តទៅនេះ គឺជាបទវិចារណកថាដែលឆ្លុះបញ្ចាំងអំពីទស្សនៈរបស់រដ្ឋាភិបាលសហរដ្ឋអាមេរិក
ជម្លោះរវាងកងកម្លាំងពិសេសនៃតំបន់ Tigray និងកម្លាំងការពារជាតិអេត្យូពីដែលបានចាប់ផ្តើមនៅតំបន់ Tigray ភាគខាងជើងប្រទេសអេត្យូពីកាលពីថ្ងៃទី៤ ខែវិច្ឆិកា បានសម្លាប់ប្រជាជនអេត្យូពីរាប់រយនាក់ និងបាននាំឲ្យមនុស្សរាប់ពាន់នាក់ផ្លាស់ទីលំនៅ។
ការប្រយុទ្ធគ្នានេះ គឺជាលទ្ធផលនៃការដណ្តើមអំណាចដោយផ្អែកលើខ្សែស្រឡាយជាតិសាសន៍រវាងរបបចាស់ និងរបបមួយដែលបានជាប់ឆ្នោតឡើងកាន់អំណាចកាលពីពីរឆ្នាំមុន ដែលកំពុងដកខ្លួនឆ្ងាយពីអតីតរបៀបដឹកនាំផ្តាច់ការនៅប្រទេសនេះដែលផ្តោតលើភាពខុសគ្នារបស់ជនជាតិ ហើយកំពុងធ្វើការឆ្ពោះទៅរៀបចំកំណែទម្រង់នយោបាយ និងសេដ្ឋកិច្ចបែបប្រជាធិបតេយ្យដ៏ធំធេងដែលផ្តោតលើអត្តសញ្ញាណជាតិអេត្យូពី។
លោក Tibor Nagy ឧបការីរដ្ឋមន្ត្រីការបរទេសទទួលបន្ទុកកិច្ចការអាហ្វ្រិកថ្លែងថា៖«នេះមិនមែនជាការប្រយុទ្ធគ្នារវាងរដ្ឋអធិបតេយ្យពីរទេ។ នេះ ជាបក្ខពួករបស់រដ្ឋាភិបាលដែលកំពុងគ្រប់គ្រងតំបន់មួយនៅក្នុងប្រទេសអេត្យូពី ដែលបានសម្រេចចិត្តបង្កប្រទុស្តរាយប្រឆាំងរដ្ឋាភិបាលកណ្តាល»។
នៅក្នុងការនិយាយតាមទូរស័ព្ទនាពេលថ្មីៗនេះជាមួយលោក Abiy Ahmed នាយករដ្ឋមន្រ្តីអេត្យូពី លោក Mike Pompeo រដ្ឋមន្រ្តីក្រសួងការបរទេសសហរដ្ឋអាមេរិក បានអំពាវនាវឱ្យបញ្ចប់ទាំងស្រុងនូវការប្រយុទ្ធគ្នា និងអំពាវនាវឱ្យមានការសន្ទនាប្រកបដោយលក្ខណៈស្ថាបនាដើម្បីដោះស្រាយវិបត្តិនេះ។ លោកបាននិយាយសង្កត់ធ្ងន់អំពីឆន្ទៈរបស់សហរដ្ឋអាមេរិក ប្រេសិតសហភាពអាហ្វ្រិក និងដៃគូអន្តរជាតិដទៃទៀតដើម្បីជួយក្នុងការសន្ទនា និងការផ្សះផ្សាគ្នា។
ជាអកុសល មានរបាយការណ៍គួរឱ្យទុកចិត្តដែលថា ជនស៊ីវិលត្រូវបានគេយកជាគោលដៅ និងវាយប្រហារដោយពួកយុទ្ធជន។
លោកឧបការីរដ្ឋមន្ត្រីការបរទេស Tibor Nagy និយាយថា៖ «យើងជំរុញឱ្យមានការស៊ើបអង្កេតឯករាជ្យលើរាល់របាយការណ៍នៃអំពើសម្លាប់រង្គាល និងការវាយប្រហារជនស៊ីវិល។ អ្នកប្រព្រឹត្ត ត្រូវតែទទួលខុសត្រូវចំពោះមុខច្បាប់»។
នៅថ្ងៃទី២៨ ខែវិច្ឆិកា រដ្ឋាភិបាលអេត្យូពី បានប្រកាសពីការបញ្ចប់ប្រតិបត្តិការយោធាសំខាន់ៗនៅ តំបន់ Tigray។ ទោះយ៉ាងណា ការប្រយុទ្ធគ្នានៅតែបន្តកើតមាននៅតាមកន្លែងផ្សេងៗនៅជុំវិញ Mekele រដ្ឋធានី Tigray ហើយមានការប្រយុទ្ធគ្នាម្តងម្កាលនៅក្នុងរដ្ឋក្នុងតំបន់។
ជនជាតិអេត្យូពីជាច្រើនដែលត្រូវបានផ្លាស់ទីលំនៅដោយការប្រយុទ្ធគ្នា កំពុងចាកចេញពីស្រុកកំណើត និងឆ្លងកាត់ព្រំដែនចូលប្រទេសស៊ូដង់។ សហរដ្ឋអាមេរិកកំពុងទាក់ទងយ៉ាងជិតស្និទ្ធជាមួយមន្រ្តីអង្គការមនុស្សធម៌ក្នុងស្រុក និងអន្តរជាតិទាក់ទងនឹងផែនការរបស់ពួកគេ ជួយជនភៀសខ្លួនជាង៤៥.០០០នាក់ដែលបានភៀសខ្លួនចេញពីជម្លោះនេះ។
ក្នុងការសន្ទនាតាមទូរស័ព្ទរបស់លោកជាមួយនាយករដ្ឋមន្រ្តីអេត្យូពី លោករដ្ឋមន្រ្តីការបរទេស Pompeo ក៏បានគូសបញ្ជាក់ពីសារៈសំខាន់នៃការការពារជនស៊ីវិលពីគ្រោះថ្នាក់បន្ថែមទៀតរួមទាំងជនភៀសខ្លួន និងជនស៊ីវិលដែលភៀសខ្លួនចេញពីជម្លោះចូលក្នុងប្រទេសស៊ូដង់។ លោកបាននិយាយសង្កត់ធ្ងន់អំពីភាពចាំបាច់ក្នុងការអនុញ្ញាតឱ្យអង្គការមនុស្សធម៌អន្តរជាតិ ចូលទៅកាន់តំបន់ Tigray ដើម្បីធានាកុំឲ្យមានការរំខានដល់ការដឹកជំនួយមនុស្សធម៌ រួមមានប្រេងឥន្ធនៈ ស្បៀងអាហារនិងគ្រឿងផ្គត់ផ្គង់វេជ្ជសាស្ត្រដល់អ្នកដែលខ្វះខាត។
សហរដ្ឋអាមេរិក នៅជាមួយប្រជាជនអេត្យូពី ហើយនឹងធ្វើការជាមួយមនុស្សទាំងអស់ដែលប្តេជ្ញាចិត្តកសាងសន្តិភាព វិបុលភាព ប្រជាធិបតេយ្យ និងនីតិរដ្ឋ៕