តទៅនេះ គឺជាបទវិចារណកថាដែលឆ្លុះបញ្ចាំងពីទស្សនៈរបស់រដ្ឋាភិបាលសហរដ្ឋអាមេរិក
បើតាមលោក Robert Martini អគ្គនាយកគណៈកម្មាធិការកាកបាទក្រហមថា នៅពេលដែលសេវាទឹកត្រូវបានបង្អាក់ ឬបំផ្លាញដោយសារសង្គ្រាម ផលវិបាកខាងមនុស្សធម៌មានសភាពធ្ងន់ធ្ងរនិងធំធេងណាស់។ បញ្ហានេះកើតមានឡើងដោយសារសេវាទឹកមានការពាក់ព័ន្ធគ្នា។ វាមិនមែនគ្រាន់តែទាក់ទិននឹងការផ្តល់ទឹកនិងអនាម័យប៉ុណ្ណោះទេ វាក៏អាចទាក់ទិននឹងការមានទឹក ការជួសជុល ការផ្លាស់ប្ដូរគ្រឿងបន្លាស់ និងក្រុមបុគ្គលិកចាំបាច់ដើម្បីធ្វើការងារនេះផងដែរ ហើយមិនត្រូវមានឧបសគ្គរារាំងមិនឱ្យធ្វើការនេះបានដោយសារសង្គ្រាមនោះទេ។
អ្នកតំណាងរងស្តីទីរបស់ស.រ.អ.ប្រចាំអ.ស.ប. លោក Jeffrey DeLaurentis បាននិយាយថា៖ «ការសិក្សាស្រាវជ្រាវមួយកាលពីឆ្នាំ ២០២២ ដោយសាកលវិទ្យាល័យ California នៅទីក្រុង Los Angeles បានស្ទង់ប្រមាណថា ជិតពាក់កណ្តាលប្រជាជននៅទូទាំងពិភពលោកនឹងរងគ្រោះធ្ងន់ធ្ងរដោយសារកង្វះទឹកមិនហួសពីឆ្នាំ២០៣០»។ លោកបានថ្លែងថា ទោះជាបុព្វហេតុនៃវិបត្តិនេះមានច្រើនក៏ដោយ ក៏សង្គ្រាមនិងការប្រែប្រួលអាកាសធាតុជាកត្តាជំរុញធំៗពីរផងដែរ។ លោកបានថ្លែងទៀតថា៖ «សម្រាប់ក្រុមជនដែលរស់ក្នុងតំបន់មានសង្គ្រាម ការគ្មានទឹកនិងអនាម័យមានផលវិបាកធ្ងន់ធ្ងរ»។
លោក DeLaurentis បាននិយាយថា៖ «យើងឃើញកាន់តែច្រើនឡើងៗអំពីផលប៉ះពាល់ដែលអសន្តិសុខទឹកត្រូវជំរុញដោយសង្គ្រាមមានទៅលើការផ្លាស់ប្តូរកន្លែងរស់នៅ និងអំពើហិង្សាខាងយេនឌ័រ។ នៅក្នុងសង្គ្រាមខ្លះកងកម្លាំងប្រដាប់អាវុធបានធ្វើឱ្យខូចខាតហេដ្ឋារចនាសម្ព័ន្ធទឹក និងគ្រប់គ្រងការចូលទៅកាន់ប្រភពក្បាលទឹក»។
លោកឯកអគ្គរដ្ឋទូត DeLaurentis បានផ្តល់ឧទាហរណ៍មួយនៃការខ្ទេចខ្ទីបណ្តាលមកពីការវាយប្រហាររបស់រុស្ស៊ីក្នុងប្រទេសអ៊ុយក្រែន។
លោកបាននិយាយថា៖ «នៅក្នុងប្រទេសអ៊ុយក្រែន កងកម្លាំងរុស្ស៊ីបានវាយប្រហារលើហេដ្ឋារចនាសម្ព័ន្ធទឹក ហើយបានបណ្តាលឱ្យជនជាតិអ៊ុយក្រែនជាង១១លាននាក់ គឺស្មើនឹងមួយភាគបួននៃប្រជាជនអ៊ុយក្រែនសរុបគ្មានទឹកស្អាតប្រើប្រាស់។ សកម្មភាពនេះហួសពីអំពើឃោរឃៅទៅទៀត»។
ប្រទេសរុស្ស៊ីនៅតែបន្តវាយប្រហារប្រព័ន្ធទឹករបស់អ៊ុយក្រែន មានរួមតំបន់មានវាលភក់ដែលជួយធ្វើឱ្យទឹកស្អាត។ លោកឯកអគ្គរដ្ឋទូត DeLaurentis បាននិយាយថា៖
«ស.រ.អ.ទទួលស្វាគមន៍ការអនុម័តសេចក្តីសម្រេចចិត្តមួយតាមរយៈអនុសញ្ញា Ramsar ដែលអំពាវនាវដល់រុស្ស៊ីឱ្យបញ្ឈប់ការរំលោភដែលរារាំងអ៊ុយក្រែនមិនឱ្យការពារ ធ្វើឱ្យមានឡើងវិញ និងប្រើប្រាស់វាលភក់របស់ផងខ្លួន»។
លោក DeLaurentis បានប្រសាសន៍ថា៖ «យើងដឹងថា ការខ្វះខាតទឹកអាចនាំឱ្យមានការផ្តើម ឬបង្កើនជម្លោះរវាងសហគមន៍ រវាងក្រុមមនុស្សនានា ឬរវាងរដ្ឋ។ ហើយយើងដឹងថា អាកាសធាតុអាក្រក់ មានរួមទឹកជំនន់និងភាពរាំងស្ងួត មានផលប៉ះពាល់លើលទ្ធភាពសហគមន៍ងាយរងគ្រោះក្នុងការផលិតស្បៀងអាហារតាមវិធីដែលពួកគេបានផលិតជាច្រើនជំនាន់មកហើយ»។
កាលពីពេលថ្មីៗនេះ ស.រ.អ.បានប្រកាសអំពីការប្តេជ្ញាធ្វើវិនិយោគរហូតដល់៤៩ពាន់លានដុល្លារក្នុងវិស័យធ្វើឱ្យមានទឹកស្មើគ្នា មានទឹកដែលធន់នឹងការប្រែប្រួលអាកាសធាតុបាន និងខាងអនាម័យនៅក្នុងប្រទេសនិងនៅទូទាំងពិភពលោក។
លោកឯកអគ្គរដ្ឋទូត DeLaurentis បាននិយាយថា តែទោះជាយ៉ាងណាក៏ដោយ «ក៏គ្មាននរណាម្នាក់អាចធ្វើការនេះតែឯកឯងបានដែរ។ ការដោះស្រាយបញ្ហាអសន្តិសុខទឹកតម្រូវឱ្យមានកិច្ចសហប្រតិបត្តិការជាសាកល។ យើងមានកាតព្វកិច្ចដោះស្រាយបញ្ហាខ្វះទឹកដែលនាំឱ្យមានជម្លោះនិងបង្អាក់ដល់សន្តិភាពនិងសន្តិសុខថែមទៀតផង»។
លោកបានថ្លែងបន្ថែមទៀតថា៖ «មនុស្សត្រូវការទឹក។ ដូច្នេះ សន្តិភាពមានន័យថា ទឹក។ វាជាការងាយស្រួលយល់បែបនេះឯង»៕
