ບົດບັນນາທິການ ທີ່ສະທ້ອນເຖິງນະໂຍບາຍ ຂອງລັດຖະບານສະຫະລັດ
ປະທານາທິບໍດີຣັດເຊຍ ທ່ານວລາດີເມຍ ປູຕິນ ມີຄວາມຕັ້ງໃຈທີ່ຈະໃຊ້ລະດູໜາວເປັນອາວຸດສົງຄາມ ນັ້ນຄືຄຳປະກາດຂອງຫົວໜ້າອົງການພັດທະນາສາກົນຂອງສະຫະລັດ ຫຼືຢູເສດ ທ່ານນາງຊາແມນຕາ ພາວເວີ. ໂດຍເພີ້ມທະວີການໂຈມຕີໃສ່ພື້ນຖານໂຄງລ່າງດ້ານພົນລະເຮືອນນັ້ນ ກອງກຳລັງຂອງຣັດເຊຍໄດ້ຂົ່ມຂູ່ທີ່ຈະເຮັດໃຫ້ປະຊາຊົນຊາວຢູເຄຣນຫຼາຍຮ້ອຍພັນຄົນບໍ່ມີອາຍອຸ່ນ ແລະໄຟຟ້າໃຊ້ ໃນຊຸມເດືອນ ທີ່ໜາວທີ່ສຸດຂອງປີ. ໃນຄວາມພະຍາຍາມເພື່ອ ຊ່ວຍເຫຼືອຊາວຢູເຄຣນ ປ້ອງກັນຕໍ່ການນຳໃຊ້ກົນລະຍຸດດັ່ງກ່າວ ທ່ານນາງໄດ້ປະກາດການໃຫ້ເງິນເພີ້ມຕື່ມ 55 ລ້ານໂດລາ ເພື່ອໃຫ້ຊາວຢູເຄຣນມີອາຍອຸ່ນໃຊ້ ໃນລະຫວ່າງການເດີນທາງໄປຢ້ຽມຢາມເມື່ອໄວໆມານີ້.
ການໃຫ້ຄວາມສະໜັບສະໜຸນນີ້ ທ່ານຊາແມນຕາ ພາວເວີ ກ່າວວ່າ ຈະຊ່ວຍຊາວຢູເຄຣນຫຼາຍເຖິງ 7 ລ້ານຄົນ ມີອາຍອຸ່ນໃຊ້ໃນລະດູໜາວນີ້. “ພວກເຮົາຮູ້ວ່າ ມີຄວາມຈຳເປັນເພີ້ມຕື່ມ ແລະພວກເຮົາກຳລັງເຮັດວຽກຮ່ວມກັບປະເທດຕ່າງໆ ຜູ້ບໍລິຈາກອື່ນໆ ເພື່ອສຶກສາເບິ່ງບັນຫາທີ່ມີຄວາມຫຼໍ່ແຫຼມທາງດ້ານພະລັງງານ ໄຟຟ້າ ແລະແກັສທຳມະຊາດ.
ທ່ານນາງຊາແມນຕາ ພາວເວີ ໄດ້ພົບປະກັບພວກພໍໄຮ່ຊາວນາ ທີ່ດິນດອນຂອງພວກເຂົາເຈົ້າໄດ້ຖືກຢຶດຄອງໂດຍກຳລັງຣັດເຊຍ ແລະຫຼັງຈາກນັ້ນກໍໄດ້ຖືກປົດປ່ອຍ ທີ່ພົບເຫັນວ່າອຸບປະກອນເຮັດໄຮ່ເຮັດນາຂອງພວກເຂົາເຈົ້າຖືກລັກຂະໂມຍໄປຫຼືບໍ່ກໍຖືກທຳລາຍ ແລະບາງຄົນກໍພົບວ່າໄຮ່ນາຮົ້ວສວນແລະເຮືອນຊານຂອງພວກເຂົາເຈົ້າ ມີການຫ້າງລະເບີດໃສ່. ນອກນັ້ນ ທ່ານນາງຍັງໄດ້ພົບພໍ້ກັບພວກພໍ່ໄຮ່ຊາວນາທີ່ໄດ້ເກັບກ່ຽວຜົນລະປູກຂອງພວກເຂົາເຈົ້າ ແລະຈົນເທົ່າໄດ້ມີຂໍ້ຕົກລົງທະເລດຳ ທີ່ໄກ່ເກ່ຍໂດຍອົງການສະຫະປະຊາຊາດແລະເທີກີ ພວກເຂົາເຈົ້າແມ່ນບໍ່ມີທາງເລີຍ ທີ່ຈະສົ່ງເຂົ້າເບລ່ຂອງພວກເຂົາເຈົ້າອອກໄປຂາຍຢູ່ໃນຕ່າງປະເທດໄດ້. ອົງການຢູເສດໄດ້ປະກາດເມື່ອຫຼາຍໆເດືອນຜ່ານມານີ້ກ່ຽວກັບຂໍ້ລິເລີ້ມກະສິກຳຢູເຄຣນຊຶ່ງເປັນໂຄງການໃນມູນຄ່າ 100 ລ້ານໂດລາເພື່ອສະໜັບສະໜຸນພວກພໍ່ໄຮ່ຊາວນາຢູເຄຣນ ໃນຂະນະທີ່ພວກເຂົາເຈົ້າ ຊອກຫາຊ່ອງທາງທີ່ຈະຂົນສົ່ງອາຫານປະເພດເມັດໃນປະລິມານເພິ້ີ້ມຂຶ້ນຂອງພວກເຂົາເຈົ້າ ໂດຍທາງພາກພື້ນດິນ ທາງລົດໄຟ ແລະທາງອາກາດ.
