តទៅនេះ គឺជាបទវិចារណកថាដែលឆ្លុះបញ្ចាំងអំពីទស្សនៈរបស់រដ្ឋាភិបាលសហរដ្ឋអាមេរិក
នៅឆ្នាំ១៩៩៣ ដោយបានសម្រេចថា រដ្ឋាភិបាលស៊ូដង់កំពុងផ្តល់ជម្រកនិងការគាំទ្រដល់ក្រុមភេរវជន ដែលរួមមានទាំងមេដឹកនាំក្រុមភេរវកម្មអាល់កៃដាឈ្មោះ Osama bin Laden ផងនោះ សហរដ្ឋអាមេរិកបានកំណត់ប្រទេសស៊ូដង់ថា ជារដ្ឋឧបត្ថម្ភភេរវកម្ម។
ការកំណត់បែបនេះមានផលវិបាកយ៉ាងធ្ងន់ធ្ងរគឺថា ប្រទេសនេះក្លាយជាប្រទេសដែលអន្តរជាតិមិនរាប់រក។ វិនិយោគិនចៀសវាងប្រទេសដែលត្រូវបានកំណត់ថាជារដ្ឋឧបត្ថម្ភភេរវកម្ម ហើយប្រទេសផ្សេងទៀតប្រយ័ត្នប្រយែងនឹងប្រទេសនេះ។ សហរដ្ឋអាមេរិកត្រូវបានហាមឃាត់មិនឱ្យផ្តល់ជំនួយដោយផ្ទាល់ជាច្រើនប្រភេទ ដាក់ការត្រួតពិនិត្យលើការនាំចេញផ្សេងៗ និងធ្វើការប្រឆាំងទៅនឹងការផ្តល់ប្រាក់កម្ចីរបស់ធនាគារពិភពលោក និងមូលនិធិរូបិយវត្ថុអន្តរជាតិដល់ប្រទេសនេះ។ ប្រទេសដែលត្រូវបានកំណត់ថាជារដ្ឋឧបត្ថម្ភភេរវកម្ម ត្រូវបានដាក់កំហិតទៅលើលទ្ធភាពក្នុងការចូលរួមក្នុងប្រព័ន្ធសេដ្ឋកិច្ចសាកលលោក។
ការកំណត់ប្រទេសស៊ូដង់ជារដ្ឋឧបត្ថម្ភភេរវកម្ម ក៏បានធ្វើឱ្យប្រទេសនេះ បាត់បង់អភ័យឯកសិទ្ធិអធិបតេយ្យរបស់ខ្លួនផងដែរ ដែលអភ័យឯកសិទ្ធិនេះ ជាគោលការណ៍ច្បាប់ដែលធ្វើឱ្យរដ្ឋាភិបាលនេះរួចផុតពីបណ្តឹងរដ្ឋប្បវេណី ឬការកាត់ទោសព្រហ្មទណ្ឌ។ ជាលទ្ធផល ជនរងគ្រោះដោយសារការវាយប្រហាររបស់ក្រុមអាល់កៃដា និងក្រុមគ្រួសាររបស់ពួកគេ បានប្តឹងរដ្ឋាភិបាលស៊ូដង់ពីបទឧក្រិដ្ឋនៅក្នុងតុលាការសហរដ្ឋអាមេរិក។ នៅក្នុងករណីដាច់ដោយឡែក តុលាការសហរដ្ឋអាមេរិកបានសម្រេចថា ប្រទេសស៊ូដង់ជំពាក់សំណងក្រុមគ្រួសារជនរងគ្រោះដោយសារការបំផ្ទុះគ្រាប់បែកនៅតាមស្ថានទូតអាមេរិកកាលពីឆ្នាំ១៩៩៨ នៅក្នុងរដ្ឋធានីដាអេសសាឡឹម នៃប្រទេសតង់ហ្សានី និងនៅក្នុងរដ្ឋធានីណៃរ៉ូប៊ីនៃប្រទេសកេនយ៉ា និងត្រូវសងក្រុមគ្រួសារនៃនាវិកអាមេរិកចំនួន ១៧ នាក់ ដែលបានស្លាប់ដោយសារលទ្ធផលនៃការវាយប្រហារដោយគ្រាប់បែកនៅក្នុងប្រទេសយេម៉ែនលើនាវាកងទ័ពជើងទឹកអាមេរិកឈ្មោះ Cole ផងដែរ។
