តទៅនេះ គឺជាបទវិចារណកថាដែលឆ្លុះបញ្ចាំងអំពីទស្សនៈរបស់រដ្ឋាភិបាលសហរដ្ឋអាមេរិក
ឧបការីរដ្ឋបាលទទួលបន្ទុកកិច្ចការតំបន់មជ្ឈិមបូព៌ា នៃទីភ្នាក់ងារសហរដ្ឋអាមេរិកសម្រាប់ការអភិវឌ្ឍអន្តរជាតិ USAID លោក Michael Harvey បានថ្លែងថា៖ «ទីភ្នាក់ងារ USAID មានភាពសកម្មនៅក្នុងប្រទេសរាប់ចាប់ពីប្រទេសម៉ារ៉ុក រហូតដល់ប្រទេសអ៊ីរ៉ាក់ និងស្ទើរតែនៅគ្រប់ប្រទេសនៃតំបន់មជ្ឈិមបូព៌ាទាំងអស់ អស់រយៈពេល ៣០ឆ្នាំ ទៅ ៥០ឆ្នាំ មកហើយ។
លោក Michael Harvey បានថ្លែងបន្តថា៖
«វាជាភាពជាដៃគូយូរអង្វែងប្រកបដោយនិរន្តរភាពមួយ ដែលពិតជាបានផ្តោតលើការកសាងសមត្ថភាពរបស់ប្រទេសទាំងនេះ ដើម្បីឲ្យប្រទេសទាំងនេះអាចគ្រប់គ្រងជោគវាសនារបស់ខ្លួនបាន និងដើម្បីកសាងអនាគតដែលពួកគេកំណត់សម្រាប់ខ្លួនពួកគេ»។
នៅក្នុងបទសម្ភាសន៍មួយកាលពីពេលថ្មីៗនេះ លោក Michael Harvey បានកត់សម្គាល់ថា ប្រាក់ជាច្រើនដែលបានមកពីការបង់ពន្ធរបស់ពលរដ្ឋអាមេរិកាំង ដែលត្រូវបានយកមកចំណាយនៅក្នុងតំបន់នេះ គឺទៅលើការបង្កើតនូវអ្វីដែលពិបាកនឹងមើលឃើញ តែមានផលដល់ការរស់នៅរបស់ប្រជាពលរដ្ឋជារៀងរាល់ថ្ងៃ ដែលមានដូចជា ប្រព័ន្ធទឹកស្អាតជាដើម។
លោក Michael Harvey ថ្លែងបន្តទៀតថា៖
«ក៏ប៉ុន្តែ អ្វីដែលប្រហែលជាសំខាន់ជាងនេះ ដែលទីភ្នាក់ងារ USAID បានធ្វើក្នុងរយៈពេល ៣០ ឬ ៥០ឆ្នាំ កន្លងមកនេះ គឺការកសាងសមត្ថភាពមនុស្សនៅក្នុងប្រទេសនានានៅទូទាំងតំបន់មជ្ឈិមបូព៌ា។ ដូច្នេះហើយ ទើបមានការចំណាយថវិកា ពេលវេលា និងការខិតខំប្រឹងប្រែងជាច្រើន ទៅលើការបណ្តុះបណ្តាលដែលមានដូចជា ការបណ្តុះបណ្តាលវេជ្ជបណ្ឌិត ការបណ្តុះបណ្តាលគ្រូប្រងៀន មន្រ្តីក្នុងក្រសួងហិរញ្ញវត្ថុ និងក្រសួងផែនការជាដើម»។
លោក Michael Harvey បានថ្លែងទៀតថា អ្វីដែលធ្វើឲ្យលោកមានមោទនភាពបំផុតនោះ គឺការធ្វើដំណើរទៅកាន់សាកលវិទ្យាល័យស្ទើរតែទាំងអស់នៅក្នុងតំបន់នេះហើយឃើញថា សាស្រ្តាចារ្យភាគច្រើនទទួលបានការបណ្តុះបណ្តាលនៅសហរដ្ឋអាមេរិក ដែលជាញឹកញាប់ គឺតាមរយៈអាហារូបករណ៍របស់ទីភ្នាក់ងារ USAID។
លោក Michael Harvey បានថ្លែងបន្តទៀតថា៖
«យើងបានឃើញថា ការវិនិយោគជាច្រើនទសវត្សរ៍មកនេះ ទៅលើប្រជាពលរដ្ឋ គឺផ្នែកធនធានមនុស្សនោះ កំពុងជះឥទ្ធិពលយ៉ាងខ្លាំងទៅលើការធ្វើទំនើបកម្ម និងនាំមកនូវវិធីថ្មីៗនៃការធ្វើជំនួញ និងការរៀបចំសណ្តាប់ធ្នាប់សង្គមដល់បណ្តាប្រទេសទាំងនេះ»។
លោក Michael Harvey បានចង្អុលបង្ហាញថា មានការធ្វើទំនើបកម្មយ៉ាងខ្លាំងមួយ នៅក្នុងផ្នែកភាគច្រើននៃពិភពអារ៉ាប់។ លោក Harvey ថ្លែងទៀតថា បញ្ហាប្រឈមនោះ គឺថា ល្បឿននៃការធ្វើទំនើបកម្ម អាចមានល្បឿនយឺតជាងការរំពឹងទុករបស់យុវជននៅក្នុងតំបន់នេះ។
លោក Michael Harvey បានថ្លែងបន្ថែមទៀតថា៖
«នោះហើយជាមូលហេតុដែលយើងឃើញយុវជនចេញមកតវ៉ានៅតាមផ្លូវពីគ្រប់ប្រទេសទាំងអស់តាំងពីប្រទេសម៉ារ៉ុក រហូតដល់ប្រទេសអ៊ីរ៉ង់។ ពួកគេលើកឡើងនូវប្រធានបទដូចៗគ្នា។ ពួកគេចង់ឲ្យរដ្ឋាភិបាលមានការទទួលខុសត្រូវ។ ពួកគេចង់ឲ្យរដ្ឋាភិបាលមានភាពស្មោះត្រង់។ ពួកគេចង់ឲ្យរដ្ឋាភិបាលមានតម្លាភាព។ ពួកគេចង់បញ្ចេញមតិអំពីរបៀបដែលគ្រប់គ្រងទៅលើពួកគេ។ ហើយពួកគេចង់ឃើញសេដ្ឋកិច្ចនៅក្នុងប្រទេសរបស់ពួកគេ ត្រូវបានធ្វើទំនើបកម្ម និងបើកទូលាយ។ ពួកគេដឹងថា ប្រទេសធម្មតាមួយមានសភាពបែបណា ដែលនោះគឺប្រទេសមួយដែលអ្នកអាចធ្វើដំណើរទៅណាមកណាបាន អាចវិនិយោគ និងអ្នកអាចបង្កើតអាជីវកម្មបាន។ នោះ គឺជាអនាគតដែលពួកគេចង់បានសម្រាប់ខ្លួនពួកគេ»។
ដូចដែលបានធ្វើជាច្រើនទសវត្សរ៍មកហើយ ទីភ្នាក់ងារ USAID នឹងបន្តគាំទ្រសេចក្តីប្រាថ្នារបស់ប្រជាពលរដ្ឋនៅតំបន់មជ្ឈិមបូព៌ា នៅពេលដែលពួកគេធ្វើការឆ្ពោះទៅរកអនាគតដែលគេប៉ងប្រាថ្នានោះ៕