່ອສ້າງຄວາມສັ່ນ​ສະ​ເທືອນຕໍ່ຫົວເມືອງຕ່າງໆຂອງຢູເຄຣນ ສັງຫານພົນລະເຮືອນ ແລະສ້າງຄວາມເສຍຫາຍ ໃຫ້ແກ່ຕຶກອາຄານທີ່ພັກພາອາໄສ ໂຮງໄຟຟ້າ ໂຮງງານບຳບັດນ້ຳເສຍ ຂົວ ແລະບ່ອນຫຼິ້ນຂອງເດັກນ້ອຍ.

ບົດບັນນາທິການ ທີ່ສະທ້ອນເຖິງນະໂຍບາຍ ຂອງລັດຖະບານສະຫະລັດ

ການ​ໂຈມ​ຕີ​ຢ່າງ​ຮ້າຍ​ແຮງ​ຂອງ​ຣັດ​ເຊຍ ໂດຍ​ໃຊ້​ໂດ​ຣນ​ຂ້າ​ໂຕ​ຕາຍ​ຂອງ​ອີ​ຣ່ານ ຍັງ​ດຳ​ເນີນ​ຢູ່​ຕໍ່​ມາ ເພື່ອ​ສ້າງ​ຄວາມ​ສັ່ນ​ສະ​ເທືອນ​ຕໍ່​ຫົວ​ເມືອງ​ຕ່າງໆ​ຂອງ​ຢູ​ເຄ​ຣນ ສັງ​ຫານ​ພົນ​ລະ​ເຮືອນແລະ​ສ້າງ​ຄວາມ​ເສຍ​ຫາຍ​ໃຫ້​ແກ່​ຕຶກ​ອາ​ຄານ​ທີ່​ພັກ​ພາ​ອາ​ໄສ ໂຮງ​ໄຟ​ຟ້າ ໂຮງ​ງານ​ບຳ​ບັດ​ນ້ຳ​ເສຍ ຂົວ ແລະ​ບ່ອນ​ຫຼິ້ນ​ຂອງ​ພວກ​ເດັກ​ນ້ອຍ. ຮອງ​ໂຄ​ສົກ​ກະ​ຊວງ​ການ​ຕ່າງ​ປະ​ເທດ​ສ​ະ​ຫະ​ລັດ ທ່ານ​ວີ​ແດັນ ພາແທ​ລ ໄດ້​ເຕືອນຣັດ​ເຊຍວ່າ “​ການ​ເປັນ​ພັນ​ທະ​ມິດແບບ​ລົງ​ເລິກ​ກັບ​ອີ​ຣ່ານແມ່ນສິ່ງ​ທີ່​ໂລກ​ທັງ​ໂລກ ໂດຍ​ສະ​ເພາະ ​ບັນ​ດາ​ປະ​ເທດ​ຢູ່​ໃນ​ຂົງ​ເຂດ ຄວນ​ຈະ​ມອງ​ເບິ່ງວ່າ​ເປັນ​ໄພ​ຂົ່ມ​ຂູ່​ທີ່​ຮ້າຍ​ແຮງ.”

ເພື່ອ​ເປັນ​ການ​ຕອບ​ໂຕ້ ສະ​ຫະ​ລັດ ສະ​ຫະ​ຣາ​ຊະ​ອາ​ນາ​ນັກ ແລະ​ຝ​ຣັ່ງ ໄດ້​ຍົກ​ເອົາ​ບັນ​ຫາ​ການ​ສົ່ງ​ຍານ​ບໍ່​ມີ​ຄົນ​ຂັບ​ຂອງ​ອີ​ຣ່ານຂຶ້ນ​ມາ​ຫາ​ລື​ກັນ ໃນ​ກອງ​ປະ​ຊຸມສະ​ພາ​ຄວາມ​ໝັ້ນ​ຄົງ​ອົງ​ການ​ສະ​ຫະ​ປະ​ຊາ​ຊາດ. ສະ​ຫະ​ລັດສະ​ແດງ “ຄວາມເປັນ​ຫ່ວງກ່ຽວ​ກັບ​ການ​ທີ່​ຣັດ​ເຊຍ​ໄດ້​ຮັບຍານ​ບໍ່​ມີ​ຄົນ​ຂັບ​ຈາກ​ອີ​ຣ່ານ ຊຶ່ງ​ເປັນ​ການລະ​ເມີດ​ຕໍ່​ມະ​ຕິ 2231 ຂອງ​ສະ​ພາ​ຄວາມ​ໝັ້ນ​ຄົງ​ສະ​ຫະ​ປະ​ຊາ​ຊາດ” ນັ້ນ​ຄື​ຄຳ​ເວົ້າ ​ຂອງ​ໂຄ​ສົກ​ກະ​ຊວງ​ການ​ຕ່າງ​ປະ​ເທດ​ສະ​ຫະ​ລັດ ທ່ານ​ເນດ ໄພ​ຣສ໌ ທີ່​ໄດ້
ກ່າວ​ຢູ່​ໃນ​ຖະ​ແຫຼງ​ການ.