នៅខែសីហា ឆ្នាំ២០១៩ ប្រជាជនស៊ូដង់ បានផ្តួលរំលំមេដឹកនាំផ្តាច់ការដ៏យូរអង្វែងរបស់ខ្លួន ហើយរដ្ឋាភិបាលបណ្តោះអាសន្នថ្មីបានប្រកាសថា អាទិភាពកំពូលរបស់ខ្លួនគឺដកប្រទេសស៊ូដង់ពីឋានៈជារដ្ឋឧបត្ថម្ភភេរវកម្ម ហើយចូលរួមជាមួយនឹងសហគមន៍នៃប្រជាជាតិនានាឡើងវិញ។ ដើម្បីសម្រេចគោលដៅនេះ រដ្ឋាភិបាលស៊ូដង់ បានយល់ព្រមដោះស្រាយសាលក្រមប្រឆាំងនឹងខ្លួនដោយសងដើមបណ្តឹងទាំងអស់ក្នុងទឹកប្រាក់ចំនួន ៣៣៥ លានដុល្លារ។
បន្ទាប់ពីពិនិត្យបន្ថែមទៀតអំពីវឌ្ឍនភាពរបស់ស៊ូដង់នៅថ្ងៃទី១៤ ខែធ្នូ សហរដ្ឋអាមេរិក បានសម្រេចដកប្រទេសស៊ូដង់ចេញពីបញ្ជីរដ្ឋឧបត្ថម្ភភេរវកម្ម។ កាលពីថ្ងៃទី ២៨ ខែធ្នូ ច្បាប់សមាហរណកម្មរួមបានចូលជាធរមានដែលរួមមានខ្លឹមសារដែលបើកផ្លូវឲ្យប្រទេសស៊ូដង់ឆ្ពោះទៅស្តារឡើងវិញនូវអភ័យឯកសិទ្ធិអធិបតេយ្យភាពភាគច្រើនរបស់ខ្លួនវិញបាន។
រដ្ឋមន្រ្តីក្រសួងការបរទេសសហរដ្ឋអាមេរិកលោក Mike Pompeo បានថ្លែងនៅក្នុងសេចក្តីថ្លែងការណ៍ជាលាយលក្ខណ៍អក្សរថា ជំហាននេះ តំណាងឱ្យ«ការផ្លាស់ប្តូរជាមូលដ្ឋានមួយនៅក្នុងទំនាក់ទំនងរបស់ស៊ូដង់ ដែលមិនមែនត្រឹមតែទំនាក់ទំនងជាមួយសហរដ្ឋអាមេរិកប៉ុណ្ណោះទេ គឺថែមទាំងទំនាក់ទំនងជាមួយសហគមន៍អន្តរជាតិទាំងមូលផងដែរ។ វិធានការនេះ លុបចោលការរារាំងដល់ការធ្វើសមាហរណកម្មពេញលេញរបស់ប្រទេសស៊ូដង់ទៅក្នុងសេដ្ឋកិច្ចសាកលលោក ដោយកាត់បន្ថយហានិភ័យនៃការភ្ជាប់ទ្រព្យសម្បត្តិរបស់ប្រទេសស៊ូដង់ជាលក្ខខណ្ឌ បើកលទ្ធភាពសម្រាប់ការបង្កើនយ៉ាងលើសលប់នូវការធ្វើពាណិជ្ជកម្ម និងការវិនិយោគផងដែរ»។
លោក Mike Pompeo បានបន្ថែមថា៖ «យើងសូមសរសើរប្រជាជនស៊ូដង់ចំពោះការទទូចទាមទារសេរីភាព សន្តិភាព និងយុត្តិធម៌»៕