តទៅនេះ គឺជាបទវិចារណកថាដែលឆ្លុះបញ្ចាំងអំពីទស្សនៈរបស់រដ្ឋាភិបាលសហរដ្ឋអាមេរិក
សហរដ្ឋអាមេរិក បានសម្របសម្រួលឱ្យមានកិច្ចព្រមព្រៀងសន្តិភាពមួយរវាងប្រទេសស៊ូដង់ និងប្រទេសអ៊ីស្រាអែល ដែលនេះ គឺជាកិច្ចព្រមព្រៀងមួយរវាងប្រទេសអ៊ីស្រាអែល និងប្រទេសជាតិមួយ ដែលមានប្រជារាស្ត្រភាគច្រើនជាអ្នកកាន់សាសនាឥស្លាម កើតឡើងក្នុងរយៈពេលតិចជាងបីខែ។
ប្រទេសអ៊ីស្រាអែល និងប្រទេសស៊ូដង់ បានយល់ស្របគ្នាថា នឹងធ្វើឱ្យទំនាក់ទំនងរវាងប្រទេសទាំងពីរមានភាពប្រក្រតី។ ប្រទេសទាំងពីរនេះ នឹងចាប់ផ្តើមធ្វើការចរចាគ្នាអំពីកិច្ចព្រមព្រៀងកិច្ចសហប្រតិបត្តិការក្នុងវិស័យកសិកម្ម សេដ្ឋកិច្ច ពាណិជ្ជកម្ម អាកាសចរណ៍ បញ្ហាអន្តោប្រវេសន៍ និងវិស័យឯទៀតៗ ដើម្បីអត្ថប្រយោជន៍ទៅវិញទៅមក។
កិច្ចព្រមព្រៀងសន្តិភាពជាប្រវត្តិសាស្ត្រនេះ មានឡើងក្រោយកិច្ចព្រមព្រៀងស្រដៀងគ្នារវាងប្រទេសអ៊ីស្រាអែល និងប្រទេស Emirates អារ៉ាប់រួម និងប្រទេសបារ៉ែន។ ការពង្រីកកិច្ចព្រមព្រៀង Abraham ដោយមានរួមបញ្ចូលប្រទេសស៊ូដង់ ជាជំហានសំខាន់មួយដែលនឹងបង្កើតឱកាសសម្រាប់ប្រទេសស៊ូដង់ និងប្រទេសអ៊ីស្រាអែលឱ្យកែលម្អជីវភាពនៃប្រជារាស្ត្រពួកគេ នៅពេលពង្រឹងសន្តិសុខនៃប្រទេសទាំងពីរនេះផងដែរ។
ជាការពិតជាច្រើនទសវត្សរ៍មកហើយ ប្រទេសស៊ូដង់ឋិតក្នុងស្ថានភាពមានសង្គ្រាមជាមួយប្រទេសអ៊ីស្រាអែល ហើយបានធ្វើពហិកាទំនិញអ៊ីស្រាអែល។ នៅក្រោយសង្គ្រាម៦ថ្ងៃ កាលពីឆ្នាំ១៩៦៧ សម្ព័ន្ធអារ៉ាប់ បានប្រជុំគ្នានៅក្នុងក្រុង Khartoum ដែលនៅទីនោះ ពួកគេបានចេញផ្សាយសេចក្តីថ្លែងការណ៍ Three No’s ដែលថា គ្មានសន្តិភាព គ្មានការទទួលស្គាល់ប្រទេសអ៊ីស្រាអែល និងគ្មានការចរចាជាមួយប្រទេសនេះទេ។
ការណ៍នេះ បានផ្លាស់ប្តូរហើយ ដូចដែលលោក Jared Kushner ទីប្រឹក្សាជាន់ខ្ពស់របស់ប្រធានាធិបតីបានកត់សម្គាល់ថា៖ «យើងមានសមិទ្ធផលបី នៅពេលប្រធានាធិបតី Trump កាន់តំណែងគឺ៖ យើងមានសន្តិភាព យើងមានការទទួលស្គាល់ប្រទេស Israel និងយើងមានកិច្ចចរចាដើម្បីឱ្យមានសន្តិភាពថែមទៀត»។
លោកប្រធានាធិបតី Trump បាននិយាយថា នៅក្រោយការរស់នៅច្រើនទសវត្សរ៍ក្រោមរបបផ្តាច់ការឥស្លាមនិយមឃោរឃៅ ដែលគាំទ្រភេរវកម្ម ប្រជារាស្ត្រនៃប្រទេសស៊ូដង់មានរដ្ឋាភិបាលថ្មីមួយ ដែលមានគោលនយោបាយថ្មីៗ។ លោកបានថ្លែងថា៖
«រដ្ឋាភិបាលអន្តរកាលនៃប្រទេសស៊ូដង់ បានបង្ហាញការប្តេជ្ញារបស់ខ្លួនដល់ការប្រយុទ្ធប្រឆាំងនឹងភេរវកម្ម បង្កើតសេដ្ឋកិច្ចផ្សារសេរី និងអភិវឌ្ឍស្ថាប័នប្រជាធិបតេយ្យ។ កិច្ចព្រមព្រៀងនៅថ្ងៃនេះ មានបន្ថែមលើការប្តេជ្ញាទាំងនោះ ហើយកំណត់ពេលមានការផ្លាស់ប្តូរនៅក្នុងប្រវត្តិសាស្ត្រនៃប្រទេសស៊ូដង់។
សហរដ្ឋអាមេរិក ស្វាគមន៍ការជឿនលឿនសំខាន់នេះ ហើយប្រុងប្រៀបគាំទ្រប្រជារាស្ត្រនៃប្រទេសស៊ូដង់នៅពេលពួកគេធ្វើការដើម្បីកសាងអនាគតល្អជាងមុនសម្រាប់ពួកគេផ្ទាល់ និងមនុស្សជំនាន់ក្រោយៗទៀត។
ដោយសារកិច្ចព្រមព្រៀងសន្តិភាពថ្មីបីនេះ មជ្ឈិមបូព៌ា និងទ្វីបអាហ្វ្រិកមានការផ្លាស់ប្តូរខាងភូមិសាស្ត្រនយោបាយសំខាន់មួយ។ នៅពេលដែលប្រទេសច្រើនជាងមុន រៀបចំឱ្យមានទំនាក់ទំនងធម្មតាជាមួយប្រទេសអ៊ីស្រាអែល តំបន់នោះនឹងមានស្ថិរភាព មានសន្តិសុខ និងភាពសំបូររុងរឿងជាងមុន។
សហរដ្ឋអាមេរិក នឹងបន្តឈរជាមួយប្រជារាស្ត្រនៃតំបន់នោះ នៅពេលពួកគេធ្វើការដើម្បីអនាគតមួយភ្លឺស្វាង និងប្រកបដោយសេចក្តីសង្ឃឹមច្រើនជាងមុន៕