“ສະ​ຫະ​ລັດ​ເລີ້ມ​ອອ​ກ​ຄຳ​ເຕືອນ​ໃນ​ເດືອນ​ກໍ​ລະ​ກົດ​ວ່າ ອີ​ຣ່ານ​ພວມ​ວາງ​ແຜນ​ທີ່​ຈະ​ໂອນຍານ​ບໍ່​ມີ​ຄົນ​ຂັບ​ໃຫ້​ແກ່​ຣັດ​ເຊຍ ເພື່ອ​ໃຊ້​ໃນ​ການ​ເຮັດ​ສົງ​ຄາມ​ແບບ​ໂຫດ​ຮ້າຍທາ​ລຸນ​ຕໍ່​ຢູ​ເຄ​ຣນ” ທ່ານ​ໄພ​ຣ​ສ໌ ໄດ້​ກ່າວ. “ແລະ​ເວ​ລານີ້ ​ພວກ​ເຮົາ​ໄດ້​ມີ​ຫຼັກ​ຖານຢ່າງ​ຫຼວງ​ຫຼາຍ ທີ່​ວ່າຍານ​ບໍ່​ມີ​ຄົນ​ຂັບ​ເຫຼົ່າ​ນີ້ໄດ້​ຖືກ​ນຳ​ໃຊ້​ເພື່ອ​ໂຈມ​ຕີ​ພົນ​ລະ​ເຮືອນ​ຊາວ​ຢູ​ເຄ​ຣນ ແລະ​ພື້ນ​ຖານ​ໂຄງ​ລ່າງ​ທີ່​ມີ​ຄວາມ​ສຳ​ຄັນໆ​ທາງ​ດ້ານ​ພົນ​ລະ​ເຮືອນ.” ໂດ​ຣນ​ພວກນີ້​ແມ່ນ​ມີ​ບົດ​ບາດ​ທີ່​ສຳ​ຄັນ ຢູ່​ໃນ​ບັນ​ຫາ​ຂັດ​ແຍ້ງ ແຕ່​ການ​ນຳ​ໃຊ້​ເປັນ​ຈຳ​ນວນ​ຫຼວງ​ຫຼາຍ ​ແມ່ນ​ເລີ້ມ​ຂຶ້ນນັບ​ແຕ່​ລະ​ດູ​ຮ້ອນ​ເປັນ​ຕົ້ນ​ມາ. ອີ​ຣ່ານ​ໄດ້​ປະ​ຕິ​ເສດ​ວ່າ ​ຕົນ​ບໍ່​ໄດ້ສະ​ໜອງ​ອາ​ວຸດ​ໃດໆ​ໃຫ້​ແກ່​ຣັດ​ເຊຍ ທັງໆ​ທີ່​ມີ​ຫຼັກ​ຖານ​ໃນ​ທາງ​ກົງ​ກັນ​ຂ້າມ.

