Accessibility links

Breaking News

ບົດບັນນາທິການ: ສະໜັບສະໜຸນໃຫ້ພວກກໍ່ລັດຖະປະຫານໃນມຽນມາ ເປັນຜູ້ຮັບຜິດຊອບ


ມຽນມາ

ບົດບັນນາທິການ ທີ່ສະທ້ອນເຖິງນະໂຍບາຍ ຂອງລັດຖະບານສະຫະລັດ

ໃນຮອບຫ້າອາທິດທີ່ຜ່ານມານີ້ ປະຊາຊົນຊາວມຽນມາ ໄດ້ພາກັນລົງສູ່ຖະໜົນຫົນທາງ ເພື່ອທຳການປະທ້ວງດ້ວຍຄວາມສະຫງົບ ແລະສະແດງອອກເຖິງຄວາມມຸ່ງມາດປາຖະໜາຂອງພວກເຂົາເຈົ້າທີ່ຢາກຈະກັບຄືນໄປສູ່ລັດຖະບານທີ່ຖືກເລືອກຢ່າງເປັນປະທາທິປະໄຕ ມີສິດທິມະນຸດ ອິດສະຫຼະພາບຂັ້ນພື້ນຖານ ໃນການໂຮມຊຸມນຸມແບບສັນຕິແລະສະແດງອອກຊຶ່ງຄວາມຄິດຄວາມເຫັນແລະການປົກຄອງດ້ວຍຕົວບົດກົດໝາຍ. ເພື່ອເປັນການຕອບໂຕ້ກຳລັງຮັກສາຄວາມສະຫງົບຂອງມຽນມາ ຊຶ່ງໄດ້ຮັບຄຳສັ່ງຈາກຜູ້ບັງຄັບບັນຊາ ໄດ້ຈັບກຸມຄຸມຂັງແບບບໍ່ເປັນທຳ ແລະໂຈມຕີພວກປະທ້ວງ ທີ່ບໍ່ມີອາວຸດ ພ້ອມທັງພວກນັກຂ່າວຢ່າງໂຫດຮ້າຍປ່າເຖືອນແລະສັງຫານຢ່າງໜ້ອຍ 126 ຄົນ ນັບແຕ່ໄດ້ມີການກໍ່ລັດຖະປະຫານເມືອວັນທີ 1 ກຸມພາຜ່ານມາ.

ທ່ານແອນໂທນີ ບລິງເກັນ ລັດຖະມົນຕີການຕ່າງປະເທດ ສະຫະລັດ ກ່າວວ່າ “ພວກເຮົາຂໍປະນາມຕໍ່ການໂຈມຕີທີ່ໜ້າຢ້ານກົວເຫຼົານີ້. ພວກເຮົາຂໍປະນາມ ຕໍ່ການຈັບກຸມທີ່ຍັງດຳເນີນຢູ່ຕໍ່ມາ ແລະການຄຸມຂັງຜູ້ນຳທາງການເມືອງ ທ່ານໝໍ ພວກປົກປ້ອງສິດທິມະນຸດ ພວກນັກຂ່າວ ຜູ້ນຳກຳມະບານ ແລະປະຊາຊົນທຳມະດາສາມັນທີ່ຊົມໃຊ້ສິດທິຂອງພວກເຂົາເຈົ້າຫຼາຍກວ່າ 1,700 ຄົນແລະພວກເຮົາຂໍປະນາມຜູ້ນຳທະຫານ ທີ່ໄດ້ຊຸກຍູ້ໃຫ້ເກີດຄວາມຮຸນແຮງຕໍ່ປະຊາຊົນຂອງຕົນ.”

ສະຫະລັດໄດ້ຕັດສິນໃຈທີ່ຈະເອົາບາດກ້າວເພີ້ມຕື່ມເພື່ອຊຸກຍູ້ໃຫ້ມີຄວາມຮັບຜິດຊອບຂອງພວກທີ່ກໍລັດຖະປະຫານ ແລະຈະແນເປົ້າໝາຍ ໃສ່ພວກທີ່ໄດ້ຮັບຜົນປະໂຫຍດທາງດ້ານການເງິນໃນການພົວພັນຂອງພວກເຂົາກັບອຳນາດການປົກ ຄອງທະຫານ. ລັດຖະມົນຕີການຕ່າງປະເທດບລິງເກັນໄດ້ປະກາດວ່າສະຫະລັດໄດ້ລະບຸຊື່ລູກຊາຍ 2 ຄົນຂອງຜູ້ບັນຊາການທະຫານສູງສຸດ ນາຍພົນມິນ ອອງ ລາຍ ຄື ທ້າວອອງ ເປ ຊອນ ແລະທ້າວຄິນ ທິຣີ ເທັດ ມອນ ພ້ອມກັບອີກ 6 ອົງການທີ່ເປັນເຈົ້າຂອງ ຫຼືບໍ່ກໍຄວບຄຸມໂດຍບຸກສ່ວນຄົນເຫຼົ່ານີ້ ເພື່ອໃຫ້ເປັນໄປຕາມດຳລັດເລກທີ 14014.

