ບົດບັນນາທິການ ທີ່ສະທ້ອນເຖິງນະໂຍບາຍ ຂອງລັດຖະບານສະຫະລັດ
ສະຫະລັດຍັງສືບຕໍ່ມີຄວາມໝັ້ນໝາຍທີ່ຈະໃຫ້ການສະໜັບສະໜຸນຕໍ່ປະຊາຊົນຊາວມຽນມາ ທີ່ມີຄວາມປາຖະໜາຢ່າງແຮງກ້າ ຢາກໃຫ້ມີສັນຕິພາບ ຄວາມອຸດົມຮັ່ງມີ ແລະປະຊາທິປະໄຕໃນປະເທດມຽນມາ. ເມື່ອສອງປີກ່ອນນັ້ນ ປະຊາຊົນ 27 ລ້ານຄົນ ໄດ້ພາກັນໄປລົງຄະແນນສຽງເພື່ອປ່ອນບັດໃນການເລືອກຕັ້ງທົ່ວໄປຊຶ່ງເປັນຂີດໝາຍໃນບາດກ້າວອັນສຳຄັນສຳລັບການຫັນປ່ຽນໄປສູ່ປະຊາທິປະໄຕໃນປະເທດດັ່ງກ່າວ. ແຕ່ຄວາມມຸ້ງມາດປາຖະໜາຂອງປະຊາຊົນ ໄດ້ຖືກປະຕິເສດເວລາພວກທະຫານມຽນມາໄດ້ເຮັດລັດຖະປະຫານ ໃນເດືອກຸມພາປີ 2021 ຊຶ່ງໄດ້ຕ່າວປີ້ນຄວາມກ້າວໜ້າ ໃນດ້ານປະຊາທິປະໄຕທີ່ໄດ້ຮັບມາ ເປັນເວລານຶ່ງທົດສະວັດ.
ຢູ່ໃນຖະແຫຼງການ ເນື່ອງໃນໂອກາດວັນຄົບຮອບປີທີສອງ ຂອງການເລືອກຕັ້ງຢູ່ໃນມຽນມານັ້ນ ລັດຖະມົນຕີກະຊວງການຕ່າງປະເທດສະຫະລັດ ທ່ານແອນໂທນີ ບລິງເກັນ ໃຫ້ຂໍ້ສັງເກດວ່າ ນັບແຕ່ນັ້ນມາພວກທະຫານແມ່ນໄດ້ທຳການປາບປາມ ໂດຍໃຊ້ຄວາມຮຸນແຮງຕໍ່ປະຊາຊົນຊາວມຽນມາ ຊຶ່ງໄດ້ສັງຫານຫຼາຍ ກວ່າ 2,400 ຄົນ ແລະຈັບກຸມ 16,000 ກວ່າຄົນ ຮວມທັງປະທານາທິບໍດີວິນມິນ ແລະທີ່ປຶກສາຂອງລັດຖະບານ ທ່ານນາງອອງຊານ ຊູຈີ.
ສະຫະລັດຈະສືບຕໍ່ໃຫ້ການສະໜັບສະໜຸນຕໍ່ຂະບວນການເຄື່ອນໄຫວເພື່ອປະຊາທິປະໄຕ ແລະພວກທີ່ພວມເຮັດວຽກທັງໝົດ ເພື່ອສ້າງຕັ້ງອະນາຄົດ ທີ່ຮວມເອົາທຸກພັກຝ່າຍ ແລະເປັນປະຊາທິປະໄຕ ຢູ່ໃນປະເທດມຽນມາ. ລັດຖະມົນຕີການຕ່າງປະເທດບລິງເກັນ ກ່າວວ່າ ແມ່ນມີຄວາມເຊື່ອໝັ້ນ ແບບດຽວກັນ ກັບຜູ້ນຳຂອງຂະບວນການທີ່ວ່າ ແຜນການເລືອກຕັ້ງຂອງອຳນາດການປົກຄອງ ທີ່ຈະຈັດຂຶ້ນໃນເດືອນສິງຫາປີ 2023 “ອາດຈະບໍ່ສາມາດເປັນການເລືອກຕັ້ງທີ່ເສລີ ແລະເປັນທຳໄດ້ ເມື່ອເວົ້າເຖິງສະພາບການໃນປັດຈຸບັນ… ແລະກໍຈະເລື່ອນກຳນົດເວລາໃນການຫັນປ່ຽນປະເທດໄປສູ່ປະຊາທິປະໄຕແລະໃຫ້ມີສະຖຽນລະພາບ.”