ໂຄ​ສົກ​ຂອງ​ຜູ້​ແທນ​ສະ​ຫະ​ລັດ​ປະ​ຈຳ​ອົງ​ການ​ສະ​ຫະ​ປະ​ຊາ​ຊາດ ທ່ານ​ເນດ ແອ​ແວັນ​ສ໌ ໃຫ້​ການ​ຢືນ​ຢັນ​ວ່າ “ມີ​ຫຼັກ​ຖານ​ຢ່າງ​ຖ້ວມ​ລົ້ນ ທີ່​ວ່າ ​ຣັດ​ເຊຍ​ໄດ້​ນຳ​ໃຊ້ຍານ​ບໍ່​ມີ​ຄົນ​ຂັບ​ເຮັດ​ໂດຍ​ອີ​ຣ່ານ ໃນ​ການ​ໂຈມ​ຕີ​ທີ່ໂຫດ​ຮ້າຍ ແລະ​ດ້ວຍ​ຄວາມຕັ້ງ​ໃຈ​ຕໍ່​ປະ​ຊາ​ຊົນ​ຊາວ​ຢູ​ເຄ​ຣນ ຮວມ​ທັງ​ຕໍ່​ພົນ​ລະ​ເຮືອນ ແລະ​ຕໍ່​ພື້ນ​ຖານ​ໂຄງລ່າງ​ທີ່​ມີ​ຄວາມ​ຫຼໍ່​ແຫຼມ​ສຳ​ຄັນ​ທາງ​ພົນ​ລະ​ເຮືອນ. ໂດຍ​ການ​ໄດ້​ຮັບ​ອາ​ວຸດ​ເຫຼົ່​ານີ້ ຊຶ່ງ​ເປັນ​ການ​ລະ​ເມີດ​ ຕໍ່​ມະ​ຕິ​ຂອງ​ສະ​ພາ​ຄວາມ​ໝັ້ນ​ຄົງ​ສະ​ຫະ​ປະ​ຊາ​ຊາດ ຣັດ ​ເຊ​ຍຍັງ​ສືບ​ຕໍ່ບໍ່​ໃຫ້​ການ​ເຄົາ​ລົບ​ຕໍ່​ກົດ​ໝາຍ​ລະ​ຫວ່າ​ງ​ປະ​ເທດ ໃນ​ການ​ຊອກ​ສະແຫວງ​ຫາ​ການ​ເຮັດ​ສົງ​ຄາມ​ແບບ​ໄຮ້​ເຫດ​ຜົນ ແລະ​ໂຫດ​ຮ້າຍ​ທາ​ລຸນ​ຕໍ່​ຢູ​ເຄ​ຣນ” ນັ້ນ​ຄື​ຄຳ​ປະ​ກາດ​ຂອງ​ທ່ານ.

ໃນ​ຂະ​ນະ​ທີ່​ອີ​ຣ່ານ​ຍັງ​ສືບ​ຕໍ່​ຕົວະ​ລ່າຍ ແລະ​ປະ​ຕິ​ເສດ​ວ່າ ຕົນ​ບໍ່​ໄດ້​ສະ​ໜອງ​ອາ​ວຸດ​ໃດໆ​ໃຫ​ແກ່​ຣັດ​ເຊຍ ເພື່ອ​ນຳ​ໃຊ້ ​ຢູ່​ໃນ​ຢູ​ເຄ​ຣນນັ້ນ ສະ​ຫະ​ລັດ​ມີ​ຄວາມ​ໝັ້ນໝາຍ​ທີ່​ຈະ​ເຮັດ​ວຽກ​ຮ່ວມ​ກັບ​ບັນ​ດາ​ປະ​ເທດ​ພັນ​ທະ​ມິດແລະ​ພາ​ຄີ​ຂອງ​ພວກເຮົາເພື່ອ​ປ້ອງ​ກັນ​ບໍ່​ໃຫ້​ມີ​ການ​ໂອນ​ອາ​ວຸດ​ທີ່​ເປັນ​ອັນ​ຕະ​ລາຍ​ໄປ​ໃຫ້​ຣັດ​ເຊຍ ນັ້ນ​ຄື​ຄຳ​ເວົ້າ​ຂອງ​ທ່ານ​ເນດ ໄພ​ຣ​ສ໌. “ພວກ​ເຮົາ​ຈະ​ບໍ່​ລັງ​ເລ​ໃຈ ທີ່​ຈະ​ນຳ​ໃຊ້​ການ​ລົງ​ໂທດ​ຂອງ​ພວກ​ເຮົາ ແລະ​ເຄື່ອງ​ມື​ທີ່​ເໝາະ​ສົມ​ອື່ນໆ ຕໍ່​ທຸກໆ​ປະ​ເທດ​ທີ່​ພົວ​ພັນ​ນຳ​ການ​ໂອນ​ເຫຼົ່າ​ນີ້. ນອກນັ້ນ ພວກ​ເຮົາ​ຍັງ​ຈະ​ສືບ​ຕໍ່​ໃຫ້​ການ​ຊ່ວຍ​ເຫຼືອ​ເພີ້ມ​ຂຶ້ນ​ໃນ​ດ້ານ​ຄວາມ​ໝັ້ນ​ຄົງ ແບບ​ບໍ່​ເຄີຍ​ມີ​ມາ​ກ່ອນ ແກ່​ປະ​ເທດ​ຢູ​ເຄ​ຣນ ຮວ​ມ​ທັງ​ຄວາມ​ສາມາດ​ໃນ​ການ​ປ້ອງ​ກັນ​ໄພ​ທາງ​ອາ​ກາດເພື່ອ​ໃຫ້​ຢູ​ເຄ​ຣນ​ສາ​ມາດ​ປ້ອງ​ກັນ​ໂຕ​ຈາກ​ອາ​ວຸດ​ເຫຼົ່າ​ນີ້.

XS
SM
MD
LG