តទៅនេះ គឺជាបទវិចារណកថាដែលឆ្លុះបញ្ចាំងអំពីទស្សនៈរបស់រដ្ឋាភិបាលសហរដ្ឋអាមេរិក
សហរដ្ឋអាមេរិក បានសម្តែងការគាំទ្រដល់ការលុបចោលកម្មសិទ្ធិបញ្ញាសម្រាប់វ៉ាក់សាំងបង្ការជំងឺកូវីដ១៩ នៅឯអង្គការពាណិជ្ជកម្មពិភពលោក។
គោលនយោបាយនេះរបស់រដ្ឋបាលលោកប្រធានាធិបតី Joe Biden និងអ្នកស្រីអនុប្រធានាធិបតី Kamala Harris ត្រូវបានប្រកាសកាលពីថ្ងៃទី៥ ខែឧសភា ដោយអ្នកស្រីឯកអគ្គរដ្ឋទូត Katherine Tai អ្នកតំណាងពាណិជ្ជកម្មសហរដ្ឋអាមេរិក។
អ្នកស្រីបានសរសេរនៅក្នុងសេចក្តីថ្លែងការណ៍មួយថា៖
«នេះជាវិបត្តិសុខភាពសាកល ហើយកាលៈទេសៈមិនធម្មតានៃការរាតត្បាតជំងឺកូវីដ១៩នេះ អំពាវនាវឱ្យមានវិធានការសំខាន់ៗជាបន្ទាន់។ រដ្ឋាភិបាលអាមេរិកាំងមានជំនឿយ៉ាងខ្លាំងទៅលើការការពារកម្មសិទ្ធិបញ្ញា តែដើម្បីជួយបញ្ឈប់ការរាតត្បាតនៃជំងឺនេះ សហរដ្ឋអាមេរិកគាំទ្រការលុបចោលការការពារទាំងនេះសម្រាប់វ៉ាក់សាំងកូវីដ១៩»។
នៅក្នុងសេចក្តីថ្លែងរបស់អ្នកស្រី អ្នកស្រីឯកអគ្គរដ្ឋទូត Tai បានមានប្រសាសន៍ថាសហរដ្ឋអាមេរិក «នឹងចូលរួមយ៉ាងសកម្មក្នុងកិច្ចចរចានៅឯអង្គការពាណិជ្ជកម្មពិភពលោក...កិច្ចចរចាទាំងនោះ នឹងចំណាយពេលច្រើនដោយសារដំណើរការផ្អែកលើការមូលមតិគ្នានៃស្ថាប័ននេះនិងភាពសាំញ៉ាំនៃបញ្ហាទាក់ទិន»។
ប្រទេសកំពុងអភិវឌ្ឍជាច្រើន បានទទួលវ៉ាក់សាំងតែបន្តិចបន្តួច ហើយកំពុងតស៊ូដើម្បីឆ្លើយតបនឹងកំណើនខ្លាំងនៃជំងឺកូវីដ១៩ក្នុងចំណោមប្រជាពលរដ្ឋពួកគេ។ លោក Tedros Adhanom Ghebreyesus អគ្គនាយកអង្គការសុខភាពពិភពលោក បានស្វាគមន៍សេចក្តីសម្រេចរបស់សហរដ្ឋអាមេរិកដោយលោកបានហៅសេចក្តីសម្រេចនេះ ថាជា «ពេលវេលាធំក្រៃលែង» និងជា «ឧទាហរណ៍ខ្លាំងមួយនៃភាពជាមេដឹកនាំរបស់អាមេរិកដើម្បីពុះពារឧបសគ្គសុខាភិបាលសាកលនេះ»។
អ្នកស្រីឯកអគ្គរដ្ឋទូត Tai បាននិយាយថា៖
«គោលដៅរបស់រដ្ឋបាលអាមេរិក គឺធ្វើឱ្យមានវ៉ាក់សាំងប្រកបដោយសុវត្ថិភាព និងប្រសិទ្ធភាពសម្រាប់មនុស្សឱ្យបានយ៉ាងច្រើនបំផុតតាមដែលអាចធ្វើបាន។ នៅពេលដែលការផ្គត់ផ្គង់វ៉ាក់សាំងរបស់យើងសម្រាប់ប្រជាពលរដ្ឋអាមេរិកាំងមានគ្រប់គ្រាន់ហើយនោះ រដ្ឋបាលយើងនឹងបន្តកិច្ចខិតខំប្រឹងប្រែងធ្វើការជាមួយវិស័យឯកជននិងពួកដៃគូទាំងអស់ដើម្បីបង្កើនការផលិតនិងការចែកចាយវ៉ាក់សាំងទាំងនេះ។ រដ្ឋបាលអាមេរិកាំង ក៏នឹងធ្វើការដើម្បីបង្កើនវត្ថុធាតុដើមដែលត្រូវការសម្រាប់ផលិតវ៉ាក់សាំងទាំងនោះផងដែរ»៕