ບົດບັນນາທິການ ທີ່ສະທ້ອນເຖິງນະໂຍບາຍ ຂອງລັດຖະບານສະຫະລັດ
ພວກນັກຊ່ຽວຊານດ້ານສິດທິມະນຸດ ຂອງອົງການສະຫະປະຊາຊາດ 8 ຄົນ ໄດ້ສະແດງຄວາມເປັນຫ່ວງກັງວົນຕໍ່ການປາບປາມຢ່າງຮຸນແຮງຂອງລັດຖະບານອີຣ່ານ ຕໍ່ພວກເດີນຂະບວນປະທ້ວງດ້ວຍຄວາມສະຫງົບ. ພວກເຂົາເຈົ້າໄດ້ຂຽນລົງໃນຖະແຫຼງການວ່າ “ພວກເຮົາມີຄວາມຕື່ນຕົກໃຈ ຕໍ່ການຈັບກຸມຄຸມຂັງໂດຍພະລະການ ທີ່ມີເພີ້ມຂຶ້ນເມື່ອໄວໆມານີ້ ຕໍ່ພວກນາຍຄູ ພວກປົກປ້ອງສິດຄົນງານແລະຜູ້ນຳກຳມະບານ ທະນາຍຄວາມ ພວກປົກປ້ອງສິດທິມະນຸດແລະຜູ້ເຮັດວຽກໃຫ້ກຸ່ມສັງຄົມພົນລະເຮືອນ. ພື້ນທີ່ສຳລັບກຸ່ມສັງຄົມພົນລະເຮືອນ ແລະສະມາຄົມອິດສະຫຼະ ເພື່ອໃຫ້ເຮັດວຽກຢ່າງຖືກຕ້ອງຕາມກົດໝາຍຂອງພວກເຂົາເຈົ້ານັ້ນ ແມ່ນມີໜ້ອຍຫຼາຍເກືອບວ່າເປັນໄປບໍ່ໄດ້.”
ພວກນັກຊ່ຽວຊານສະປະຊາຊາດໄດ້ພາກັນອອກມາຖະແຫຼງ ໃນຂະນະທີ່ການເດີນຂະບວນປະທ້ວງຍັງດຳເນີນຕໍ່ໄປໃນທົ່ວປະເທດອີຣ່ານ. ຫຼາຍໆພາກສ່ວນຂອງສັງຄົມໄດ້ພາກັນປະທ້ວງຕໍ່ຫຼາຍໆບັນຫາຮວມທັງເງິນເດືອນຕ່ຳ ສະພາບ ຢູ່ບ່ອນເຮັດວຽກບໍ່ປອດໄພ ອັດຕາເງິນເຟີ້ສູງ ການສໍ້ລາດບັງຫຼວງຂອງລັດຖະບານ ແລະການກົດຂີ່ທາງດ້ານການເມືອງ. ພວກນັກຊ່ຽວຊານຂອງສະຫະປະຊາຊາດຍັງໃຫ້ຂໍ້ສັງເກດວ່າກຳລັງຮັກສາຄວາມສະຫງົບໄດ້ຕອບໂຕ້ “ດ້ວຍກຳ ລັງທີ່ເກີນຂອບເຂດ.” ມີພວກປະທ້ວງຢ່າງນ້ອຍ 5 ຄົນຖືກຂ້າຕາຍນັບແຕ່ເລີ້ມມີການປະທ້ວງເມື່ອເດືອນພຶດສະພາແລະຫຼາຍຄົນຍັງຖືກທຸບຕີ. ຍິ່ງໄປກວ່ານັ້ນ ຍັງມີພວກປະທ້ວງຫຼາຍສິບຄົນໄດ້ຖືກຈັບ ແລະລັດຖະບານໄດ້ປິດການບໍລິການອິນເຕີແນັດ ຢູ່ໃນຫຼາຍຫົວເມືອງ.
ໃນການໃຫ້ການຕໍ່ສະພາສູງສະຫະລັດນັ້ນ ທ່ານໂຣເບີດ ມາລລີ ທູດພິເສດສະ
ຫະລັດ ຮັບຜິດຊອບໃນເລື້ອງອີຣ່ານ ກ່າວວ່າ “ການປະທ້ວງທີ່ພວກເຮົາເຫັນຢູ່ໃນປະເທດອີຣ່ານເວລານີ້ ແມ່ນມາດຕະການ ຂອງລັດຖະບານສໍ້ລາດບັງຫຼວງແລະການບໍລິຫານງານທີ່ພິດພາດ ແລະການຕອບໂຕ້ຢ່າງໂຫດຮ້າຍປ່າເຖື່ອນ ຕໍ່ການປະທ້ວງນັ້ນ ແມ່ນເປັນການເຕືອນ ກ່ຽວກັບການລົ້ມລະລາຍທາງດ້ານສິນທຳຂອງລັດຖະບານ.”
