ډیجیټل تکنالوژي ددې وړتیا لري چې اقتصادي وده ګړندۍ کړي؛ آزادیو، روڼتیا، او معلوماتو ته د لاسرسي وده او د سولې او امنیت پرمختګ وهڅوي. خو دا همداشان کیدای شي د زورواکو حکومتونو لخوا د خلکو د کنټرول، د مخالفینو د ځپلو، د معلوماتو د جریان چوپ کولو، د غلطو معلوماتو د خپرولو او په مخالفو غږونو باندې د نظر ساتلو او سانسور کولو لپاره وکارول شي.
له همدې امله د آنلاین آزادۍ ایتلاف په ۲۰۱۱ کې د هالنډ د بهرنیو چارو وزارت په نوښت رامینځته شو. نن ورځ ایتلاف په پنځو لویو وچو کې ۳۵ غړي لري.
د متحده ایالاتو د بهرنیو چارو وزارت ویاند نډ پرایس وویل: "د آنلاین ازادۍ ایتلاف د هیوادونو یوازینۍ نړیواله ډله ده چې په ځانګړي ډول په آنلاین او ډیجیټل برخو کې د بشري حقونو ملاتړ او پرمختګ ته وقف شوې ده." هغه زیاته کړه، "د دې هدف دا دی چې انټرنیټ د خلاص، له مداخلې پرته، خوندي او د باور وړ نړیوالو 'شبکو د شبکې' په توګه خوندي وي او ډاډ ترلاسه کړي هغه بشري حقونه چې خلک یې آفلاین لري، آنلاین هم خوندي وي."
سږکال، متحده ایالاتو د آنلاین آزادۍ د ایتلاف مشري په غاړه واخیسته. د بهرنیو چارو وزیر انتوني بلینکن وویل، "څرنګه چې متحده ایالات په ۲۰۱۱ کې ددې ډلې د رامینځته کیدو راهیسې د لومړي ځل لپاره د دې ډلې مشري په غاړه اخلي، موږ د انټرنیټ د ژمنې وده ورکولو او د هغې د خطرونو کمولو لپاره د ایتلاف په لا ډیر اغیزمن کولو باندې تمرکز کوو."
هغه وویل: "لومړی، موږ به د بنسټیزو آزادیو د ساتنې لپاره د ایتلاف په اصلي ماموریت تمرکز وکړو، چې په کې د همفکره حکومتونو، مدني ټولنې ډلو، تخنیکي شرکتونو او اتباعو سره کار کول شامل دي چې د انټرنیټ لاسرسي ته د خنډونو مخه ونیول شي."
"دوهم، موږ به د ډیجیټل تکنالوژیو څخه د ناوړه ګټې اخیستنې او ډیجیټل جبر پر وړاندې ودریږو او مقاومت به رامینځته کړو،" ښاغلي بلینکن زیاته کړه، "زموږ حکومتونه کولی شي داسې ګامونه پورته کړي چې څارونکي ځای پر ځای کړي تر څو کله چې حکومتونه د څارنې تکنالوژي کاروي، د بشري حقونو ساتنه وشي."
"درېیم، موږ به د راټوکیدونکو تکنالوژیو د نورمونو او مقرراتو د رامینځته کیدو لپاره کار وکړو، لکه د یوې مسؤلې پراختیا او د مصنوعي استخباراتو کارول او د هغو پلي کول چې له دمخه څخه شتون لري. څلورم، موږ به د ډیجیټل د شمولیت پیاوړتیا ته دوام ورکړو او خوندي آنلاین ځایونو ته به وده ورکړو، په ځانګړې توګه د ښځو او نجونو، او د LGBTQ جنستیتي خلکو، توکمیز، نژادي او مذهبي اقلیتونو، معلولیت لرونکو خلکو او نورو محرومو ډلو لپاره."
د بهرنیو چارو وزیر بلینکن وویل: "موږ خپل ځان د انټرنیټ د رامنځته کیدو راهیسې د انټرنیټ د راتلونکي په تعرفي شیبه کې وینو." هغه زیاته کړه، "موږ به په بیړه او هدف سره عمل وکړو ځکه چې که موږ د انټرنیټ راتلونکی په داسې طریقه جوړه نکړو چې زموږ د ارزښتونو سره سمون ولري، نو استبدادي هیوادونه به دا کار وکړي."