ທ່ານໄດ້ໃຫ້ຄຳໝັ້ນສັນຍາວ່າສະຫະລັດ ພ້ອມກັບບັນດາປະເທດພັນທະມິດແລະພາຄີ ແມ່ນຈະສືບຕໍ່ທຳການລົງໂທດຕໍ່ການກໍ່ໂທດກຳຂອງອຳນາດການປົກຄອງດັ່ງກ່າວ.
ມາຈົນເຖິງປັດຈຸບັນນີ້ ສະຫະລັດໄດ້ລະບຸໂຕ 74 ສ່ວນບຸກຄົນ ແລະ 29 ອົງການ ມີຄວາມເຊື່ອມໂຍງກັບການເຮັດລັດຖະປະຫານຂອງພວກທະຫານ ຫຼືບໍ່ກໍໃຫ້ການສະໜັບສະໜຸນຕໍ່ອຳນາດການປົກຄອງ ຮວມທັງການກໍ່ຄວາມຮຸນແຮງທີ່ໜ້າຢ້ານກົວ.
ເທື່ອຫຼ້າສຸດ ຄືໃນວັນທີ 8 ພະຈິກຜ່ານມານີ້ ສະຫະລັດກໍໄດ້ທຳການລົງໂທດຕໍ່ພວກທີ່ປະຕິບັດງານ ຢູ່ໃນພາກສ່ວນເສດຖະກິດດ້ານປ້ອງກັນປະເທດຂອງມຽນມາ ແລະສະໜອງເຮືອບິນແລະອາວຸດຍຸດທະພັນຕ່າງໆໃຫ້ແກ່ກອງທັບຂອງມຽນມາ. ໃນຂະນະທີ່ມີການປັບທຽບ ເພື່ອຫຼີກລ່ຽງຜົນທີ່ຕິດຕາມມາ ໂດຍບໍ່ໄດ້ຕັ້ງໃຈສຳລັບປະຊາຊົນສ່ວນໃຫຍ່ນັ້ນ ການເອົາມາດຕະການເຫຼົ່ານີ້ ແມ່ນໄດ້ແນໃສ່ອົງການທີ່ສຳຄັນໆ ແລະການສ້າງລາຍໄດ້ ເພື່ອສະໜັບສະໜຸນພວກຜູ້ນຳທະຫານ ພວກຄ້າອາວຸດ ແລະພວກນັກທຸລະກິດທີ່ເປັນເພື່ອນຝູງໃກ້ຊິດ ກັບອຳນາດການປົກຄອງ.
ນີ້ແມ່ນສອດຄ່ອງ ກັບການລົງໂທດຮອບທີ 5 ຕໍ່ມຽນມາຂອງສະຫະພາບຢູໂຣບເມື່ອວັນທີ 8 ພະຈິກຜ່ານມາຊຶ່ງໄດ້ມີການຮັບຮອງເອົາ “ເພື່ອເປັນການຕອບໂຕ້ໃນການສືບຕໍ່ເພີ້ມທະວີຄວາມຮຸນແຮງ ແລະການລະເມີດສິດທິມະນຸດຢ່າງຮ້າຍແຮງ ຫຼັງຈາກພວກທະຫານໄດ້ເຂົ້າຢຶດອຳນາດເມື່ອສອງປີກ່ອນ.”
ສະຫະລັດ ຈະສືບຕໍ່ເຮັດວຽກຢ່າງໃກ້ຊິດຮ່ວມກັບບັນດາປະເທດພັນທະມິດແລະພາຄີ ຮວມທັງສະຫະຣາຊະອານາຈັກ ການາດາ ແລະສະຫະພາບຢູໂຣບ ເພື່ອສົ່ງສັນຍານຢ່າງແຂງຂັນ ໄປໃຫ້ອຳນາດການປົກຄອງແລະພວກສະໜັບສະໜຸນ ໃຫ້ຮູ້ວ່າ ປະຊາຄົມນາໆຊາດ ຈະຢືນຢູ່ດ້ວຍຄວາມເປັນເອກກະພາບ ຕ້ານການປະຕິບັດງານອັນໜ້າຢ້ານກົວຂອງອຳນາດການປົກຄອງມຽນມາ.