ໂຄສົກກະຊວງການຕ່າງປະເທດສະຫະລັດ ທ່ານເນດ ໄພຣສ໌ ໄດ້ຕົບມືຊົມເຊີຍ ຕໍ່ຜົນງານຂອງພວກນັກຊ່ຽວຊານ ດ້ານສິດທິມະນຸດສະຫະປະຊາຊາດ ແລະໄດ້ປະກາດວ່າ ຄວາມວິຕົກກັງວົນຂອງພວກເຂົາເຈົ້າ ກ່ຽວກັບການໃຊ້ກຳລັງເກີນຂອບເຂດຕໍ່ພວກປະທ້ວງ “ແມ່ນຄວາມເປັນຫ່ວງກັງວົນຢ່າງແນ່ນອນຂອງພວກເຮົາ.”
ທ່ານເນດ ໄພຣສ໌ ກ່າວວ່າ “ພວກເຮົາຂໍປະນາມ ການໃຊ້ຄວາມຮຸນແຮງຕໍ່ພວກປະທ້ວງແບບສັນຕິ. ພວກເຮົາສະໜັບສະໜຸນ ສິດທິມະນຸດຂອງຊາວອີຣ່ານ ຕໍ່ການໂຮມຊຸມແບບສັນຕິແລະໄດ້ສະແດງອອກຄວາມຄິດຄວາມເຫັນ ໂດຍປາສະຈາກຄວາມຢ້ານກົວຫຼືຄວາມຮຸນແຮງໃດໆ.”
ທ່ານເນດ ໄພຣສ໌ ໃຫ້ຂໍ້ສັງເກດວ່າ ກະຊວງການເງິນຂອງສະຫະລັດໄດ້ອະນຸມັດໃຫ້ມີການນຳໃຊ້ຊົ່ວຄາວຊອບແວໃນການຕິດຕໍ່ກັບສ່ວນບຸກຄົນຢ່າງກວ້າງ
ຂວາງ ແລະການບໍລິການຕໍ່ຊາວອີຣ່ານ. “ພວກເຮົາຈະສືບຕໍ່ເຮັດວຽກ ກັບພາກ ເອກກະຊົນ ແລະກະຊວງການເງິນຈະລະບຸການເອົາມາດຕະການເພີ້ມຕື່ມ ເພື່ອໃຫ້ການສະໜັບສະໜຸນ ແລະອຳນວຍຄວາມສະດວກ ໃຫ້ມີການຫຼັ່ງໄຫຼໄປມາຂອງຂໍ້ມູນຂ່າວສານຢູ່ໃນປະເທດອີຣ່ານ” ນັ້ນຄືຄຳເວົ້າຂອງທ່ານ.
ມາຈົນເຖິງເວລານີ້ ສະຫະລັດໄດ້ທຳການລົງໂທດ ຕໍ່ເຈົ້າໜ້າທີ່ອີຣ່ານຫຼາຍໆສິບຄົນ ແລະບັນດາບໍລິສັດ ທີ່ພົວພັນກັບການກົດຂີ່ຕໍ່ພວກປະທ້ວງ ແລະພວກນັກເຄື່ອນໄຫວ ຂອງກຸ່ມສັງຄົມພົນລະເຮືອນ ແລະອົງການຕ່າງໆ. ໂຄສົກກະຊວງການຕ່າງປະເທດເນດ ໄພຣສ໌ ໃຫ້ຄຳໝັ້ນສັນຍາວ່າ “ສະຫະລັດຈະສືບຕໍ່ຖືວ່າອີຣ່ານເປັນຜູ້ຮັບຜິດຊອບຕໍ່ການລະເມີດສິດທິມະນຸດ ທີ່ເກີດຂຶ້ນພາຍໃນປະເທດອີຣ່ານເອງ. ພວກເຮົາຈະສືບຕໍ່ ຖືວ່າອີຣ່ານເປັນຜູ້ຮັບຜິດຊອບຕໍ່ທຸກໆກິດຈະກຳທີ່ຊົ່ວຮ້າຍ ທີ່ອີຣ່ານໄດ້ກະທຳໄປນັ້ນ.