ໂຄງການກະສິກຳຢູເຄຣນ ແມ່ນມີຄວາມສຳຄັນເປັນພິເສດ ເພື່ອຊ່ວຍໃຫ້ຊາວຢູເຄຣນສາມາດຢືນຢູ່ດ້ວຍລຳແຂ່ງຂອງໂຕເອງ ໃນຂະນະທີ່ປະເທດດັ່ງກ່າວຍັງຈະຕ້ອງສືບຕໍ່ດຳເນີນການ ເພື່ອໃຫ້ໄດ້ຮັບໄຊຊະນະໃນສະໜາມລົບ. ເສດຖະກິດຢູເຄຣນ ບໍ່ສາມາດທີ່ຈະລໍຖ້າ ການສິ້ນສຸດລົງຂອງບັນຫາຂັດແຍ້ງ ຢ່າງເປັນທາງການ ນັ້ນຄືຄຳເຕືອນ ຂອງທ່ານນາງຊາແມນຕາ ພາວເວີ. ພວກນາຍຄູ ຂ້າລັດຖະການ ເຈົ້າຂອງຫ້າງຮ້ານ ແລະຜູ້ຄົນໃນທຸກໆວີຊາຊີບ ທີ່ຕ້ອງການຢາກເຮັດວຽກຢູ່ທີ່ນີ້ ແລະໃນເວລານີ້ ແລະເງິນລາຍໄດ້ຈາກພາສີທີ່ພວກເຂົາເຈົ້າຈ່າຍໃຫ້ນັ້ນ ແມ່ນມີຄວາມສຳຄັນສຳລັບເຮັດໃຫ້ຢູເຄຣນສາມາດກັບຄືນມາຢືນຢູ່ດ້ວຍລຳແຂ່ງຂອງຕົນເອງຄືນອີກ.
ຫົວໜ້າອົງການຢູເສດ ທ່ານນາງຊາແມນຕາ ພາວເວີ ປະກາດວ່າ “ຂໍ້ສະຫຼຸບຂອງຂ້າພະເຈົ້າຢູ່ທີ່ນີ້ ກໍຍັງຄືເກົ່າ. ສະຫະລັດ ພວກເຮົາຊາວອາເມຣິກັນ ຢືນ ຢູ່ກັບປະຊາຊົນຊາວຢູເຄຣນໃນຍາມທີ່ພວກເຂົາເຈົ້າຕ້ອງການແລະພວກເຮົາຈະຢືນຢູ່ກັບປະຊາຊົນຊາວຢູເຄຣນ ຕາບໃດທີ່ຍັງມີຄວາມຕ້ອງການ ພວກເຮົາຢູ່. ພວກເຮົາຮັບຮູ້ເຖິງຄວາມຫຍຸ້ງຍາກ ຄວາມໜ້າຢ້ານກົວ ທີ່ປະຊາຊົນ ຂອງປະເທດອັນຍິ່ງໃຫຍ່ແຫ່ງນີ້ໄດ້ຮັບໂດຍບໍ່ມີເຫດຜົນໃດໆເລີຍ. ແລະພວກເຮົາຢາກຈະເຮັດທຸກສິ່ງຢ່າງທີ່ຢູ່ໃນຄວາມສາມາດຂອງພວກເຮົາ ເພື່ອຊ່ວຍບັນດາພາຄີຂອງພວກ ເຮົາໃນພາກພື້ນດິນ ສາມາດຜ່ານຜ່າ ບໍ່ພຽງແຕ່ໃນລະດູໜາວເທົ່ານັ້ນ ແຕ່ໃນໃນວິກິດການຫຼາຍໆຮູບແບບທີ່ມະນຸດເຮັດຂຶ້ນນັ້ນນຳດ້ວຍ.