ທ້າວອອງ ເປ ຊອນ ແລະທ້າວຄິນ ທິຣີ ເທັດ ມອນ ໄດ້ໃຊ້ຄວາມສຳພັນຂອງພວກເຂົາກັບຜູ້ບັນຊາການທະຫານສູງສຸດ ມາເປັນເວລາດົນນານແລ້ວເພື່ອສ້າງຮັ່ງຄູນມີໃຫ້ແກ່ຕົນເອງ. ລັດຖະມົນຕີການຕ່າງປະເທດບລິງເກັນກ່າວວ່າ “ພວກຜູ້ນຳໃນການກໍ່ລັດຖະປະຫານແລະສະມາຊິກທີ່ໃຫຍ່ແລ້ວໃນຄອບຄົວຂອງພວກເຂົາ ບໍ່ຄວນທີ່ຈະສາມາດສືບຕໍ່ໄດ້ຮັບຜົນກຳໄລຈາກອຳນາດການປົກຄອງໃນຂະນະທີ່ມັນໃຊ້ຄວາມຮຸນແຮງ ແລະເສີມຂະຫຍາຍການກົດດັນ ຕໍ່ປະຊາທິປະໄຕຢູ່ນັ້ນ.”

ລັດຖະມົນຕີການຕ່າງປະເທດບລັງເກັນກ່າວຕື່ມວ່າ “ພວກເຮົາຈະສືບຕໍ່ເຮັດວຽກຮ່ວມກັບກຸ່ມພັນທະມິດແລະພາຄີສາກົນ ໃນຂອບເຂດທີ່ກວ້າງຂວາງ ເພື່ອຊຸກຍູ້ໃຫ້ມີຄວາມຮັບຜິດຊອບໂດຍພວກຜູ້ນຳໃນການກໍ່ລັດຖະປະຫານ ຄວາມຮັບຜິດ ຊອບເຫຼົ່ານັ້ນສຳລັບຄວາມຮຸນແຮງນີ້ ແລະການລ່ວງລະເມີດອື່ນໆ ແລະພວກທີ່ໄດ້ຮັບຜົນປະໂຫຍດ ທາງດ້ານການເງິນ ຈາກອຳນາດການປົກຄອງ ນຳດ້ວຍ.” ການລົງໂທດເຫຼົ່ານີ້ແມ່ນແນໃສ່ພວກທີ່ຮັບຜິດຊອບໃນການກໍ່ລັດຖະປະຫານ ບໍ່ແມ່ນຕໍ່ປະຊາຊົນຊາວມຽນມາ.

ສະຫະລັດຂໍຮຽກຮ້ອງໃຫ້ປະຊາຄົມນາໆຊາດອອກມາກ່າວເປັນສຽງດຽວກັນເພື່ອສະໜັບສະໜຸນຕໍ່ປະຊາຊົນຊາວມຽນມາ ເຖິງແມ່ນໄດ້ຮັບຄວາມຮຸນແຮງທີ່ກໍ່ຂຶ້ນໂດຍກຳລັງຮັກສາຄວາມສະຫງົບຂອງມຽນມາກໍຕາມແຕ່ກໍຍັງສືບຕໍ່ສະແດງອອກໃຫ້ເຫັນເຖິງຄວາມກ້າຫານແລະການຕັດສິນໃຈທີ່ເດັດດ່ຽວໃນຄວາມພະຍາຍາມຂອງພວກເຂົາເຈົ້າທີ່ຈະປະຕິເສດຕໍ່ການເຮັດລັດຖະປະຫານຂອງພວກທະຫານ.

ລັດຖະມົນຕີການຕ່າງປະເທດບລິງເກັນໄດ້ຮຽກຮ້ອງໃຫ້ “ພວກທະຫານຟື້ນຟູລັດ ຖະບານ ທີ່ຖືກເລືອກ ຕາມແນວທາງປະຊາທິປະໄຕ ຢຸດເຊົາທຸກການໂຈມຕີ ຕໍ່ພວກປະທ້ວງແບບສັນຕິ ໃຫ້ປ່ອຍພວກທີ່ຖືກຄຸມຂັງຢ່າງບໍ່ເປັນທຳທັງໝົດ ແລະຢຸດເຊົາທຸກການໂຈມຕີ ແລະການຂົ່ມຂູ່ ຕໍ່ພວກນັກຂ່າວ ລັດຖະກອນແລະພວກນັກເຄື່ອນໄຫວ ໃນທັນທີ.

XS
SM
MD
LG